Li-vi Ki 14

Thái-kô-phiang Heu Kiet-chhiang ke Thiàu-li

1Song-chú chiông yû-koân thái-kô chhiang-li heu ke thiàu-li siên-pu pûn Mô-sî. 2Phiang-ngìn oi son-cho chhiang-li ke-ngit, ngìn oi tai kì hi khon chi-sṳ̂. 3Chi-sṳ̂ oi to yàng-ngoi hi kiám-chhà kì, na-he fat-hien kì ke thái-kô-phiang hó lé, 4chi-sṳ̂ oi ham ngìn vi ke khiù chhiang-li ke tai lióng-chak lî-ngì song ngin-thin chhiang-li ke tiâu-é, yit-te hiông-pak-su, yit-thiàu chhṳ̂m-fùng set ke sien, lâu yit-kî ngiù-chhit-chhó ke nun-kî lòi. 5Chi-sṳ̂ oi fûn-fu ngìn chhai chông-mân chhièn-súi ke nài-phùn táng chhṳ̀ khì-chûng ke yit-chak tiâu-é, 6thùng-sṳ̀ chi-sṳ̂ oi chok-he̍t nang-ngoi yit-chak tiâu-é, chiông kì lièn thùng hiông-pak-su, chhṳ̂m-fùng set ke sien, lâu ngiù-chhit-chhó khiung-ha vun phùn-tú ke hiet, 7chhai ke khiù chhiang-li ke phiang-ngìn sṳ̂n-song fin hiet chhit-pái, yèn-heu siên-pu kì he chhiang-li ke. Chi-sṳ̂ hàn-oi piong ke-chak sâng tiâu-é chéu, pûn kì pî-hiong yâ-ngoi. 8Khiù chhiang-li ke ngìn oi sé-chhiang sâm-fu, thi-thet só-yû ke thèu-nà-mô, sé-sṳ̂n, án-ngiòng kì chhai lî-ngì song chhiu chhiang-li lé. Yèn-heu kì cho-tet ngi̍p-to yàng-tú, chúng-he yit-thin oi chhai kì ke chong-phùng ngoi siên he̍t chhit-ngit. 9Thi-chhit ngit, kì oi chai thi-thèu, thi-sî, thi-thet muk-mì-mô lâu sṳ̂n-song só-yû ke mô, hàn-oi sé-chhiang sâm-fu, sé-sṳ̂n, yèn-heu chhai lî-ngì song chang-son chhiang-li.

10Thi-pat ngit, kì oi tai lióng-chak mò khiet-tiám ke se-yòng-kú, yit-chak yit-se thai, mò khiet-tiám ke yòng-chhṳ-é, sâm kûng-kîn kiâu kám-lám-yù ke yu-mien-fún, lâu sâm-fûn chṳ̂-yit kûng-sṳ̂n ke kám-lám-yù lòi. 11Hàng kiet-chhiang-lî ke chi-sṳ̂ oi tai ke khiù chhiang-li ke ngìn lâu liá-têu chi-vu̍t to sṳn-chong-phùng mùn-héu, Song-chú ke mien-chhièn, 12yèn-heu chi-sṳ̂ oi hien yit-chak se-yòng-kú lâu sâm-fûn chṳ̂-yit kûng-sṳ̂n ke kám-lám-yù cho su̍k-ko-sṳt-chi; kì ya oi chiông liá-têu yèu kí-ha cho yèu-chi hien pûn Song-chú. 13Kì oi chhai chhṳ̀ su̍k-chhui-chi lâu sêu-fa-chi thèu-sâng ke sṳn ke só-chhai chhṳ̀ liá-chak se-yòng. Kì yit-thin oi án-ngiòng cho, yîn-vi su̍k-ko-sṳt-chi lâu su̍k-chhui-chi khiung-yong he kûi-pûn chi-sṳ̂, he chṳ-sṳn ke. 14Chi-sṳ̂ oi nâ-têu su̍k-ko-sṳt-chi sên-ngì ke hiet, kò chhai ke khiù chhiang-li ke ngìn ke yu ngí-thò, yu-sú ke sú-chṳ́-kûng, lâu yu-kiok ke kiok-chṳ́-kûng táng. 15Chi-sṳ̂ oi tó yit-si̍t-é kám-lám-yù chhai chó sú-sîm, 16yung yu-sú ke sú-chṳ́ vun ke yù, chhai Song-chú mien-chhièn fin chhit-pái. 17Chi-sṳ̂ ya oi nâ yit-si̍t-é chó sú-sîm ke yù kò chhai ke khiù chhiang-li ke ngìn ke yu ngí-thò, yu-sú ke sú-chṳ́-kûng, lâu yu-kiok ke kiok-chṳ́-kûng táng, chhiu-he kò chhai su̍k-ko-sṳt-chi sên-ngì ke hiet táng. 18Kì ya oi chiông sú-sîm chhûn-tó ke yù tó chhai ke-ngìn thèu-nà táng. Chi-sṳ̂ oi yung liá-chúng fông-fap chhai Song-chú mien-chhièn vi ke-ngìn hàng kiet-chhiang-lî#14:18 “kiet-chhiang-lî” ya-he yi̍t-cho “su̍k-chhui-lî”. Chhâm-cheu 19-21, 29, 31, 53 chiet..

19Chiap-tén, chi-sṳ̂ oi hien su̍k-chhui-chi, vi ke pún-lòi mò chhiang-li ke ngìn hàng kiet-chhiang-lî, yèn-heu chhṳ̀ sêu-fa-chi ke thèu-sâng, 20chiông kì lâu su-chi hien chhai chi-thàn táng. Chi-sṳ̂ oi yung liá fông-fap vi ke-ngìn hàng kiet-chhiang-lî, kì chhiu chhiang-li lé.

21Na-he ke-ngìn tông-khú, mâi m̀-hí án-tô sên-ngì, kì cho-tet yung yit-chak se-yòng-kú lòi-cho su̍k-ko-sṳt-chi, lòi yèu kí-ha hàng kiet-chhiang-lî. Kì ya oi tai yit kûng-kîn kiâu kám-lám-yù ke yu-mien-fún cho su-chi, kâ sâm-fûn chṳ̂-yit kûng-sṳ̂n ke kám-lám-yù. 22Kì hàn-oi tai kì yû li̍t-liong mâi ke lióng-chak ngie̍t-kap-è ya-he lióng-chak pân-kiêu lòi, yit-chak cho su̍k-chhui-chi, yit-chak cho sêu-fa-chi. 23Thi-pat ngit, chhiu-he kì oi pûn ngìn siên-pu cho chhiang-li ke-ngit, kì oi chiông liá-têu chi-vu̍t tai-to Song-chú sṳn-chong-phùng mùn-héu, kâu-pûn chi-sṳ̂. 24Chi-sṳ̂ oi chiông su̍k-ko-sṳt-chi ke se-yòng-kú lâu kám-lám-yù, yèu kí-ha cho yèu-chi hien pûn Song-chú. 25Kì oi chhṳ̀ ke-chak se-yòng, nâ yit-si̍t-é hiet, kò chhai ke khiù chhiang-li ke ngìn ke yu ngí-thò, yu-sú ke sú-chṳ́-kûng, lâu yu-kiok ke kiok-chṳ́-kûng táng. 26Chi-sṳ̂ oi tó yit-si̍t-é kám-lám-yù chhai chó sú-sîm, 27yung yu-sú ke sú-chṳ́ vun ke yù, chhai Song-chú mien-chhièn fin chhit-pái. 28Chi-sṳ̂ ya oi nâ yit-si̍t-é chó sú-sîm ke yù kò chhai ke khiù chhiang-li ke ngìn ke yu ngí-thò, yu-sú ke sú-chṳ́-kûng, lâu yu-kiok ke kiok-chṳ́-kûng táng, chhiu-he yung su̍k-ko-sṳt-chi sên-ngì ke hiet kò-ko ke thi-fông. 29Kì ya oi chiông sú-sîm chhûn-tó ke yù tó chhai ke-ngìn thèu-nà táng. Chi-sṳ̂ oi yung liá-chúng fông-fap chhai Song-chú mien-chhièn vi ke-ngìn hàng kiet-chhiang-lî. 30Chiap-tén, ke-ngìn oi cheu kì yû li̍t-liong mâi ke hien yit-chak ngie̍t-kap-è ya-he pân-kiêu 31cho su̍k-chhui-chi, nang-ngoi yit-chak cho sêu-fa-chi, lâu su-chi khiung-ha hien. Chi-sṳ̂ oi yung liá-chúng fông-fap chhai Song-chú mien-chhièn vi ke-ngìn hàng kiet-chhiang-lî. 32Liá he pot thái-kô-phiang, chúng-he mâi m̀-hí kiet-chhiang-lî só-oi hien ke sên-ngì ke ngìn yin-kôi chûn-hàng ke thiàu-li.

Yû-koân Vuk-è Sâng-kû ke Thiàu-li

33Song-chú hiong Mô-sî lâu Â-lùn siên-pu yû-koân vuk-è sâng-kû ke thiàu-li. 34(Yî-set-lie̍t-ngìn chin-ngi̍p Song-chú su-pûn kì-têu cho sán-ngia̍p ke Kâ-nàm-thi yî-heu, na-he Kì sṳ́ kì-têu ke vuk-è sâng-kû, kì-têu oi cheu liá-têu thiàu-li vi-tó vuk-è hàng kiet-chhiang-lî.) 35Mò-lun má-ngìn fat-hien chhṳ-kâ ke vuk-è sâng-kû, yit-thin oi hi hiong chi-sṳ̂ po-ko. 36Chi-sṳ̂ oi fûn-fu ngìn chiông vuk-è tî-poi só-yû ke tûng-sî chhiòn-phu pân chhut-lòi, miên-tet vuk-è tî-poi ke tûng-sî chhiòn-phu pûn-ngìn siên-pu cho mò chhiang-li. Tûng-sî pân chhut-lòi heu, chi-sṳ̂ oi ngi̍p-hi vuk-tú, 37kiám-chhà sâng-kû ke thi-fông. Na-he kì fat-hien yû chhiâng-set pân-tiám ya-he fùng-set pân-tiám sâng-to piak-táng, 38kì chhiu oi chhut-lòi, chhai mùn-héu chiông vuk-è fûng chhit-ngit. 39Thi-chhit ngit, chi-sṳ̂ oi chai to-chón hi kiám-chhà, na-he fat-hien piak-táng ke sâng-kû yí-kîn chhe-to kha thai-ta̍p, 40chhiu-oi fûn-fu ngìn chiông yû sâng-kû ke sa̍k-thèu yet chhut-lòi, te̍p chhai sàng-ngoi mò chhiang-li ke thi-fông. 41Yèn-heu, kì oi fûn-fu ngìn chiông vuk-tú piak-táng ke nài-fôi koat-thet, chiông kì tó chhai sàng-ngoi mò chhiang-li ke thi-fông. 42Ke yet-chhut sa̍k-thèu ke thi-fông oi nang-ngoi yung sa̍k-thèu pú sông-hi, piak oi yung nài-fôi chhùng-sîn fún-ko.

43Chhai yet-chhut sa̍k-thèu, koat-thet nài-fôi, chhùng-sîn fún-ko yî-heu, na-he vuk-è chai sâng-kû, 44chi-sṳ̂ oi hi kiám-chhà, sâng-kû na chhe-to kha thai-ta̍p, liá sâng-kû chhin ngiàm-chhung, liá vuk-è chhiu mò chhiang-li lé. 45Vuk-è oi chhak-thet, chiông sa̍k-thèu, su-liau, nài-fôi chhiòn-phu pân-to sàng-ngoi mò chhiang-li ke thi-fông fit-thet. 46Vuk-è fûng-só ke khì-kiên, mò-lun má-ngìn ngi̍p-hi, má-ngìn chhiu mò chhiang-li to ke-ngit lìm-am-é. 47Mò-lun má-ngìn chhai ke vuk-tú soi ya-he sṳ̍t, chhiòn-phu oi sé-chhiang sâm-fu.

48Vuk-è chhùng-sîn fún-ko yî-heu, chi-sṳ̂ to-chón-lòi kiám-chhà, na-he piak mò-chai sâng-kû, kì oi siên-pu liá vuk-è he chhiang-li ke, yîn-vi sâng-kû yí-kîn vàn-chhiòn mò-thet hi lé. 49Kì oi tai-lòi lióng-chak tiâu-é, yit-te hiông-pak-su, yit-thiàu chhṳ̂m-fùng set ke sien, lâu yit-kî ngiù-chhit-chhó ke nun-kî, vi vuk-è hàng kiet-chhiang-lî. 50Kì oi chhai chông-mân chhièn-súi ke nài-phùn táng chhṳ̀-thet khì-chûng ke yit-chak tiâu-é, 51yèn-heu nâ hiông-pak-su, ngiù-chhit-chhó, chhṳ̂m-fùng set ke sien, lâu nang-ngoi yit-chak sâng tiâu-é, chiông liá-têu vun phùn-tú ke hiet, fin vuk-è chhit-pái. 52Kì oi yung tiâu-é hiet, chhièn-súi, sâng tiâu-é, hiông-pak-su, ngiù-chhit-chhó, lâu chhṳ̂m-fùng set ke sien vi-tó vuk-è hàng kiet-chhiang-lî. 53Yèn-heu, kì oi chiông ke-chak sâng tiâu-é piong-thet, yù-chhai kì pî-hi yâ-ngoi. Kì oi yung liá-chúng fông-fap vi-tó vuk-è hàng kiet-chhiang-lî, vuk-è chhiu chhiang-li lé.

54Yî-song he yû-koân thái-kô, 55-56phì-fû song yû hí-pheu, pot-sién, fat-yàm, ya he yû-koân sâm-fu lâu vuk-è sâng-kû ke kok-chúng thiàu-li. 57Liá-têu thiàu-li oi cho kiet-thin chhiang-li lâu mò chhiang-li ke kîn-kí.

Actualmente seleccionado:

Li-vi Ki 14: THV12Rdb

Destacar

Copiar

¿Quieres tener guardados todos tus destacados en todos tus dispositivos? Regístrate o inicia sesión

Aprende más sobre HAK-NGÎ SṲN-KÎN – Hien-thoi Thòi-vân Hak-ngî Yi̍t-pún – Sîn-Khiu Yok Chhiòn Sû (Lò-mâ-sṳ pán)