ALuka 21
21
Kunang fɛ́ akumung nye
(AMarkus 12:41-44)
1AYeso sok ayisi, a di fɛ́ barum se ni inesek kunang ba ni itsɛ̀n-ishashang kunang ni itu iya Adakunom ntong. 2A tɛ a di akumung akak fɛ́ a yet akan-akan, na tsin nɔɔk naban abɔk wu nafaa. 3AYeso fɛ̀, “Won in ki tak in atsak, akumung akan-akan yo, a nɔɔk ikyɛng fi i wat ifɛ́ ngma bayɔng fɛ́ ba nesek. 4Ngma ishɛrɛp banet nesek kunang bá ayɛt a dot kurúm fɛ́ ba bɛ̀; awɛt iwu ayɛt avit wu, a nɔɔk ngma nkum ikyɛng fɛ́ a da ya.”
Ikyɛng idi igang azatse
(AMatiyu 24:3-14; AMarkus 13:3-13)
5Bakak ayɛt bafi imɛɛs wu se ni itere nzam ata atek fɛ́ ba di nok kutu iya Adakunom ntong ni kuri kunang fɛ́ ba di zem iko. Wɛt aYeso fɛ̀ ni ba, 6“Ngma-ngma ikyɛng fi iyɛrɛ yin azeng, izen bi nye fɛ́ vit kuta kuzining fɛ́ ba bi won iko naton kufidang; ba bi tisik ngma na aben.”
7Ba ku rip yɛ, “Anet itees, ni izik fi ikyɛng deng bi te yɛ? Akyɛ fi i bi ki tonong yit fok izen e mi nye yɛ?”
8A fɛ̀ ni ba, “Te yin nhwyɛ, kɔn akak bi ki bɔrɔk in. Nek banet dot bi bɛ́s ni iyerek hom, ba bi nye, ‘Imi yet iwu me’ ne ‘Izen e mi bɛ́ bakat.’ I bi ka ba kuus in mo awo. 9Izen fi i bi fok in ncɛɛt itsom ni idoro nhwyɛ, i bi fok in nnyim awo. I se gbing-gbing ngma nkyɔrɔk e ni in te ninyɛn, igang e resek mo.”
10AYeso tɛ a fɛ̀ ni ba, “Mben in nà, bi dorok mben in yá ne, igwɔm idè bi dorok igwɔm idá ne. 11Ba bi nye izuut mben, ni nzong, ni kubep na narɔ zizɛɛt, nkyɔrɔk nnyim, ne ajingjing bi ne azanɛn.
12“Ni nkyɔrɔk e resek dang te, ba bi ki yisik in, ba bi ki nesek in iyɔm. Ba bi tsees ni yin na narɔ inyis baYahuda, nɛ nari-ínyang, ba bi tsees ni yin ashon bágwɔm nɛ agwɔmna, ngma naton iyin yet yin bafi ikuus in. 13Anɔng e bi ki tarak in katitu i di shara yin ifɛ̀ itek sak ni ba. 14Nek anɔng, i bi sok kuyiring naton ikyɛng fi i bi fɛ́ yin nek i di tɛnɛng in ice yin awo. 15Nek imi bi ki nɔɔk in ifɛ̀, ni kutsitsɛng ifɛ̀, fɛ́ vit afi ifa ni yin, fɛ́ a bi kyem a ki wat in, kɛ na fɛ̀ awɛy naton ikyɛng fi i fɛ̀ yin awo. 16Ngma bada, ni binggɔ, nɛ baruneng, nɛ bafi izit, nɛ bafidang, bi ki rɛp in, ba bi fɛɛs bakak yin. 17Ngma banet bi ki rayin nek iyin yet yin bafi ikuus in. 18Ngma nɛ anɔng, ku kwoy-ice yin kuzining bi beseng awo. 19Ki i nyeseng in na agap, i bi sɛ in kutset yin.
20“Izen fi i bi di yin batsom mi te aRushelima nate, i bi rēn in fok izen ikpa yɛ mi bɛ́ bakat. 21Ni izen e yɔng, won bayɔng fɛ́ ba se na aJudiya na ba tɔk sak na ahwyanang, na bayɔng fɛ́ ba se ayɛt iwɔp, na ba wuruk amatse, won bayɔng fɛ́ ba se na naban wɔp, ba bi nɔ ni wɔp awo. 22Nek nnom e yɔng, in bi yet nnom fɛ́ naman Adakunom fɛ́ ba ki mang jɛk, bi shining. 23Akyɛ kuri kawɛy fɛ́ ka bi kpa banyining afaa, ngma na bayɔng fɛ́ ba bi se ni ingasa nnon ɛ! Mgbang bi mak ni mben, naman Adakunom bi tik naton banet. 24Ba bi ka ba fɛɛs na awal, ba bi ka ba kok tɛ basam sak ni mben zizɛɛt. Banet Ícɛn-iduk bi shesh aRushelima na atak, ma izen bafi Ícɛn-iduk shining.
25“Ba bi di ikyɛng ayɔɔt naton kunom, naton kufɛn, naton ádat. Azeng azatse a bi te bafi Ícɛn-iduk kpɔrɔk makiyi, na anyim nek kuririm fi izek bi nye. 26Ni izen fɛ́ banet bi se ni itot ikyɛng fi i bi te azatse, banet bi kus nek nnyim, nek ba bi zuut nkyɔrɔk fi nse naton aza. 27Ni izen e yɔng, ba bi di Arim Anet na tsin bɛ́s wu ayɛt anɔk, ayɛt kukyem, ni ízɔk makiyi. 28Ni izen fi nkyɔrɔk nang kpa te, dorok in tsik, yɛrɛk in kazanɛn, nek ibisik in mi bɛ́ bakat.”
29AYeso ka ba nye igorok icɛɛt yɛ: “Di yin kakon atafo, ni ishɛrɛp nakon ngma. 30Kɛ na kpa turup afumung, ni yin di yin ikyɛng yin, ni rēn in fok izen ikorok kutes nakon mi bɛ̀ bakat. 31I se kpaf anɔng, i bi fi di yin nkyɔrɔk nang kpa te, ni rēn in fok izen mi bɛ́ bakat fɛ́ Adakunom da kpa ya igwɔm.
32“Won in ki tak yin atsak, banet kuzam kang bi tsang gang awo, ma nkyɔrɔk nang te ninyɛn. 33Katon na kazatse bi gang, awɛt ifɛ̀ hom bi gang awo.
34“Ka na nye yin gyam! I bi won in, ifeng, nɛ amaan nggɔn bafi isɔ, ni ndaam kusot azatse nang, ni in sok nhwyɛ yin awo. Kɛ da anɔng awo, kunom e, bi bɛ̀ hɔk ku ki shuu yin. 35Tɛ águnung, fɛ́ a bi bɛ̀ naton akaangan fɛ́ a se ni kutset azatse kusum. 36Yɛrɛ yin yɛɛt kaakyi izen, ni ras in awon, nɔng i da kyem ihwyet in ngma nkyɔrɔk fi in bi te, nɔng i bi kyem i nyeseng in ashon Arim Anet.”
37Kaakyi kunom, aYeso tees banet ni itu iya Adakunom ntong, kɛ kahwyɛ nye, na tsɛ na kɔsɔ ni Ihwyanang Ifat. 38Ngma banet bɛ́s ni itu iya Adakunom ntong e na abop adiding, nek ifoos wu.
Actualmente seleccionado:
ALuka 21: IbaasNT
Destacar
Compartir
Copiar
¿Quieres tener guardados todos tus destacados en todos tus dispositivos? Regístrate o inicia sesión
© 2019 The Nigeria Bible Translation Trust and © 2019 Wycliffe Bible Translators, Inc.