John 7
7
1အဲနော့ ကိုယ်တော်ယေရှုဟ ဂါလိလဲပြည်နှံ့ပြားဝို လှည့်လည်ပီးသွား တော်မူလေရယ်။ ဟဲဖြစ်ရိနူးဆိုဝါ ဂျူးလူမျိုးဒွေဟ ကိုယ်တော်ဝို သတ်ဝို့ကြံနေဂေ့ရိဂျော့ ကိုယ်တော်ဟ ယုဒနယ်ဝို သွားရှင်ဘဲဇာဖြစ်ရယ်။ 2အဲခီမှာ ဂျူးလူမျိုးဒွေရဲ့ သကေနေပွဲတော်ကျင်းပဝို့ခီဟလဲ နီးကပ်နေပီဖြစ်ရယ်။ 3အဲဂျော့ ကိုယ်တော်ယေရှုရဲ့ညီတော်ဒွေဟ ကိုယ်တော်ဝို "သင်လုပ်ဆော်နေဝိုရာဒွေဝို သင့်ရဲ့ဗြိတော်ဒွေ ဗြင်တွီ့နိုင်ဝို့တွက် အယ်မိုနေရာဟနေ ထွက်ခွာပီး ယုဒပြည်ဝိုသွားပါ။ 4လူဒိုင်းဝို သိစေလိုဝိုရာဒွေဝို ဟယ်သူဟမှ တိတိဘူး လုပိနေမှာမုဝ။ အဲဂျော့ အယ်မိုဇာဒွေ လုပ်ဆော်နေဝိုသင်ဟ လူဒိုင်းဝို ဗြင်ခွမ့်ပေးသင့်ရယ်' ဆိုပီး ပြောဂေ့လေရယ်။ 5အဲမိုမျိုးပြောဇာဟလော ကိုယ်တော်ရဲ့ညီတော်ဒွေဟဂိုမှ ကိုယ်တော်ဝို ယုံကြည်ခြင်း မှေ့သေးဘဲဂျော့ဖြစ်ရယ်။ 6ကိုယ်တော်ယေရှုဟ သူ့နို့ဝို 'ခုခီဟ ငါသွားဝို့ သင့်တော်မှန်ကန်ဝိုခီ မုသေးရဆိုပေမဲ့ နန်းနို့တွက်ကလလော ဟယ်ခီမှာမဆို မှန်ကန်သင့်တော်ပေရယ်။' ဆိုပီး မိတော်မူလေရယ်။ 7အယ်မိုလောကမှာရှေ့ဝို လူသားဒွေဟ နန်းနို့ဝို မူးဂေ့ရဆိုပေမဲ့ လူဒွေပြုလုပ်ဝိုမှုဒွေဟ ကောဝ ဆိုပီး ငါဟထော့ပြ ပြောဆိုတွက်ဂျော့ ငါ့ဝိုမူးဂေ့လေရယ်။ 8အဲမိုပွဲဝို နန်းနို့သွားဂေ့ပါ။ ခီကလသေးဘဲရိတွက် အဲမိုပွဲဝို ငါသွားသေးရ" 9ဆိုပီး မိဆိုတော်မူပြီးနော့ ဂါလိလဲမှာနေရစ်လေရယ်။ 10သူ့ညီဒွေ ပွဲတော်ဝို သွားပီးမှ ကိုယ်တော်ဟလဲ မထံမရှားန ကြွတော်မူလေရယ်။ 11အဲမိုပွဲမှာ ဂျူးလူမျိုးကြီးကဲဒွေဟ ကိုယ်တော်ဝို လိုက်ရှာနေဂေ့ပီး 'အဲမိုလူ ဟယ်မှာနူး' ဆိုပီး မေးနေဂေ့လေရယ်။ 12လူထုပရိသတ်ဒွေဟ ကိုယ်တော်နပတ်သက်ပီး မျိုးမျိုး ဂျင်းပီးပြောနေဂေ့လေရယ်။ ချို့လူဒွေဟ 'ကိုယ်တော်ဟ သူတော်ကောဖြစ်ရယ်' ဆိုပီး ပြောဂေ့ရယ်။ ချို့လူဒွေကလလော 'မုဝ။ သူဟ လူဒွေဝို လှည့်ဖြားနေဇာဖြစ်ရယ်' ဆိုပီး ပြောဂေ့လေရယ်။ 13အယ်ဘေမဲ့ ဂျူးလူမျိုးကြီးကဲဒွေဝို ကြော့ဂေ့ရိတွက် ဟယ်သူဟမှ ကိုယ်တော်ကြောဝို ပွမ့်ပွမ့်လန်းလန်း ပြောရဲဂေ့ရ။ 14ပွဲတော်ကာလ ကူဝို့ခီတဝက်လော့ရော့ခါမှာ ကိုယ်တော်ယေရှုဟ ဗိမာန်တော်ဝမ်းထဲဝို သွားပီး စပီး ဟောပြောသန်ကြားလေရယ်။ 15အဲမိုခီမှာ ဂျူးလူမျိုးကြီးကဲဒွေဟလဲ အံ့ဩမှင်သက်ဂေ့ပီး "အယ်မိုလူဟ သန်ယူဇာမှေ့ဘဲန ဟဲဂျော့ အဲလော့သိနေတတ်နေရနူး" ဆိုပီး ပြောဂေ့လေရယ်။ 16ကိုယ်တော်ဟ 'ငါ့ရဲ့သွန်သန်ဟောပြောချင့်ဒွေဟ ငါကိုယ်တိုင်ရဲ့သွန်သန်ဟောပြောဇာဒွေမှုဘဲန ငါ့ဝိုစေလွှတ်လိုက်ဝိုအရှင်ရဲ့ သွန်သင်ချင့်ဒွေဖြစ်ရယ်။ 17ဟယ်သူမဆို ငါ့ဝိုစေလွှတ်လိုက်ဝို အရှင်ရဲ့လိုတော်ဝို ဆော်ဝက်လိုဝို ဆန္ဒရှေ့မယ်ဆိုဝါ ငါ့ရဲ့သွန်သန်ချင့်ဒွေဟ ဘုရားရှင်ဆီဟလာလော၊ အဲမျိုးမုဘဲနေဆိုဝါ ငါဟ ငါ့ဇာငါဘဲ့ ဟောပြောနေဇာလောဆိုဇာဝို သိဂေ့လိမယ်ဖြစ်ရယ်။ 18မိမိဘုန်းအသရေဝိုရှာဝိုလူဒွေဟ မိမိသဘောအတိုင်းဘဲ့ ဟောပြောတတ်ဂေ့ရယ်။ မိမိဝိုစေလွှတ်ဝိုသူရဲ့ဘုန်းကျက်သရေဝိုရှာဝိုလူကလလော ဖြော့မတ်သူဖြစ်ပီး အဲမိုလူမှာ ဟဲရာဇာလဲ မှားဇာမှေ့ရ။ 19မောရှေဟ ပညတ်တရားဒွေဝို နန်းနို့ဝို ပေးထားရယ်မုဝလော။ အဲမိုဇာဝို နန်းနို့ယော့မှ လိုက်နာဇာမှေ့ရ၊ နန်းနို့ဟ ငါ့ဝို ဟဲဂျော့သတ်ဝို့ကြံနေဂေ့နူး' ဆိုပီး မိတော်မူလေရယ်။ 20လူထုပရိသတ်ဒွေဟလဲ 'သင့်ဝို ကောဆိုးဝါး ဝမ်ပူးနေရယ်၊ သင့်ဝို ဟယ်သူဟ သတ်ဝို့ ကြံနေရိနူး' ဆိုပီး မေးဂေ့လေရယ်။ကိုယ်တော်ယေရှုဟ သူ့နို့ဝို 'ငါဟ အံ့ဖွယ်မှုတခုဝို လုပ်ခါမှာ နန်းနို့ဂူလုံးဟ အံ့ဩဂေ့ရယ်။ 21ကိုယ်တော်ယေရှုဟ သူ့နို့ဝို 'ငါဟ အံ့ဖွယ်မှုတခုဝို လုပ်ခါမှာ နန်းနို့ဂူလုံးဟ အံ့ဩဂေ့ရယ်။ 22မောရှေဟ နန်းနို့ဝို ရေဖျားလှီးခြင်း မြင်ဂလာကြောဝို သွန်သန်ခဲ့လေရယ်။ မှန်ဟ အယ်မိုဓလေ့ဟ မောရှေဆီဟမုဘဲန ငါဒို့ရဲ့ဘိုးဘေးဒွေဆီဟ လာဇာဖြစ်ရယ်။ အဲဂျော့ နန်းနို့ဟ ဥပုသ်နေ့မှာ သားယော့ကျားဒွေဝို ရေဖျားလှီးပေးဇာဖြစ်ရယ်။ 23မောရှေရဲ့ပညတ်ဝို လိုက်နာဝို့တွက် ဥပုသ်နေ့မှာ ရေဖျားလှီးမြင်ဂလာဝို ခံယူတော်မူဇာဖြစ်မယ်ဆိုဝါ ဥပုသ်နေ့မှာ လူတယော့ဝို ကောပကတိဖြစ်စေဝိုငါ့ဝို ဟဲဖြစ်ရိနန်းနို့စိတိုဂေ့ရနူး 24ပြင်ပန်းဝိုဘဲ့ဂေ့ပီး ဆုံးဖြတ်ဂေ့ဘဲန ဖြော့မတ်မှန်ကန်စွာဆုံးဖြတ်ဂေ့လော့' ဆိုပီး မိတော်မူလေရယ်။ 25အဲခါမှာ ဂျေရုဆလင်ဗြို့သားချို့ဟလဲ 'ကြီးကဲဒွေဟ အယ်မိုလူဝို သတ်ဝို့ရှာနေဂေ့ရယ်မုဝလော။ 26ကေ့လိုက်ဂေ့၊ သူဟ လူပုံလယ်မှာ ဟောပြောနေပေမဲ့ သူ့နို့ဟ ဟဲရာဇာလဲပြောဂေ့ရ။အယ်မိုလူဟ ခရစ်တော်စစ်စစ်ဆိုဇာဝို ကြီးကဲဒို့သိနေဂေ့လော။ 27အယ်ဘေမဲ့ အယ်မိုလူဟ ဟယ်ရပ်ဟ လာဇာဝို နို့သိဂေ့ပေမဲ့ ခရစ်တော် ဟ ဟယ်ရကြွလာမယ်ဆိုဇာဝို ဟယ်သူလဲသိနိုင်ဂေ့မှာမုဝ' ဆိုပီး ပြောဂေ့လေရယ်။ 28ကိုယ်တော်ဟလဲ ဗိမာန်တော်မှာ ဆစ်လက်ပီး ဟောပြောသန်ကြားပီး ကြွေးကြော်တော်မူဇာဟလော 'နန်းနို့ဟ မှန်တကယ်ဘဲ့ ငါ့ဝိုသိပီး ငါဟယ်ရလာဇာဝို သိရယ်ဆိုပီး ထံနေဂေ့လော။ ငါဟ ငါ့ဆန္ဒနငါလာဇာမုဝ။ ငါ့ဝိုစေလွှတ်ဝိုသူဟ သစ္စာတရားနပလဲ့ဇုံရယ်။ နန်းနို့ သူ့ဝိုသိဂေ့ရ။ 29အယ်မိုသူဟ ငါ့ဝိုစေလွှတ်ပီး ငါဟ သူ့ဆီဟလာသူဖြစ်ရိဂျော့ ငါဟ သူ့ဝိုသိရယ်။ 30အဲခါမှာ လူဒွေဟ ကိုယ်တော်ဝို ဖမ်းဝို့ကြိုးစားဂေ့ပေမဲ့ သူ့ခီမကလသေးဘဲရိတွက် သူ့ဝို ဟယ်သူမှ လက်ဖျားနကိုထိဂေ့ရ။ 31အယ်ဘေမဲ့ လူများကီးဟ ကိုယ်တော်ဝိုယုံကြည်ပီး ' ခရစ်တော်ကြွတော်မူလာဝိုခီမှာ အယ်မိုလူပြုဇာထက် ပိုပီးများဝို အံ့ဖွယ်နမိလက္ခဏာဝို ပြုမယ်လော'ဆိုပီး ပြောဂေ့လေရယ်။ 32အဲခီမှာ ဖာရိရှဲဒွေဟ ကိုယ်တော်ရဲ့ကြောဝို လူထုပရိသတ်ကီးဟ တိတိရားပြောဆိုနေဇာဝို ကြားခီမှာ ပုရောဟိတ်ကြီးကဲဒွေန ဖာရိရှဲဒွေဟ ကိုယ်တော်ယေရှုဝိုဖမ်းဝို့ ဗိမာန်တော်စော့ဒွေဝို စေလွှတ်လိုက်လေရယ်။ 33အယ်ဘေမဲ့ ကိုယ်တော်ယေရှုဟ သူ့နို့ဝို 'ငါဟ နန်းနို့နတူတူ ရှစ်တားဘဲ့ရှေ့ပီး ငါ့ဝိုစေလွှတ်လိုက်ဝိုလူဆီဝို ပလန်ကြွမှာဖြစ်ရယ်။ 34 နန်းနို့ဟ ငါ့ဝိုရှာဖွီဂေ့ပေမဲ့ တွီ့ဂေ့မှာမုဘဲန ငါရှေ့ဝိုနေရာဝိုလဲ နန်းနို့လာနိုင်ဂေ့မှာမုဝ' ဆိုပီး မိတော်မူလေရယ်။ 35ဂျူးလူမျိုးကြီးကဲဒွေဟ 'ငါဒို့ရှာဖွီနိုင်ဘဲနေအော် အယ်လူဟ ဟယ်နေရာဝို သွားဝို့နူး။ သူဟ ဂရိလူမျိုးကြားမှာ ဂွဲတပြားနဖြစ်နေဝို ဂျူးလူမျိုးဒွေနတူတူနေထိုင်ပီး ဂရိလူမျိုးဒွေဝို သွန်သန်ပေးဝို့ကြံစည်နေဇာလော။ 36နန်းနို့ဟ ငါ့ဝိုရှာဖွီဂေ့ပေမဲ့ တွီ့ဂေ့မှာမုဘဲန ငါရှေ့ဝိုနေရာဝိုလဲ နန်းနို့လာနိုင်ဂေ့မှာမုဝ' ဆိုပီး သူပြောဝိုဂါး ဓိပါယ်ဟ ဟဲမျိုးနူး' ဆိုပီး ချင်းချင်းပြောဆိုဂေ့လေရယ်။ 37အဲနော့ ပွဲတော်ကာလရဲ့နော့ဆုံးရစ်ဖြစ်ဝို ရေးကီးဆုံးနေ့မှာ ကိုယ်တော်ဟ ရပ်ပီး သံကလယ်ကီးနကြွေးကြော်ဇာဟ 'ရေငတ်ဝိုလူဒွေ ငါ့ဆီဝို လာသော့ဂေ့လော့။ 38 ငါ့ဝိုယုံကြည်ဝိုသူဒွေဟ ကျမ်းစာမှာဖော်ပြထားဝိုတိုင်း အဲမိုလူဒွေထဲမှာ သက်ရေဒွေ မြဲဒမ်းစီးဆင်းနေလိမယ်' ဆိုပီး ဖြစ်ရယ်။ 39သူ့ဝို ယုံကြည်သူဒွေ လက်ခံရရှေ့မဲ့ ဉာဏ်လင်းတော်ကြောဝို ကိုယ်တော်ယေရှု မိတော်မူဇာဖြစ်ရယ်။ ကိုယ်တော်ရဲ့ ဘုန်းအသရေ ထံရှားလာဇာမှေ့သေးဘဲတွက်ဂျော့ ဉာဏ်လင်းတော်ရဲ့ ဘုန်းအသေဝို ပေးအပ်တော်မူဇာမှေ့သေးရ။ 40လူထုပရိသတ်ထဲဟချို့ဟ အယ်မိုဂါးဝိုကြားရဝိုခါမှာ 'အယ်မိုလူဟ အရိယာသူတော်ဇင် စစ်စစ်ဖြစ်ရယ်။'ဆိုပီး ပြောဂေ့လေရယ်။ 41ချို့ဟလဲ 'အယ်လူဟ ခရစ်တော်ဖြစ်ရယ်' ဆိုပီး ပြောဂေ့ပီး ခြားသူဒွေဟလဲ 'ခရစ်တော်ဆိုဝါ ဂါလိလဲနယ်သား ဖြစ်ရလော'။ 42ကျမ်းစာမှာ ခရစ်တော် ဟ ဘုရင်ဒါဝိဒ်မျိုးနွယ်ဟရော၊ ဘုရင်ဒါဝိဒ်နေရာဌာနဖြစ်ဝို ဗက်လင်ဗြို့သားဖြစ်ရမယ်ဆိုပီး ဖော်ပြထားရယ်မုဝလော။'ဆိုပီး ပြောဂေ့လေရယ်။ 43အဲဂျော့ လူထုပရိသတ်ကြားထဲမှာ အုပ်စုကွဲနေဂေ့လေရယ်။ 44ချို့လူဒွေဟ ကိုယ်တော်ဝို ဖမ်းရှင်ဂေ့ပေမဲ့ ဟယ်သူဟမှ လက်ဖျားနဂို ထိဂေ့ရ။ 45ဗိမာန်တော်စော့ဒွေ ပလန်လာခါမှာ ပုရောဟိတ်ကြီးကဲဒွေန ဖာရိရှဲဒွေဟ 'ယေရှုဝို ဟဲဖြစ်ဂျော့ရိ ခေါ်လာဂေ့ဘဲနူး' ဆိုပီး မေးဂေ့လေရယ်။ 46စော့ဒွေဟလဲ 'အဲမိုလူမျိုး ဟယ်သူဟမှ ဟောပြောဖူးရ' ဆိုပီး ဖြေဂေ့လေရယ်။ 47ဖာရိရှဲဒွေဟ ဗိမာန်တော်စော့ဒွေဝို ' နန်းနို့လဲ လှည့်စားခံခဲ့ရပီ မုဝလော။ 48ကြီးကဲဒွေန ဖာရိရှဲဒွေကြားမှာ သူ့ဝိုယုံကြည်လူ ယော့လော့ဂိုမှရှေ့ဘဲ့လော။ 49ပညတ်တရားဝို မသိနားမလည်ဂေ့ဝို အယ်မိုလူထုပရိသတ်ဟ ဘုရားရှင်ရဲ့ ပြစ်ဒဏ်ပေးဇာဝို ခံရဝို့လူဒွေဖြစ်ဂေ့မယ်' ဆိုပီး ပြောဂေ့လေရယ်။ 50အဲမိုဖာရိရှဲဒွေထဲဟယော့ဟ ကိုယ်တော်ဆီဝိုလာဖူးဝို နိကောဒင်ဖြစ်ရယ်။နိကောဒင်ဟ သူ့နို့ဝို 51ငါဒို့ရဲ့ပညတ်တရားဟ လူတယော့ဝို သူ့ဆီဟ ဟဲရာဇာလဲ ကြားနာဇာမှေ့ရ၊ သူဟဲရာဇာဝိုလုပ်နေရယ်တိုဇာဝို သိဘဲန စီရင်ပါလော'ဆိုပီး ပြောခီမှာ 52အဲမိုလူဒွေဟ 'နန်လဲ ဂါလိလဲနယ်သားလော၊ ဟဲမျိုးအရိယာသူတော်ဇင်မှ ဂါလိလဲနယ်မှာ ပေါ်ထွန်းရဆိုဇာဝို ရှာဖွီလေ့လာဂေ့လော့'ဆိုပီး သူ့ဝို ပလန်ပြောဂေ့လေရယ်။ 53အဲမိုလူဒွေဟ 'နန်လဲ ဂါလိလဲနယ်သားလော၊ ဟဲမျိုးအရိယာသူတော်ဇင်မှ ဂါလိလဲနယ်မှာ ပေါ်ထွန်းရဆိုဇာဝို ရှာဖွီလေ့လာဂေ့လော့'ဆိုပီး သူ့ဝို ပလန်ပြောဂေ့လေရယ်။
Actualmente seleccionado:
John 7: ttpv-rv
Destacar
Compartir
Copiar
¿Quieres tener guardados todos tus destacados en todos tus dispositivos? Regístrate o inicia sesión
This translation of the Taungyo Bible is © 2024 by DMS-Dhamma Mate Swe Association. It may not be reproduced in whole or in part in any form or by any means without the prior written permission of DMS-Dhamma Mate Swe Association.