أيث-روما 15
15
ذْفَار مِين يتݣّ سِيذِيثْنغ عِيْسَى لْمَسِيح
1فَا نشِّين إِݣ يجهْذن يتْخصَّا-يَانغ أَ نَارْبُو ضُّعف ن يِنِّي وَار يجْهِيذن شَا، مَاشِي أَ نݣّ مِين ذَانغ يتعْجِيبن إِ يِيخف نّغ أُو صَافِي. 2مْكُڒ يجّن زَّايْنغ يتْخصَّا-يَاس اَخَاس يَارْضَا وَاجَّار نّس اَكِذس يݣّ ڒْخِير حمَا اَذ يجْهذ. 3لِأَنَّا لْمَسِيح وَار يݣِّي شَا مِين ذَاس يتعْجِيبن إِ يِيخف نّس، يݣَّا مَامّش يقّار لْكِتَاب: <ڒْبَاطڒ إِي خَاش نَّان يفْضح-اَيِي.> 4شُوْف، مَارَّا مِين يُوْرِين ذِي لْكُتُب ذِي زْمَان ؤُرِين-ث بَاش اَزَّايس نڒْمذ نشِّين. أَوَاڒ ن أَربِّـي يتْشجَّاع-اَنغ، ئِتَاوِي-يَانغ-د صّْبَر حمَا اَغَارْنغ يِيڒِي لْأَمَال. 5أَربِّـي يعْنِي ونِّي يتِيشّن صّْبَر يتْشجَّاع-يكنِّيو، أَتَاف اَكنِّيو يسْمُوْن حمَا اَذ تِيڒِيم ذ يجّن خْمِي ثْذفَّارم عِيْسَى لْمَسِيح، 6بَاش اَذ تْحمْذم أَربِّـي بَابَاس ن سِيذِيثْنغ عِيْسَى لْمَسِيح س يِجّن ن اَرَّاي ذ يِجّن ن وقمُّوْم. 7س مَانَايَا قبْڒث اَيَاوْيَا مَامّش إِي كنِّيو يقْبڒ لْمَسِيح حمَا اَذ تْسمْغَارم أَربِّـي.
8شُوْف، نش قَّارغ-اَوم لْمَسِيح يُوْسَا-د حمَا اَذ يِيڒِي ذ اَخدَّام ن أَيث-إِسْرَائِيل، بَاش اَذ د يسْمظْهَار لْحَقِيقَا ن أَربِّـي اَذ يݣّ مِين يوْعذ سَّلَف صَّالِحِين. 9عَاوذ بَاش يِنِّي وَار يدْجِين شَا زِي أَيث-إِسْرَائِيل اَذ حمْذن أَربِّـي خ اَرَّحْمث نّس. مَامّش يقَّار لْكِتَاب:
<س مَانَايَا إِي شك غَا حمْذغ جَار ڒݣْـنُوْس،
أَذ غنّْجغ يزْڒَان إِ يِيسم نّش.>
10ئِقَّار لْكِتَاب عَاوذ:
<فَرْحث يَا ڒݣْـنُوْس اَك شَّعْب نّس!>
11ئِقَّار عَاوذ:
<حمْذث سِيذِي أَربِّـي، يَا ڒݣْـنُوْس مَارَّا إِذْوم!
حمْذم-ث، مَارَّا إِذْوم يَا شُّعُوْب!>
12ئِقَّار عَاوذ نَّبِي إِشَعْيَا:
<أَذ يغْمِي وࢲْور ن يَسَّى،#15.12 يَسَّى نتَّا ذ بَابَاس ن سِيذْنَا دَاود.
نتَّا إِي غَا يكَّرن اَذ يحْكم خ ڒݣْـنُوْس،
ذَايس إِي غَا ݣّن ڒݣْـنُوْس لْأَمَال.>
13أربِّي ونِّي يتِيشّن لْأَمَال، أَكنِّيو يشُّوْر س ڒفْرَاحت ذ ڒهْنَا وَامِي زَّايس ثُوْمْنم بَاش اَذ تنْفيّْضم س لْأَمَال س جّْهذ ن اَرُّوْح يقدّْسن.
بُوْلُس نتَّا ذ اَرَّسُوْل غَار يِنِّي وَار يدْجِين شَا زِي أَيث-إِسْرَائِيل
14آي اَيثْمَا، نش مْتيّْقن بلِّي كنِّيو ثشُّوْرم س ڒْخِير ذ مَارَّا ثُوْسْنَا،#15.14 ثُوْسْنَا نتَّاث ذ لْمَعْرِفَا. ثْزمَّرم اَذ تسْڒمْذم اَيَاوْيَا. 15-16وَلَكِن زعْمغ ؤُرِيغ ثَبْرَات-أَ غَارْوم خ ڒبْعَاض ن ثْمسْڒَايِين حمَا وَار ثنْت تتُّوْم شَا. لِأَنَّا نش تݣّغ ڒْخذْمث ن ڒفْقِي تْبشَّارغ س وَاوَاڒ ن أَربِّـي س لْبَرَاكَا نِّي إِي ذَايِي يوْشَا بَاش اَذ يڒِيغ ذ اَخدَّام ن عِيْسَى لْمَسِيح إِ كنِّيو وَار يدْجِين شَا زِي أَيث-إِسْرَائِيل. حمَا اَكنِّيو قدّْمغ اَم يِجّن ن صّذْقث ثصْفَا س اَرُّوْح يقدّْسن حمَا اَت يقْبڒ أَربِّـي. 17فَلِهَذَا س عِيْسَى لْمَسِيح اَذ فْتَخَارغ س ڒْخذْمث ينُو إِ أَربِّـي.
18شُوْف، زعْمغ اَذ سِّيوْڒغ غِير خ مِين يخدّم لْمَسِيح خ وفُوْس ينُو حمَا يِنِّي وَار يدْجِين شَا زِي أَيث-إِسْرَائِيل اَذ طَاعن إِ أَربِّـي س وَاوَاڒ ذ ڒخْذَايم ينُو، 19يعْنِي س جّْهذ ن لْمُعْجِزَاث ذ لْبُرْهَانَاث إِي د يُوْسِين س جّْهذ ن اَرُّوْح ن أَربِّـي. أَمُّو إِي بشَّرغ س لْإِنْجِيل ن لْمَسِيح ذِي مْكُڒ اَمْشَان يعْنِي زِي ثنْدِينْت ن لْقُدْس اَڒ جْوَايه ن إِلِيرْيَا. 20أُو نش رزُّوْغ اَذ تْبشَّارغ ڒبْدَا س لْإِنْجِيل ذِي ثْمُوْرَا مَانِي وَار خَاس تسْڒِين شَا خ لْمَسِيح بَاش وَار بنِّيغ شَا خ شَا ن دْسَاس إِݣ يݣَّا حَدّ نّغْنِي. 21مَامّش يقَّار لْكِتَاب:
<يِنِّي وَار خَاس يتْوَاخبَّرن اَذ تْوَاڒَان،
يِنِّي وَار خَاس يتْسْڒِين اَذ فهْمن.>
22ذ وَا ذ سَّبَاب إِي ذَايي يطّْفن اَطَّاس ن ثْوَاڒَاثِين وَار غَارْوم د ؤُسِيغ شَا.
أَرَّسُوْل بُوْلُس يرزُّو اَذ يرَاح غَار ثنْدِينْت ن رُوْمَا
23وَلَكِن ڒخُّو وَار غَارِي بُو ومْشَان اَذ خذْمغ ذِي جْوَايه-أَ، أُو نش مشْحَاڒ زݣ وَامِي إِي رزُّوْغ اَذ د اَسغ اَكنِّيو ࢲرغ. 24خْمِي غَا رَاحغ غَار سْپَـانْيَا تْمنِّيغ اَخَاوم د كّغ، أَكِذْوم قِّيمغ اَكِذْوم فَرْحغ شْوَايْت ن ڒْوقْث. نش تْمنِّيغ زَّايْوم اَذَايِي ثْعَاوْنم اَذ كمّْڒغ خ وبْرِيذ ينُو. 25وَلَكِن ڒخُّو اَقَا ݣُّوْرغ غَار ثنْدِينْت ن لْقُدْس بَاش اَذ عَاوْنغ ڒْمُوْمِنِين صَّالِحِين إِي ذِنِّي. 26لِأَنَّا ڒْمُوْمِنِين إِي يدْجَان ذِي جْوَايه ن مَسِيدُوْنْيَا ذ وخَايَا تخْسن اَذ عَاوْنن يپُـوْبْرِيثن إِي يدْجَان جَار ڒْمُوْمِنِين صَّالِحِين ذِي ثنْدِينْت ن لْقُدْس. 27أَقَا نِثْنِي تخْسن اَذ ݣّن مَانَايَا، مَانَايَا ذ صَّح ذ يجّن ن لْوَاجِب اَقَاث خَاسن. مَايمِّي؟ لِأَنَّا يِنِّي وَار يدْجِين شَا زِي أَيث-إِسْرَائِيل مڒَا يْسِين زِي لْبَرَكَا رُوْحِيَا ن يسْرَائِيلِيْين، ئِتْخصَّا-يَاسن لَابُد يِنِّي وَار يدْجِين شَا زِي أَيث-إِسْرَائِيل اَذ عَاوْنن يسْرَائِيلِيْين س وَاݣْرَا نْسن. 28إِذن خْمِي غَا كمّْڒغ شّْغڒ-أَ اَذَاسن سِّيوْضغ مَارَّا لْمُعَوَانَا-يَا، أَخَاوم د كّغ خْمِي غَا رَاحغ غَار سْپَـانْيَا. 29أُو نش سّْنغ خْمِي غَارْوم د غَا اَسغ، أَذ د اَسغ س يِجّن ن ڒْمُوْدّ#15.29 ڒْمُودّ نتَّا ذ يجّن ن وقدُّوْح تُوْغَا عبَّرن ذَايس يمنْدِي نِغ يرْذَان ذ ثْمسْڒَايِين نّغْنِي ذِي زْمَان. يشُّوْر س لْبَرَكَا ن لْمَسِيح.
30فَا تتَّارغ زَّايْوم آي اَيثْمَا، س سِيذِيثْنغ عِيْسَى لْمَسِيح ذ ڒمْحِبّث ن اَرُّوْح ن أَربِّـي اَذ تْبدّم اَكِذِي س ثْࢲَادْجِيث نْوم غَار أَربِّـي س سَّبَاب ينُو. 31ࢲَّادْجث حمَا نش اَذ نجْمغ زݣ يفَاسّن ن يِنِّي وَار يُوْمِيْنن شَا ذِي جْوَايه ن يَهُوْذِيَا، أُو عَاوذ بَاش ڒْخذْمث ينُو ذِي لْقُدْس اَت قبْڒن ڒْمُوْمِنِين صَّالِحِين إِي ذِنِّي. 32ڒخْدّنِّي، مڒَا يخس أَربِّـي اَغَارْوم د اَسغ س ڒفْرَاحث أَ نْريّح اَݣ وَايَاوْيَا. 33أَربِّـي ن ڒهْنَا اَكِذْوم يِيڒِي مَارَّا إِذْوم. آمِين.
Actualmente seleccionado:
أيث-روما 15: ريف
Destacar
Compartir
Copiar
¿Quieres tener guardados todos tus destacados en todos tus dispositivos? Regístrate o inicia sesión