41
1ဆင်းရဲသူတို့အတွက် စိုးရိမ်ပူပန်သောသူသည် မင်္ဂလာရှိ၏။ ထိုသူဒုက္ခရောက်သောာအခါ ဘုရားရှင်သည် ကူညီမစူလိမ့်မည်။ 2မဘုရားရှင်သည် သူ့အားကာကွယ်စောင့်ရှောက်တော်မူ၍ သူ့အားကာကွယ်စောင့်ရှောက်လျက် ဆက်လက်၍ အသက်ရှင်စေတော်မူလိမ့်မည်။ သူသည် ပြည်တော်တွင် မင်္ဂလာရှိသူဖြစ်လိမ့်မည်။ ကိုယ်တော်သည် သူ့အား သူ၏ရန်သူတို့အလိုရှိသည့်အတိုင်း ပြုစေရန် အပ်တော်မူမည်မဟုတ်။ 3သူသည် ခုတင်ပေါ်၌ဖျားနာလျက်နေစဉ် ဘုရားရှင်သည် သူ့အားဖေးမတော်မူ၍ အနာရောဂါခံစားနေရသည့်အိပ်ရာထဲမှသူ့ကို အပြည့်အဝပြန်လည်ကျန်းမာစေတော်မူလိမ့်မည်။ 4အကျွန်ုပ်က "အို ဘုရားရှင်၊ အကျွန်ုပ်အား သနားကရုဏာထားတော်မူပါ။ အကျွန်ုပ်သည် ကိုယ်တော်ကိုပြစ်မှားခဲ့သည်ဖြစ်၍ အကျွန်ုပ်၏ အနာရောဂါကို ပျောက်ကင်းစေတော်မူပါ" ဟု လျှောက်တင်၏။ 5အကျွန်ုပ်၏ရန်သူတို့က "သူသည် မည်သည့်အချိန်တွင်သေဆုံး၍ သူ၏အမည်အား လူတို့မေ့ပျောက်သွားကြမည်နည်း" ဟု အကျွန်ုပ်အား မကောင်းပြောဆိုကြ။ 6သူတို့ထဲမှ အကျွန်ုပ်အားလာကြည့်သူတစ်ဦးသည်လည်း မဟုတ်မမှန်ပြောဆို။ သူ၏စိတ်နှလုံးတွင် အကျွန်ုပ်၏အကြောင်း မကောင်းသတင်းများကို ရှာဖွေစုဆောင်း၍ နေရာအနှံ့အပြားသို့သွား၍ ပြောဆိုတတ်၏။ 7အကျွန်ုပ်အား မုန်းတီးကြသူအပေါင်းတို့သည် အကျွန်ုပ်၏အကြောင်းကို အတူတကွတီးတိုးပြောဆိုကြ၏။ သူတို့သည် အကျွန်ုပ်အပေါ်တွင် မကောင်းမှုကိုကြံစည်လျက် 8"ဤသူသည် အသဲအသန်ဖျားနာလျက်ရှိသည်ဖြစ်၍ လဲလျောင်းရာမှ နောက်တစ်ဖန် ပြန်ထနိုင်မည်မဟုတ်" ဟုပြောဆိုကြ၏။ 9အကျွန်ုပ်၏မုန့်ကိုစားသော အကျွန်ုပ်ယုံကြည်စိတ်ချခဲ့သည့် အကျွန်ုပ်၏မိတ်ဆွေရင်းချာကပင်လျှင် အကျွန်ုပ်အား ခြေဖြင့်ကန်ကျလေပြီ။ 10သို့သော် အို ဘုရားရှင်၊ အကျွန်ုပ်သည် သူတို့အားတုံ့ပြန်နိုင်ရန် ကိုယ်တော်သည် အကျွန်ုပ်ကိုသနားတော်မူ၍ ပြန်ထစေတော်မူပါ 11အကျွန်ုပ်၏ရန်သူသည် အကျွန်ုပ်အပေါ်၌အောင်ပွဲခံ၍ ကြွေးကြော်ခွင့်မရသည်ကိုထောက်၍ ကိုယ်တော်သည် အကျွန်ုပ်ကိုနှစ်သက်တော်မူကြောင်း အကျွန်ုပ်သိပါ၏။ 12အကျွန်ုပ်သည် မှန်ရာကိုပြုကျင့်သောသူဖြစ်သောကြောင့် ကိုယ်တော်သည် အကျွန်ုပ်အား ကူညီမစတော်မူ၍ ကိုယ်တော်၏ရှေ့တော်တွင် ထာဝစဉ်နေရခွင့်ကို ပေးတော်မူလိမ့်မည်။ 13အစ္စရေးလူမျိုးတို့၏ ဘုရားဖြစ်တော်မူသော ဘုရားရှင်အား ချီးမွမ်းကြလော့။ ကိုယ်တော်အား ယခုမှစ၍ ကာလအစဉ်အဆက်တိုင်အောင် ချီးမွမ်းကြလော့။ အာမင်၊ အာမင်။