ڒخذايم 15
15
لْعَلَاقَا يدْجَان جَار يمَسِحِيْين ذ شَّرِيعَا ن مُوْسَى
1ؤُسِينْ-د شَا ن يرْيَازن زِي يَهُوْذِيَا سڒْمَاذن اَيثْمَاثْنغ ذݣ وَانْطَاكْيَا نَّان-اَسن: "وَار ثْزمَّرم شَا اَذ تْنجْمم إِلَّا مڒَا ثݣِّيم طَّهَارث عْلَاحْسَاب شَّرِيعَا ن مُوْسَى." 2-3ئِرُوْح بُوْلُس ذ بَرْنَابَا تمْنَاقَارن اَك يِنِّي إِي د يُوْسِين زِي يَهُوْذِيَا، ئِوْقع جَارَاسن يجّن ن لْخِلَاف ذ اَمقّْرَان. كَّرن جْمَاعث نِّي ن ڒْمُوْمِنِين ذݣ وَانْطَاكْيَا يخْضَرن بُوْلُس ذ بَرْنَابَا بَاش اَثن سّكّن اَك ڒبْعَاض ن ڒْمُوْمِنِين نْسن غَار ثنْدِينْت ن لْقُدْس بَاش اَذ سّقْسَان اَرُّسُل ذ يمقّْرَانن ن جْمَاعث ن ڒْمُوْمِنِين خ لْخِلَاف-أَ إِݣ يوقْعن. وَامِي سّكّن بُوْلُس ذ بَرْنَابَا غَار لْقُدْس خ وبْرِيذ نْسن عْذُوْن خ فِنِيقِيَا ذ سَمَارْيَا. خبَّرن اَيثْمَاثنغ يدْجَان ذِنِّي خ مَامّش إِݣ ؤُمْنن ؤُڒَا ذ يِنِّي وَار يدْجِين شَا زِي أَيث-إِسْرَائِيل. ڒخْبَار نِّي يسْفَرح-يثن اَطَّاس مَارَّا. 4وَامِي ؤُوْضن غَار لْقُدْس، رحّْبن زَّايْسن جْمَاعث ن ڒْمُوْمِنِين ذ يمقّْرَانن ن جْمَاعث-أَ ذ ارُّسُل. ذِنِّي بُوْلُس ذ بَرْنَابَا عَاوْذن-اَسن إِ نِثْنِي مَارَّا مِين يݣَّا أَربِّـي خ وفُوْس نْسن.
5وَلَكِن كَّرن شَان ن ڒْمُوْمِنِين ڒْحِزب نْسن زݣ يفَرِّيسِيْين نَّان: ئِتْخصَّا وَا لَابُد اَذ طهَّارن يِنِّي وَار يدْجِين شَا زِي أَيث-إِسْرَائِيل، أَثن ثْوصَّام اَذ طَاعن إِ شَّرِيعا ن مُوْسَى.
6مُوْنن اَرُّسُل ذ يمقّْرَانن ن جْمَاعث ن ڒْمُوْمِنِين حمَا اَذ خْزَرن ذِي لْخِلَاف-أَ. 7وَامِي مْنَاقَاشن اَطَّاس، ئِكَّر بُطْرُس يبدّ ينَّا-ٱسن: "آي اَيثْمَا، أَقَا كنِّيو ثسّْنم مشْحَاڒ زݣ وَامِي إِي ذَايِي يخْضَر أَربِّـي زَّايْوم بَاش يِنِّي وَار يدْجِين شَا زِي أَيث-إِسْرَائِيل اَذ سْڒن زݣ وقمُّوْم ينُو اَوَاڒ ن لْإِنْجِيل اَذ اَمْنن. 8أَربِّـي ذ نتَّا إِݣ يسّْنن ؤُڒ ن بْنَاذم، يسظْهَار-د نتَّا بلِّي يقْبڒ-يثن يعْنِي يُوْشَا-ٱسن أَرُّوْح يقدّْسن مَامّش ذَانغ ث يُوْشَا إِ نشّْين. 9وَار يݣِّي بُو س وُوْذمَاون جَارَانغ، ئِسِيرذ-اَسن ؤُڒَاون نْسن وَامِي ؤُمْنن. 10ڒخُّو كنِّيو مَايمِّي ثْزَعْمم اَذ تࢲرم أَربِّـي مِين غَا يݣّ، تݣّم دْقڒ ن ثْزَايْڒُوْت#15.10 ثزَايْڒُوْت نتَّاث ذ ثْزَاݣْرُوْت. تݣّن-تث خ يِيرَاون ن يفُوْنَاسن ذِي زْمَان شرّْزن زَّايس. قَّارن-اَس عَاوذ ثَغْوَاوْث. زَعْمَا نتَّاث ذ شَّرِيعَا ن مُوْسَى، ثذْقڒ خ يِوْذَان مِنْزِي ذَايس اَطَّاس ن ڒُوْصِيَاث. خ يِيرِي ن يمحْضَارن؟ دْقڒ نِّي تُوْغَا وَار نْزمَّر اَث نيْسِي لَّا نشِّين ؤُڒَا ذ ڒجْذُوْذ نّغ. 11نشِّين مِين نْتَامن؟ نْتَامن بلِّي نشِّين أَ ننْجم س اَرْضَا ن سِيذِيثْنغ عِيْسَى مَامّش غَا نجْمن ؤُڒَا ذ يِنِّي وَار يدْجِين شَا زِي أَيث-إِسْرَائِيل."
12مَارَّا جْمَاعث نِّي ذِنِّي إِي قِّيمن وَار نِّين وَالُو، تسْڒَان إِ بَرْنَابَا ذ بُوْلُس سَّاوَاڒن خ لْمُعْجِيزَاث ذ لْبُرْهَانَاث يݣَّا أَربِّـي خ وفُوْس نْسن جَار يِنِّي وَار يدْجِين شَا زِي أَيث-إِسْرَائِيل.
13وَامِي كمّْڒن اَوَاڒ نْسن، ئِنْدق-د يَعْقُوْب ينَّا-ٱسن: "آي اَيثْمَا، صنّْطم غَارِي مْلِيح! 14ئِعَاوذ-اَنغ سِمْعَان خ مَامّش ذݣ ومزْوَارُو يفْقذ أَربِّـي يِنِّي وَار يدْجِين شَا زِي أَيث-إِسْرَائِيل يخْضَر شَا زَّايْسن اَذ يڒِين ذ شَّعْب نّس. 15مَانَايَا يُوْسَا-د اَك لْأَنْبِيَا مِين نَّان ذِي زْمَان، مَامّش يقَّار لْكِتَاب:
16منْبَعْد إِ مَانَايَا نش اَذ د ذوْڒغ،
أَقِيضُوْن ن دَاود إِي يوْضَان اَث سْبدّغ،
مِين زَّايس ينْهذْمن اَث سْݣَعّْذغ اَث عذْڒغ.
17-18بَاش ينِّي يقِّيمن زݣ يِوْذَان اَذ رْزُوْن خ سِيذِي أَربِّـي،
بَاش مَارَّا يِنِّي وَار يدْجِين شَا زِي أَيث-إِسْرَائِيل
يِنِّي إِي ييْسِين يسم ينُو اَخَاس رْزُوْن.
أَمُّو يقَّار سِيذِي أَربِّـي
ثِمسْڒَايِين-أَ إِي دْجَانْت زِي زْمَان،
ڒخُّو يسْمظْهَار-يثنْت-يد."
19 ينَّا-ٱسن يعْقُوْب: "خ مَانَايَا نش تْوَارِيغ وَار نْسقْسَاح شَا خ يِنِّي وَار يدْجِين شَا زِي أَيث-إِسْرَائِيل إِݣ يتَامْنن ڒخُّو زِي أَربِّـي. 20وَلَكِن اَذَاسن نَارِي ثَبْرَات-أَ حمَا اَذ بعّْذن خ لْمَكْلَا يتْوَاقدّْمن إِ لْأَصْنَام ذ لْفَسَاد ذ مِين يتْوَاجيّْفن ذ يذَامّن. 21لِأَنَّا زِي زْمَان تْحدَّاثن إِ يِوْذَان س شَّرِيعَا ن مُوْسَى ذِي مْكُڒ ثنْدِينْت، قَّارن-ت زِي سّبْث غَار سّبْث ذِي ثمزِيذَاوِين ن أَيث-إِسْرَائِيل."
ثَبْرَات إِ ڒْمُوْمِنِين إِي وَار يدْجِين شَا ذ يسْرَائِيلِيْين
22خ مَانَايَا اَرُّسُل ذ يمقّْرَانن ن جْمَاعث ن ڒْمُوْمِنِين ذ مَارَّا جْمَاعث ن ڒْمُوْمِنِين ݣِّين اَذ يخْضَرن شَان ن يرْيَازن نْسن، أَثن سّكّن اَك بُوْلُس ذ بَرْنَابَا غَار ثنْدِينْت ن وَانْطَاكْيَا. ئِخْضَرن يجّن ؤُمِي قَّارن سِيلَاس ذ يِجّن قَّارن-اَس يَهُوْذَا يعْنِي ونِّي ؤُمِي قَّارن بَارْسَابَا، غَارْسن يجّن ن ومْشَان ذ اَمقّْرَان جَار ڒْمُوْمِنِين. 23سّكّن اَكِذْسن ثَبْرَات-أَ نَّان-اَسن:
"آي اَيثْمَاثْنغ وَار يدْجِين شَا زِي أَيث-إِسْرَائِيل إِݣ يزدّْغن ذِي وَانْطَاكْيَا ذ سُوْرْيَا ذ لْإِقْلِيم ن كِيلِيكْيَا، نتْسدْجَام خَاوم نشِّين إِي يدْجَان ذ اَرُّسُل ذ يمقّْرَانن ن جْمَاعث ن ڒْمُوْمِنِين.
24نتْسْڒَا بلِّي شَان يِوْذَان زَّايْنغ ؤُسِين-د غَارْوم بْڒَا لْإِذن نّغ، سدّْعن-كنِّيو، سِيذْفن ذَايْوم شّكّ س وَاوَاڒ نْسن. 25نشِّين مَارَّا نْتَافق، نِيخْضَر شَان ن يرْيَازن اَثن د نسّكّ غَارْوم اَك يمْعِيزّن نّغ بَرْنَابَا ذ بُوْلُس. 26يرْيَازن-أَ غَامَرن س ثُوْذَارْث نْسن خ يِيسم ن سِيذِيثْنغ عِيْسَى لْمَسِيح. 27خ مَانَايَا نسّكّ-اَوم-د ؤُڒَا ذ يَهُوْذَا-يَا ذ سِيلَاس-أَ بَاش اَذَاوم ينِين س وقمُّوْم نْسن مِين ذَاوم د نُوْرَا ذِي ثبْرَات-أَ. 28نشِّين ذ أَرُّوْح يقدّْسن نتْوَاڒَا مْلِيح وَار خَاوم نتّݣّ بُو دْقڒ اَطَّاس إِلَّا مِين يدْجَان وَا لَابُد. 29يعْنِي اَذ تْبعّْذم خ لْمَكْلَا يتْوَاقدّْمن إِ لْأَصْنَام، ذ يذَامّن، ذ مِين يتْوَاجيّْفن، ذ لْفَسَاد. مڒَا ثْبعّْذم خ ثْمسْڒَايِين-أَ وَا اَتَاف ثݣِّيم مْلِيح. اَكنِّيو يعَاون أَربِّـي."
30يِيْنَا يتْوَاسّكّن غَار وَانْطَاكْيَا صَافِي ؤُوْضن ذِنِّي، سْمُوْنن جْمَاعث ن ڒْمُوْمِنِين ؤُشِين-اَسن ثَبْرَات نِّي. 31وَامِي ت غْرِين جْمَاعث نِّي فَرْحن اَطَّاس لِأَنَّا ثْشجّع-يثن. 32يَهُوْذَا ذ سِيلَاس نِثْنِي ذ لْأَنْبِيَا، تْشجَّاعن ڒْمُوْمِنِين س وَاطَّاس ن وَاوَاڒن، ݣِّين ذَايْسن ؤُڒ. 33قِّيمن ذِنِّي يجّن ن لْمُدَّا، منْبَعْد سّكّن-ثن ڒْمُوْمِنِين نِّي ذِي ڒهْنَا غَار يِنِّي إِي ثن د يسّكّن. 34{وَلَكِن سِيلَاس يݣَّا اَذ يقِّيم ذِنِّي.} 35بُوْلُس ذ بَرْنَابَا قِّيمن ذِي ثنْدِينْت ن وَانْطَاكْيَا، سڒْمَاذن تْبشَّارن س وَاوَاڒ ن سِيذِي أَربِّـي، نِثْنِي ذ وَاطَّاس ن يِوْذَان.
لْخِلَاف جَار اَرَّسُوْل بُوْلُس ذ بَرْنَابَا
36ثعْذُو يجّن ن ڒْوقْث، ينَّا-ٱس بُوْلُس إِ بَرْنَابَا: يَالَّاه، أَ نذْوڒ غَار اَيثْمَاثْنغ ذِي كُڒ ثنْدِينْت مَانِي نْبشَّر س وَاوَاڒ ن سِيذِي أَربِّـي أَ نࢲر مَامّش دْجَان. 37بَرْنَابَا يخس اَكِذْسن يَاوِي يُوْحَنَّا ونِّي ؤُمِي قَّارن مَرْقُس. 38وَلَكِن بُوْلُس وَار ذَاس يعْجِيب شَا اَث اَوِين اَكِذْسن مِنْزِي مَرْقُس تُوْغَا يسْمح ذَايْسن ذِي پَـامْفِيلْيَا وَار كِيسن يقِّيم شَا ذِي ڒْخذْمث نِّي. 39وَار تَافْقن قَاع ذِي ثْمسْڒَايْث-أَ، كُڒ يجّن مَانِس يكَّا. بَرْنَابَا يسَفَر اَك مَرْقُس ذݣ وغَرَّابُو غَار قُبْرُص. 40بُوْلُس نتَّا يخْضَر سِيلَاس، فّْغن نِثْنِي كلّْفن-ثن ڒْمُوْمِنِين خ ڒْخذْمث نِّي نَّان اَخَاوم يَارْضَا سِيذِيثْنغ. 41ئِرُوْح غَار سُوْرْيَا ذ لْإِقْلِيم ن كِيلِيكْيَا يتݣّ ؤُر ذي ثْجُمَاع ن ڒْمُوْمِنِين.
Actualmente seleccionado:
ڒخذايم 15: ريف
Destacar
Compartir
Copiar
¿Quieres tener guardados todos tus destacados en todos tus dispositivos? Regístrate o inicia sesión