Imamat 26
26
Wene tak a’ge ano hegitsogo togwi holuk e, ede aganhan enebam pasulom wene
1 #
Kel. 20:4; Ima. 19:4; Ula. 5:8; 16:21-22; 27:1 Mo’gulentesirik, ’gain Nonuk Logo a’ge enaik anatma re, nebalema asua ogut heli’gogo pogulat, di a’ge yu a’ge ogut heli’gogo pogulat, onodogwi e asua heli’gogo pogulat, helep ogut heli’gogo wokho onowi pam pogulat, takpoluk ondogorlu pam en erliktugulom mia o.
2Allah anatma re, agauwa 6 nogoluk loruk o’gwe set hwalhorlogulat we welemagoluk, pulogo enebegi a’ge ebano enede eberogulat, nowi sabo werik asuema ebano en erliktugulat, tugu lemak o.
3 #
Ula. 11:13-15; 28:1-14 Is en an wene le’gelogo mo’gulentasu a’ge ano motluk lagalat, ye, wene disogo tip, asogo tip, oluk, mo’gulentasu a’ge ebano opsogo til lagalat, togwi holuk, 4moru wago erlige moru perakpou wago holuk ono’gwiang pam di a’ge yu a’ge yorogwi a’ge op nak agalat, eniabukmu di agan yu agan e’gen a’bigat ikhasulat, tagoma re, 5yorogwi a’ge ebe nil lagaihwe, anggur e’gen ebe hurle agalat, ye, e’gen hurle agoam e, ’balogo nil lagaihwe, pobuk di a’ge yu a’ge mu yoru a’ge hegit lai lasulat, tagalomma re, onso’boru onogumsogo no’gulat, onowi pam welat enede we selangat welat, tugu lemak o.
6Onogola enagai pam onowi pam we op at welemagoluk, tagenebaikmu re, Onogorlok hogwi erlakma en e, enede we sesogoat nogouwa ani o. A’geat de, orlomene ebabut wiak a’ge onowi pam eba en mukho lebikpasulat, emin il ’belak a’ge ano wagaimu no oluk, wene ’belakpasulat, tisokhwe, 7Enemin weim ’belak a’ge en mugonoboluk onoboluk wusogo wasogo enebil lasulat, 8Is Israel enebe 5 en is ap weim enemin ’belak enebe 100 at sebelogo onobogulat, ye, is Israel a’ge enebe 10 en is ap onoweim selei a’ge enebe 10.000 at wusogo onobogulat, til laga lema ani o.
9An en nogola nagai enebam Pasulat, wene nemin daksogo ’balegis a’ge ano hegirat emak oluk e, ene’balak dagonobogulat, a’bigat emak oluk wogentaik ani o. 10Yorogwi a’ge ano a’bigat emama re, naduk a’ge ’belakpo’gogwi a’ge no’gwi erlakma en welagai a’ge ano hwik haiotluk ’get a’ge ebalema po’gogulat, tugu lema ani o. 11Ap yu arat nebit o, oluk, nosilak tenonobu erlakma en ene’gerlakma at welat, 12#2Kor. 6:16An enaigat agalat, ye, is an neiyagaiat agalat, tuagoluk, an is nemin modogat welik o. 13Eneragam a’geat welat, e’gin enebam welat, enepema ’gonnuksogo welagai a’ge ano is Israel ena’gul lekho no’gulemagoluk, is aphwami O Mesir a’ge en eneragam a’ge tagonoboluk wolom mia o, oluk, O Mesir en wogonoboluk wegi a’ge ’gain Nonuk logo a’ge enaik Allah ano re, anat o, oluk, egei ai o, oluk, mo’gulontomup o.
Wene tak a’ge ano togwi erlak holuk e, wiagap onobogulom wene
14 #
Ula. 28:15-68
Mo’gulentesirik, asogo enebegi a’geat de, is en an niak holu erlakma en ukpogulat, wene disogo tip, asogo tip, oluk mo’gulentasu a’ge ano opsogo tu erlak welat, 15wene le’gelogo mo’gulentasu a’ge ano mi-miarak pogulat, tugulom a’ge wene mo’gulentasu a’ge ano nenebit o, oluk, eme lukho ’gela’ge ukpogulat, wene disogo tip, asogo tip, oluk mo’gulentasu a’ge ano ’berlegat opsogo tu erlak welat, wene nenemin daksogo ’balige a’ge ano sagalogo pogulat, togwi holuk e, 16An en tagonobo ano re, yuat o. Eberak erlakmaat e’gin is enebam perakpou wagoam ou enagap pam odouk pasulat, enil wiagapsogo pasulat, wik-wiaksogo takpil lasulat, enebe at erlagapsogo pasulat, tik o. Yabuk a’bigat wokho yorogwi a’ge ano enselei a’ge en ’balhwerlil waga lemama re, we almasogoat yorogu lema ani o. 17An no’borlma enebegimu re, enemin weim il ’belak a’ge en sebelogo onobou wagalat, is aphwami Israel enebirap onobogwi a’ge ano en e, eneragam sebelogo onobogulat, ye, is en mugonoboluk wagai erlakhweat de, is Israel en nak ’bogolil lagalat, tugu lema o.
18Asogo tagonobogu lema a’geat de, is Israel an niak opsogo hwalogo togwi erlakma ennak welagai ai en e, onowiak o’go e’gin o agauwa 7 hwerliat enebam pasu leik ani o. 19Is Israel enede ’buk welat logo pogwimu re, o moru ’buom no oluk, ’bogorl helep ’gela’ge takpasulat, ono’gwiang pam helep tembaga ’gela’ge takpasulat tik o. 20Asogo takpasuam e, yabuk, lo’gat wokho di a’ge yu a’ge yu a’ge yorogwi a’geat de ebe arat hurle agalat, ono’gwiang pam di agan yu agan e’gen op egesiselat, sogo egesiselat, tua erlakma re, we, almasogoat yorogu lema o.
21Is enede ’buk otluk mo’gulentasu a’ge ano enesa’go holu a’ge enebirap nobogulat nak welagai holuk e, onowiak togwi a’ge ano o’go hegit hegirat e’gin-pe’gin ne’gik 7 pamat enebam pou wagaleik ani o. 22A’geat de, an en di a’ge yu a’ge enanni maro parema a’ge perakpou weikmu is Israel eneiyagai derlelogo parema en no’gulat, onuam erlagapsogo derlel-derlal hogulat enebe mesik-mesik nakma re, onowi pam eba aphwami dengsogo erlak welemagoluk warenebil lagalat, tuguleima o.
23Onowiak o’go asogo tagenebasukhweat de, yu re, Allah enat taknenebasu o, oluk, enede en pobirak erlak enede ’buk nak welagai holuk e, 24an ogo re, nebabut ’buk otluk onowiak o’go o agauwa ne’gik 7 hwerliat e’gin enebam pasulik ani o. 25Onowiak o’go enebam pasulat, wene nemin arat deksogo ’balige a’ge ano sagalogo pogwi ano pam enemin il ’belak a’ge ebano en warenebil wemak oluk, yo’go enebasulat, watnonobu no oluk o kota pak werikmu ’gwilouwok o, oluk, ’gwi lagai a’geat de, ou enebe pam iak erlelik poluk enemin weim il ’belak a’ge en waronobumagoluk, wogentasulat, togolik o. 26A’geat de, onso’boru an en wogentasu a’ge ano erlagapsogo pasu holuk e, hwami enebe 10 en onso’boru sogoluak mesik a’ge pamsogo poluk e’gin walhegeik wogontogwi holuk e, no’gwi a’geat de, nele a’ge nagat welema o.
27E’gin asogoat tagenebasu a’geat de, an niak holu erlakma en enede ’buksogo nak oruak holuk e, 28an ogo re, nede ’buk otluk nolot het en onowiak o’go ne’gik 7 hwerliat e’gin enebam pasulik o, 29enebam pasuam e, onso’boru nele en enemalik logomalik emin, hwelani emin, werak onoboluk no’gulema o. 30A’geat de, dom pam enasua uam wusogo odouk narlogumu erlagapsogo pasulat, e’ben op hogwi a’ge ano odouk narlogumu ebale hele’gik a’ge ano ’goluk ’gelaksogo pasulat, is enebe waragai holuk e, enasua ogut hele’gik a’ge ano e’birek la’bulogo pasulat, enebe eme lukho pogwi a’ge ’gela’ge no’borlma pasulat, togolik o.
31Onowi kota op a’ge ai, moluk-melaksogo takpasulat, enasua erlik tugulomma ’bulogo ’balogo pasulat, e’ben op a’ge holuk nogola nagai hayogoluk, nebaget wusogo pogwi a’ge ano ogo re, wo pukmu en ukpasulat, tago holuk e, 32enemin weim ’belak a’ge ebano en ono’gwiang ai pam ’besie ’balogulat ono’gwiang wik wiaksogo takpegi a’ge ano enil yethogu lemarik, eige, nogorlok e, oluk, erlik tugu lema ani o. 33Enemin il ’belak a’ge en aphwami, Israel onowi pam en mukho lebik onoboluk mugonoboluk warenebil lagai holuk e, di aphwami yu aphwami ena’gul onuk hundomok ene’gerlakma yarluk etil louwagoluk, enemin il ’belak a’ge yo’go enebaikmu tagonobou wagai holuk, Israel onowi kota ap werik a’ge ai erlak agalat, ye, ono’gwiang ano re, we, o wogoat welat, taga lema o.
34-35Asogo tagonobouwago holuk e, is Israel a’ge en ono’gwiang pam welat, tahun 6 takpoluk, tahun mesik pam ono’gwiang en ik welemagoluk, ukpo a’ge ano tu erlakma re, ai erlige is enebe ono’gwiang pam erlak is enemin il ’belak a’ge ono’gwiang pam oruakhwe, ono’gwiang we, o wogo welat, tahun 7 ai pam ono’gwiang en ik aga lemagoluk yabuk wo erlakma en ukpoluk, wolom ’gela’geat ema o.
36A’geat de, is Israel a’ge pema waronobu erlak a’ge emin, il ’belak a’ge ene’gerlakma welagai ano re, onogorloksogo denagallemagoluk tagenebegimu re, o sogwei en e e’gela mesik puhasuam o’borlogouk oso holuk yu re, aphwami en watnenebil wagai o, oluk, mugonoboluk lagai erlakhweat de, aphwami warenebil lagai erlak holuk e, ’bogolil lagai ’gela’ge ’bogolil lagalat ’bule ’bugulat, 37ye, warenebil lagai erlakhweat de, watnenebil wagai yema re, oluk, at mesik en at mesik arogun lebikpogulat, togulat, til-til hweiye ’bogolil laga lemama re, enagap delhorlo a’ge miayat hogu lema o. 38Enagap delhorlo a’ge miama re, di aphwami yu aphwami ena’gul onuk mu a’ge ene’gerlakma ena’guluak erlak agalat, is enemin il ’belak a’ge ono’gwiang en enebe sagalogo nasu ’gela’ge erlagapsogo enebasulat, togolik o. 39Ye, is pema waronobu erlakma en ugonobo ’gwi holuk e, is emin ene’balak emin, wiak tugu legesa o’go is enemin il ’belak a’ge ono’gwiang pam eba en enaboluak de tagenebasulat enebe erlagat aga lema o.
40-41Asogo tagenebasulik a’geat de, is ene’balak enemin, en an niak wene werak a’ge ano sagalogo no’borl pam ligagalat, At iak hologo tu nenebit o, oluk, enede ’buksogo welagai holuk e, an en ogo re, nede ’buk otluk enemin il ’belak a’ge ene’gerlakma welemagoluk, peragenebasu legi a’ge ano onowiak ai, ap enagap ’balogo ukpogwi ai ’gela’ge, enede en logo pogwi a’ge ano ukpoluk enede sebelak pogulat, nis wiak tigemaat taknenebasu o, oluk, onowiak ’bak tugulat, togwi holuk e, 42#Kej. 17:7-8; 26:3-4; 28:13-14 an en Yakub ne’birek wene ologun daksogo ’baliselat, Isak ne’birek wene ologun daksogo ’baliselat, Abraham ne’birek wene ologun daksogo ’baliselat, asogo tagalat, his hono’gwiang wokhentaik o, oluk egi a’ge ano eberak poluk ono’gwiang pam onobou wom a’ge eberik o.
43Asogo tik at a’geat de, an en tugulom a’ge wene werak mo’gulentasu a’ge ano mia opogulat, ye, wene le’gelogo mo’gulentegis a’ge ano tu nenebit o, oluk, niak sagalogulat, togwi a’ge ano re, wiagatma re, onobou wom a’ge paget memerentasulat, ono’gwiang ano en ik agokhwe Di tahun yu tahun di a’ge yu a’ge yorogwi erlak welat, enebe erlak o wogo a’geat ukpou wagoluk, tagenebaik o. 44Asogoat tagenebasu a’geat de, is ap enemin il ’belak a’ge ono’gwiang pam oruakhwe, an nemin wene arat ologun daksogo ’balegis a’ge ano erlagapsogo poma re, an en ukpasulat, aphwami yu arat nebit o, oluk, enebe a’bigat erlagapsogo enebasulat, tik erlak o. An ’gain Nonuk logo a’ge enaik Allah enat egi o. 45’Gain Nonuk logo a’ge anatma re, di aphwami yu aphwami ena’gul onuk mu a’ge enil oruakhwe, is ene’balak enaik Allah weleik oluk, O Mesir en wogonoboluk wegi a’ge ano nemin wene ologun ’balegis a’ge ano enede eberogulat, enagap delik egei oluk, mo’gulontomup o, oluk, mo’gulesi.
46Wene yu re, wene le’gelak a’ge emin, tugulom a’ge wene werak a’ge emin, disogo tip, asogo tip, oluk wene werak a’ge emin, aphwami Israel a’ge en togu lemagoluk, at Allah en dom Sinai pam welat, Musa Mo’gulesi a’ge ano re, aiat o.
Actualmente seleccionado:
Imamat 26: Wul
Destacar
Copiar
Comparar
Compartir
¿Quieres tener guardados todos tus destacados en todos tus dispositivos? Regístrate o inicia sesión