Mareka 15
15
Pilatu aa ratura Yesu
(Mat 27.1-2,11-14; Luk 23.1-5; Joh 18.28-38)
1Popa dya vire diyuwa, akuru o mapurisita nakuru o mbunga, arongithsi o murao no Nthzango thzothzihe a ciyuvire. Angire Yesu no ku mu twara ku ka mu pa kwa nguvuru Pilatu.
2Pilatu wepurire Yesu ci: “Ene yowe o fumu o Majuda?”
Aye wa tawire ci: “Ii, dyodi o amba yame!”
3Akuru o mapurisita ngou a mu capire enu yoingi ci yo naa kwama. 4Pilatu wa mwipurire karo ci: “Ene kwithsa ethsi o huthsako? O na yuvu eyi enu pongi a ku capa!” 5Unone Yesu ka a mu tawire thsimweya, eyo ya komokithsire nene Pilatu.
Yesu aa ratweriwa kufa
(Mat 27.15-26; Luk 23.13-25; Joh 18.39—19.16)
6Ko murao wo, mwaka no mwaka pa thsidika thso Paseka Pilatu shime a wa rukurwerangire thsinthzinda thsothsihe ethsi a na rombo. 7Kowa ekarire mu kamenga mwethso thsikati mukaci ko kwipaa munu mu mukwangarakanyi o ku pirukera kutumina, kwekarire mukwerume o dithzina dyo Barabasi. 8Mbunga thza keyire kwa Pilatu no ku mu romba ci a tende eci edi a wa kwamenangire.
9Pilatu wepurire ci: “Ene mwaa fota ci ni mi punithsere fumu o Majuda?” 10Wepurire kengeyo pakuninga ci wa dimukire ci akuru o mapurisita shime a retire Yesu ku kwenthzi pa ku mu tendera mbamba. 11Unone akuru o mapurisita a hongaurire mbunga ci thzi rombe Pilatu ku wa punithsera Barabasi kadi wao. 12Ngou Pilatu a wepurire karo ci: “O mu na foto ci ni tende ngepi oyu mu nethsanga ci fumu o Majuda?”
13Awo a kumbire ci: “O mwambe pa mbinda!”
14Pilatu wepurire ci: “Ine eyi na epithsa?”
Unone a kumbire wahe karo ko ku tanarithsa ci: “O mwambe pa mbinda!”
15Pilatu pa ku fota ku nyanyukithsa mbunga, wa wa punithserire Barabasi. Ngou a tuminine ci Yesu a furiwe no ku u wa pa ci a ka mwambe pa mbinda.
Mashwarare o Maroma aa teurura Yesu
(Mat 27.27-31; Joh 19.2-3)
16Mashwarare a twarire Yesu mu marombe omu a tungire nguvuru, no kwithserako mashwarare oahe. 17A vatekire Yesu thsikoveyo thso muvara o muhombohombo, no ku thzinga dikata dyo miunga no ku di mu shupeka ku mutwi. 18A tatekire ku mu showerera ci: “Shooshoo Fumu o Majuda!” 19A mu hukahukerire ku mu fura no dingondo ku mutwi no ku mu thsipaera mate. A tongamine ku manwi ku mu varaera ku mu rombera. 20Ou a manine ku mu varaera, a mu shupurire thsikoveyo thso muvara o muhombohombo no ku mu shupeka ekoveyo yenthzi. Ngou a mu twarire ku ka mwamba pa mbinda.
Yesu a ambiwa pa mbinda
(Mat 27.32-44; Luk 23.26-43; Joh 19.17-27)
21A hanganine mukwerume o ku Sirene o dithzina dyo Simoni, tata wa Alekisanda na Rufusi, o ku ka tunda ku makanda. A mu ooterire ku shimba mbinda thza Yesu. 22A twarire Yesu pa ndau ethzi thzi nethsiwa Gologota (kuamba ci “Ndau thzo Katendere”). 23A mu pire waine o ku vandakana no muthzi ou u nethsiwa mira, unone Yesu ka a mu nwine.
24Ngou a mwambire pa mbinda. A ciererire evata yenthzi ko ku pepa ñera ci a mone ci munu no munu thsipi a shimba. 25Nedi mathsikuthsiku ko thsikati thso 9 ou a mwambire pa mbinda. 26Maywi o murandu ou a mwipaerire a ñoriwire kenge ci: “Fumu o Majuda.” 27A mwamberire mu kaci ko mapuku edi, dimweya ku rudyo dimweya ku rumoho. 28Eyi, ya tendaharire ci i citombore no Mañoro o kuninga ci: “Aa mu varera kwikeremi.”
29Nowa pitire po pepi a mu yengwerire o kwa nyunga mitwi thzo no ku amba ci: “Ewa, owe o ku twethsa ku umburura Tembere no ku thzi umba mu mayuwa ahatu, 30o ciyoyithse othsinda. O shirukepo apo pa mbinda!”
31Mofoci kengeyo nakuru o mapurisita narongithsi o murao, a mu varaerire mu kaciko. A ambire ci: “Naa yoyithsa amweya, unone aye aa kwanga ku ciyoyithsa! 32Oyu Krisitu Fumu o Maisiraele a shiruke honi pa mbinda, ci tu mone no ku tawa.” Nowa ambiwire nenthzi a mu teururire.
Kufa kwa Yesu
(Mat 27.45-56; Luk 23.44-49; Joh 19.28-30)
33Diyuwa ou dya kumine pa kaci ko mutwi, mirema thza thsikire ditunga dyodihe mwitunde ihatu katere ku ka kuma mu thsikati thso muthsihatu thso runguro. 34Ko thsikati thso muthsihatu thso runguro Yesu wa dirire ko diywi dyodikuru ci: “Eloi, Eloi lama sabakatani?” ku amba ci: “Nyambi wange, Nyambi wange, waa ni thsiererera ine?”
35Ou a i yuvire amweya awa emanine po pepi aa ambire ci: “Mu na yuvu, aethsa Eliya!” 36Mukwerume yumweya wa ndandumukire ku ka shimba thsiponji no ku thsi cimbeka mu waine o kuwawata, wa thsi pakire ku dimbungu no ku pa Yesu ci a nwe, no ku amba ci: “Mu mu thsie tu mone ngeci oyu Eliya ethsa kenge a keya ku na mu tundithsa pa mbinda.”
37Yesu wa karumukire ko diywi dyodikuru no ku mina mwoyo ku fa. 38Popo dimbatu dyo mu Tembere dya yaturiwire epinthzi idi, ku tatekera ku wiru katere pashi.
39Muendithsi o mashwarare o Maroma oyu wemanine pa rupara rwa Yesu, ou a mu yuvire o ku dira no ku mona oku fa, wa ambire ci: “Yoshemwa oyu mukwerume po nedi Mwana Nyambi!” 40Ambuyama amweya shime a i tanekerire o kwa nemana kokure. Mu kaciko, kwekarire Madiya Magadalena, Madiya mama wa Jakovo shoonye na Josesi, na Salome. 41Yesu o ku di mu Galilea, awa ambuyama awa a mu shupwerire no ku mu kwamena. Ambuyama amweya owangi awa a keyire nenthzi ku Yerusalema nawo pekarire.
Yesu aa vumbekiwa
(Mat 27.57-61; Luk 23.50-56; Joh 19.38-42)
42Apo nedi runguro, mu Diyuwa dyOciroithsero, dyo Savata o ku di shime ku tateka. 43Josefa o ku Arimatea oyu wekarire o mukuru mu thsivaka mu Nthzango thzo Majuda, karo oyu wa tatererire Kutumina kwa Nyambi, wa thzire kondume kwa Pilatu no ku ka romba erama ya Yesu. 44Pilatu wa komokire ou a yuvire ci Yesu o na fu kare. Wethsire muendithsi o mashwarare o Maroma, wa mwipurire ci Yesu ne o na fu kare nji ngepi. 45Ou a yuvire kwa muendithsi o mashwarare o Maroma ci Yesu o na fu, wa tawethzire Josefa ku ka shimba thsithzimbi thsa Yesu. 46Josefa wa urire dimbatu dyodikenu dyo lineni, wamburire thsithzimbi thsa Yesu pa mbinda no ku thsivungera omo mu dimbatu. Wa thsi pakire mu thsidi ethsi thsa cakuriwire mu diwe. Ngou arumwenine diwe ku thsero thzathso. 47Madiya Magadalena no Madiya mama wa Josesi, a monine omu a pakiwire Yesu.
Actualmente seleccionado:
Mareka 15: mho
Destacar
Compartir
Copiar
¿Quieres tener guardados todos tus destacados en todos tus dispositivos? Regístrate o inicia sesión
©2023 The Seed Company