Ɔ̀rɔ̀mùnka reè 3

Ŋaablà rii sààbèntsià

1Àwà, Dzyèèsìbee mòdzian fyanbemaà nì kɛ̀n, shimaangoo nàfaà yè bà kɛ̀n ? 2E bà Dzyèèsìbee mòdzin, tɔ̀ nàfaà blà kàjaa sapɛ tsɛ. È ɲɛn à tsɛ, Ŋaablà re Gooma reè kɛ̀ɛ̀yfau ye rìì jɔ̀na ma. 3À ni dzùrù ? Swey kɛ̀nsɛɛn ma ba bàu vusootsi tɔ̀ goò doùn, tɔ dzia Ŋaablà raa vusootsibee sà ɔ̀ ? 4#Zab 51.6.Ayi dɛrɛ ! À wù è tɔ̀ ci Ŋaablà rii sààbèntsi, mòdzin sapɛ yeè bà doodebaa, a ci à yɛ sɛbɛɔ̀n nìi tsuru Ŋaablà re Goomaa doùn ci: «À wù è tɔ̀ ci wo tereòn a re gooma reè doùn, kitsia doùn w'e bà dzi tarabaa.» 5Ɲe raa terenbɛybeè to ye ba Ŋaablà raa terenbee rìì kpàdèe, mùn dzia fee rìì dè ? È kpàdè ci Ŋaablà na tereòn à re vununta jikɔɔn doùn ɲe tsɛ gbɛ ? Mun goomaa adamàdzin mòdzin goomau'n kur'la. 6Ŋaablà terenbɛy ? Ayi dɛrɛ ! È ba na tà tsuru, à na nà dziɲan kitsi dzùrù ? 7Ŋà mun ne doò ye ba bàa saabu Ŋaablà re sààbeen yè kpàdè fyɛ è nɔɔrɔ ɲɛn à tsɛ, fèe bèe à to kitsi yeè mɛɛy mun tsɛ kɔn, ci mun gooɲaantsiitsi ? 8Tà doùn mùn to fa ɲaan fa wùù yeè bà ni bo à doùn a ci swey tɔ̀ goomaa doò wɔɔ̀ mun na nìi tsuru ɔ ? Kitsia nà mɛɛy twɛy mòdzin neè tsɛ, tɔ̀ to wù è ka.

À kpàdeò min niì ci Ŋaablà boshɔ̀ùn mòò pɛn na tereòn waa

9Àwà, à ni dzùrù ? Ɲe Dzyèèsìbee mòdzin neè fyan dzyee rèè mà gbɛ ? Ayi dɛrɛ ! M'a dè kpàdèu nòn, ci Dzyèèsìbee mòdzin o, kun kpɛrɛ mòdzin o, gooɲaan fààn ɲinaɔn è sapɛ ma. 10#Zab 14.1-3; 53.2-4.À sɛbɛɔ̀n Ŋaablà re Goomaa doùn ci: «Mòò pɛn na tereòn waa, arì mòò sɔn. 11Akiritsi pɛn na ni, mòò pɛn na Ŋaablà gaa. 12È sapɛ sèè bou Ŋaablà kpɛyn, è sapɛ yeè bà nàfà bɛy esire. Goowuufabaa pɛn na ni è ɲan, arì mòò sɔn. 13#Zab 5.10; Zab 140.4.È naanaakuan ni a ci fùnkɔɔ saunma, è nɛɛ̀n mòdziìn sàn fìr'la, è dziɛ̀ yè bà ni a ci myɛn baà. 14#Zab 10.7.È dzuà tsyɛɔ̀n nìi rà, à sapɛ danga goòmà soùn. 15#Ekk 59.7,8.È sàn ma ta mòdzìn vua ra. 16È nà dɔ̀n bo min o min, à sapɛ baragoò ko màtsuru. 17È na jaanciàn shi pɛn tɔ̀. 18#Zab 36.2.Ŋaablà jɔun shiɲaanbe pɛn na ni è ɲan.» 19Àwà, m'à tɔ̀ ci sàrìyaa nìi sapɛ deè, nìì reè ni sàrìyaa dzuun, à y'à dè siàn twɛy rìì là. À y'à dè siàn twɛy rìì là, gè riì ni à to dzii pɛn mà goomama jà waa, mòdzian sapɛ to yè jà fìrìgòòtsi Ŋaablà biìn. 20#Zab 143.2; Gal 2.16.Tɔ̀ kamà, mòò pɛn fa kpàdè ci à tereòn Ŋaablà jaa dzuun, sàrìyaa goo rèè yè bà saabu waa. È ɲɛn à tsɛ, sàrìyaa y'à toò mòdzian yè gooɲaan nì tɔ̀.

È kpàdè ci a tereòn, tɔ faa ɲɛynaà nì baraka ɲan

21Ŋà dòònuùn, Ŋaablà re terenbee kpàdeò, nìi na sàrìyaa fyɛ̀ waa. Sàrìyaa ko kɛɛra reè dèvuà sa tɔ̀ shɛɛrɛbe faa. 22#Gal 2.16.Ɲɛynaà nì baraka ɲan Yesù Kirisà rà, Ŋaablà ye e re terenbee kpàdèe mòdzian sapɛ kajaa tsɛ. À tɔ̀ tsuru, è ɲɛn à tsɛ Ŋaablà na mòò boò mòò ɲàn waa. 23Àwà mòdzian sapɛ gooɲaan fau, è sapɛ yeè fɔn Ŋaablà nɔɔrɔɔ̀ ɲan. 24Ŋà Ŋaablà ɲanwùɔ baraka rɔ̀n, à kpàdèu ci è sapɛ tereun maana, è ɲɛn à tsɛ, Yesù Kirisà saabu ɲan, mòdziìn kùngɔ maboò. 25Ŋaabla wò rii sìun mòdzian rè gooɲaantsiɛ mɛɛ̀ saaka ɲɛynaà baraka rɔ̀n, à y'à tsìɛn ka à re terenbee kpàdè. È ɲɛn à tsɛ, gooɲaan niì reè fa dɔun bɔrɔɔ, à na twɛy dan waa. 26È mɔɲɔun tɔ̀ tsuru è tɔ̀ fa, è tɔ̀ ka à kpàdè ci arì she wò re terenbee ni e nima nɔ̀n. Wò tereonmaà doùn, mòò riì ɲɛɛn Yesù rà, wò y'a kpàdèe ci tɔ tereòn.

27Tà doùn, mòò rè e yɛrɛ̀blàbè kun ni kɔn ɔn ? Ayi, tɔ̀ kùn na ni dɛ ! Sàrìya kɛn daàn tɔ̀ ka ? Faadziɛ raà gbɛ ? Fyeu ! Fɔ ɲɛynaà raa sàrìyaa. 28Àwà ɲe raa jàma nɔ̀n, à kpàdèe ci mòo tereòn ɲɛynaà nì baraka ɲan, à na faadziɛ raa sàrìyaa fyɛ̀ waa. 29Tà doùn, Ŋaablà Dzyèèsìbee mòdzin neè bàsɔùn nì nè Ŋaablà gbɛ ? À na kun kpɛrɛ mòdzin neè sa raa ? Taki kɛ, à kun kpɛrɛ mòdzin neè sa raa dɛrɛ ! 30#Sdk 6.4; Gal 3.20.À tɔ̀ tsuru, è ɲɛn à tsɛ, Ŋaabla soo rii, è bà à kpàdèe ci mòdzin shɛunma ko shɛnbɛy sa tereòn ɲɛynaà baraka rɔ̀n. 31Tɔ̀ y'a kpàdèe ci ɲɛynaà kamà, ɲe sào ni ɲe yè sàrìyaa bà gè nàfà bɛy gbɛ ? Ayi dɛrɛ, à na tɔ̀ tsuru waa. Ɲe yɛ̀rɛ̀ to nìi kpàdèe, tɔ̀ rii yɛ ci sàrìyaa gè nàfàma.

Actualmente seleccionado:

Ɔ̀rɔ̀mùnka reè 3: BDZU

Destacar

Copiar

Comparar

¿Quieres tener guardados todos tus destacados en todos tus dispositivos? Regístrate o inicia sesión

Aprende más sobre Bible Dzùùngoo Unicode

Ɔ̀rɔ̀mùnka reè 3

Versículos bíblicos populares de Ɔ̀rɔ̀mùnka reè 3

Versículos bíblicos populares de
Ɔ̀rɔ̀mùnka reè 3