Ɔ̀rɔ̀mùnka reè 4

Nìi ni Ibraximà raa shɛɛrɛbee tsɛ

1Àyìwà, Ibraximà nìi ɲe fàbɔɔ adamadzinbee kàjaa tsɛ, mùn dzia fèe rìì dè tɔ̀ raa goò tsɛ ? Mùn dzia dzin ci à fèe tàrau ? 2Ibraximà ye ba na kpàdeu ci à tereòn e faadziɛ rìì baraka ɲan, tɔ̀ na dzia bà à yɛ̀rɛ̀blabee goo, ŋà à fa dzi tɔ̀ fa Ŋaablà rii jaaterema waa. 3#Gok 15.6; Gal 3.6.Àwà Ŋaablà re Goomaa fèe dèe mùn na ? À sɛbɛɔ̀n ci: «Ibraximà ɲɛun Ŋaablà ra, tɔ̀ yeè dan à re terenbe.» 4M'à tɔ, ci mòò riì ye faagoo fa, sàr'lìi sìan à ra, tɔ̀ na maana ge waa, ŋà à sàr'lì. 5Ŋà mòò riì na faagoo faɔ̀ waa, tɔ̀ ye ɲɛn à ra ci Ŋaabla mòò bàa tereunma, mòò riì na shia à jɔun waa, tɔ̀ ɲɛynaà daàn à tsìfa re terenbe. 6Tɔ̀ soo sa tsuru, Ŋaabla mòò riì daàn tereunma, à to na à faadziɛ fyɛ̀ waa, màsà kpiri Dawudà dzii wɔɔ tɔ̀ raa xɛɛrɛɛ̀ goomaa tsɛ ci: 7#Zab 32.1,2.«Ŋaabla nìì reè rè terenbɛy goo ì mɛɛy boò è mà, è vu ra gooɲaantsiɛ dzii tsyee, twɛy raa wùbeu ! 8Ɔ̀ɔn, Tsìfaà na mòò riì rè gooɲaantsii daàn dɛ, tɔ̀ raa wùbeu !» 9Tɔ̀ xɛɛrɛɛ̀ shɛunma rèè bàsɔùn nì naa ràà, tàà à shɛnbɛy reè sa raa ? Mùn kpɛ̀yn dzia nìi dè, tɔ̀ rii yɛ ci Ibraximà ɲɛunmaà kamà Ŋaablà ra, tɔ daun à re terenbe. 10Tɔ̀ fau fau'n kuru kɛn na ? Ibraxima shɛunmaà shɔ̀ùn nàà tàà à shɛunmaà bònè ? À na fa à shɛunmaà shɔ̀ùn waa, ŋà à fau nì sani è shɛn. 11#Gok 17.10.Tɔ̀ rii shɔ̀ùn, à shimaangoo tàànmàshɛn tarau, nìi fyɛ̀, è kpàdè ci à terenbe tarau ɲɛynaà baraka rɔ̀n, tɔ̀ y'a tàrà à na shɛn ŋe waa. Tɔ̀ fau, gè riì ni à to, shɛnbɛy reè gè o ge ɲɛynaà faa, è bà ni ba twɛy sapɛ fa, tɔ̀ ɲɛynaà to yè bà ni dan twɛy sa re terenbe. 12È bà shɛunma rèè sa fa, nìi yɛ, nìì reè na daɔ̀n shimaangoo bàsɔùn mà waa, ŋà è jìɛ ɲe fà Ibraximà rè ɲɛynaà sa fyɛùn, tɔ̀ y'a tàrà à na shɛn ŋe waa.

13 # Gok 17.4-6; 22.17,18; Gal 3.29. Àwà, Ŋaablà y'a làyiri sen Ibraximà ko e tsua dzin nèè rè ci è nà dziɲaan tàrà shɛn, tɔ̀ na sàrìyaa fyɛ̀ dɛ, ŋà à ɲɛynaà raa terenbee rìì fyɛ̀. 14#Gal 3.18.Shɛn sen neè ye ba na dzia tɔ̀ shɛɛ̀n tàrà sàrìyaa baraka ɲan, ɲɛynaà kùn naà ni dɛ, làyir'là sa to na mɛrɔun. 15Àwà sàrìyaa, tɔ nàa Ŋaablà re vununtaà rìì ka, ŋà sàrìya na ni min niì, à bar'la gooma tsu na ni mɔn waa. 16#Gal 3.7.Tɔ̀ kamà, e bà ni tɔ̀ shɛɛ̀n tàrà, tɔ faa ɲɛynaà nì baraka ɲan, gè riì ni à to è bà kwɛ̀yge nìi làyir'là dzii tsyɛɛn Ibraximà tsua dzin nèè sapɛ re. À na sàrìyaa dzuun dzin neè bàsɔùn waa, fɔ nìì reè sapɛ ɲɛynaà faa Ibraximà raà tsuru. È ɲɛn à tsɛ, Ibraximà mùn sapɛ fa rìì. 17#Gok 17.5.Àwà à tɔ̀ tsuru, è ɲɛn à tsɛ, à sɛbɛɔ̀n Ŋaablà re Goomaa doùn ci: «Mun wo bàu kun giri fà.» À ɲe fà Ŋaablà biìn, à ɲɛun tɔ̀ niì rà, niì fùn bàa jaama, gè niì na ni waa, à to tɔ̀ yeè bà ni. 18#Gok 15.5.Ibraximà ɲɛun goo ra è si xɔbe à tsɛ, mòò fa dzi e si xɔbe nìi tsɛ waa. Tà doùn, à bàu kun giri fà, a ci Ŋaablà re goomaa y'à deò nìi tsuru ci: «Wo tsua dzin nèè nà giribe tà tsuru.» 19#Gok 17.17.Àwà Ibraximà sìà tsyɛnbeumaà ko e raà sa jii caànmoò rà, à na e gɔɔ̀n siin ci à tsyɛn saàn rà nòn, à fàan yè dzyɛ̀nbe ɲɛynaà doùn waa. À re tààn Saràn, tɔ̀ tsu naà dzin ker'là waa, ŋà à na tɔ̀ tsu siin waa. 20Ŋaabla tɔ̀ làyir'lìi seun à rè, à na e ciri tɔ̀ tsɛ, è to ɲɛn bɛy à ra waa. Ŋà ɲɛynaà fààn ni wɔu à ɲan, è nɔɔrɔ ɲɛn Ŋaa tsɛ. 21À si na xɔ à tsɛ taki, ci Ŋaabla nìi làyiri seòn, à dzi ni à rà, à y'à bo e shi tsɛ. 22Tɔ̀ kamà, tɔ̀ ɲɛynaà yè dan à re terenbe. 23Tɔ̀ to y'à tàrà, à sɛbɛn niì faɔ̀ ci: «Tɔ̀ yeè dan à re terenbe», tɔ̀ na sɛbɛɔ̀n à soo kamà waa. 24Ɲe nìì reè raa ɲɛynaà sa nà dan terenbe, à sɛbɛɔ̀n ɲe sa kamà. È ɲɛn à tsɛ, nìi mùn Tsìfa Yesù sèè kpunan bou fùn nèè fi, ɲe ɲɛɔ̀n tɔ̀ ra. 25#Ekk 53.4,5.À dɔ̀un dziira mùn ne fìrìgoo rèè rìì kamà, è sèè kpunan bo saàn ɲàn, è kpadè ci mùn tereòn.

Actualmente seleccionado:

Ɔ̀rɔ̀mùnka reè 4: BDZU

Destacar

Copiar

Comparar

¿Quieres tener guardados todos tus destacados en todos tus dispositivos? Regístrate o inicia sesión

Aprende más sobre Bible Dzùùngoo Unicode

Ɔ̀rɔ̀mùnka reè 4

Versículos bíblicos populares de Ɔ̀rɔ̀mùnka reè 4

Versículos bíblicos populares de
Ɔ̀rɔ̀mùnka reè 4