matiyu 9
9
Yesɔ gati shɔ gbete u bii vɔ kagbete yɛ
1Yesɔ to yɛti girgi mii, a tɛɛ ɓooti da yɛkɛ koo gbete baa aɗɔnni yɛ. 2Shɔ n tiu shɔ bii vɔne au ɗɔ bii, roo a siri. Naa Yesɔ zɛ nɔgbeteyi ã sisɨn tɛ, a geli shɔ gbeteu bii vɔu nɛ,<<A pɔ̃ yuu kɔne ɓa, majaa; n sɔ̃raa ruuvini tɛ.>>
3Kɛɗɔn shɔ mala gbeteyi mati shɔ laabeene nya ãsine i shakɛ ai noo nɛ, <<Jam risi Ɗalapa tɛ pɛtɛlɛ.>>
4Yesɔ zɛ vigbete ai sisɨn tɛttɔ, a hɨyi nɛ, <<Aruu ivi ɔ sha ruu kɔline awɔ sisɨn nankɔ viya? 5Shɔpi ɔ̃rɛ pɛlaa a nya ni piyaː shɔ shanɛ,<n sɔ̃raa ruuvini tɛ,>wɔsɔ̃ng shɔ shanɛ, <Yulapa nɛ a yɛrɛ>? 6N yɛn tasɔɔ tɔ, nɛ jashɔzɛ u nya nwane aɗɔn ni u sɔ̃ri shɔ ruuvini koo....>>Kɛɗɔn a geli shɔ bii vɔneu nɛ, <<Yulapa, a tuu siri a yɛ wɛrɛ.>> 7A jau yulapa rɛ a yɛ wɛrɛ rɛ. 8Shɔ gbeteyi toli nya aɗɔu i nta seti tɔ; I bɛli Ɗalapa rɛ, shɔ gbeteu ã shɔ naa neu pɛli vibii-zaa nem nankɔ.
Yesɔ ɓa Matiyu nya
9Yesɔ yulapa u ɗɔ yɛne, a zɛ jawɔɔ shɔ ɓau nii ne Matiyu u ɗɔ ɔ̃ne aɗɔ saa bɛne tɛnɛ.<<gnpɛ,>>Yesɔ geli Matiyu, a gn Yesɔ rɛ.
10Aɗagbete Yesɔ ɗɔ vishaane shaanɛ a Matiyu wɛrɛ, shɔ gbeteyi tɛ saa bɛneyi waa-ne a<<shɔ ruuviniyi>>a Yesɔ jadɔyi i arɛ i shaa vishaane awuni ɗɔzɔ. 11Naa shɔ Farisawayi zɛtɛ nankɔ, i hɨ Yesɔ jadɔyi nɛ, aruu ivi ɔ shɔ mala shaa vishaane a shɔ saa bɛneyi ni ɗɔzɔ a <<shɔ ruuviniyi ni viya?>>
12Naa Yesɔ nta tɛ a kasi nya nɛ, shɔ gbeteyi ji nta bii kɔne ɓa, i yɛ ɗɔ shɔ gãng pɛline ɓa, ama see shɔ gbeteyi vɔrɔ a bii ni. 13Ama ɔ yɛnɛ ɔ gbãali jaa gɔɔ kɛjo ɔ yɛtiː <<N kasi ɔ ɔ̃ shɔ raa ntanɛ, ɓa vivaa ãne aruu yuu ãne ɓa. Njo a ɓa shɔ tɔ̃vɨngyi ɗɔ bii ne kɔsi sisɨn ɓa, ama n a ɗɔ shɔ ruuviniyi bii i kɔsi sisɨn tɔ.>>
Ruu gbete shɔ hɨ Yesɔ aruu nya manɛ
14Kɛɗɔn Yɔhana shɔ gbete pɛli Batisima jadɔyi i a Yesɔ ɗɔ bii a hɨunɛ,<<Aruu ivi u a Farisawayi u ɗɔ nya mane, ama a jado i ma- nya ɓɛjo ɓa aruu iviya?>>
15Yesɔ kasi nya rɛ ne,<<A ɔ zɛne ango ɓɛsayi i sisɨn hm kati aɗagbete angou do a ikɔniya? Pɛliɓaǃ Ama dii kane gbete ango yɛ yayi ɗɔ bii tɔ; Kɛɗɔn iyɛyi ma nya kati.
16<<Shɔ rɛɛ visi bii gbaali ɓa a nya fãrã sɔɔni ɓa, aruu gbete yɛ li visi bii tɔ, u ntali kɛ bang. 17shɔ tɛ̃ɛ̃ saa ɓa a yɛti vi gbãali gbete shɔ pɛli a koo ni ɓa. shɔ kɛ pɛline, ko piya yɛ ntaatɔ, saau tɛ̃ɛ̃ a tipi, koou ma yɛ lɛsi tɔ. shɔ pɛli naa shom, saa gbete doo sɔɔ shɔ tɛ̃ɛ̃ a koo sɔɔ, a nankɔ piti ziti kpai yɛ lɛsi ɓa.>>
Ruu jasoro gbete ɗi naa a Yesɔ visi bii, a jaa gbete Yesɔ yusi yɛ
18Yesɔ u gbete geli yɛ nankɔ, shɔ yuu pẽni Yahudayi arɛ a sɔ̃si au ɗekn a geliu ne,<<ma jasoro vɔɔ dotɔ dɔddɔrim kɔ. Ama ane a pɔ̃ naa pɛ au bii, yɛ yuu tɔ.>> 19Yesɔ yulapa rɛ a gɨu rɛ, u jadɔyi gɨu sɔ̃njo a dɔɔni.
20Kɛɗɔn suu wɔɔ gbete u kpaa aɗɔɔ tɛ̃ne saa kopi tu ziti bãli rɛ a kaa knti a dii Yesɔ nya fãrã. 21Suu sha au yɛti nɛ, <<nkɛ dii naa nɛ awu fãrã kɔ sheeli n yɛn gati tɔ.>>
22Yesɔ rii noo rɛ a zɛurɛ.<< mɔkɔ pɔ̃ yuu kɔnɛ nɛ, n jasoro,>> Yesɔ sharɛ,<<a sisɨn ãne gataa tɛ.>> Suu gati rɛ tɛ̃ɛ̃t aɗawukɔ.
23Naa Yesɔ to yuu pẽni Yahudayi wɛrɛ tɛ, a zɛ shɔ vi geneyi moo waa-ne shɔ ɗɔ nya marine, 24a shanɛ, <<ɔ yɛ kawaa. Jasuu ji vɔɔ ɓa tɔɓa ama u a noro.>> Ama i latiwu tɔ. 25Tɛ̃ɛ̃ti naa Yesɔ shɛshi shɔ ɓili tɛ, Yesɔ tɔrɛ a sã jasuu naa rɛ, jasuu yulapa rɛ. 26Rum raa ɗɔ piti kpai.
Yesɔ gati shɔ nɔɔ gbãati a shɔ sho gbãati
27Yesɔ yulapa rɛ u ɗɔɔ rakki nɛ a nyaba, shɔ noo gbãatiyi ziti i gɨu rɛ a knti, i ɗɔɔ nya ɓane, <<ntawu raa jɔ, Dawuda ɓɛjaa.>>
28Naa Yesɔ to yɛti wɛrɛ wɔɔ tɛ, shɔ noo gbãatiyi ziti i awu ɗɔ bii, a hɨyinɛ, ɔ ã sisɨn tɛttɔ nɛn yɛn zɛnoo dɔtɔ ya?
<<Nn Uɓeyelapa,>> i risi nyarɛ.
29Kɛɗɔn Yesɔ dii naa rɛ ai bii a shanɛ, <<u ɔ̃pɛ nagbete ɔ ã sisɨn kɔ>>; 30Ai noo ɓeli rɛ. Yesɔ gɔ̃i yuusho nɛ, <<ɔkɔ geli shɔ wɔne.>> 31Ama i yɛrɛ i sãnti ruu kpai a koou ni.
32Naa Yesɔ au jadɔyi sã nyaba yɛne tɛ, shɔ n tiu jawɔɔ gbete suru kɔline awu bii ni nwanya ɓa. 33Tɛ̃ɛ̃ti naa suru kɔline shɛ tɛ, jaa gbete nwanya ɓawu nwanya rɛ. moo gbeteyi ɗɔwu pɛlikɛ vibii zaane ai shanɛ,<<ujo zɛ vi nam jo shãa a Isrela ni ɓa.>>
34Ama shɔ Farisawayi shane, <<Suru kɔline i yupẽni kɔ ã Yesɔ kakaa rɛ u shɛshi suru kɔline rɛ a shɔ bii ni.>>
Shovi shoneyi pẽtẽrẽ
35Yesɔ rakki koomoo pẽniɓa a pẽtẽrẽ ni piti kpai, u ɗɔ shɔ vi matine a jaa Ɗa, u gbeteu waa nya aruu vi tɔ̃vɨng gbete n ti shɔ Ɗalapa wɛrɛ yɛ a shɔ vɔrɔ gatinɛ a bii kɔpi shɔpiya. 36Naa Yesɔ zɛ moo tɛ waa-ne, a ntayi raa rɛ, aruu gbete si ɔ̃ri shɔyi tɛ yuu kɔne shɔ naa pɔ̃ne ɓa, naa mɛrɛɛ gbeteu shɔ gane ɓa. 37Kɛɗɔn a geliu jadɔyi nɛ,<<shɔ vi yeene a jaa waa-ne ama shɔ vi shoneyi pẽtẽrẽ. 38Arumkɔ, ɔ gakki Ɗa jaa yeene, u dɔ̃ shɔgbete i yɛ yeruu vi jaa yɛ. >>
Actualmente seleccionado:
matiyu 9: Laa
Destacar
Compartir
Copiar
¿Quieres tener guardados todos tus destacados en todos tus dispositivos? Regístrate o inicia sesión
The Word for the World International and The Word for the World Nigeria