John 10
10
1ကိုယ်တော်ယေရှုဟ ' "နန်းနို့ဝို ငါမှန်ပြောရမယ်ဆိုဝါ သိုးခြံထဲဝို ခေါ့ပေါ့ဟ ဝမ်ဘဲန ခြားနည်းန ကျော်ဝမ်ဝိုလူဟ ခိုး မလဘဲ့ဖြစ်ရယ်။ 2အယ်ဘေမဲ့ ခေါ့ပေါ့ဟနေ ဝမ်လာဝိုလူဟ သိုးဒွေရဲ့ သိုးထီးဖြစ်ပေရယ်။ 3ခေါ့ပေါ့စော့ဟ သူ့ဝို ခေါ့ပေါ့ဖွမ့်ပေးတတ်ရယ်။ သိုးဒွေဟ သူ့သံဝို နားထော်တတ်ဂေ့ရယ်။ သူဟ သူ့သိုးဒွေဝို နော်မယ်ခေါ်ပီး သိုးခြံပလန်ဝို ခေါ်ဝါးတတ်လေရယ်။ 4သိုးထီးဟ ရှေ့သမျှသိုးဒွေဝို ခေါ်ပီး သူဟ သိုးဒွေရှေ့ဟနေသွားပီး သိုးဒွေဟ သူ့သံဝို သိရိဂျော့ သူ့နော့ဝို လိုက်လာလေရယ်။ 5သူ့နို့ဟ ဇီးဒွေသံဝို သိဘဲတွက်ဂျော့ ဇီးဒွေနော့ဝို ဟယ်ခါမှလိုက်ဘဲန ဇီးဒွေဆီဟနေ ထွက်ပလေးတတ်ဂေ့လေရယ်'ဆိုပီး မိတော်မူလေရယ်။ 6ကိုယ်တော်ယေရှုဟ အဲမိုလူဒွေဝို အယ်မိုပုံဥပမာဒွေဝို ပြောပြနေဂိုမှ ကိုယ်တော်ရဲ့ ဆိုလိုရင်းဓိပ္ပာယ်ဝို နားမလည်ဂေ့ရ။ 7ကိုယ်တော်ယေရှုဟ ထပ်ပီးပြောဇာဟ 'ငါမှန်ပြောရမယ်ဆိုဝါ ငါဟ သိုးဒွေတွက် ခေါ့ပေါ့ဖြစ်ရယ်။ 8ငါ့ရှေ့ဟနေ ဦးဆုံးရော့လာဝိုသူဒွေဟ ခိုးန မလဒွေဘဲ့ဖြစ်ရယ်။သိုးဒွေဟလဲ အဲမိုလူဒွေရဲ့ ဂါးဒွေဝို နားမထော်ဂေ့ရ။ 9ငါဟခေါ့ပေါ့ဖြစ်ရယ်။ ဟယ်သူမဆို ငါမည်နာမအားနဝမ်မယ်ဆိုဝါ ကယ်တံရှင်းခံရမယ်။ အဲမိုလူဟ ဝမ်ထွက်ပီး ကျစ်စားဝိုနေရာဝို တွီ့ရလိမယ်။ 10ခိုးဒွေဟ ခိုးယူ သတ်ဖြတ်၊ ဖျစ်စီးဝို့တွက်ဘဲ့ လာတတ်ဂေ့ရယ်။ငါကလလော ငါ့ရဲ့သိုးဒွေဝို သက်ဝိုရရှေ့ပီး ပီးပလဲ့စုံဝိုဘဝဝို ရရှိစေဝို့လာဇာဖြစ်ရယ်။ 11ငါဟ သိုးထီးကောဖြစ်ရယ်။ သိုးထီးကောဆိုဇာဟ ကိုယ့်သိုးဒွေဝို ကယ်တံဝို့ သူ့သက်ဝို ပေးအပ်ထားပီးဖြစ်ရယ်။ 12လူငှားဟ သိုးထီးမုဘဲမျိုး သိုးဝိုလဲ ပိုင်ဆိုင်ဇာမုဝ။ ဝံပုလွေတကော် လာနေဇာဝို ဗြင်ခါမှာ သိုးဒွေဝို စွန့်ပစ်ပီး ထွက်ပလေးမှာဖြစ်ရယ်။ အဲဂျော့ ဝံပုလွေဒွေဟ သိုးဒွေဝို ဖမ်းယူဆွဲစားပီး ဂွဲတပြဲဖြစ်စေမယ်ဖြစ်ရယ်။ 13လူငှားဟ ငှားရမ်းထားသူဘဲ့ဖြစ်ရိတွက် သိုးဒွေရဲ့ရေးကိစဝို ဂရုစိုက်ဘဲန ထွက်ပလေးဇာဖြစ်ရယ်။ 14ငါဟ သိုးထီးကောဖြစ်ရယ်။ ငါဟ သိုးဒွေဝို သိမျိုး ငါ့သိုး ဒွေဟ ငါ့ဝိုသိရယ်။ 15အဲမိုမျိုးဘဲ့ ငါ့ရဲ့ဖခမည်းတော်ဟ ငါ့ဝို သိတော်မူမျိုး ငါဟလဲ ငါ့ဖခမည်းတော်ဝို သိလေရယ်။ ပီးရယ်ဆိုဝါ ငါ့သိုးဒွေအတွက် ငါ့သက်ဝိုစွန့်ဝို့ လိုရှေ့ပေရယ်။ 16ငါ့ဆီမှာ အယ်မိုသိုးခြံထဲဟ မုဘဲဝို ခြားသိုးဒွေရှေ့သေးရယ်။ အဲမိုသိုးဒွေဝိုလဲ ငါခေါ်ဆော်လာရမှာဖြစ်ရယ်။ သူ့နို့ဟလဲ ငါ့သံဝိုနားထော်ဂေ့ရိတွက် သိုးအုပ်ဟ အုပ်ဒဲဖြစ်ပီး သိုးထီးဟလဲ ဦးဒဲဘဲ့ဖြစ်လိမယ်ဖြစ်ရယ်။ 17ငါဟ သက်ဝို တဖန်ပလန်ရယူဝို့ ငါ့ရဲ့သက်ဝိုစွန့်ရိတွက် အဖဘုရားရှင်ဟ ငါ့ဝို ရှစ်တော်မူရယ်။ 18ဟယ်သူဟမှ ငါ့သက်ဝို ငါ့ဆီဟနှုယူမှာမုဝ။ ငါ့ဆန်ဒနေန ငါ့သက်ဝို ငါ့စွန့်လွှတ်မှာဖြစ်ရယ်။ ငါ့မှာ ငါ့သက်ဝို စွန့်လွှတ်ပိုင်ခွမ့်ရှေ့မျိုး အဲမိုဇာဝို ပလန်လည်ရယူပိုင်ခွမ့်လဲရှေ့ရယ်။ငါဟ အဲမိုမိဝို ငါ့ခမည်းတော်ဆီဟ ရရှေ့ဇာဖြစ်ရယ်။ 19အယ်မိုဂါးဒွေဂျော့ ဂျူးလူမျိုးဒွေကြားမှာ ဘောထားကွဲလွဲမှုဒွေ ရှေ့ဂေ့လေရယ်။ 20အဲမိုလူဒွေထဲဟ များစုဟ 'သူဟ ကောဆိုးဝါးပူးကပ်နေရိတွက် ရူးနေဇာဖြစ်ရယ်။ ဟဲရာဂျော့ သူ့ဂါးဒွေဝို ယုံနေဂေ့နူး'ဆိုပီး ပြောဂေ့လေရယ်။ 21ခြားလူဒွေဟ 'အယ်မိုဂါးဒွေဟ ကောဆိုးဝါးပူးကပ်နေဝိုလူရဲ့ဂါးဒွေ ဖြစ်နိုင်ရ၊ ကောဆိုးဝါးဟ မျစ်မမြင်ဝို ပလန်ဗြင်စေနိုင်ရိလော'ဆိုပီး ပြောလေရယ်။ 22အဲမိုခီဟ ဆောကာလဖြစ်ရိတွက် ဂျေရုဆလင်ဗြို့မှာ ဂျူးလူမျိုးဒွေရဲ့ ဗိမာန်တော်သန့်စင်ခြင်းပွဲတော်ခုရှေ့လေရယ်။ 23ကိုယ်တော်ယေရှုဟ ဗိမာန်တော်ဝန်းထဲမှာရှေ့ဝို ရှောလမုန်မုဒ်ဆော်မှာ လမ်းရှော့ကြွတော်မူနေခီမှာ 24ဂျူးလူမျိုးဒွေဟ ကိုယ်တော်ရဲ့ပတ်ပတ်လည်မှာ စုရုံးရော့လာဂေ့ပီး 'သင်ဟ နို့ဝို ဟယ်လော့ကြာအော် မသေချာမှုဒွေန ထားရှေ့နေမယ်နူး၊ သင်ဟ ကယ်တံရှင်မေရှိယ မှန်ရယ်ဆိုဝါ နို့ဝိုသေချာပြောပြပါ'ဆိုပီး ပြောဆိုဂေ့လေရယ်။ 25ဂျူးလူမျိုးဒွေဟ ကိုယ်တော်ရဲ့ပတ်ပတ်လည်မှာ စုရုံးရော့လာဂေ့ပီး 'သင်ဟ နို့ဝို ဟယ်လော့ကြာအော် မသေချာမှုဒွေန ထားရှေ့နေမယ်နူး၊ သင်ဟ ကယ်တံရှင်မေရှိယ မှန်ရယ်ဆိုဝါ နို့ဝိုသေချာပြောပြပါ'ဆိုပီး ပြောဆိုဂေ့လေရယ်။ 26အယ်ဘေမဲ့ နန်းနို့ဟ ငါ့ဝိုယုံဂေ့ရ။ ဟဲဂျော့ဆိုဝါ နန်းနို့ဟ သိုးဒွေမုဘဲတွက်ဖြစ်ရယ်။ 27ငါ့သိုးဒွေဟ ငါ့သံဝို နားထော်ဂေ့ရယ်။ ငါဟ သူ့နို့ဝိုသိပီး သူ့နို့ဟလဲ ငါ့နော့ဝိုလိုက်ဂေ့ရယ်။ 28သူ့နို့ဝို နိစထာဝရသက်ဝို ငါပေးမှာဖြစ်ရယ်။ သူ့နို့ဟ ဟယ်ခါမှ ပျစ်စီးရှင်းဝို ရော့နိုင်ဘဲပြင် ဟယ်သူဟမှ ငါ့ဆီဟ သူ့နို့ဝိုခွဲထုနိုင်ရ။ 29သူ့နို့ဝို ငါ့ဆီပေးအပ်တော်မူဝို ငါ့ရဲ့ဖဘုရားရှင်ဟ ခြားသူဒွေထက် ကီးမြတ်ဇာဖြစ်ရိတွက် ဟယ်သူဟမှ ငါ့ဖဘုရားရှင်ဆီဟ သူ့နို့ဝို ခွဲထုနိုင်မှာမုဝ။ 30'ငါ့ခမည်းတော်န ငါဟ သားဒဲဖြစ်ရယ်'ဆိုပီး ပလန်လည်မိတော်မူလေရယ်။ 31အဲခါမှာ ဂျူးလူမျိုးဒွေဟ ကိုယ်တော်ဝို ဂဲနပေါ့ဝို့တွက် ကလော့ခဲဒွေဝို ထပ်ပီးကော့လေရယ်။ 32အယ်ဘေမဲ့ ကိုယ်တော်ယေရှုဟ 'ငါဟ ခမည်းတော်ဆီဟ ကောမွန်ဝို မှုကိစဒွေဝို နန်းနို့ဝို ပြသပီးပီဖြစ်ရယ်။ အဲမိုမှုကိစဒွေထဲဟ ဟဲရာမှုကိစဂျော့ နန်းနို့ဟ ငါ့ဝိုဂဲနပေါ့ဝို့နူး'ဆိုပီး မေးတော်မူလေရယ် 33ဂျူးလူမျိုးဒွေဟ ကိုယ်တော်ယေရှုဝို 'ကောဝိုမှုဝို ပြုလုပ်ရိတွက် သင့်ဝိုဂဲနပေါ့မှာမုဝ၊ လူစင်စစ်ဖြစ်ပီး ဘုရားရှင်ယော်ဆော်ပီး ဘုရားရှင်ဝို စော်ကားရိတွက် ဂဲနပေါ့ဇာဖြစ်ရယ်'ဆိုပီး ပြောဆိုဂေ့လေရယ်။ 34ကိုယ်တော်ယေရှုဟ 'နန်းနို့ရဲ့ပညတ်ကျမ်းမှာ 'ငါဆိုသည်ကား နန်းနို့ဟ ဘုရားဒွေဖြစ်ကြရယ်' ဆိုပီး ရေးရားရယ်မုဝလော။ 35ကျမ်းစာဟ မြဲဒမ်း မှန်ကန်ရယ်ဆိုဇာဝို နို့သိဂေ့ရယ်၊ ဘုရားရှင်ဟ သူ့ရဲ့နှုထွက်ဂါးဒွေဝို ပေးအပ်ဇာခံရသူဒွေဝို ဘုရားဒွေဆိုပီး ပြောရားရယ်မုဝလော။ 36ငါကလလော ခမည်းတော်ဟ ငါ့ဝို ဝွီးချယ်ပီး စေလွှတ်တော်မူဝိုလူဖြစ်ရယ်။ အဲမျိုးဖြစ်မယ်ဆိုဝါ ငါဟ ဘုရားရှင်ရဲ့သားတော်ဖြစ်ရယ်ဆိုပီး ငါပြောဇာဝို ဟဲရာဂျော့ ငါဟ ဘုရားရှင်ဝို စော်ကားပြောဆိုရယ်ဆိုပီး နန်းနို့ဟ ပြောနေဂေ့နူး 37ဂယ်ရိ ငါဟ ဘုရားရှင်ရဲ့ မှုတော်ဝို လုပ်ဆော်နေဇာ မှေ့ဘဲနေဆိုဝါ ငါ့ဝို ယုံကြည်ဂေ့န။ 38အယ်ဘေမဲ့ ငါဟ လုပ်ဆော်နေရယ်ဆိုဝါ နန်းနို့ဟ ငါ့ဝို ယုံကြည်ဘဲနေဂိုမှ မှုတော်ပေါ်ဝို ယုံကြည်ဂေ့လော့။ အဲမိုမျိုးမှ ခမည်းတော်ဟ ငါ့မှာရှေ့ပီး ငါဟ ခမည်းတော်မှာရှေ့ကြောဝို နန်းနို့ သိနားလည်ဂေ့မှာဖြစ်ရယ်'ဆိုပီး မိတော်မူလေရယ်။ 39အဲခါမှာ လူဒွေဟ ကိုယ်တော်ဝို ဖမ်းဝို့ ထပ်ကြိုးစားဂေ့လေရယ်။ ကိုယ်တော်ဟ သူ့နို့လက်ဟ လွတ်ပီး ကြွတော်မူသွားပြန်လေရယ်။ 40ကိုယ်တော်ဟ ဝွီးဝို ပလန်လည်ထွက်ခွာသွားပီး ဂျော်ဒန်ဗြစ်လွန်မှာရှေ့ဝို ယောဟန် ဟိုးစဒူးဟ ရေနှစ်မြင်ဂလာပေးခဲ့ဝို နေရာဝို ကြွတော်မူပီး အဲမိုနေရာမှာ နေထိုင်တော်မူလေရယ်။ 41လူဒွေဟလဲ ကိုယ်တော်ဆီဝို လာဂေ့ပီး ' ယောဟန်ဟ ဂယ်ဒန်း ဟဲရာနမိလက္ခဏာမှ ပြရစ်ဇာမှေ့ဘေမဲ့ အယ်မိုလူရဲ့ကြောဝို ယောဟန်ပြောရစ်ဇာဟလော မှန်ကန်လေရယ်'ဆိုပီး ပြောဂေ့လေရယ်။ 42အဲမိုမျိုးနဘဲ့ အဲမိုနေရာမှာ ကိုယ်တော်ဝို လူများကီးဟ ယုံကြည်ဂေ့လေရယ်။
Actualmente seleccionado:
John 10: ttpv-rv
Destacar
Compartir
Copiar
¿Quieres tener guardados todos tus destacados en todos tus dispositivos? Regístrate o inicia sesión
This translation of the Taungyo Bible is © 2024 by DMS-Dhamma Mate Swe Association. It may not be reproduced in whole or in part in any form or by any means without the prior written permission of DMS-Dhamma Mate Swe Association.