Bilangan 7
7
Allah owi werik a’ge pulogo pogulat tegisa wene
1At Musa ano at Allah owi sabo ano arat weregeitik, o sabo werik emin, di a’ge yu a’ge o ogola ebano emin, Allah ebaget wusogo odouk narlogulomma emin, di a’ge yu a’ge togulat togulom a’ge ai paget emin, ’berlegat eba omu degelak welemagoluk, a’bosu egelik pil laga. 2-3Asogo til lasuam e, aphwami Israel a’ge onuelak ena’gul onuk oruak a’ge en degelonobogulat onosi wenak onobogu legesa a’ge ebano en Allah ebaget pouwagoluk ap onue mesik nak ebaget sapi ebe mesigat nak mesik polik pogulat, ye, ap onuelak ’biren enebaget ’gwiangso kereta nak mesik pulogo pogulat, tegisarik, sapi enebe 12 a’ge wogulat, ye, ’gwiangso kereta ebe 6 wogulat, takpoluk, woluk at Allah il pam owi werik a’ge ebalema eriano Allah ebaget pou wegesa,
4pou wagaiam e, at Allah en Musa mo’guleselat, 5An nebaget pou wegesa a’ge ai, ’berlegat wemin o. Waguntik e, is ap Lewi a’ge an nemin hwedik togumu nowi werikmu en yabuk togulat, is onomu-onomu enat tul opogulat holuk togu lemagoluk, wogentemin o,
6oluk mo’gulesimu, at Musa en ’gwiangso kereta emin, sapi emin, wesirik, is Lewi a’ge ebano wogentasulat, 7’gwiangso kereta ’biren emin, sapi 4 emin, is ena’gul onuk Gerson a’ge en tul opogwi a’ge holuk hegitsogo tuagoluk wogentasulat, 8’gwiangso nin 4 emin, sapi 8 emin, is ena’gul onuk Merari a’ge ap Harun at Allah eiye a’ge omlogo Itamar en onue agarik senentarok welat, tul opogwi a’ge ebano hegitsogoat togu lemagoluk, wogentasulat, tegei a’geat de, 9Is ap ena’gul onuk Kehat a’ge nak e, di a’ge yu a’ge omu degelak Allah owi werikmu wolom a’ge eiye tagenebesi a’ge ano enemarlo pam woluk no’gulomma re, is mesik wogonto erlakma en ugenebesi.
10-11At Allah en Musa mo’guleselat, is ap Israel a’ge onuelak ebano en an Allah nebaget wusogo e narlogulomma omu degelogo a’bosu herlilogo po holuk e, agauwa mesik pam at mesik en woluk wagalat, agauwa mesik pam at mesik en woluk wagalat, togu lemak o, oluk, mo’gulesi a’ge ano mo’gulentesimu, Allah ebaget wusogo e narlogumu omu degelogo a’bosu herlilogo pouwagoluk, di a’ge yu a’ge woluk e narlogulomma ebalema ebano Allah ebaget pou wegesa a’ge enebe ononuk e yu o.
12-83Allah ebaget naduk-naduk pou wago ano re, yuat o.
Ap a’gul Yehuda a’ge onuk Aminadab omlogo Nahason enat pou wagoam e, nogoluk hubet o’gwe
ap a’gul Isakhar a’ge onue Zuar omlogo Netaneel enat pou wagoam e, nogoluk hubet o’gwe
ap a’gul Zebulon a’ge onue Khelon omlogo Eliab enat pou wagoam e, nogoluk hubet o’gwe
ap a’gul Ruben a’ge onue Syedeur omlogo Elizur enat pou wagoam e, nogoluk hubet o’gwe
ap a’gul Simeon a’ge onue Zurisyadai omlogo Selumiel enat pou wagoam e, nogoluk, hubet
ap a’gul onuk Gad a’ge onue Rehuel omlogo Elyasaf enat pou wagoam e, nogoluk, hubet
ap a’gul Efraim a’ge onue Amihud omlogo Elisama enat pou wagalat, nogoluk, hubet
ap a’gul Manasye a’ge onue Pedazur omlogo Gamaliel enat pou wagoam e, nogoluk hubet
ap a’gul Benyamin a’ge onue Gideoni omlogo Abidan en enat pou wagoam e, nogoluk, hubet
ap a’gul Dan a’ge onue Amisyadai omlogo Ahiezer enat pou wagoam e, nogoluk, hubet
ap a’gul Asyer a’ge onue Okhran omlogo pak yen enat pou wagoam e, ye, ologun ’goboksogo pou wago ano re,
ap a’gul onuk Naftali a’ge onue at omlogo Ahira enat pou wagalat tegisa.
Di a’ge yu a’ge hun-hundomok enat o’borl pam louk-o’borl pam louk pou waga legesa anore yuat o.
Allah owi sabo werikmu o’go tak oruak a’ge ano hegit-hegit walhegeik ebale perak a’ge pam hele’gik a’ge e’gin e, mesigat takpoluk mesik ’burl lasu a’ge ano emin,
ik nak ogwi a’ge perak a’ge pam hele’gik a’ge e’gin e, mesik nak a’ge emin, emin wokho
gandum e’gen modok opsogo e’gen wokho a’bosu emin negarlok-hegarlok takpoluk yagarak a’ge Allah ebaget o, oluk pogwi a’ge ano emin,
ik ebale a’ge pam a’bosu egil holuk hele’gik worogwi a’ge emas a’ge pam hele’gikmu e’ben op a’ge yagarak a’ge ano e’gin modok weiyat, 110 gram emin,
Allah ebaget wusogo e narlu a’ge paget sapi ierak a’ge mesik emin,
domba ierak a’ge mesik emin, domba ierak a’ge dogo oruakhwe tahun mesik tak a’ge mesik emin,
ye, onowiak erlagapsogo po a’ge oluk, Allah ebaget wusogo po a’ge kambing ierak a’ge mesik emin,
Allah emin hwedik welemagoluk wusogo at Allah ebaget wogoum a’ge sapi biren emin,
domba ierak a’ge 5 emin, kambing ierak 5 emin, domba ierak a’ge dogo oruakhwe tahun mesigat tak a’ge 5 emin,
hundomok-han domok en pou wegesa a’ge re aiat o.
84At Allah ebaget wusogo odouk narlogulomma omu degelogo a’bosu herlilogo pouwagoluk, is aphwami Israel a’ge onuelak en di a’ge yu a’ge woluk Allah ebaget pou wegesa ano re, ebale perak a’ge pam hele’gik a’ge 12 emin, ik na’gogo pogwi a’ge e’be perak a’ge pam hele’gik a’ge 12 emin, ik ebale hele’gik a’ge pam a’bosu worogwi a’ge emas a’ge pam hele’gik a’ge 12 emin, woluk pou wegesa.
85Ye, demogo pogwi a’ge piring mesigat nak e’gin e, mesik takpoluk, mesik ’burl ’gela’ge, ye, ik nagogwi a’ge mesik nak e’gin e, ’burl ’gela’geatma re, piring emin, ik na’gogwi a’ge emin, perak a’ge pam hele’gik a’ge ano ’berlegat labulogo e’gin walhogulom a’ge Allah owi werik o asuama opsogo hwelak oruak a’ge hegitsogoat walhogulat, e’gin e, 28 a’ge, 86Ye, ik ebale hele’gik a’ge pam a’bosu egil holu worogwi a’ge emas a’ge pam hele’gik e’ben op ago a’ge ne’gak mesik e’gin walhogulom a’ge Allah owi werik o asuama a’ge opsogo hwelak oruak a’ge ano hegitsogoat walhogulat, e’gin e weiyat, 110 gram atma re, la’bolik e, e’gin mesigat takpoluk mesik ’burl ’gela’ge agalat, tegei.
87Ye, Allah ebaget wusogo e narlu a’ge paget, sapi ierak a’ge 12 emin, domba ierak a’ge 12 emin, domba ierak a’ge dogo oruakhwe tahun mesik tak a’ge 12 emin, onowiak erlagapsogo po a’ge paget oluk Allah ebaget wusogo wogoum a’ge kambing 12 emin, woluk wagalat, gandum e’gen wogo Allah ebaget wogoum a’ge eminat pou wegesa. 88Is aphwami Allah emin hwedik wolomogoluk, wusogo wogoum a’ge la’bolik e, sapi ierak a’ge 24 emin, domba ierak a’ge 60 emin, kambing ierak a’ge 60 emin, domba ierak a’ge dogo oruakhwe tahun mesigat tak a’ge 60 emin, ai ’berlegat Allah ebaget wusogo e narlogulomma omu degelogo a’bosu herlilogo pogulat, Allah ebaget wusogo wogegisa ano re, aiat o.
89Arat tegisema, at Musa ano at Allah emin wene ’baligoluk Allah emin hwedik togumu o sabo werikmu ebano ’gwilotluk oruak en e, Allah iak ’belak peti hele’gik a’ge ogola yagasogo lerak a’ge o’borl pam Allah emin hwedik togumu malaikat ’gela’ge kerub biren pema-pema oruakhwe, At Allah ano ’burl hogorlakma eriano ’bu agarik, wene Musa mo’guloso a’ge ano at Musa en holise laga.
Actualmente seleccionado:
Bilangan 7: Wul
Destacar
Copiar
Comparar
Compartir
¿Quieres tener guardados todos tus destacados en todos tus dispositivos? Regístrate o inicia sesión