Oroome Asaas 10
10
1Ta ishatoo! Isra7eele nayta gishshas ta amoynne ta Xoos woossizay istti dhayontta attanaassa. 2Istti Xoossa yo7os mishettizayta gididayssa ta istta gishshas markkattana dandayays; istta misheteththi gidikko erateththan gidenna. 3Xoossi as xillisiza oge erontta aggidi ba xilloteththa oge kaallida attiin Xoossa xilloteththa oge kaallibeettenna. 4Ammaniza asaa ubbaa xillisanaas Kirstoosi woga ubbaa polides.
5Musey woga baggara beettiza xilloteththaa gishshas erisishe, «Hayta wogata poli ooththizaadey ha wogatan daana» gizayssa.#Lewe 18:5 6Ammanon beettiza xilloteththi qasse, «Ne wozinara pude salo oonee kezanay? gooppa;» hessaththo guussi Kirstoosa saloppe duge haa woththana guussa. 7Woykko, « ‹Duge ciimman oonee wodhdhanay?› Gooppa!» hessika Kirstoosa hayqoppe buro denththana guussa.
8Gido attiin qaalay ay gizee? «Qaalay ne achchan dees.» Ne doonaninne ne wozinan dees, nuni ammano gishshas sabbakiza qaalay hayssa.
9Neni ne doonara, «Yesusi Godaa» gaada markkattiko Xoossi iza hayqoppe denththidayssa ne wozinan ne ammanikko attana. 10Neni xillanay wozinan ammanikko; ne attanay ne doonara markkattiina. 11Geeshsha Maxaafay giza mala, «Izan ammanizay wurikka yeellatenna.»#Isa 28:16 12Ayhudata giddoninne Ayzaabeta giddon dummateththi deenna; issi Goday ubbaasikka Godaa; iza woossizayta gujji anjjees. 13«Godaa sunth xeygizayti wurikka attana» geetetti Geeshsha Maxaafan xaafettides.
14Histtiin iza ammanonttayti iza wozgi xeyganee? Qasse iza gishshas siyontta dishe wostti ammananee? Sabaakey baynda dishin wostti siyanee? 15Kiitettontta wostti sabbakandettoo? Hessika, «Mishiraachcho qaala ekki yizayta yuussi ay mala lo7oo!» geetetti Geeshsha Maxaafan xaafettida mala hanides.#Isa 52:7 16Gido attiin siyidayti wurikka Mishiraachcho qaalaa ekkibeettenna; Isayaasi, «Godoo! Nu yootidayssa ooni ammanidee?» gida mala hanides.#Isa 53:1
17Hessa gishshas ammanoy beettizay yootiza qaala siyeththana; yootettiza qaalaykka Kirstoosa gishshas yootiza qaalaappe.
18Gido attiin asay siyibeenneeshaa? gaada ta oychchays; tumappe asay siyides; Geeshsha Maxaafan xaafettida mala,
«Istta qaalay biitta ubbaaninne
alame gaxa gakkanaas siyettdes.»#Maza 19:4
19Ta qasseka oychchays; Isra7eele nayti qaalaa eribeetteneeshaa? Koyro Musey isttas,
«Ta dere gidonttaytan
ta istta amosana;
yuushshi qoppontta deretan
ta istta yiillochchana» gides.#Zaare 32:21
20Isayaasikka xalateththan,
«Tana koyonttaytas ta beettadis;
tana oychchonttaytas
tana qonccisadis» gides.#Isa 65:1
21Isra7eele gishshas qasse,
«Taas azazettontta derekkonne
taas eeno gontta derekko
kumeththa gallas
ta kushe miccadis» gees.#Isa 65:2
Actualmente seleccionado:
Oroome Asaas 10: GM
Destacar
Copiar
Comparar
Compartir
¿Quieres tener guardados todos tus destacados en todos tus dispositivos? Regístrate o inicia sesión
The Word for the World International