1 أيث-كورينث 3
3
لْخِلَاف ذِي جْمَاعث ن ڒْمُوْمِنِين
1آي اَيثْمَا، نش تُوْغَا وَار زمَّرغ شَا اَكِذْوم سِّيوْڒغ اَم يِوْذَان يتݣّن اَرَّاي إِ اَرُّوْح ن أَربِّـي. لَّا، سِّيوْڒغ اَكِذْوم اَم يِوْذَان إِݣ يتݣّن اَرَّاي إِ نّفْس نْسن، أَم يسيْمَان وَاهَا إِي د يخڒْقن ذِي لْمَسِيح. 2ؤُشِيغ-اَوم اَذ تْحڒْوم اَغِي#3.2 أَغِي نتَّا ذ اَشفَّاي ذِي ڒبْعَاض ن يمُوْشَان ذِي أَرِّيف. وَاهَا مَاشِي لْمَكْلَا ذ صَّح، لْمَكْلَا ذ صَّح تُوْغَا وَار ذَاس ثْزمَّرم شَا. أَقَا عَاذ ڒخُّو وَار ذَاس ثْزمَّرم شَا، 3كنِّيو عَاذ تݣّم اَرَّاي إِ طَّبِيعَا ثَعفَّانْت نْوم. مڒَا يتِيڒِي ڒحْسذ جَارَاوم ذ ومنْغِي، أَتَاف تݣّم اَرَّاي إِ طَّبِيعَا ثَعفَّانْت نْوم اَتَاف تْعِيشم اَم يِوْذَان ن دُّنشْت-أَ وَاهَا، نِغ لَّا؟ 4شُوْف، مڒَا يجّن يقَّار نش ذفَّارغ بُوْلُس يجّن يقَّار نش ذفَّارغ أَپُــوْلُّوْس، أَتَاف كنِّيو تْعِيشم اَم يوْذَان ن دُّنشْت-أَ، نِغ لَّا؟
5إِيوَا مِين يعْنَا أَپُــوْلُّوْس؟ مِين يعْنَا بُوْلُس؟ نشِّين ذ يخدَّامن وَاهَا، ثُوْمْنم خ وفُوْس نّغ مَامّش ذَانغ د يُوْشَا سِيذِي أَربِّـي أَ نخْذم. 6نش ࢲُّوْغ، أَپُـوْلُّوْس يسسّو، أُو ذ أَربِّـي إِي كنِّيو يسغْمَاين. 7ونِّي يتࢲُّوْن ذ ونِّي يسسَّاون نِثْنِي وَار دْجِين ذ وَالُو. ونِّي يدْجَان نتَّا ذ أَربِّـي يعْنِي نتَّا يسغْمَاين.
8فَا ونِّي يتࢲُّوْن ذ ونِّي يسسَّاون ڒْخذْمث نْسن ذ يجّن، كُڒ يجّن اَث يجَازَا عْلَاحْسَاب ڒْخذْمث نّس. 9لِأَنَّا نشِّين نْشَرّش اَك أَربِّـي ذِي ڒْخذْمث-أَ. كنِّيو ذ اَمَرْجع نّس ذ ڒبْنِي نّس. 10نش عْلَاحْسَاب اَرْضَا إِي ذَايِي يُوْشَا أَربِّـي ݣِّيغ يجّن ن دْسَاس اَم يِجّن ن لمْعَلّم يفْسُوْس نتَّا. يُوْسَا-د يجّن نّغْنِي يبنَّا خ دْسَاس-أَ. وَلَكِن أُو لَابُد كُڒ يجّن اَذ يَارّ ڒْبَاڒ مَامّش غَا يبْنَا خ دْسَاس-أَ. 11وَار ذِنِّي حَدّ يزمَّر اَذ يݣّ يج ن دْسَاس نّغْنِي خ ونِّي ذِنِّي يتْوَاݣّن، أُو دْسَاس-أَ وَانِيتَا ذ عِيْسَى لْمَسِيح. 12-13ئِجّن، مڒَا يبْنَا خ دْسَاس-أَ س دّْهب نِغ س نُّقَارْث نِغ س ثِيزْرَا ثِصبْحَانِين نِغ س وكشُّوْض نِغ س اَرْبِيع نِغ س ورُوْم، أَتَاف ڒْخذْمث نّس اَذ د تْبَان، يعْنِي يُوْم لْحِسَاب ذ لْعِقَاب إِي د غَا يسْمظْهَار مَانَايَا. أُو عَاوذ مَانَايَا اَثِيد ثسْمظْهَار يجّن ن ثْمسِّي أُو ثِمسِّي-يَا اَذ تْصَاحّح مَان نُّوْع ن ڒْخذْمث إِي يݣَّا مْكُڒ يجّن. 14ونِّي يبْنَان خ دْسَاس-أَ ڒْخذْمث نّس نِيشَان وَار ت تتّ شَا ثْمسِّي، أَتَاف اَث يجَازَا. 15ونِّي ؤُمِي غَار ثحرق ڒْخذْمث نّس، أَتَاف اَذ يخْسَر لْجَائِزَا نِّي. نتَّا س يِيخف نّس اَذ ينْجم وَلَكِن اَم ونِّي يَالَّاه د يَروْڒن زِي ثْمسِّي.
16مَا وَار ثسِّينم شَا بلِّي ذ كنِّيو إِي يدْجَان ذ ثَمْزِيذَا ن أَربِّـي، يزدّغ ذَايْوم اَرُّوْح ن أَربِّـي؟ 17ونِّي غَا يهذْمن ثَمْزِيذَا-يَا ن أَربِّـي، أَث يهْذم أَربِّـي. لِأَنَّا ثَمْزِيذَا-يَا ن أَربِّـي نتَّاث مُقدّس أُو ذ كنِّيو إِݣ يدْجَان ذ ثَمْزِيذَا نِّي.
18ئِتْخصَّا وَار ذِنِّي يتِيڒِي حَدّ يخدّع يخف نّس. مڒَا ذِنِّي شَان يِجّن جَارَاوم يحسّب يخف نّس ذ اَمِيغِيس ذِي زْمَان-أَ، ئِتْخصَّا اَذ يذْوڒ ذ اَبُوْهَاڒِي زَعْمَا بَاش اَذ يِيڒِي ذ اَمِيغِس. 19شُوْف، ڒفْهَامث ن دُّنشْت-أَ نتَّاث ذ ثُوْبُّوْهْڒِيَا وَاهَا غَار أَربِّـي. لِأَنَّا يقَّار لْكِتَاب: <نتَّا يطّف يمِيغِيسن ذݣ يخَارْوِيضن نْسن.> 20ئِقَّار عَاوذ: <سِيذِي أَربِّـي يسّن لْأَفْكَار ن يمِيغِيسن وَار نفّْعنْت شَا.>
21-22إِيوَا صَافِي، مَاشِي اَذ تفْتَخَرم س يرْيَازن. شُوْف، كُڒْشِي نْوم: وَاخَّا ذ بُوْلُس نِغ ذ أَپُوْلُّوْس نِغ ذ بُطْرُس، نِغ ذ دُّنشْت-أَ نِغ ذ ثُوْذَارْث نِغ ذ ڒْموْث، نِغ ذ مِين يدْجَان ڒخُّو نِغ ذ مِين غَا يِيڒِين منْبَعْد، يعْنِي كُڒْشِي نْوم. 23كنِّيو ن لْمَسِيح، أُو لْمَسِيح نتَّا ن أَربِّـي.
Actualmente seleccionado:
1 أيث-كورينث 3: ريف
Destacar
Compartir
Copiar
¿Quieres tener guardados todos tus destacados en todos tus dispositivos? Regístrate o inicia sesión