मत्ती 13
13
र्यु पन्नान्न द्रिस्तान्त
(मर्क ४:१-१२; लुक ८:४-१०)
1मन्नै लाह्ः येसु यिमलै गेग्गे समुद्रन नाः लह्म्मः छ्युङ्बो। 2आलै सिमिवन अकेः मोङ किम नुन रह्म्म जोम्बो, कि नु दोङाः चपचप छ्युङ्बो, आलै सिमि पुरूव नाः थाङथाङ छ्युङ्बो।#लुक ५:१-३ 3येसुई मन सिमिकाङ्मोः ल्होई लैः द्रिस्तान्तन रुपग झाम रुह्ङदी र्वाबो। नुई र्वाबो, “तीँ तीपा र्यु पन्नान र्यु पह्म्मः गेप्पो।” 4“आलै झामखेखे पह्न्तौ कान र्यु लम्राः छार्बो, रे युजुई स्वास्वा मन झबो। 5कान र्यु ताङ्खोराःन साः छार्बो, खाः सा लैः मह्या, रे सा तिङ मरह्पान कारन मन खम्मै थुङ्बो। 6जेङ्नै जब ङिह्मा स्याःबो रे पादा मीपा राह्राह् मन खार्बो। 7कान र्यु चन चेरवन घूँ छार्बो, जेङ्नै चेरव छारछार स्वाबो रे नू च्योर्बो। 8कान र्यु सा लग छार्बो, रे कानजै ङाथल, कानजै सुमथल, कानजै सुमच्यु गुना फल बिम्बो। 9येसुई र्वाबो, सुन नाम्ज्योवा ङ्याह्, नुई ङ्यानाःयो।”
द्रिस्तान्तन अर्थ
(मर्क ४:१-१२; लुक ८:९-१०)
10आलै चेलाव स्वास्वा येसू र्वाबो, “ना ख्युन ङ्याबो तैङ द्रिस्तान्तवग ल्होई र्वानान?”
11येसुई ख्युकाङ्मोः झब बिम्बो, “ङेनकाङ्मोः ता स्वर्गन राज्यन रहस्यवन ग्यान बिम्पा ङ्याह्, जेङ्नै ख्युकाङ्मोः चन बिम्पा मह्या। 12तैङर्वाङिन सुन ङ्याबो ङ्याह्, नू हेँ ह्याल्म बिन्नान ङ्याह्, रे नुन ङ्याबो हाति र्वार्वा राह्नान ङ्याह्। जेङ्नै सुन ङ्याबो मह्या, नुन ङ्याबो ङिह्पा यङ नुन लम तल्नान ङ्याह्।”#मत्ती २५:२९; मर्क ४:२५; लुक ८:१८; १९:२६ 13अन्नैकारन ङा ख्युन ङ्याबो द्रिस्तान्तग ल्होई र्वानान: तैङर्वाङिन ख्यु सेन्चे ता सेह्ङ्ङ, जेङ्नै मरँ, ङ्यान्चे ता ङ्याङ्ङ, जेङ्नै ताह्ताह् हामकोँ। 14यसैयान भबिस्यबानी ख्युन स्याह् पुरा रह्पा ङ्याह् “ङ्यान्चे ता ङेन ङ्याङ्ङ, जेङ्नै हातौयै हामकोँ, सेन्चे ता सेह्ङ्ङ, जेङ्नै हातौयै मरँ।#यसै ६:९-१० 15तैङर्वाङिन अन सिमिवन सम पुल्म रह्पा ङ्याह्, रे ख्युन नाम्ज्योवा मताह्नान रह्पा ङ्याह्, रे ख्युई जेँन मी चिम खेपा ङ्याह्, तेमन्ता ख्युई मीजै रङ्नान ङ्याह्, नाम्ज्योवाई ताह्नान ङ्याह्, समजै हाकोनान ङ्याह्, रे होल्नान ङ्याह्, रे ङा ख्युकाङ्मोः ताःफान्नान ङ्याह्। 16जेङ्नै ङेन चन धन्न जेङ्पा। ङेनकोन मीजै रँ रे नाम्ज्योवाजै ताँ।#लुक १०:२३-२४ 17तेम्माई, ङा ङेनकाङ्मोः र्वाचे, ङेनजै रङ्पान ल्होई लैः भबिस्यबक्तावजै रे धर्मी सिमिवजै यामयाम सेनसुम खेपा ङ्याह्, जेङ्नै मरङ्बो, आलै ङेनजै ताह्पान ल्होई यामयाम ङ्यानसुम खेपा ङ्याह्, जेङ्नै मह्ताबो।
18“र्यु पन्नान्न द्रिस्तान्तन अर्थ ङ्याना। 19जब कान सिमिवजै स्वर्गन राज्यन बचन ङ्याङ्ङ, रे अन हामकोँ, तब आत्मा अलः स्वानान रे नुन समग तै पप्पा ङ्याह् अन तलतल वन्नान। लम्राः पप्पान र्यु चन मनै जेङ्पा। 20आलै सा ताङ्खोराः पप्पा र्यु चन मन जेङ्पा, सुई बचन ङ्यानलुङ्मीम स्याङस्याङ समग वङ्ङ। 21जेङ्नै नुन जेँन पादा मीपा राह्राह् मन ङाईदिन बेर मात्र थुप्ङ, बचन्न कारनजै तूरि या तेह्पफान्नानग थेपलुङ्मीम मन ङिक च्योल्ङ। 22चेरवग पप्पा र्यु चन मन जेङ्पा, सुई बचन ङ्याङ्ङ, जेङ्नै अन सन्सारन छरा रे क्युन लोभजै बचनग च्योर्ङ, रे मन फल मछ्याःनान राह्नान। 23जेङ्नै सा लग पप्पा र्यु चन मन जेङ्पा, सुई बचन ङ्याङ्ङ, रे हाकोँ, रे तेम्माई फल छ्याःङ। नुई पप्पान र्युलम गुना ङाथल, गुना सुमथल रे गुना सुमच्यु फल छ्याःङ।”
सामान द्रिस्तान्त
24येसुई ह्याङ ख्युकाङ्मोः घङ द्रिस्तान्त स्याप्पो, “स्वर्गन राज्य सिमि तीपा लैम जेङ्पा, सुई जेँन खेः र्यु लः पप्पो। 25जेङ्नै सिमिव आःपान भेला नुन बैरि स्वाबो, रे रुन्जन्न घूँ-घूँ सामान र्युको पप्पे होई। 26जब रुन्जन्न बोती गेग्गे मनग गेल्ला छ्याःबो, तब सामा यङ रङ्बो।” 27“यिमन ताःपोन राङ्पावजै स्वास्वा नू र्वाबो, ‘गुरू, तै नाई जेँन खेः र्यु लः पप्पा नङ्पाऊ? स्याह् सामा खालै स्वाबो?’” 28“यिमन तापोई ख्युकाङ्मोः र्वाबो, ‘कान बैरिजै झाम खेपा जेङ्पा।’ राङ्पावजै नू र्वाबो, ‘तै ङि वैवै मन सामाव पिङ्ङी?’” 29“जेङ्नै नुई र्वाबो, ‘उजु नख्या, तेमन्ता ङेनजै सामा पिङ्तौ रुन्जन यङ पिङ्दरा। 30बालि चाह्नान्न भेला बेर ङ्योरुमग ङ्याबो ङ्याबोई छार्फाना। बालि चाह्नान्न भेला ङा गम्नानकाङ्मोः र्वानान ङ्युँ,’ ‘ङू सामा पिङ्पिङ् मेह्ः तुन्चेन भिह्तु पोला ध्वाँ, जेङ्नै रुन्जन चन तुह्ईतुह्ई ङन स्योह्बुङग नाह्ना।’”
रायोन र्यु रे सोरान द्रिस्तान्त
(मर्क ४:३०-३४; लुक १३:१८-२१)
31येसुई ख्युकाङ्मोः घङ द्रिस्तान्त र्वाबो, “स्वर्गन राज्य छून र्यु लैम जेङ्पा, कन सिमि तीपाई वव्वै जेँन बारी पाःबो। 32मन र्यु पुरूवग छ्युम राह्नान, जेङ्नै जब छार्ङ, तब मन सागपात पुरूव खेरे किम राह्नान रे तङ्पुई राह्नान। पान्नाङन युजुव स्वास्वा मन्न धावग चाङ धोँ।” 33येसुई ख्युकाङ्मोः घङ द्रिस्तान्त र्वाबो, “स्वर्गन राज्य सोरा लैम जेङ्पा, कन चिमिचादीजै किलोग्राम सुमच्यु राःपि होम्बो, रे अन पुरू सोरा बारबार ठिक मह्रान बेर नू तीपू नाह्म्बो।” 34येसुई अन ल्होई पुरू सिमिन मोह्ङग द्रिस्तान्तग र्वाबो। द्रिस्तान्त मीम नुई ख्युकाङ्मोः तये मर्वाबो। 35भबिस्यबक्तालम झाम र्वापान बचन पुरा रह्बो,
“ङा जेँन ङुर द्रिस्तान्तवग पोङ्नान ङ्युँ,
सन्सारन स्रिस्तिलै क्युक्यु नाम्पान ल्होईव ङा र्वानान ङ्युँ!”#भजन ७८:२
सामान द्रिस्तान्तन अर्थ
36मन्न छाम्म पुरू सिमिकाङ्मोः स्याह्ई ख्योवाख्योवा येसु यिमक्याँ होई। नुन चेलाव नुन स्याह् वैबो रे र्वाबो, “घलि छ्याचल ङी खेःन सामान द्रिस्तान्तन अर्थ र्वा।”
37येसुई झब बिम्बो, “खेः र्यु लः पन्नान्न सिमिन ङोह्जो जेङ्पा। 38सन्सारै खेः जेङ्पा। र्यु लःव राज्यन परमेस्वरनै सिमिव जेङ्पा। सामा सैतान्न सन्तानव जेङ्पा। 39आलै र्यु अलःव पन्नान बैरि चन सैतान जेङ्पा। साह्ई गम्नान्न भेला चन सन्सारन अन्त्य जेङ्पा। आलै साह्ई गम्नानव स्वर्गदुतव जेङ्पा।”
40“सामाव रूमी मन मेह्ग कोःनान ङ्याह्, सन्सारन अन्त्यगै उजुई राह्नान ङ्याह्। 41मन्न लाह्ः सिमिन ङोह्जोई जेँन स्वर्गदुतकाङ्मोः फेन्नान ङ्याह् रे ख्युई नुन राज्यभरिन कानुन मङ्यान्नान रे कानुन ङ्यान फान्नानव पुरूग रूनान ङ्याह्। 42छ्याप्पान मेह्ग पन्नान ङ्याह्। स्याह् सिमिव दाईदाई सो चपैचपै छ्युङ्नान ङ्याह्। 43परमेस्वरन ङू धर्मी ठहरी राह्नानव चन जेँन पा परमेस्वरन राज्यग ङिह्मा लैम चम्कि राह्राह् छ्युङ्नान ङ्याह्। सुन नाम्ज्योवा ङ्याह्, नुई ङ्यानाःयो।”
लुम्पा क्युन द्रिस्तान्त
44“स्वर्गन राज्य कान खेदीग लुम्लुम नाम्पान लुम्पा क्यु लैम जेङ्पा। कन सिमि तीपाई दोदो क्युक्यु नान्नान, रे नु स्याङ्स्याङ नु वैनान रे जेँन ङ्याबो ङिह्पान तैस्याङ पुरूव र्युह्बो रे मन खेः र्युप्पो।”
मकेकुकेन कुम्म मोतीन द्रिस्तान्त
45“ह्याङ, स्वर्गन राज्य ती ब्यापारी लैम जेङ्पा, सुई मोती लःव फाप्पो। 46तीँ मन ब्यपारीजै ती मकेकुकेन कुम्म मोती देप्पो। रे नुई वैवै जेँन ङ्याबो रह्पान तैस्याङ पुरू र्युर्र्युई मन मोती र्युह्बो।”
जालन द्रिस्तान्त
47ह्याङ “स्वर्गन राज्य समुन्द्रग ताह्पान जाल लैम जेङ्पा। मन जालग राँसाराँसान ङाह्व थेप्पो। 48आलै जाल नाङ्मी सिमिवजै मनग नाः कानकान छ्यूबो, रे छ्युङछ्युङ लः भरी धाङवग साबो, रे अलः भरी खोलोः पह्प्पो। 49सन्सारन अन्त्यगै झामै राह्नान ङ्याह्। स्वर्गदुतव स्वा ताप्नान ङ्याह् आलै परमेस्वरन ङू धर्मी ठहर्याई खेपान सिमिवलम सिमि अलःकाङ्मोः फानान ङ्याह्। 50छ्याप्पान मेह्ग पन्नान ङ्याह्। मन सिमिव पिरजै दोःनान ङ्याह् सो चम्नान ङ्याह्।”
सार्बा रे घ्वापा तेम्मा
51तब येसुई जेँन चेलाकाङ्मोः लोप्पो, “तै अन ल्होई पुरूव ङेनजै हाकोपौ?”
ख्युई झब बिम्बो, “अँ प्रभु, ङ्योअजै हाकोपा।”
52तब येसुई जेँन चेलाकाङ्मोः र्वाबो, “पुरू कानुन लन्नान्न सिमि सुई स्वर्गन राज्यन भारेः लम्पान ती यिमन तापो लैम जेङ्पा। नुई जेँन भकारिलै ङिङ्पा रे सार्बा चिजव जगाई नाम्पा राह्नान। आलै नुई मन घ्वापा रे सार्बा चिजव खोलोः छ्यूनान।”
नासरतग येसू अस्वीकार खेपा
(मर्क ६:१-६; लुक ४:१६-३०)
53झामखेखे द्रिस्तान्तवग लनतामी येसुई स्याह्लै होई। 54येसु जेँन सहरग स्वाबो। येसुई यहूदी आराधनालयग ख्युकाङ्मोः लह्म्बो। नुन छोए ङ्यान्नानव हालाईलाई र्वाबो। अन्नकारन नुई राह्ङराङ्साः ल्होई र्वाबो, “हालाईचेन धोनव खेनान्न झाम बुद्धि रे सक्ति अनजै खालै देप्पो? 55अन नुई कर्मीन ङोह्जो नङ्पाऊ? आलै नुन मा मरियम नङ्पाऊ? याकूब, योसेफ, सिमोन रे यहूदा नुन भाईव नङ्पा तै? 56नुन मितिकोव चोँ ङिन ङ्याबो ङ्याह्। अन्नकारन नुई अन ल्होईव र्वानान्न अकेः किम बुद्धि रे सक्ति खालै देत्तँ?” 57अन्नकारन सिमिवजै येसू स्वीकार खे मतैबो। जेङ्नै येसुई ख्युकाङ्मोः र्वाबो, “घङ सिमिवजै भबिस्यबक्ताः सम्मान खेँ। जेङ्नै जेँन सहरग रे जेँनै यिमन सिमिवजै भबिस्यबक्ताः उजुखेखे नुन लैम सम्मान मखेँ।”
58मन ठाउँग सिमिवजै येसू बिस्वास मखेपान कारन नुई स्याह् लैः ताईलुवान धोनव मथम्बो।
Actualmente seleccionado:
मत्ती 13: NTKST25
Destacar
Compartir
Copiar
¿Quieres tener guardados todos tus destacados en todos tus dispositivos? Regístrate o inicia sesión
The New Testament Books in Kaike Language © The Word for the World International and Kaike Translation Project, Nepal, 2025
मत्ती 13
13
र्यु पन्नान्न द्रिस्तान्त
(मर्क ४:१-१२; लुक ८:४-१०)
1मन्नै लाह्ः येसु यिमलै गेग्गे समुद्रन नाः लह्म्मः छ्युङ्बो। 2आलै सिमिवन अकेः मोङ किम नुन रह्म्म जोम्बो, कि नु दोङाः चपचप छ्युङ्बो, आलै सिमि पुरूव नाः थाङथाङ छ्युङ्बो।#लुक ५:१-३ 3येसुई मन सिमिकाङ्मोः ल्होई लैः द्रिस्तान्तन रुपग झाम रुह्ङदी र्वाबो। नुई र्वाबो, “तीँ तीपा र्यु पन्नान र्यु पह्म्मः गेप्पो।” 4“आलै झामखेखे पह्न्तौ कान र्यु लम्राः छार्बो, रे युजुई स्वास्वा मन झबो। 5कान र्यु ताङ्खोराःन साः छार्बो, खाः सा लैः मह्या, रे सा तिङ मरह्पान कारन मन खम्मै थुङ्बो। 6जेङ्नै जब ङिह्मा स्याःबो रे पादा मीपा राह्राह् मन खार्बो। 7कान र्यु चन चेरवन घूँ छार्बो, जेङ्नै चेरव छारछार स्वाबो रे नू च्योर्बो। 8कान र्यु सा लग छार्बो, रे कानजै ङाथल, कानजै सुमथल, कानजै सुमच्यु गुना फल बिम्बो। 9येसुई र्वाबो, सुन नाम्ज्योवा ङ्याह्, नुई ङ्यानाःयो।”
द्रिस्तान्तन अर्थ
(मर्क ४:१-१२; लुक ८:९-१०)
10आलै चेलाव स्वास्वा येसू र्वाबो, “ना ख्युन ङ्याबो तैङ द्रिस्तान्तवग ल्होई र्वानान?”
11येसुई ख्युकाङ्मोः झब बिम्बो, “ङेनकाङ्मोः ता स्वर्गन राज्यन रहस्यवन ग्यान बिम्पा ङ्याह्, जेङ्नै ख्युकाङ्मोः चन बिम्पा मह्या। 12तैङर्वाङिन सुन ङ्याबो ङ्याह्, नू हेँ ह्याल्म बिन्नान ङ्याह्, रे नुन ङ्याबो हाति र्वार्वा राह्नान ङ्याह्। जेङ्नै सुन ङ्याबो मह्या, नुन ङ्याबो ङिह्पा यङ नुन लम तल्नान ङ्याह्।”#मत्ती २५:२९; मर्क ४:२५; लुक ८:१८; १९:२६ 13अन्नैकारन ङा ख्युन ङ्याबो द्रिस्तान्तग ल्होई र्वानान: तैङर्वाङिन ख्यु सेन्चे ता सेह्ङ्ङ, जेङ्नै मरँ, ङ्यान्चे ता ङ्याङ्ङ, जेङ्नै ताह्ताह् हामकोँ। 14यसैयान भबिस्यबानी ख्युन स्याह् पुरा रह्पा ङ्याह् “ङ्यान्चे ता ङेन ङ्याङ्ङ, जेङ्नै हातौयै हामकोँ, सेन्चे ता सेह्ङ्ङ, जेङ्नै हातौयै मरँ।#यसै ६:९-१० 15तैङर्वाङिन अन सिमिवन सम पुल्म रह्पा ङ्याह्, रे ख्युन नाम्ज्योवा मताह्नान रह्पा ङ्याह्, रे ख्युई जेँन मी चिम खेपा ङ्याह्, तेमन्ता ख्युई मीजै रङ्नान ङ्याह्, नाम्ज्योवाई ताह्नान ङ्याह्, समजै हाकोनान ङ्याह्, रे होल्नान ङ्याह्, रे ङा ख्युकाङ्मोः ताःफान्नान ङ्याह्। 16जेङ्नै ङेन चन धन्न जेङ्पा। ङेनकोन मीजै रँ रे नाम्ज्योवाजै ताँ।#लुक १०:२३-२४ 17तेम्माई, ङा ङेनकाङ्मोः र्वाचे, ङेनजै रङ्पान ल्होई लैः भबिस्यबक्तावजै रे धर्मी सिमिवजै यामयाम सेनसुम खेपा ङ्याह्, जेङ्नै मरङ्बो, आलै ङेनजै ताह्पान ल्होई यामयाम ङ्यानसुम खेपा ङ्याह्, जेङ्नै मह्ताबो।
18“र्यु पन्नान्न द्रिस्तान्तन अर्थ ङ्याना। 19जब कान सिमिवजै स्वर्गन राज्यन बचन ङ्याङ्ङ, रे अन हामकोँ, तब आत्मा अलः स्वानान रे नुन समग तै पप्पा ङ्याह् अन तलतल वन्नान। लम्राः पप्पान र्यु चन मनै जेङ्पा। 20आलै सा ताङ्खोराः पप्पा र्यु चन मन जेङ्पा, सुई बचन ङ्यानलुङ्मीम स्याङस्याङ समग वङ्ङ। 21जेङ्नै नुन जेँन पादा मीपा राह्राह् मन ङाईदिन बेर मात्र थुप्ङ, बचन्न कारनजै तूरि या तेह्पफान्नानग थेपलुङ्मीम मन ङिक च्योल्ङ। 22चेरवग पप्पा र्यु चन मन जेङ्पा, सुई बचन ङ्याङ्ङ, जेङ्नै अन सन्सारन छरा रे क्युन लोभजै बचनग च्योर्ङ, रे मन फल मछ्याःनान राह्नान। 23जेङ्नै सा लग पप्पा र्यु चन मन जेङ्पा, सुई बचन ङ्याङ्ङ, रे हाकोँ, रे तेम्माई फल छ्याःङ। नुई पप्पान र्युलम गुना ङाथल, गुना सुमथल रे गुना सुमच्यु फल छ्याःङ।”
सामान द्रिस्तान्त
24येसुई ह्याङ ख्युकाङ्मोः घङ द्रिस्तान्त स्याप्पो, “स्वर्गन राज्य सिमि तीपा लैम जेङ्पा, सुई जेँन खेः र्यु लः पप्पो। 25जेङ्नै सिमिव आःपान भेला नुन बैरि स्वाबो, रे रुन्जन्न घूँ-घूँ सामान र्युको पप्पे होई। 26जब रुन्जन्न बोती गेग्गे मनग गेल्ला छ्याःबो, तब सामा यङ रङ्बो।” 27“यिमन ताःपोन राङ्पावजै स्वास्वा नू र्वाबो, ‘गुरू, तै नाई जेँन खेः र्यु लः पप्पा नङ्पाऊ? स्याह् सामा खालै स्वाबो?’” 28“यिमन तापोई ख्युकाङ्मोः र्वाबो, ‘कान बैरिजै झाम खेपा जेङ्पा।’ राङ्पावजै नू र्वाबो, ‘तै ङि वैवै मन सामाव पिङ्ङी?’” 29“जेङ्नै नुई र्वाबो, ‘उजु नख्या, तेमन्ता ङेनजै सामा पिङ्तौ रुन्जन यङ पिङ्दरा। 30बालि चाह्नान्न भेला बेर ङ्योरुमग ङ्याबो ङ्याबोई छार्फाना। बालि चाह्नान्न भेला ङा गम्नानकाङ्मोः र्वानान ङ्युँ,’ ‘ङू सामा पिङ्पिङ् मेह्ः तुन्चेन भिह्तु पोला ध्वाँ, जेङ्नै रुन्जन चन तुह्ईतुह्ई ङन स्योह्बुङग नाह्ना।’”
रायोन र्यु रे सोरान द्रिस्तान्त
(मर्क ४:३०-३४; लुक १३:१८-२१)
31येसुई ख्युकाङ्मोः घङ द्रिस्तान्त र्वाबो, “स्वर्गन राज्य छून र्यु लैम जेङ्पा, कन सिमि तीपाई वव्वै जेँन बारी पाःबो। 32मन र्यु पुरूवग छ्युम राह्नान, जेङ्नै जब छार्ङ, तब मन सागपात पुरूव खेरे किम राह्नान रे तङ्पुई राह्नान। पान्नाङन युजुव स्वास्वा मन्न धावग चाङ धोँ।” 33येसुई ख्युकाङ्मोः घङ द्रिस्तान्त र्वाबो, “स्वर्गन राज्य सोरा लैम जेङ्पा, कन चिमिचादीजै किलोग्राम सुमच्यु राःपि होम्बो, रे अन पुरू सोरा बारबार ठिक मह्रान बेर नू तीपू नाह्म्बो।” 34येसुई अन ल्होई पुरू सिमिन मोह्ङग द्रिस्तान्तग र्वाबो। द्रिस्तान्त मीम नुई ख्युकाङ्मोः तये मर्वाबो। 35भबिस्यबक्तालम झाम र्वापान बचन पुरा रह्बो,
“ङा जेँन ङुर द्रिस्तान्तवग पोङ्नान ङ्युँ,
सन्सारन स्रिस्तिलै क्युक्यु नाम्पान ल्होईव ङा र्वानान ङ्युँ!”#भजन ७८:२
सामान द्रिस्तान्तन अर्थ
36मन्न छाम्म पुरू सिमिकाङ्मोः स्याह्ई ख्योवाख्योवा येसु यिमक्याँ होई। नुन चेलाव नुन स्याह् वैबो रे र्वाबो, “घलि छ्याचल ङी खेःन सामान द्रिस्तान्तन अर्थ र्वा।”
37येसुई झब बिम्बो, “खेः र्यु लः पन्नान्न सिमिन ङोह्जो जेङ्पा। 38सन्सारै खेः जेङ्पा। र्यु लःव राज्यन परमेस्वरनै सिमिव जेङ्पा। सामा सैतान्न सन्तानव जेङ्पा। 39आलै र्यु अलःव पन्नान बैरि चन सैतान जेङ्पा। साह्ई गम्नान्न भेला चन सन्सारन अन्त्य जेङ्पा। आलै साह्ई गम्नानव स्वर्गदुतव जेङ्पा।”
40“सामाव रूमी मन मेह्ग कोःनान ङ्याह्, सन्सारन अन्त्यगै उजुई राह्नान ङ्याह्। 41मन्न लाह्ः सिमिन ङोह्जोई जेँन स्वर्गदुतकाङ्मोः फेन्नान ङ्याह् रे ख्युई नुन राज्यभरिन कानुन मङ्यान्नान रे कानुन ङ्यान फान्नानव पुरूग रूनान ङ्याह्। 42छ्याप्पान मेह्ग पन्नान ङ्याह्। स्याह् सिमिव दाईदाई सो चपैचपै छ्युङ्नान ङ्याह्। 43परमेस्वरन ङू धर्मी ठहरी राह्नानव चन जेँन पा परमेस्वरन राज्यग ङिह्मा लैम चम्कि राह्राह् छ्युङ्नान ङ्याह्। सुन नाम्ज्योवा ङ्याह्, नुई ङ्यानाःयो।”
लुम्पा क्युन द्रिस्तान्त
44“स्वर्गन राज्य कान खेदीग लुम्लुम नाम्पान लुम्पा क्यु लैम जेङ्पा। कन सिमि तीपाई दोदो क्युक्यु नान्नान, रे नु स्याङ्स्याङ नु वैनान रे जेँन ङ्याबो ङिह्पान तैस्याङ पुरूव र्युह्बो रे मन खेः र्युप्पो।”
मकेकुकेन कुम्म मोतीन द्रिस्तान्त
45“ह्याङ, स्वर्गन राज्य ती ब्यापारी लैम जेङ्पा, सुई मोती लःव फाप्पो। 46तीँ मन ब्यपारीजै ती मकेकुकेन कुम्म मोती देप्पो। रे नुई वैवै जेँन ङ्याबो रह्पान तैस्याङ पुरू र्युर्र्युई मन मोती र्युह्बो।”
जालन द्रिस्तान्त
47ह्याङ “स्वर्गन राज्य समुन्द्रग ताह्पान जाल लैम जेङ्पा। मन जालग राँसाराँसान ङाह्व थेप्पो। 48आलै जाल नाङ्मी सिमिवजै मनग नाः कानकान छ्यूबो, रे छ्युङछ्युङ लः भरी धाङवग साबो, रे अलः भरी खोलोः पह्प्पो। 49सन्सारन अन्त्यगै झामै राह्नान ङ्याह्। स्वर्गदुतव स्वा ताप्नान ङ्याह् आलै परमेस्वरन ङू धर्मी ठहर्याई खेपान सिमिवलम सिमि अलःकाङ्मोः फानान ङ्याह्। 50छ्याप्पान मेह्ग पन्नान ङ्याह्। मन सिमिव पिरजै दोःनान ङ्याह् सो चम्नान ङ्याह्।”
सार्बा रे घ्वापा तेम्मा
51तब येसुई जेँन चेलाकाङ्मोः लोप्पो, “तै अन ल्होई पुरूव ङेनजै हाकोपौ?”
ख्युई झब बिम्बो, “अँ प्रभु, ङ्योअजै हाकोपा।”
52तब येसुई जेँन चेलाकाङ्मोः र्वाबो, “पुरू कानुन लन्नान्न सिमि सुई स्वर्गन राज्यन भारेः लम्पान ती यिमन तापो लैम जेङ्पा। नुई जेँन भकारिलै ङिङ्पा रे सार्बा चिजव जगाई नाम्पा राह्नान। आलै नुई मन घ्वापा रे सार्बा चिजव खोलोः छ्यूनान।”
नासरतग येसू अस्वीकार खेपा
(मर्क ६:१-६; लुक ४:१६-३०)
53झामखेखे द्रिस्तान्तवग लनतामी येसुई स्याह्लै होई। 54येसु जेँन सहरग स्वाबो। येसुई यहूदी आराधनालयग ख्युकाङ्मोः लह्म्बो। नुन छोए ङ्यान्नानव हालाईलाई र्वाबो। अन्नकारन नुई राह्ङराङ्साः ल्होई र्वाबो, “हालाईचेन धोनव खेनान्न झाम बुद्धि रे सक्ति अनजै खालै देप्पो? 55अन नुई कर्मीन ङोह्जो नङ्पाऊ? आलै नुन मा मरियम नङ्पाऊ? याकूब, योसेफ, सिमोन रे यहूदा नुन भाईव नङ्पा तै? 56नुन मितिकोव चोँ ङिन ङ्याबो ङ्याह्। अन्नकारन नुई अन ल्होईव र्वानान्न अकेः किम बुद्धि रे सक्ति खालै देत्तँ?” 57अन्नकारन सिमिवजै येसू स्वीकार खे मतैबो। जेङ्नै येसुई ख्युकाङ्मोः र्वाबो, “घङ सिमिवजै भबिस्यबक्ताः सम्मान खेँ। जेङ्नै जेँन सहरग रे जेँनै यिमन सिमिवजै भबिस्यबक्ताः उजुखेखे नुन लैम सम्मान मखेँ।”
58मन ठाउँग सिमिवजै येसू बिस्वास मखेपान कारन नुई स्याह् लैः ताईलुवान धोनव मथम्बो।
Actualmente seleccionado:
:
Destacar
Compartir
Copiar
¿Quieres tener guardados todos tus destacados en todos tus dispositivos? Regístrate o inicia sesión
The New Testament Books in Kaike Language © The Word for the World International and Kaike Translation Project, Nepal, 2025