ALuka 14
14
AYeso te anet kyang atuk aSabat
1Atuk aSabat akak, aYeso tsɛ a yas ari agbat aFarasi akak. Banet di sak ayisi ni wu makiyi. 2Anet akak fɛ́ a kin bɛ̀ kurɔk imos irɔm, kin se azɔng ashon wu. 3Wat aYeso rip bágwɔm irēn ntsi aMusa, nɛ BaFarasi, “Ntsi aMusa fɛ̀ na ba te kyang anet atuk aSabat, ke awɛy ɛ?” 4Awɛt ngma bá ba te yuu. Wat aYeso yit anet e, a ku te kyang, a ku te ni irèn na a tseng. 5A tɛ a ka ba rip yɛ, “Ke akak ayɛt yin bi nggon ki ìtarakey wu fɛ́ ka kpa ayɛt ibong ashi atuk aSabat, anet e da tsɛ a tun ika ziri ziri awɛ?” 6Wat akak ayɛt bá kyem a fɛrɛng ikikak awo.
Igorok icɛɛt amok iweneng
7Ni izen fɛ́ a di fɛ́ batsen kasa narɔ isosok naratek azɔng narɔ iyak e. Nek anɔng, a ka ba nye igorok icɛɛt yeng: 8“Kɛ akak ki rini yin sak narɔ iweneng agwol, i bi tsi ikasa yin narɔ isosok naratek awo, nek gyang a rini anet akak fɛ́ a da waat ni iratek. 9Ki ikyɛng e te anɔng, ni iwu fɛ́ a ki rini yin bafaa me, bɛ́ na fɛ̀ ni ngɔn, ‘Dorok, nɔɔk anet yo karɔ isonong.’ I di, ni nsum da yit, nek ngɔn da bun narɔ isonong kabaane. 10Ikyɛng ira yet, ke ba da rini, tun tsi tsɛt karɔ isonong ka gebet, nɔng ke ayɔng fɛ́ a da rini bɛ́ a da di, a da fɛ̀ ni ngɔn, ‘Afidang in, dorok bi sonong aze narɔ isonong kagarang e.’ I di, ni sɛ iratek na yisi nshɛrɛp batsen e. 11Nek kaangan fɛ́ sok ice wu zɔk, ba da ku tik lee, wat ayɔng fɛ́ a tik ice wu lɛɛ, ba bi ku sok zɔk.”
Igorok icɛɛt naton amok aratek
12Wat aYeso fɛ̀ nɛ anet fɛ́ a ku rini me, “Ki ngɔn rini banet iya kuyak inom kɛ kufɛ́ ahwyɛ ayi, i bi rini bafidang ngɔn, kɛ barunyining, kɛ bafi izit ngɔn, kɛ bafidang isot ngɔn barum kyɛk awo, ki ngɔn nye anɔng, atuk akak iba yɔng ba bi bɛ́ ba da rini bà. Na anɔng, a sot ba tɛ ba da tarang yɔng. 13Ngma izen fi ngɔn nye nayak iya nek banet, tsi rini bakan, nɛ bayɔng fɛ́ ba yɔmɔng, nɛ bayɔng fɛ́ aduru mang ku, nɛ bakpatɔn. 14Adakunom bi ki nɔɔk yin izang atuk idoro bafaben, nek i bɛ́ yin na bayɔng fɛ́ da ba da kyem ba ki tarang yin awo.”
15Ni izen fɛ́ azining ayɛt bayɔng fɛ́ ba se ni iyas gung ni wu me fok anɔng, a fɛ̀ na aYeso, “Awɛng se gung nɛ anet yɔng fɛ́ a bi sɛ na a ya ni igwɔm Adakunom.”
16AYeso fɛ̀ ni wu, “Ba kin nye anet akak, fɛ́ a kin moon amok aratek, a kin rini banet dot. 17Fi izen iyak e nye, a tom asam wu na a tsɛ a fɛ̀ nɛ bayɔng fɛ́ ba ka ba rini me yɛ, ‘Bɛ́ yin, ba mi nye kaakyi ikyɛng.’
18“Awɛt ngma bá ba tsɛsɛk irèn ihwyesek. Afi imɛsɛng e fɛ̀ na asam e, ‘In tsin mɛsɛng shan ikɔ, i se gbing-gbing ni in tsi di ide. Kabɔk, tsi tak atekari ngɔn, na a nye akabɔk.’
19“Akak tɛ a fɛ̀, ‘In tsin mɛsɛng shan ínyak ikap itoon, in shim in tsin in mara ide yɔng, tsi tak atekari ngɔn, na a nye akabɔk.’
20“Anet akak tɛ a ne bà, a fɛ̀ na asam e, ‘In tsin mɛsɛng ra kuweneng, nek anɔng, in da kyem in bɛ́ awo.’
21“Asam e tɛ bun, a tsɛ a tak atekari wu ngma ikyɛng fɛ́ ba ku tak. Wat iyɛ atekari me beseng, a nɔɔk asam wu irèn ye, ‘Tseng ziri, kuus irén iratek, ni ibaane in fi iwɔp, rung bakan, bayɔng fɛ́ ba yɔmɔng, bakpatɔn, nɛ bayɔng fɛ́ aduru mi ku.’
22“Asam e fɛ̀ ni wu, ‘Atekari, in mi nye ikyɛng fi ngɔn fɛ̀, ngma nɛ anɔng, karɔ rēn di se.’
23“Wat atekari me tɛ a fɛ̀ na asam e, ‘Tseng, kuus irén iratek, ni irén ayit, di ban ni ba, ma ba bɛ́, nɔng kari hom bin shining. 24Won in ki tak yin, vit azining ayɛt bayɔng fɛ́ ba kin tsang ka ba rini yɔng fɛ́ a da fok kuyak amok hom nang fɛ́ ba mi nye.’ ”
Mgbang kusot anet Ikuus
(AMatiyu 10:37-38)
25Atuk akak, kudyɛng banet kin se ni idi kuus aYeso, a tirik a fɛ̀ ni ba, 26“Kɛ akak shim a di kuus mo, kɛ da ishim fɛ́ a bɛ̀ na Adakunom iwaat ifɛ́ atek, ni ifɛ́ anyining, ni ifɛ́ abining, ni ifi nnon, ni ifɛ́ barunyining, ni ifɛ́ banganyining, ngma ni ifi ice wu awo, a da kyem a sot anet ikuus hom awo. 27Ngma anet fɛ́ da a sok kukon itegak wu, a di kuus mo awo, a da kyem a sot anet ikuus hom awo.
28“Won in fɛ̀ yit akak ayɛt yin shim a nok kari aton. A da tung sonong, na fa kudot itsɔm fi inok e da ya ninyen, nɔng a da bin di gyang itsɔm fɛ́ a bɛ̀ da kyem igang kutomong e awɛ? 29Nek kɛ da a nye anɔng awo, a tsɛ a kpa ita itis e, kɛ kari me bɛ́ ka ku gaat igang e, ngma ayɔng fɛ́ a di kari me, a da ku mas. 30Ne ba nye, ‘Anet yong! A ka ka fok iwu nok, di yin fɛ́ ka ku gaat inok.’
31“Won in fɛ̀ yit kɛ agwɔm akak shim a tsɛ a kpa itsom ne afidang, a da tun sonong na mara ke iwu fɛ́ a bɛ̀ batsom agup kusɔk da kyem na ya afidang fɛ́ a bɛ̀ batsom agup nsɔk nfaa yɛ? 32Kɛ a di a da kyem awo, na tom banet gyam, na ba tsɛ ba shuu afidang e, na rēn resek, na ba tsɛt kusonong kukyang. 33Nek anɔng, kaangan ayɛt yin, fɛ́ a da kyem a wosong ngma ikyɛng fɛ́ a bɛ̀ awo, a da kyem na a sot anet ikuus in awo.
34“Ntɔk yet ntek bɛɛs, awɛt ki kuta nate wɛrɛng, ne anɛ fi in da ti in sɛ kuta na yɛ? 35Vit ina ni kutomong kukak, ba da kyem ba te ina ni ikɔ awo, kɛ na ba te ina na na sot narik awo, tit na ba nosong ina kyɛk.
“Ayɔng fɛ́ a bɛ̀ ato, won na a fok ifɛ̀.”
Actualmente seleccionado:
ALuka 14: IbaasNT
Destacar
Compartir
Copiar
¿Quieres tener guardados todos tus destacados en todos tus dispositivos? Regístrate o inicia sesión
© 2019 The Nigeria Bible Translation Trust and © 2019 Wycliffe Bible Translators, Inc.