མེ་ཐིའུ 14

ཁྲུས་གསོལ་གནང་ཁན་ཆ་ཡེ་ ཡོ་ཧ་ནཱན་བསུད་པའི་སྐོར་ནས།

(མཱརཀ 6:14-29; ལུཀ 9:7-9)

1དུས་ཚོད་འོ་སོ་སྐབས་ན་ ལུང་ཕྱོགས་ ག་ལི་ལི་གི་དཔོན་ ཧེ་རཱོད་ཀྱིས་ ཡེ་ཤུ་གི་སྐོར་ནས་ཉན་གསན་ཇི 2ཁྱི་རང་གི་ཕྱག་ཞུ་ཁན་ཆ་ཡི་ ཨ་སོ་མི་ཆ་ཡི་ཁྲུས་གསོལ་བྱིན་ཁན་ཆ་ཡི་ ཡོ་ཧ་ནཱན་ཡོན་ད་ ཁྱི་ཤི་ས་ནས་ཡང་ཇི་ དེ་ལོ་བུ་ཇི་ཡང་ཇི་ ཁྱི་དོ་རྫུ་འཕྲུལ་ལེ་ཤ་ཆོང་ཆུ་མེ་ལ་དབང་ཤུགས་ན་ཁེ་ཡོན་ད་བུ་ཇི་གསུང་ན།

3ཧེ་རཱོད་ཀྱིས་ ན་རོ་ཁྱི་རའི་སྐུ་མཆད་ ཕི་ལིབ་ཀྱི་ལྕམ་ ཧེ་རཱོད་ཡཱས་ཀྱི་དོན་ན་ བཀའ་གནང་ཇི་ ཡོ་ཧ་ནཱན་བཟུང་ཇི་ དམ་ཇི་བཙོན་ཁང་ནང་སོ་ཇི་བླེ་ན། 4ཞ་བོ་བུ་ནང་ནས་ ཡོ་ཧ་ནཱན་གྱིས་དཔོན་ན་ ཧ་རཱོད་ཡཱས་ ཆོང་ངེ་བཞེས་མི་ཆོག་བུ་ཇི་ན་རོ་ཞུ་ས་ཡོན་ད། 5ཆར་ཇི་བུ་ཇི་ ཧེ་རཱོད་ཀྱིས་ ཡོ་ཧ་ནཱན་བསུད་མེ་ལ་བུ་ན་ ཁྱི་མི་སེར་ནང་གཟིགས་ཏེ་ དིག་ན་ ཞ་བོ་བུ་ནང་ནས་ མི་སེར་གྱི་ ཡོ་ཧ་ནཱན་ཆ་ཡི་ལུང་སྟོན་པ་ཆ་བླེག་པ་ཡོན་ད།

6ཆོད་ནས་ ཧེ་རཱོད་ཀྱི་འཁྲུངས་སྐར་ལུ་ ཧེ་རཱོད་ཡཱས་ཀྱི་སྲས་མོ་ ཁྱི་ཡི་སྐུ་མདུན་ན་ཞབས་ཁྲ་ཕུལཝ་ད་ ཧེ་རཱོད་གནམ་མེད་ས་མེད་ཐུགས་ནེ་ན། 7སྲསམོ་ཆ་ཡི་ན་ མོ་རའི་ཡུམ་གྱིས་ཨ་ཇི་ར་ཞ་ཇུ་སང་ བྱོན་མེ་ལ་ཡོན་བུ་ཇི་མནའ་བཞེས་ན།

8སྲསམོ་ཆར་ཇི་ ཁྱི་ར་ཡུམ་གྱིས་གསུངས་པའི་ཅོག་སར་ ང་དོ་ཁྲུས་གསོལ་བྱིན་ཁན་ཆ་ཡི་ ཡོ་ཧ་ནཱན་གྱི་མགུ་ཡོང་ཏུབ་ཇི་ པེ་དར་ནང་ངོ་སོ་ཇི་ གནང་ང་ཡི་བུ་ཇི་ཞུ་ན།

9ཆར་ཇི་བུ་ཇི་ཧེ་རཱོད་ཐུགས་མ་མཉེས་ན་སང་ ཁྱི་ར་གི་ངོས་གི་གདོང་ངོ་ ཁྱི་ར་མནའ་བཞེས་པ་ཆར་ཇི་ མོ་གིས་ཇ་གནང་ང་ཡི་བུ་ཇི་ས་དེ་ བུལ་བུ་ཇི་བཀའ་གནང་ན། 10ཆོད་ནས་ དམག་མི་གི་ བཙོན་ཁང་ནང་ག་ཡི་བུ་ཇི་ ཡོ་ཧ་ནཱན་གྱི་མགུ་ཡོང་ཏུབ་ཇི 11ཡོ་ཧ་ནཱན་གྱི་མགུ་ཡོང་ པེ་དར་ནང་སོད་བུ་ཇི་འོ་ཇི་ སྲསམ་ཆ་ཡི་ནང་གནང་ན་ སྲསམོ་ཆར་ཇི་འབག་ཇི་ ཁྱི་རང་གི་ཡུམ་ན་ཕུ་ཡི་ན། 12ཆོད་ནས་ ཡོ་ཧ་ནཱན་གྱི་སློབ་མ་ར་ཇི་ ཁྱི་གི་ཕུམ་ཆ་ཡི་ཐུམ་ཇི་ དབང་ནང་སོར་ཇི་ ཁྱི་ཡེ་ཤུ་གི་སྐུ་མདུན་ན་བཅར་ཇི་ ལོ་རྒྱུས་ཆ་ཡི་ཞུ་ན།

མི་སྟོང་ཕྲག་ཡ་ང་ནང་ལྟོ་ཁ་གནང་པའི་སྐོར་ནས།

(མཱརཀ 6:30-44; ལུཀ 9:10-17)

13ཡེ་ཤུ་གི་གནས་ཚུལ་ཆ་ཡི་ནཝ་ཀོ་མ་ ཁྱི་འོ་སོར་ནས་བྱོན་མ་ གྲུ་ཡི་ནང་འཛུལ་ཇི་ རི་ཙག་ས་རོ་བྱོན་ན་ མི་དམངས་ཀྱི་ཡེ་ཤུ་རི་ཙག་ས་ལོ་རྒྱུས་གོ་ཇི་ བོད་ཁྲོམ་ནས་བྱོང་བྱི་ མཚོ་བའི་ངོད་པ་ནང་ཁག་ཏོ་ རྐང་ཐང་བུ་ཇི་ ཁྱི་བྱུ་ཉོག་ཇི་ག་ཡི་ན། 14ཁྱི་གྲུ་ནང་ནས་ བྱོང་བྱི་ ཡོ་སོ་ བྱོན་མ་ མི་ད་ས་ང་གཟིགས་ཇི་ ཐུགས་ཁར་སྙིང་རྫེ་ར་ན་ ནད་པ་ད་ས་ང་ནང་དྲག་ཇི་གནང་ན།

15ཆོད་ནས་ཉིན་ནུབ་མེ་ལ་བུ་མ་ སློབ་མ་ད་ས་ང་ཁྱི་ནག་ས་རོ་ཅར་ཇི་ ནམ་སྲུན་མེ་ལ་བུ་ས་ ཨོ་སོ་རི་ཙག་ས་རོ་ཞང་མི་ཉང་ད་ རྐོང་ནང་ངོ་བཞེས་སྒོ་ཉེ་ཇི་ མི་དམང་ནང་པླེད་ན་བུ་ཇི་ཞུ་ན།

16ཡེ་ཤུ་གི་ལན་ན་ བོད་ག་ཡི་མི་དགོ་ བོ་དོ་ཟུ་མེ་ལ་ཆ་ཡི་ ཡོན་ཇི་ བུལ་བུ་ཇི་གསུངམ་ན།

17བོ་ཡི་ལན་ན་ ད་ནེ་ཆ་ཁྱབ་ནང་ ནག་སང་མུ་སང་ བཅོ་ཐམ་ལེབ་ཡ་ང་ནས་ཉ་ཇོན་རྐྱང་མ་ཐེ་ན་བུ་ཇི་ཞུ་ན།

18ཆ་ཡི་ བཅོ་ཐམ་དང་ཉ་ཇོན་ཆ་ཡི་ ཆོར་དབའེ་ ཡེ་ཤུ་གི་གསུངས་ན། 19མི་དམངས་ནང་མཝ་སྤང་ནང་ཉེ་ལེ་བུ་ཇི་བཀའ་གནང་ས་ནས་ བོ་རང་བཅོ་ཐམ་ལེབ་ཡ་ང་ནས་ཉ་ཇོན་ཆ་ཡི་ ཕྱག་ན་བསྣམས་ཇི་ ཞལ་ཡརཝ་གནམ་དོ་གཟིགས་ཇི་ དཀོན་མཆོག་ནང་བཀའ་དྲིན་ཆེ་བུ་ཇི་ཞུ་ཇི་ བཅོ་ཐམ་ཐོར་ཇི་ ཁྱི་རའི་སློབ་མ་ནང་ བཅོ་ཐམ་ནས་ཉ་གནངམ་ད་ སློབ་མ་གིས་མི་དམངས་ན་སྐུ་ཡི་ཇི་བུལ་ན། 20མི་ད་ས་ང་ ཇོ་མ་ར་ངོ་ར་ཟུ་ཆར་བའི་བྱུ་ཉོག་ཇི་ ཉ་ནས་བཅོ་ཐམ་གྱི་ཐོར་མེ་ལྷན་ཇུ་དུ་མ་དཝ་ ལྟོ་བའི་ཁོམ་པ་བཅོ་ཉིས་བྱོང་ན། 21ཆ་ན་ཟུ་ཁན་ ཨ་མ་ནས་ཨོ་ང་མ་བརྩི་རུང་ ཕོ་ཇ་རྐྱང་མ་གང་ཁ་སྟོང་ཕྲག་ཡ་ང་ནག་པ་ཡོན་ད།

ཡེ་ཤུ་ཁེ་ཡི་བྱོན་ནེ་བྱོན་ད།

(མཱརཀ 6:45-52; ཡོན 6:15-21)

22ཆེ་འཕྲོ་ནས་ཡེ་ཤུ་གི་ ང་ཡི་མི་དམངས་པླེད་མེ་ལ་བར་ན་ ཡིན་སློབ་མ་ཆ་ཁྱབ་གྲུ་ནང་འཛུལ་ཇི་ ང་ཡི་ན་རོ་ར་མཚོ་བའི་ཐི་ལི་གོ་ ག་ལེ་བུ་ཇི་གསུངས་ན། 23ཆོད་ནས་མི་དམངས་ནང་པླེད་ཆར་བའི་ཤུལ་ནས་ཁཡི་ར་རྐྱང་མ་ཐེ་ ཡརཝ་གང་ན་སྨོན་ལམ་ཞུ་རུ་བྱོན་ན་ ཆོད་ནས་ནམ་སྲུན་ལ་ཁྱི་ར་ཐེག་པ་བུ་ཇི་ བཞུགས་པའི་སྐབས་ན། 24རྐྱེན་ངན་རླུང་འཚུབ་ཆ་ཡི་ཤུགས་བུ་ཇི་ར་མ་དཝ་ མཚོའི་རྦ་རླབས་བོད་སློབ་མ་འཛུལ་ཁན་ལ་གྲུ་གུ་ཇེ་མ་ གྲུ་མཚོའི་སྦུག་ས་ར་དར་ན།

25ཆོད་ནས་ངར་ཇི་ནམ་མ་ཁར་བའི་བར་དོ་ ཡེ་ཤུ་མཚོ་བའི་ཁ་ནས་ཡམ་བྱོན་བྱི་ བོད་ཉེ་ས་རོ་བྱོན་མ། 26སློབ་མ་གིས་ཁྱི་མཚོའི་ཁ་ནས་ ཚོར་བྱོན་མ་ བོ་ཡི་མཐོང་ཇི་ འོ་སོ་འདྲེ་ཡོན་ད་བུ་ཇི་ བོད་གནམ་མེད་ས་མེད་འདྲེ་ན་ ཀད་ཤོར་ན།

27ཡེ་ཤུ་གི་བོ་དོ་ ཆེ་འཕྲོ་ནས་ ཚ་གྱང་མ་ལང་ང་ཡི་ ངད་ཡོན་ འདྲེག་མི་དགོ་བུ་ཇི་གསུང་ན།

28ཆོད་ནས་པེ་ཏྲོ་གིས་ གཙོ་བོ་ལགས་ དོན་ལ་ར་ཆོ་ཡོན་ནང་ནས་ ངད་ཡང་ ཁེ་ཇ་ཡི་ནས་ཐུ་རོ་ཡམ་གོ་ཇི་ ཆོ་བཞུགས་སར་ ཤ་ཡི་བུ་ཇི་བཀའ་གནང་བུ་ཇི་ཞུ་ན།

29ཡེ་ཤུ་གིས་ཤ་ཡི་བུ་ཇི་གསུང་ན་ ཆོད་ནས་ པེ་ཏྲོ་གིས་གྲུ་ནང་ནས་ཇོང་ཇི་ ཁེ་ཇ་ཡི་ནས་ཐུ་རོ་ ཡེ་ཤུ་བཞུགས་སར་རྐང་ཐང་བུ་ཇི་ག་ཡི་མ། 30ཞེ་རློང་ཤུགས་ར་ས་མཐུང་ཇི་ བོད་འདྲེགས་ན་ ཆོད་ནས་ཁྱི་ཆུ་ནང་ཐིམ་ཇི་བུ་མ་ ཁོ་སྐད་ཤོར་ཇི་ གཙོ་བོ་ང་དོ་སྐྱབས་མཛད་གནང་ང་ཡི་བུ་ཇི་ཞུ་ན།

31ཡེ་ཤུ་གི་ཆེ་འཕྲོ་ནས་ ཁྱི་རང་ཕྱག་ཁྱི་ར་བསྣར་ཇི་ པེ་ཏྲོ་ནང་ཇོང་བྱི་ དབའི་དད་པ་ཆུང་ཀུ་ལ་མི་ཡོད་ ཞ་བུ་ཇི་ཐེ་ཚོམ་བསྐྱེད་ཏ་ཡ་བུ་ཇི་གསུངས་ན།

32བོད་ཇོན་གྲུ་ནང་ལོག་བྱོན་མ་ རླུང་འཚུབ་ཆེ་ཡང་ཞི་བར་ཇོང་ན། 33ཆོད་ནས་བོད་གྲུ་ནང་ན་ཁན་མི་ཆར་ཇི་ ཆོ་དོན་ལས་རང་དཀོན་མཆོག་གི་སྲས་ཡོན་ད་བུ་ཇི་ ཕྱག་འཚལ་ཇི་ བསྟོད་པ་ཕུ་ཡི་ན།

ཡེ་ཤུ་གི་གེ་ནེ་ས་རཱེད་ནང་དྲག་མཛད་ནག་པའི་སྐོར།

(མཱརཀ 6:53-56)

34བོད་མཚོ་ཁིམ་ཇི་ ཐི་ལི་གོ་བྱོན་མ་ གེ་ནེ་ས་རཱེད་བུ་ཇི་ནང་ ཕེབས་ན། 35ཁོ་ཆེ་ནང་འབྱོནམ་ད་ མི་ཚུ་གི་ངོ་བརན་དེ་ བོ་ཡི་ས་གནས་ཆེ་ན་ ད་ས་ང་ བོ་ཡི་ དར་ཡོད་ན་ལ་བུ་ན་ མི་ད་ས་ང་གི་ནད་པ་ཁྱི་ནག་ས་རོ་ དྲག་གོ་བུལ་བུ་ཇི་ འབག་ཇི་ར་ན། 36ནད་པ་ད་ས་ང་གི་ ཁྱི་ཡི་ན་བཟའ་ངོད་པ་ངོན་སང་ ཇོང་ང་ཡི་བུ་ཇི་གསུངས་ན ཆ་ཡི་ཅོག་སར་བུ་ཇི་ ན་བཟའ་ངོད་པ་རོ་ ཇོང་ཁན་ཆ་ཁྱབ་ ད་ས་ང་དྲག་ན།

Actualmente seleccionado:

མེ་ཐིའུ 14: NBT

Destacar

Copiar