Mataafa Dikoota 4
4
Koda Qa'ateta kooto
1Yaahiwwe ka Muuse isho Arooni kide, 2“Lawaata oppaayye kaffaasso ka toollaassotin sanynyeeta Qa'ati dike. 3Ka a tukkaniyyo kelopa koda' deena ettansha a parraasso kunda sessaayye paayyatte haka kunda keniti ca dike. 4Koda sanynyeeta Qa'ati nefo tukkaniyyo kela mehadda akata qulqullaawe qara tooyeta.
5Oto samayta poraadi a oppa safareppaayye xaanooyye, Arooni isho hellaadi a diira tukkanase a Yaahiwweti otanta karopa kullan ka kaarantase tura koden alle' furan ka taapotase a maakkumatin maran; 6ka kollatta a pahasame qara dekaneew ka ohaata immakkootan moonta pahato qara afan; ka ishin haada'e karopa molookadda kalshan.
7Ka tarabbeesa a kalisoota laaqqota qara ohaata a moonta pahato afen; ka qara'e, saahinna ka jilfada ka tiwwada ka moqorqoraddasene a kalisoota ikkayta qara' xaayan; umma kalisootase a laaqqota kuyyaata mina kalinnaan qara in dapannin. 8Ka ohaata a tiima qara uwwishan ka kollatta qolpayta a pahasamen qara dekan; ka porraasso karopa molookadda kalshan.
9Ka ohaata a tiima qeedeneew ka meehase qara ipsa xaaynaan qara afen ka ipsada ka meehaaysho a taraan sahanaan ka paallawwaasso a taraan haaddinaane isho meehaaysho a kara sayteeta oorinnaan piisa qaran deken. 10Ka meehase qara ipsa xaaynaan isho meeha a quda co piisa, oyleeta a kollaya qolpaya oppa kodameetin qara uwwishen ka molookase ishin haanaan qara' xaayen.
11Ka ohaata moonta pahato porase a kalisoota a warqeeta qaran deken ka qara oyleetase a kollaya qolpaya oppa kodamte qara uwwishen; ka poraadi karopa molookadda kalshen. 12Ka tukkanase qulqullaawe kelaayye mehaddasene kodaan koonaan piisa qeedeneew ka ohaata moonta pahato qara' xaayen ka oyleetase kollaya qolpaya oppa kodamten qara deken ka molookase ishin haanaan qara' xaayen. 13Ka porase a kalisoota qara alle tara sahen ka qara ohaata awla uwwishen. 14Ka mehaddasene porase a kalisoota qara kodaan koonaane, meeha a apittan opannaan ka qaptoowwa ka meeha a taran sahnaan isho saahinnaasso a qorewwa pappaha qara' xaayen; ka kollattase a qolpa pahasame qaran deken ka poraadi karopa molookadda kalshen. 15Oto Arooni isho hellaadi a diira tukkanase qulqullaawe isho mehaddaadi piisa quda dekeeta dikkishan kammaayye, saara ka xaanooyye, Qa'ateta a mehaddoosen haadeta sookto; ma xoori akka in leenini'i, mehaddoosen quda kaya ishootta parpaaccisni in kitto; mehaddoosen a tukkana Waaqa a Qa'ateta haadeta parpaaccisnitta tooy sene.
16Ali'asaari innasene a Arooni a qeesitta, sayteeta a ipsa koddinitto ka tankartase alaawnitto ka kalisoota unta a kuyyaata mina kallitto isho sayteeta a daatammitto qara saaruma qapnaada; ka tukkanase a Waaqa ka porase qulullaawe isho mehadda a kara ca piisa qara tooya.”
17Yaahiwwe ka Muuse isho Arooni kide, 18“Lawaata oppaayye kafa Qa'ateta akka in pirammin ka in pannini tooyta. 19Oto mehaddasene qulqullaawe kapopa dehaannaaneeyye akka caadan ka in leenini'i, ishina asse ishootta koda: Arooni isho hellaadi a tikase qulqullaawte karopa kullen ka matta mina wa koda ishootta faanitta ishootta' qooten; ka wa haadeta ishootta faanitta ishootta upnayshen. 20Ma xoori Qa'ateta akka in leenini'i, tukkana kelopa kulleeta ka wa qulqullaawe ildaan nefo tooyyatta ishootta faani in kitto.”
Koda kafa Kershooni
21Yaahiwwe ka Muuse kide, 22“Kaffa isho toollaassotin sanynyeeta Kershooni dike; 23diira a para kunda sessa paayyatte a haka para kunda keniti ca ka tukkanase a Waaqa kelopa deena ka koda koda kaye piisa dike; 24Kershooneta koda kooto ka haadeta haato tooy sede; 25ishootta kaaranta a tukkana Waaqa a tula qara' qate ka a xati kela' qate haadan; ka oyleetase kollatta qolpa oppa kodamte qaran dekan; ka kaarrantase a tukkana kodeeta Waaqa qaran dekan; ka kaarrantase xarra tukkana Waaqa qaran deken haadan. 26Ka kaarantaddasene a oxinta paahapaha ka tukkana Waaqa isho porase a kalisoota kapa tiitaysheti ka kaarrantadda a xarra paapaha isho watarowwaasso ka mehadda pila a kodooseti kodame piisa haadan. 27Koda a Kershooneta koonitto ka wa haanitta isho wa koonitta piisa'e, Arooni isho hellaadi a diira qara ajaja teyyatta; attikka wa ishootta haadane piisa ishootta kittita. 28Koda a kafa Kershooni tukkana Waaqa kela kodo tooy sede; Itamaari inna Arooni a qeesitta ka kodaaysho piisa qara tooya.
Koda a kafa Meraari
29A kafa Meraariiw, kaffaasso ka toollaassotin ishootta dike. 30ka a tukkanase a Waaqa kelopa deena ka koda koda ettansha a parraasso kunda sessa paayyatte a haka para kunda keniti ca piisa taafe. 31Tukkanase a Waaqa kelaayye kodaaysho a ishi kitamen ka kodan piisa tooy sede: ishootta saanqada a xarra ka teehowwaasso ka tuudda isho kiriyyaasso 32ka tuudda a oxinta paapaha ka kiriyyaasso ka shikaalla tukkana ka watarowwaasso isho mehadda a kodooseti parpaacciisna piisa haadan. 33Saaruma a Itamaari a inna Arooni a qeesittatinni koda a kafa sanynyeeta Meraari tukkana Waaqa kela kooto tooy sede.”
Lekuma a kafa Lawaata
34Muuse ka Arooni isho saarra samayta, sanynyeeta Qa'ati kaffaasso isho toollaassotin diken. 35Ka para kunda sessaayye paayyatte haka para kunda keniti'i, nama a tukkana Waaqa kela koda koda deeno piisa diken. 36A kaffaassotin dikame kan nama kuma lakki ka dippa tappa ka kunda keni kayni. 37Akka Yaahiwwe Muuse ajaje qara'e, kaffasene a Qa'ati tukkana Waaqa kela koda kode a Muuse isho Arooni dikene tooy sene.
38Sanynyeeta Kershooni a kaffaasso ka toollaassotin dikamte, 39a tukkana Waaqa kela koda koda kaye a parraasso kunda sessaayye paayyatte haka para kunda keniti ca, 40nama kuma lakki ka dippa lehi ka kunda sessa kayni. 41akka Yaahiwwe Muuse ajaja qara'e, kaffasene a sanynyeeta Kershooni a tukkana Waaqa kela koda kode a Muuse isho Arooni dikene tooy sene.
42Kaffa a sanynyeeta Meraari a kaffaasso ka toollaassotin dikame, 43diira a tukkanase a Waaqa kela koda koda ettanshe a parraasso kunda sessa paayyatte haka kunda keniti ca, 44a kaffaan dikame nama kuma sessa ka dippa lakki kayni. 45Akka ajaja Yaahiwwe a Muuse qudan lelame qara'e kaffasene a sanynyeeta Meraari a Muuse isho Arooni dikene tooy sene. 46Lawaatase a Muuse ka Arooni isho saarra Isira'eeli kaffaasso ka toollaassotin dikene 47a tukkana Waaqa kela koda kodeeta ka tukkana haadeeta de'e a parraasso kunda sessa paayyatte haka para kunda keniti ca piisa tooy sene. 48A dikootaysho, nama kuma sette ka dippa keni ka kunda sette kayni.
49Ajaja a Yaahiwwe Muuse qudan daashe qara'e ishootta ka matta mina'e koda kodan isho haadeta haadan ka ishootta kitamte. Ishootta ka matta mina'e akka Yaahiwwe Muuse ajaje qara dikamen.
Actualmente seleccionado:
Mataafa Dikoota 4: MaQu
Destacar
Copiar
Comparar
Compartir
¿Quieres tener guardados todos tus destacados en todos tus dispositivos? Regístrate o inicia sesión