MATAYO 14
14
1Kilïm osiswechoni Erode ngala Yeso nyo kile pöytoghinto Kalilaya. 2Kïmwochï nyinte mötworichi lö, “Yoana Kipatisanin nyini nyo mötïny, nyo ketutï nyinte. Nka nyï ighisyewut pö töngönchin.”
3 #
Luk 3:19-20. Ki Erode nyo kïmwatïta kenam Yoana aketorchï chela, kigh lenyoni ompö ngala Erodiya korketo werïngwa Pilipo. 4#Law 18:16; 20:21. Ompöwölo kimwochï Yoana Kipatisanintö Erode lö, “Melö mïchininyi ipe nyinte.” 5Kïmach Erode kïpar Yoana, wölo kiwagh pipö Yaudi cho kighan werkoyon Yoana lö.
6Kikany ato kimi pich ichonto yiyo Erode, kïpirön chepö Erodiya ompö tawu pich kïmïkul. Kïngarak Erode, 7ntökuyomis cheptanyi ompö muma lö, “Okoninyi kïgh anka tïkwïl nyo kemwaghanyi!”
8Kurur kame cheptanyi lö lenchinö Erode, “Konante möt pö Yoana Kipatisanin ompö otupö nyete le ye!” 9Kwotyö pöytoghinto, wölo ompö kiwalwalatenyi nyo kimwa ompö tawu toyechi, kïmwatïta keghchï chepini machatenyi. 10Kuyoktö nyu kepa kedïng Yoana möt ompö chela, 11akepunö mötït otupö aketö chepay, kwipchï kame. 12Kïpka kinetanpa Yoana kïsït portanyi akïpa kïtïp, atolapay kïpa kïmwochï Yeso.
Kapagh Yeso söpïch nyo wow
(Mrk 6:30-44; Luk 9:10-17; Yna 6:1-4)
13Otini kilïm Yeso ngalechoni, kïweghö otini ompö meli kutang surkwen akïtöpö onkït. Wölo otini kinkïtï söpïch, kïngetunö kanastinekwa akïpegha kelyön kïrïp nyinte. 14Kïngetunö Yeso meli, otini kisïwa nyinte söpïch nyo mamïnïng, kusyonchï akusop pikökwa cho kikösisyote.
15Kïkany kwimön, kïpkonchï kinetankachi akïlenchï, “Mach kïröytö asis kör akwanyï siriron wölete, yontena pïchï kïpechï kegh wölo mi kestonï atökwolchï kegh omisyewut.”
16Kuyokyï Yeso chane lö, “Möminye machata kïpa pich, otönö kïgh kwam!”
17Kuyokyï lö, “Mi ne anka yi, kïpoto makatin mut nko kaghagh odeny.”
18Kïlenchï Yeso chane, “Ale yi omitan.” 19Kimwochï pich kumpur ngwïny, atolapay kïcheng makatinechay le mut nko kaghaghe kwodeny akuros yïm akusoyön Tororöt. Kïmïnchïran makatinechay akutö kinetankachi kutö pich. 20Kwam chane löwïr ntökïpïghyö. Atolapay kïghamït kinetankachi ngötunön cho kinyïghï köröpon taman nko odeny. 21Ki pich cho ngata 5,000 choni kyomisyö akimeyitnye chi kor nko monïng.
Köwesteghö Yeso pögh parak
(Mrk 6:45-52; Yna 6:15-21)
22Atolapay kïmwochï Yeso kinetankachi kïpegha meli kwoghyö nanam antakwagh kuntöghogha nyinte, otini tökuyomisöy nyinte pich. 23Nyini kïyonta pich kïpechï kegh, kïwö onkït kïpus kamas kïsagh. Kimi Yeso atoni onkït akikwimön, 24kikikwit melinay nanam kwen atoni akimi kulukluköy kegh nko chepkïrïri pö pögh nyo kikutuna tawunyi.
25Kïweghö Yeso pögh parak kiwasan kutang wölo mi kinetankachi. 26Nyini kïsïwa chane nyinte kïwegho pögh parak, kuwöghisyö akïlö, “Chi nyï nyo kapusuna ngwen!” Kuteghyö ompö nyökoryö. 27Wölo panini lawel, kïngölonchï Yeso chane kïlenchï, “Onyökonitunö ani nyete, mowöghisyö!”
28Atolapay kïlö Petro, “Echotyon, ato nyi nyoni nyoman, ikany angwïnan pögh parak wöloni imitenyi!”
29Kïlenchï Yeso, “Nyonö!” Kïröyteghö Petro meli akïweghö pögh parak kïwö wölini mi Yeso. 30Wölo nyini kisïwa mirtino pögh kuwöghisyö kïmach kïlït pögh. Kutegh tya lö, “Echotyon sörwante!”
31Kughïtö Yeso ewunyi lenyini lawel akïnam nyinte, atolapay kïlenchï, “Wechï mïnïng kighanatengu! Kölö ne tetomtomönönyi?”
32Kïpus chane kwodeny melinay, kïwïs yomonay. 33Kïkïtïngchï kïsagh kinetan ompö meli akïlö, “Ichinyi nyoman Wero Tororöt!”
Kesop Yeso pich cho chiryot ompö Kenasaret
(Mrk 6:53-56)
34Kwoghyö nanam akïpa ntökwit koro Kenasaret. 35Nyini kunkïtï pich ompö korononi, kuyoktö kut kemïtyï nyinte pich löwïr cho kichiryot ompö koronini kïmïkul. 36Kïsagh pich nyinte lö tökany kïswany pich cho kichiryote sörömuto sïrenyi, akï chane löwïr cho kïswany sïrenyi kï kisöpchö.
Kinetut pö poy
(Mrk 7:1-13)
Actualmente seleccionado:
MATAYO 14: PIPÏLIA
Destacar
Copiar
Comparar
Compartir
¿Quieres tener guardados todos tus destacados en todos tus dispositivos? Regístrate o inicia sesión
©Bible Society of Kenya, 2019