Mateu 8
8
Yesu aa porithsa mukwengondwe
(Mar 1.40-45; Luk 5.12-16)
1Yesu ou a urumukire ku tunda pa mukinya, mbunga thzothzikuru thza mu shupwerire. 2Popo mukwerume wengondwe wa keyire no ku na tongama ku rupara rwa Yesu no ku amba ci: “Fumu, nga o i shime kenge nga o ni porithsa.”#8.2 Oyo mukwengondwe shime a rombire Yesu ci a mu kenithse. Ku kwama kengeyo ya ningire ci Yesu shime a mu porithse.
3Yesu wa ororire dyoko ku mu kwata, no ku amba ci: “Ni na i shimi, o pore!” Popo engondwe yenthzi ya pwire. 4Yesu ngou a mu amberire ci: “O na mono, katere o ka i tongwere munu eyi, unone o thze o ka ciyareke kwa mupurisita. O ka punithse thsikunda thsombangi kwanu wahe thso kuporithsiwa koe eci dyodi a i raire Mushe.”#Mali 14.1-32.
Yesu aa porithsa mupika muendithsi o mashwarare o Maroma
(Luk 7.1-10)
5Popa engenine Yesu mu Kapenauma, muendithsi o mashwarare o Maroma wa mu shambawerire no ku mu adikanena ci a mu kwathse. 6Wa mu amberire ci: “Fumu, mupikange mu nthzio a di o na rara, aa kora nene. Kadi wa ku twethsa ku enda karo aa shupeka nene.”
7Yesu wa mu tawire ci: “Kenge ni thza ni ka mu porithse.”
8Unone oyo muendithsi o mashwarare o Maroma wa tawire ci: “Dyombo Fumu, ka i roerire ci owe o wingene mu nthzio thzange. Unone o ambe pohuma diywi, mupikange kenge a pora. 9Inene name mushi thzokoro thzowa a na ni endithsa ni di, karo name ni di no mashwarare aa ni na endithsa. Ku ambera yumweya ci: ‘O thze,’ aa thza. Ku tumina yumweya ci: ‘O keye,’ aa keya. Ku ambera mupikange ci: ‘O kwame eyi,’ aa i kwama.”
10Yesu ou a yuvire eyo, wa komokire nene no ku ambera awa a mu shupwerire ci: “Naa mi tongwera yoshemwa ci ka na ni mono karo munu o thsitawo thsothsikuru eci ethsi muno mu Isiraele yomuhe. 11Naa mi tongwera ci anu owangi kenge a ku tunda ku muvo no ku mutoko, no ku nekara ku thsidika na Aburahama, Isaka, na Jakovo mu Kutumina ko ku Wiru. 12Unone awa a na roera kwikaramo omu mu Kutumina kenge a ku konthzeriwa pora mu mirema. Omo kenge kwa kwikara ku dira no ku cihuma nwaeo.”
13Yesu ngou a amberire oya muendithsi o mashwarare o Maroma ci: “O huke ku diumbo kenge o kwameniwa eyi o na foto dyodi o na i tawa.” Mo muya mu thsikati mupikenthzi wa porire.
Yesu aa porithsa anu owangi
(Mar 1.29-34; Luk 4.38-41)
14Yesu ou a thzire ku nthzio thza Peturu, wa ka wanine ngumwenya Peturu o ku na rara o ku kora dihokoma. 15Wa mu kwatire ku dyoko, no dihokoma dya mu pwire. Wa pindukire ku tunda podidi no ku tateka ku mu roithsera edya.
16Runguro o ku pa neraura pashi, anu a retire kwa Yesu anu o mathzimu owangi, aye wa na a cithzire ko diywi pohuma no ku porithsa akwakukora wahe. 17Wa tendire kengeyo ci i citombore neyi a ambire mukwakukethza Isaya yo ku amba ci:
“Na a shimbi mawethzi etu,
no ku cikambeka ekora yetu.”
Ku shupwera Yesu
(Luk 9.57-62)
18Yesu ou a monine anu owangi o kwa na mu thzingwera, wa raererire erongwa yenthzi ci: “Tu thzenu mu thsambwadiya thzo diviya.” 19Ngou a keyire ku kwenthzi murongithsi o murao oyu wa mu amberire ci: “Murongithsi, kenge ni thza noe kokuhe oku o thza.”
20Yesu wa mu tawire ci: “Mbwawa thzi di no mateke, nenyunyi i di no mataratara, uno honi Mwana Munu aye ka a di no nthzio thzo ku rara.”
21Thsirongwa thsimweya thsa amberire Yesu ci: “Fumu, o ni tawethze ni thze tango ni ka vumbeke tata.”
22Unone Yesu wa mu amberire ci: “O ni shupwere, o thsie afu a vumbeke aenthzo afu.”
Yesu aa tutwarithsa dyungu
(Mar 4.35-41; Luk 8.22-25)
23Yesu wa yomamine mu wato nerongwa yenthzi. 24Popo dyungu dyodikuru nene dya katukire mu diviya no mañithsingi a yarithsire meyu mu wato. Unone Yesu aye o ku di pa turo. 25Erongwa ya henyenine ku kwenthzi no ku mu pindura ci: “Fumu, o tu yoyithse, twaa fa!”
26Wa tawire ci: “Amwe mwa shopu thsitawo, ine eyi mu yapa?” Ngou emanine no ku kuturura mupepo no mañithsingi, popo akopo ku onga kuruu.
27Wahe a komokire no ku cipaura ci: “Oyu munu ne wa ngepi, o ku ninga ci shaanga mipepo no mañithsingi yaa mu yuvera!”
Yesu aa porithsa akwerume aidi o mathzimu
(Mar 5.1-20; Luk 8.26-39)
28Yesu ou a ka kumine mu thsambwadiya thzo diviya, mu ditunga dyo Magadareni, a mu hanganyekire akwerume aidi o mathzimu, awa ekarangire pa mararo. Shime a ciperururire ku ninga ci kwithsa munu oyu wa twethsire ku pitera edyo dikuñwa. 29A kumbire ci: “Ine eyi o fota ku kwetu, owe o Mwana Nyambi? Ene waa keyera ku na tu nyandithsa thsikati thsetu o ku thsi shime ku kuma nji?”
30Po pare kamananano, kwekarire mutanga oukuru o nguru ou wa dyererirepo. 31Mipepo thzothzimango thza adikanenine Yesu ci: “Ngeci waa tu cithza, o tu tawethze ku kengena mo uya mutanga o nguru.”
32Yesu wa thzi amberire ci: “Mu thze!” Ngou thza tundire kowaya akwerume no ku kengena mu nguru. Popo mutanga ouhe wa urumukire ku tunda pa muurumuko ku ka cirundumwethza mu diviya, no ku ka feramo ku meyu. 33Awa thzi futithsire a cirire no ku thza mu diumbo no ku ka tongora enu yoihe eyi ya tendaharire kowaya akwerume o mathzimu. 34Mbongi thzothzihe thza keyire ku shambawera Yesu. Ou a ka kumine, a ka mu adikanenine ci a tunde mu ditunga dyo.
Actualmente seleccionado:
Mateu 8: mho
Destacar
Compartir
Copiar
¿Quieres tener guardados todos tus destacados en todos tus dispositivos? Regístrate o inicia sesión
©2023 The Seed Company