Mataafa Dikoota 3
3
Hellaa Arooni a diira
1Eta Yaahiwwe irroota Siina qara Muuse olli haasawadeeyye, sene sanynyeeta a Arooni isho a Muuse. 2Maxxada a hellaa Arooni a diira sene: Nataapi qarta, Apihu, kussitta, a kamma qate'ew Ali'asaari ka Itamaari. #dikoota 26:60 3Arooni ka akka qeesewwa koddane'e, xawwi ishootta reexe ka daate. 4Ma xoori Nataapi isho Apihu, ete koommayta Siina oppaayye fuula Yaahiwwe tura'e apitta a dawrame opaysheneeyye, fuula Yaahiwwe tura'e le'en; umma hella in qapan. Semmalla a aappaaysho Arooni cooyye Ali'asaari isho Itamaari patta koda qeesuma kode. #Lewi 10:1-2; dikoota 26:61
Koda Lawaata
5Yaahiwwe ka Muuse haasawade ka kide, 6“Kafa Lewin xooye ka akka qeesittase Arooni kela koda kodane'e isha tura ishootta qaatishe. 7Oto tukkanase xayyo tura koda koonaneeyye, tukkanose a kodeetiyyo turaayye Arooni isho samayta piisa'e wa parpaaccisna kodan. 8Ishootta mehadda tukkaniyyo piisa tooytan; ka oto tukkanose a kodeetiyyo kela koda koonaneeyye, samaytiyyo a Isira'eeliti'i wa parpaaccisna kodan. 9Atti Lawaata qeede ka Arooni isho hellaadi' daashe; ishootta ka samayta Isira'eeli oppa a Arooni xawwi reexxame koddan. 10Akka kodaaysho a qeesuma kodane'e, Arooni isho hellaadi shuume; oton nama pila'e kodoose xaaysho koda dehaanniiyyi, a alle ishshamo.”
11Yaahiwwe ka Muuse kide, 12“Tin, anti samayta Isira'eeli piisa oppaayyen pakka qaramma dalanna oppa'e Lawaata teyyade; semmalla Lawaata xayyo koddita. #sooka 13:2 13Maana malla, qaramma piisa xayyooy, kuyyaatan piita Kipsi kara qaramma piisa leysheeyye, anti qaramma a nama ka a horeeta kodde piisan Isira'eeli kara xawwi reexade; ishootta xayyo koddan anti an Yaahiwweey.”
Akka Lawaata dikamte
14Yaahiwwe ka koommayta Siina oppa Muuse kide, 15“Lewaatoppa hellaa a diira a leya takka pire ka qaropeela ca piisa toollaasso ka kaffaassotin dike.” 16Muuse ka akka ajajame qara'e qaaleta Yaahiwwe qara ishootta dike. 17Maxxada a hellaa diira a Lewi nefo, Kershooni ka Qe'ati isho Meraari kidammi. 18Maxxada hellaa diira a Kershooni kaffaassotinni, Lipini isho Shimi'i kidammi 19Maxxada hellaa a diira a Qa'ati kaffaassotinni, Amiraami ka Yisihaari ka Keprooni isho Usi'eli kidammi. 20Maxxada hellaa a diira a Meraari kaffaassotinni, Mahiliina isho Muushi kidammi. Oto toollaan diknaaneeyye, kaffa Lawaata tooy sene.
21Toola a Lipiina isho a Shiimi'i ishootta olloppa kafa Kershooni karopaaw dikamen ; sene tooy ishoottan kafa Kershooni. 22Ishoottoppa hellaa a diira a leyaa takka pire ka qaropeela ca a dikame kuma tappa ka dippa keni. 23Kaffa a Kershooneta tukkanase a kodeeta Yaahiwwe kammanne qinda dumaatetatinni safaran. 24Asaara toolla Kershooneta koddino, Eliyasaafi inna La'eli. 25Hellaa Kershooni a diira kodaaysho, tukkana a kodeeta Yaahiwwe ka kaarantaddaadi tukkana qaran deknaan a qaran co ka a karan co isho kaarantase a xarraadi turan deknaan tooyteeta. 26Ka kaarantadda a paapaha a tukkana isho a pora kalisoota kapa tiitayshe ka kaarantase a xarra oxinta tura a ishin paapahoppopa kullinaan isho watarowwosen a kaarantoseti tooyteta.
27Toola Amiraami ka a Yisihaari ka a Keprooni isho a Usi'eli, ishootta olloppa kafa Qe'ati oppopaaw dikammi. 28Hellaa diira a leyaa takka pire ka qaropeela ca a ishoottoppa dikame, nama kuma sette ka dippa lehi kayni. Qe'ateta ka tukkana qulqullaawe tooytini. 29Toolla kafa Qe'ati tukkaneeyye qinda tupattatinni safarri. 30Kafa Qe'ati karaayye a saara toolla koddino, Elisafaani inna Usi'eeli. 31Koda a Qe'ateta nefo, taapota ka tarabbeesa ka meeha a qara ipsa xaaynaan ka pora kalisoota ka mehadda a qeesewwa, tukkana Waaqa kela kodaan koonaan ka kaarantadda tukkana otantoppa co isho mehaddasene quda ca piisa qara tooyeta.
32A saarra Lawaata piisa qara saarummo ka a tukkana qulqullaawe tooytina qara tooyno, qeesittase Ali'asaari inna Arooni.
33Toolla Amahiili isho a Muushi, ishootta olloppa kaffa Meraari karopaaw dikamen; sene tooy ishoottan kafa Meraari. 34Hellaa diira a leya takka pire ka qaropeela ca a ishoottoppa dikame kuma lehi ka dippa lakki kayni. 35Kafa Meraari karaayye a saara toolla koddino, Suri'eli inna Api'eli ; ishootta tukkanase a kodeeta Waaqatiiyyi qinda qutattatinni safaran. 36Koda a Meraareta nefo, tukkana kodeeta Waaqa karaayye qapaya tukkana ka xarnaadi ka qapayaadi a otanta ka kiriyyaadi ka koda mina tooyno ka meeha quda co qara tooyeeta. 37Ka asseew qora a oxinta paapaha ka kiriyyaasso ka shikaalla isho watarowwaasso qara tooyeta.
38Muuse ka Arooni isho hellaa Arooni tukkanase a kodeeta Waaqatiiyyi qinda piirtotatinni fuule desa safaran. Ishootta pakka samayta Isira'eeli oppa'e kaatasene qulqullaawe qara tooyan. Ma xoori nama pila a tukkana Waaqa kapopa dehaanno a ishshamo. 39Hellaa a diira a leya takka pire ka qaropeela ca isasene a Muuse isho Arooni akka ajaja Waaqa qara Lewaatoppa kaffa kaffaan dikene, kuma kunda lakki lakki kayni.
40Yaahiwwe ka Muuse kide, “Samayta Isira'eeli oppaayye hellaa diira a qaramma kodde a leya takka pire ka qaropeela ca piisa dike; ka meeqa akkima kaynaan qapado; 41ka samayse a Isira'eeli oppaayye pakka hellaa a diira a qaramma kodde oppa'e Lawaata ana' qeede; ka pakka a horeeta Isira'eeli a paayyota dalatte oppa'e, horeeta Lawaata ana qeede. Anti an Yaahiwweey.” 42Muuse ka akka Waaqa isha ajaje qara'e samayta Isira'eeli oppaayye hellaa diira a qaramma kodde piisa dike.” 43Hellaa diira a qaramma kodde a leyaa takka pire ka qaropeela ca a dikame ka kuma kunda lakki lakki ka dippa lakki kunda tappa sessa kayen.
44Yaahiwwe ka Muuse kide, 45“Samayta Isira'eeli oppaayye pakka hellaa diira a qaramma kodde oppa'e Lawaata qeede ka pakka horeeta Isira'eeleta oppa'e horeeta Lawaata qeede; Lawaata xayyo koddita! Anti an Yaahiwweey. 46Hellaa diira a qaramma kodde a Isira'eeli kara dikame qoota Lewaatoppa dikame qaropa dippa lakki kunda tappa sessaan qapan malla, sene kaajaan furatta ke faani. 47Hiila tukkana qulqullaawetinni matta nama mina'e sheqileeta dakara pirreeta keni keni#3:47 sheqileeta keni, kiraameta kunda keni keni mina'e kitta. qeede. 48Ka oto hellaa a diira a Isira'eeleta ishin a Lawaata qara qapta furattooyye kaajosen Arooni isho hellaadi' daashe.” 49Muuse ka hellasene a Isira'eeleta a Lawaata furatte qara qapa nama dippa lakki ka kunda tappa sessa qara kaajasene ishin furatta pohame qeede. 50Ka samayta Isira'eeli oppaayye hellaa a diira a qaramma kodde qaraayye sheqileetanne dakara pirreeta kuma ka dippa sessa kunda lehi keni#3:50 sheqileeta 1365, kiilo kiraameta kudanka keni. qeede. 51Muuse ka akka Yaahiwwe isha ajaje qara'e, kaajasene a furatta Arooni isho hellaadi a diiraati daashe.
Actualmente seleccionado:
Mataafa Dikoota 3: MaQu
Destacar
Copiar
Comparar
Compartir
¿Quieres tener guardados todos tus destacados en todos tus dispositivos? Regístrate o inicia sesión