AMatiyu 13
13
Igorok icɛɛt naton anet inas ija
1Atuk kazining e yɔng, aYeso wuruk ayɛt ari, a tsɛ a sonong na anu izek. 2Kudyɛng banet makiyi ku te nate, fi i sak a nɔ ayɛt kukyɛ ashi, a sonong, wɛt banet e ngma, tsɛ ba nyeseng ni ice ibanang. 3AYeso ka ba nye ncɛɛt zizɛɛt ayet igorok icɛɛt, a fɛ̀ ni ba: “Anet ikap akak kin tsɛ a nas ija wu. 4Ni izen fɛ́ a se ni inas e, ikak kpas naton irèn, wɛt nanon berem na tang ide. 5Ikak kpas na agbondong, narɔ fɛ da ntong mak di se awo. I tang i wat i rasak, nek ntong e se gbɛngɛjɛng. 6Wat izen fi kunom ngarak nate, ku shosh ide, i wat nkoot, nek aney e tsang nɔ yik-yik ayet mben awo. 7Ikak kpas ayɛt itsitsan, itsitsan rasak i ki de ro ni kurasak. 8Wat ikak kpas ni ntong ntek, ites ica, ikak anakat, ikak nsɔk karataat, ikak nsɔk ntaat. 9Ayɔng fɛ́ a bɛ́ kuto, won na a fok ifɛ̀.”
Ikyɛng fi sak aYeso ras igoroso icɛɛt
10Bafi imɛɛs e, bɛ́ ni wu, ba fɛ̀ ni wu, “Akyɛ sak fi ngɔn cɛɛt nɛ banet ni igoroso icɛɛt ɛ?”
11AYeso fɛ̀ ni ba, Iyin ba mi ki nɔɔk yin kurēn narɔk igwɔm azanɛn, awɛt i se anɔng sak ni ishɛrɛp banet e awo. 12Nek anet fɛ́ a bi ikyɛng, ba bi tɛ ba ku barang mo shɛkɛdɛk, awɛt ayɔng fɛ́ a se vit ikyɛng, igyet e dɔng fɛ́ a bɛ̀ ngma, ba bi shan ide ni wu. 13Ikyɛng de fi i sak in di cɛɛt ni iba ni igorok icɛɛt: Banet ba se tɛ ba bɛ ayisi akabes, awɛt ba nɛ ba yɛrɛ awo; ba se tɛ ba foos kucɛɛt, ba kyem ba fok nɛ ba yit awo. 14Nek anɔng, ikyɛng fɛ́ atan aIshaya ki mang fɛ̀, ishining naton ba,
“I bi woso ifos yin akabes,
awɛt i bi kyem i rēn yin awo,
i bi woso yɛrɛ yin,
awɛt i bi kyem i di yin awo.
15Nek ayɛ banet nang,
mi te kashalang,
ato ba tɛ a foos awo,
ba mi fam ayisi bà.
Ke da anɔng awo,
ke ba di yɛrɛ na ayisi me,
ke bayɔng ba foos na ato bá.
Ke bayɔng ba kyem ba rēn atsak e,
na ayɛ bá,
ke bayɔng ba tirik sak ni imi,
nɔng imi da ka ba te kyang.”
16Awɛt iyin bɛ̀ yin awɛng nek ayisi yin kyem a yɛrɛ, nɛ ato yin foos. 17Won in ki tak yin atsak: Batan dot, nɛ banet dot fɛ́ ba kin nye ikyɛng fɛ́ Adakunom kin shim, ba tsɛt ke ba di ikyɛng fi iyin tsin yɛrɛ yin, awɛt ba kyem ba sɛ awo, ba tsɛt ba fok ikyɛng fi i tsin foos yin, awɛt ba kyem ba fok awo.
AYeso tak ikyɛng fi igorok icɛɛt e tonong
18Wes yin ato, nɔng i da rēn yin ikyɛng fi igorok icɛɛt anet inas ija me tonong:
19Anet yɔng fɛ́ ke a fok ifɛ̀ igwɔm Azanɛn, ni i ku gaat irēn, a se ti ica me dɔng fi i kpas naton irèn, na amaan e bɛ́ na shan ikyɛng fɛ ba mi tsang tuus ni iyɛ wu nɛ agap. 20Ija me dɔng fi i kpas naton agbondong, i se tɛ anet fɛ́ ke a fok ifɛ̀ me, ayɛt izen izining na wat ishan ifɛ̀ me ni iyɛ ikan. 21Awɛt nek vit iwu na aney, a kyem a nye nkɔs nfaa awo. Izen fi mgbang bɛ́, ke ba kpa ku nesek iyɔm nek ifɛ̀ me ayi, ni izen izining na wat na bun na kama. 22Ija me dɔng fi i kpas narɔ fi itsitsan di se, i se tɛ bayɔng fɛ́ ke ba fok ifɛ̀ me, awɛt ni ndaam nkyɔrɔk azatse, ni nta, ni kurúm, ro ni ifɛ̀ me kurasak, ni sot vit kutes. 23Wat idɔng fi i kpas ni ntong ntek, i se tɛ anet yɔng fɛ́ ke a fok ifɛ̀ me, na rēn ide gyat. Na a di ra kutomong ni ide gyat, kpaf idɔng fi ites ica anakat, ikak nsɔk kanakataat, ikak nsɔk ntat.
Igorok icɛɛt naton agam nɛ alikama
24AYeso tɛ a ka ba nye igorok icɛɛt ikak: Igwɔm azanɛn se tɛ anet fɛ́ a tsɛ a tuus ija itek ni ikɔ wu. 25Awɛt ni izen fɛ́ kaangan se ni nda, anet ifa ni wu, tsɛ a di tuus agam ayɛt alikama me, a tseng akɔɔn wu. 26Izen fɛ́ alikama bɛ́ a rasak, a tes ice, agam dorok bà.
27Basam atek ikɔ me tsɛ ba ku sɛ, ba fɛ̀ ni wu, “Atekari, i kin yet ija itek fi ngɔn kin tuus awɛ? Wat agam e yong, nɛ a ne akɛ?”
28“Atekari me fɛ̀ ni iba, ‘Anet ifa ni imi yɔng, a tsɛ nye kutomong yɔng.’
“Basam e ku rip yɛ, ‘Ki ngɔn shim ni in tsin ngaa yit ina yɛ?’
29“A fɛ̀ ni iba, ‘Awɛy, nek kɔng ni izen ingaa agam me, i bi wɛt i di ngaa yin alikama i di moon yin. 30Won yin ide ni i rasak gung sak izen itusung nayak. Ni izen e yɔng, imi bi tak banet itusung e: Tusung yin agam e, rosom yin nsom-nsoom e, di te yin árong; Tusung yin alikama me, da tse yin ne ni imyɛ.’ ”
Igorok icɛɛt naton kica amusta
31AYeso tɛ a ka ba nye igorok icɛɛt yɛ, “Igwɔm azanɛn se ti kica amusta, fɛ́ anet sok a tsɛ a tuus ni ikɔ wu. 32Ngma nɛ fi ide de i yet ibaane aza kaaki ija, awɛt ni izen fi i bi i rasak, na sot kakon na ka wat kaakye kakon fɛ́ ba tup ni igɔɔt e, nɛ nanon tsɛ na di nok arɛ na na ahwyang e.”
33AYeso tɛ a ka ba nye igorok icɛɛt ikak bà, “Igwɔm azanɛn se tɛ ayiis fɛ́ abining sok, a di riit ni nkpe alikama itsɛn imaas itaat, nɛ a ma dorok fungam.”
34AYeso nyes kudyɛng banet e kucɛɛt ayet igorok icɛɛt; vit ikyɛng fɛ́ a ka ba tak fɛ́ da a di te igorok icɛɛt awo. 35A nye nɔng, mok a di shining ikyɛng fɛ́ atan ki mang fɛ̀,
“Imi bi cɛɛt ni iba ni igoroso icɛɛt,
in bi ka ba tak nkyɔrɔk
fi in kin se ni nɛt neme
dun na ba nye kazatse.”#13:35 Ban di yin: Abom 78:2.
AYeso ka ba tak ikyɛng fi igorok icɛɛt agam nɛ alikama me tonong
36Ama anɔng, aYeso wosong kudyɛng banet e, a tsɛ a nɔ ari. Bafi imɛɛs wu, tsɛ ba ku sɛ ayɛt e, ba fɛ̀ ni wu, “Ki tak yit ikyɛng fi igorok icɛɛt agam ni ikɔ me tonong.”
37AYeso fɛ̀ ni iba, “Anet fɛ́ a tuus ija itek e yet Arim Anet. 38Ikɔ me yet kazatse, ija itek e yet banet fɛ́ Adakunom ya igwɔm natoon ba. Agam e yet banet fɛ́ ba ras nggɔn anyas, 39wɛt anet ifup fɛ́ a ka ba tuus e yet aShetan. Izen itusung e, yet izen igang azatse, wɛt banet itusung e yet batomaza.
40“Kyɔn tɛ fɛ́ ba di ngaa agam e, ba shosh iwu ni rong, i bi se kpaf anɔng ni izen igang azatse. 41Arim Anet bi tom batomaza wu, na ba tusung ngma bayɔng fɛ́ ba saas banet nɛ ba kpas ni inɛn, nɛ ngma bayɔng fɛ́ ba ras ntomong anyas ayɛt igwɔm wu. 42Ba bi ka ba bara ayɛt árong fɛ́ a ya makiyi, azɔng wu ba bi tos, na ba ros anyi bá. 43Wat bafi kusot atsak, bi ron ti kunom ayɛt igwɔm ada bá. Ayɔng fɛ́ a bɛ̀ kuto, won na a fok ifɛ̀.
Igorok icɛɛt naton kurúm
44“Igwɔm azanɛn se tɛ kurúm fɛ́ ba nɛt ni mben. Ni izen fɛ́ akak sɛ kurúm e, a tsɛ a nɛt iko azɔng bà, nek iyɛ ikan, a tsɛ a rɛp ngma kusum ikyɛng fɛ́ a bɛ̀, a tsɛ a di shan ikɔ me.
45“Kpaf anɔng, igwɔm azanɛn se tɛ agbat anet ijik fɛ́ a shashang ata fɛ́ a bi itsɔm makiyi. 46Fɛ́ a sɛ kuta kutek kuzining kufi itsɔm makiyi, a tsɛ rɛɛs ngma ikyɛng fɛ́ a bɛ̀, a tsɛ a di shan iko.
Igorok icɛɛt naton agunung iyisik ízos
47“Igwɔm azanɛn se tɛ agunung iyisik ìzos, fɛ́ ba ta iwu ayɛt idung, a yisik nzam-nzam ìzos. 48Izen fɛ́ a shining, banet iyisik ìzos e, kɔrɔk iwu sak ni ice ibanang. Wat ba sosok aben, ba kasa ìzos itek, ba te na akɔmɔng, ba nosong iduk e yik-yik. 49I bi te kpaf anɔng ni izen igang azatse. Batomaza bi bɛ́ ba kaba banet anyas nɛ bafi kusot atsak 50ba bi bara bafɛ́ anyas e ayɛt árong fɛ́ a ya makiyi, azɔng wu fɛ́ ba bi tos nɛ ba ros anyi.”
51AYeso ka ba rip yɛ, “Iyin yɔng i rēn yin ngma nkyɔrɔk e yɛ?”
Ba fɛ̀ ni wu, “Ey.”
52A fɛ̀ ni iba, “Nek anɔng, ngma anet itees ntsi fɛ́ ba mi ku tees naton igwɔm azanɛn, a se tɛ atekari fɛ́ a turung kurúm kufas ni kuzen narɔ fɛ́ a di tusung.”
Banet aNazaret raba aYeso
53Ama fɛ́ aYeso mi gang igorok ncɛɛt e yɔng, a won karɔ me yɔng. 54A bun sak ni wɔp wu. A tees banet narɔ inyis baYahuda azɔng, ayɔɔt ka ba yisik, nɛ ba nye, “Anet yong sɛ kutsitsɛng kutsik kang akɛ? A sɛ agap iras kutomong abes kang akɛ? 55A barɔ! Arim anet kutomong itosop ákon yong awɛ? Anyining yɔng ba ku yes aMarya awɛ? Barunyining yɔng ba yet ba: aYakubu, nɛ aYusufu, nɛ aSiman, nɛ aJudas awɛ? 56Banganyining yɔng ba se ni mbɔk yit awɛ? Anet yong tsɛ a ne ni nkyɔrɔk nang akɛ?” 57Ayɛ bá wɛt a beseng ni iwu.
Awɛt aYeso fɛ̀ ni iba, “Banet ngma ba nesek atan iratek, nkum banet iwɔp wu, nɛ bafɛ́ ari wu kyɛk fɛ́ ba ku byɛs.”
58A kyem a nye kutomong abes dot azɔng awo, nek avit atsak bà.
Actualmente seleccionado:
AMatiyu 13: IbaasNT
Destacar
Compartir
Copiar
¿Quieres tener guardados todos tus destacados en todos tus dispositivos? Regístrate o inicia sesión
© 2019 The Nigeria Bible Translation Trust and © 2019 Wycliffe Bible Translators, Inc.