Bilangan 9
9
Eming ontoluk laga a’ge enede ebesogo seni onuk Paskah sorogulom wene
1 #
Kel. 12:1-13
Is aphwami Israel a’ge ebano o Mesir en liplau wotluk, tahun mesik takpoluk, mesik togulat dugwi naduk pelelak a’ge pam at Musa ano dom Sinai pam oruakma, at Allah en Musa mo’guleselat,
2-3“Tanggal 14 dugwi yu a’ge pam o hopmu agoam e, eming nontoluk laga o,” oluk seni sorogulom a’ge hwalogo pesi a’ge ano wene ’belak a’ge ano hegitsogo sorogulat, wene disogo tip, asogo tip, oluk wene tak a’ge emin, wene le’gelak a’ge emin, modok pobitak poluk, hegitsogo enagai pamat sorogu lemagoluk, is aphwami Israel a’ge mo’gulontomup.
4Mo’gulesimu, at Musa en is aphwami Israel a’ge ebano en eming nontoluk lago oluk seni sorogwi a’ge ano onogola enagaisogo welat, soruagoluk, mo’gulentesimu 5dugwi naduk pelelak a’ge pam tanggal 14 o hopmu akhit at Allah en Musa mo’gulesi a’ge ano hegitsogo, eming nontoluk laga oluk enede ebesogo seni sorogwi a’ge ano at seregisa.
6Seregisa a’geat de, is ap pema ap werak a’ge sen entegisema re, sobul yagasogo welagai ’gela’ge, enebe wiak egesarik oruakma, eming ontoluk laik oluk seni sorogwi a’ge ano pam sorogulat, “Agauwa yu a’ge pam his sorogup erlak o,” oluk, mo’gulentegisema, is en agauwa ai erlige Musa Harun emin en’bek wegesarik, mo’gulontogulat, 7“Nis e ap werak a’ge tenholuk sobul yagasogo welagai ’gela’ge, nenebe wiak ege ai demat a’geat de, eming nontoluk laga oluk seni sorogulom oluk wene ’belak a’ge ano sorogulat, at Allah ebaget wusogo soru a’ge ano, his henemin sorul erlak, oluk mo’gulnontogwi ai, no paget en mo’gulnontogwi o?”
8Asogo mo’gulegisema, at Musa en is ebano o’go mo’gulentasulat, “His en no’gosogo tu a’ge holuk, at Allah en mo’gulnoso holuk en de mo’gulhentaikmu re, mosogo wolomup o.”
9Oluk mo’gulentesimu, at Allah en Musa mo’guleselat, 10“Hat en is aphwami Israel a’ge mo’gulentagun e yu at o. Ap mesik is ene’gerlakma oruak a’ge emin, eneiyagai ene’balak weiyal il laga lema a’ge ebano a’ge emin, ebano en ap warema a’ge ebe wogulat, ebela walekma en owan wagalat, tua a’geat de an Allah ebetniogulat, seni eming ontoluk legi a’ge paget enagaisogo sorogwi holuk, is ogo re enemin sorogulom obat o. 11Ye, onogola enagaisogo soru ano re, dugwi mesik pelelak poluk, mesik peleliso a’ge tanggal 14 ai a’ge pam o hopmu ago holuk nak, seni eming nontoluk laga oluk onogola enagaisogo sorogwi a’ge ano pam domba ano wusogo sorogulat, oroti ragi po erlak a’ge worogo a’ge emin, yorum erle a’ge sogo emin, no’gulemak o. 12#Kel. 12:46; Yoh. 19:36No’gulat e, sogo a’ge pema dedilogo pouwa a’ge oruakhwe o dakha eselat, ye, uak mesik ogo porlok hogulat, tu modok mia o. At e, seni eming ontoluk legi a’ge ano paget onogola enagaisogo sorogulat, togulom wene, disogo tip asogo tip, oluk, wene legelogo mo’gulentegis ano hegitsogoat togu lemak o.
13Ye, ap mesik ebe sobul yagasogo wiak agalat, ebela walekma en owan wagalat, tu erlak oruakhwe, agauwa seni sorogulom a’ge oluk ’belak a’ge ano a’ge pam en an Allah nebaget wusogo seriso erlak holuk, at ap ai, arilak oruak a’ge ene’gerlakma en a’guluak erlagapsogo o’borlma lebikpouwak o. At wiak tiso ano re, e’gin omuat ebam welemak o.
14Is ap ’bok a’ge ene’gerlakma oruak a’ge ebano en an Allah nebaget enede ebet nobogulat, eming nontoluk laga oluk seni sorogumu, an ogo serik o, oluk epasulat holuk e, seriselat, togulom a’ge wene tak a’ge emin, wene le’gelak a’ge emin, ai ’gela’geat taga lemak o. Israel onowirak a’ge emin, is ap ’bok a’ge emin, ’berlegat hegitsogo nak wene tak a’ge mesigat ai nagat ’berlek en togu lemak o, oluk, egei ai o oluk, mo’gulontomup o,” oluk, mo’gulesi.
O hena a’geat de, odouk magale amolit ’gela’ge yogo pasu laga wene
15-16Nenaik ’gain Onuk Logo a’ge owi sum owi werigisa ai erlige re, o hena en o werik a’ge ano sebelu aga. Sebelu agarik, o hik ese laga hwerli en ’bekhit o dakha ese laga hwerli, o hena odouk ’gela’ge amolit yogo oruakma yethogu legesa. 17O hena ano sebelak welaga a’ge ligaga holuk e, is aphwami Israel a’ge onowi sum a’ge werik ano moluksogo woluk horloluk e, waga legesa. Wagalat, at o hena ano o momu ebano ’bu agalat mo oso holuk e, o ebayat onowi sum a’ge ebayat worogu legesa. 18Aphwami Israel a’ge en e, Nenaik ’gain Onuk Logo a’ge en,
“O ai moluk tit o,” oluk mo’gulentasuam, moluktogulat, ye,
“Togolik werit o,” oluk mo’gulentasuam, worogulat, til waga legesa. At o hena ai, o Nenaik ’gain Onuk Logo a’ge owi sum a’ge werikmu ebanoat oruak holuk e, is o ebayat modok welegesa. 19At o hena ano o sum a’ge werikmu ebano dum pam aregenat oruak holuk e, is en e, Nenaik ’gain Onuk Logo a’ge en,
“Disogo togu lomup o,” oluk mo’gulentesi hegitsogoat, o eba en wom erlakma en mo ogu legesa o. 20Asogo a’geat de, at o hena ano o sum a’ge werikmu ano dum pam, we, agauwa weiyat nak weleigoluk holugat welaga. Agauwa loksogo welat, weisogo welat, tagalat e, we, nenaik ’gain Onuk Logo a’ge enat,
“His o eba wolorogup o,” eselat,
“Yogodak e, lagup o,” eselat, oso holugat, asogo til waga legesa. 21Agauwa agaikhen erlige re, o hena ano, we, o hup enat ’bekhit hubet dakhasogo nak wolomtik en, hubet erianoat lagaimu re, is ogo waga legesayat. Ye, o hena ano erlige de a, hopmu’gwe de a, lasu holuk, is ogo waga legesayat. 22At o hena ano Nenaik ’gain Onuk Logo a’ge owi sum a’ge werikmu ebano agauwa ’biren de a, dugwi mesigat pam de a, tahun mesigat pam de a, agauwa logon emin de a, o eba oruak holuk, is ogo re, ebanoat welegesa o. Oruakma en o hena ano lasu holuk en nak e, is ogo waga legesa. 23At Nenaik ’gain Onuk Logo a’ge en e,
“Disogo tip o,” oluk Musa en wene mo’gulontuagoluk mo’gulesi hegitsogoat, is o momu wolomtik o akhenma wagalat, til waga legesa ai o.
Actualmente seleccionado:
Bilangan 9: Wul
Destacar
Copiar
Comparar
Compartir
¿Quieres tener guardados todos tus destacados en todos tus dispositivos? Regístrate o inicia sesión