Ɔ̀rɔ̀mùnka reè 2

Ŋaabla nà mòdzian sapɛ sarà è kòrò è faadziɛ ka

1 # Mat 7.1; Luk 6.37. Tà doùn, wo bàu mòò o moò, wo nìi dzyee rèè jààkia, dzi tarama pɛn na ni wo re waa. Dzyee rèè jààkikɔɔn, wo kitsi mɛɛ̀ a yɛrɛ tsɛ. È ɲɛn à tsɛ, wo yè è jààkia nìi rà, wo sa tɔ̀ soo rìì faa. 2Mùn to y'à tɔ̀, ci nìì reè twɛy goo rèè faa, Ŋaablà kitsi riì kùn'na è tsɛ, à tɔ̀ faa è kòrò sààbeen ka. 3Nìì ree twɛy goo rèè faa w'e bà è jààkia, wo sa to tɔ̀ soo rìì faa, w'e bà à kɛ̀sɛɛ̀ ci wo nà a tsi Ŋaablà raa kitsia rà gbɛ ? 4Ŋaablà re wùɔ blàbee nìi boò, ko à re goo kua, ko a re mɔ̀nɲɔɔn, wo na tɔ̀ jàa goo dɛ ? Tɔ̀ to y'à tàrà wo na à tɔ̀ ci Ŋaablà ɲanwùɔ wo gaa nìi mà, tɔ̀ rii yɛ w'e nimisa, w'a re jaamabee fau'n kur'la lakere o ? 5È ɲɛn wo re tantaamaxɔbeè ko wo re dùsùkùnxɔ̀beè tsɛ, wo vununta rìì lamɔnɔ̀n tsùɔ a yɛrɛ tɛyn jisee kamà, nìi Ŋaablà re vununtaà jisee, ko à re kitsi tereunmaà kpàdè jisee. 6#Zab 62.13; Tak 24.12.Àwà tɔ̀ jisee, à nà mòdzian soo sookɔɔn sapɛ sarà è kòrò è faadziɛ ka. 7Nìì reè ɲanshiɔ̀ wùù faa rà, yè bà Ŋaablà nɔɔrɔɔ̀ ko à blàbee, ko jaamabe dobɛɛ gaa, twɛy nà jaamabe dziù dòbɛɛ tàrà. 8Ŋà nìì reè yè e nɔɔ̀n sààbeen mà, yè e maban à mà, è to yè e tsiiŋnà terenbɛybee rà, Ŋaablà re vununta brìsià twɛy nìn. 9Mòò o moò ɲaan faa, byɛnbe ko jaanta tɔ̀ nìn, è jɔ̀n Dzyèèsìbee mòdzin neè tsɛ, è bè suu kun kpɛrɛ mòdzin neè sa ra. 10Mòò o moò to wùɔ faa, nɔɔrɔɔ̀ ko blàbee ko jaanciàn tɔ̀ nìn, è jɔ̀n Dzyèèsìbee mòdzin neè tsɛ, è bè suu kun kpɛrɛ mòdzin neè sa ra. 11#Sdk 10.17.È ɲɛn à tsɛ, mòdzian sapɛ soo Ŋaablà re, à na mòò boò mòò ɲàn waa.

12Àwà nìì reè sapɛ gooɲaan fau sàrìyaa bɛy, twɛy sa nà bara, nìi na sàrìyaa ka waa. Nìì reè sapɛ to gooɲaan fau è kòrò sàrìyaa ka, twɛy sa nà kitsi, è kòrò sàrìyaa ka. 13Nìì reè dàan sàrìyaa myɛ̀ɛ̀n bàsɔùn mà, twɛy na tereòn Ŋaablà jaa dzuun waa, ŋà nìì reè y'à shi jiɛ, twɛy rìì nà kpàdè ci è tereòn. 14Àwà nìi kun kpɛrɛ mòdzin neè, twɛy nìì reè na Ŋaablà re sàrìyaa tɔ̀ waa, yè ba à goo rèè shi jiɛ e yɛrɛma, à to na ni è suun waa, tɔ̀ y'a kpàdèe ci è sàrìya e yɛr'la rè. 15È fau'n kur'la y'à kpàdèe ci sàrìyaa ci nìi yè fa, tɔ sɛbɛɔ̀n è dùsùkuan tsɛ. È akir'là sa y'a shɛɛrɛbe faa, nìi doùn è kɛ̀sɛmàà yè è jààkia waatsia sɔn ɲan, waatsia sɔn ɲan è dzi sìn è ra. 16Ŋaablà ye ba nà mòdzian rè goo mɛnɛunma rèè kitsi kunun jisee riì, è bo Yesù Kirisà ɲàn, a ci mun ne Kùnàgoo Dziɔ̀ y'à dèe nìi tsuru, tɔ̀ sapɛ nà kpàdè tɔ̀ sii sèè.

Goo nìì reè nà kitsi mɛɛy Dzyèèsìbee mòdzin neè tsɛ

17Ŋà, wo rìi ci wo Dzyèèsìbee mòdzin, wo si xɔ sàrìyaa tsɛ, w'e bà Ŋaabla goo ka a yɛrɛ blabee, 18wo Ŋaablà saɔ tɔ̀, w'e bà dzia à tɔ̀ nìi wù, kàtsu wo kàraɔ̀n sàrìyaa rà. 19Wo si xɔ à tsɛ, ci wo jaana reè kurukunbaa, nìi reè ni tsitsiɛ̀ ɲàn, wo twɛy rè vyevyee, 20wo fàànmùnyà bɛy reè kàrànbaa, w'e bà dziinkoomɛyna modzìn nèè kàrànfa, è ɲɛn à tsɛ wo re, twɛ̀ɛ ko sààbeen takia sa tàr'la sàrìyaa ɲàn. 21Àwà, wo rìi mòdzian kàr'na, wo na a yɛrɛ kar'na ɔn ? Wo rìì y'à kàr'na ci shɔnbe mà fa waa, wo to shɔnbeè faa. 22Wo ci ɲànmɔ̀ɔ̀be mà fa waa, wo to tɔ̀ faa. Ɲɔ̀n rèè goo xɔ wo mà, wo rìì to yè è shɔn boò ɲɔ̀n gba rèè doùn. 23Sàrìyaa yɛ̀rɛ̀blàbeè ni wo ɲan, wo to Ŋaablà ɲanfyanbee sàrìyaa bar'la goo rèè ka. 24#Ekk 52.5.Tà doùn, à sɛbɛɔ̀n Ŋaablà re Goomaa doùn ci: «Ye kamà, Ŋaablà tsoò baraɔ̀ kun kpɛrɛ mòdzin neè fi.» 25Àwà, a kpɛynto ye ba sàrìyaa shi jiɛ, mòo dzia dzin ci nàfa ni a shɛunmaà ɲàn. Ŋà w'e ba à bar'la rìì, a shɛunmaà ko e raa sa, à ni a ci a na shɛɔn tsu. 26Mòò riì na shɛɔn waa, tɔ̀ ye ba sàrìyaa shi kpadèunma rèè shi jiɛ, à shɛnbɛybeè ko e raà sa, à fa dan ci à shɛɔn fyeu ɔ ? 27Tɔ̀ niì na shimaangoo faɔ̀ e tsuàn ɲàn waa, tɔ̀ ye ba sàrìyaa shi jiɛ, tɔ nà wo jààki, è ɲɛn à tsɛ, sàrìyaa sɛbɛunmaà ni wo re, ko shimaangoo sa, wo to na à shi jiɛ waa. 28Àwà, a y'a myɛ̀n Dzyèèsìbee mòdzin, à na jaara jɛ̀ɛ bàsɔùn kpɛyn waa, à to na tsùàn ɲàn raa shimaangoo jakɔɔn bàsɔùn tsu waa. 29#Sdk 30.6.Ŋà Dzyèèsìbee mòdzin takia, tɔ̀ rii yɛ, duùn naà, shimaangoo yè bà dùsùkuan raa shimaangoo. Shimaangoo riì faɔ̀ Ŋaablà re Dzia baraka rɔn, nìi na sɛbɛn goo waa. Tɔ̀ mòdzian yè e raa tsoo dzia tàr'la è bo Ŋaablà rii lè, à na mòdzin neè waa.

Actualmente seleccionado:

Ɔ̀rɔ̀mùnka reè 2: BDZU

Destacar

Copiar

Comparar

¿Quieres tener guardados todos tus destacados en todos tus dispositivos? Regístrate o inicia sesión

Aprende más sobre Bible Dzùùngoo Unicode

Ɔ̀rɔ̀mùnka reè 2

Versículos bíblicos populares de Ɔ̀rɔ̀mùnka reè 2

Versículos bíblicos populares de
Ɔ̀rɔ̀mùnka reè 2