Li-vi Ki 10

Nâ-tap lâu Â-pí-fu ke Chhui

1Â-lùn ke lai-é Nâ-tap lâu Â-pí-fu kok nâ chhṳ-kâ ke hiông-lù, tiám-fó, sêu-hiông, chiông kì hien-pûn Song-chú. Chúng-he liá he mò ha̍p-fap ke fó, yîn-vi Song-chú pin-mò min-lin kì-têu cho liá-ke sṳ. 2Fut-yèn, chhiu yû fó tui Song-chú mien-chhièn chhut-lòi, chiông kì-têu sêu-me̍t, kì-têu chhiu sí chhai Song-chú mien-chhièn. 3Só-yî, Mô-sî tui Â-lùn kóng: “Liá chhiu-he Song-chú só kóng ke:

‘Chhai chhîn-khiun Ngài ke ngìn chûng,

Ngài oi hién-chhut Ngài ke sṳ̀n-sṳn;

chhai chung-ngìn mien-chhièn,

Ngài oi chông-hién Ngài ke yùng-kông#10:3 “Chhai chhîn-khiun ... yùng-kông” ya-he yi̍t-cho “Sṳ-fung Ngài ke ngìn yit-thin oi chûn-chhung Ngài ke sṳ̀n-sṳn; Ngài ke chṳ́-mìn yit-thin oi kin-chhung Ngài”..’ ”

Â-lùn chhiu tiâm-tiâm.

4Mô-sî ham Â-lùn ke â-suk Vû-siet ke lai-é Mí-sâ-li lâu Yî-li-sat-fán lòi, tui kì-têu kóng: “Chiông ngì-têu chhîn-ngìn ke sṳ̂-thí kông-chhut sṳn-só, tai-to yàng-ngoi hi.” 5Kì-têu chhiu chûn-cheu Mô-sî ke min-lin khiú-tén sṳ̂-thí ke sâm-fu, chiông sṳ̂-thí kông-tó yàng-ngoi hi.

6Mô-sî tui Â-lùn lâu kì ke lai-é Yî-li-â-sat lâu Yî-thâ-mâ kóng: “Ngì-têu cho-m̀-tet pûn thèu-nà-mô nùng-nùng, ya cho-m̀-tet chhá-lan sâm-fu lòi péu-sṳ ôi-sông. Na mò chûn-sú liá-ke fa, ngì-têu yit-thin voi sí; Song-chú ya-voi hiong chhiòn-thí ngìn-mìn fat-khién. Chúng-he, ngì-têu ke chhîn-su̍k Yî-set-lie̍t chhiòn-kâ cho-tet vi Song-chú yung fó sêu-sí ngìn ke sṳ-khien ôi-sông. 7Ngì-têu cho-m̀-tet lì-khôi sṳn-chong-phùng mùn-héu; na-he lì-khôi, ngì-têu yit-thin voi-sí, yîn-vi Song-chú ke sṳn-yù yí-kîn sṳ́ ngì-têu fûn-phe̍t vì-sṳn lé.” Só-yî kì-têu chûn-cheu Mô-sî ke fa lòi cho.

Chi-sṳ̂ ke Thiàu-li

8Song-chú tui Â-lùn kóng: 9“Ngì lâu ngì ke-têu lai-é lîm thâm-chiú ya-he ngiàm-chiú yî-heu cho-m̀-tet ngi̍p-hi Ngài ke sṳn-chong-phùng; na-he ngi̍p-hi, ngì-têu yit-thin voi-sí. Ngì-têu ke heu-thoi yit-thin oi yún-yén chûn-sú liá thiàu-li. 10Sṳ̀n-sṳn lâu sṳ-siu̍k ke, lî-ngì song chhiang-li lâu mò chhiang-li ke, ngì-têu yit-thin oi fûn-phe̍t to chhîn-chhîn chhú-chhú. 11Ngài — Song-chú thûng-ko Mô-sî pân-pu ke só-yû fap-li̍t, ngì-têu oi kau-thô Yî-set-lie̍t-ngìn.”

12Mô-sî tui Â-lùn thùng kì chhûn ke lióng-ke lai-é Yî-li-â-sat lâu Yî-thâ-mâ kóng: “Ngì-têu oi yung hien pûn Song-chú ke fó-chi chûng só chhûn-tó ke su-chi cho vù-kau-piáng, chhai chi-thàn sùn sṳ̍t, yîn-vi liá-chi he chṳ-sṳn ke. 13Ngì-têu oi chhai sṳn ke só-chhai sṳ̍t; yîn-vi chhai hien pûn Song-chú ke fó-chi tông-chûng, liá he kûi ngì-têu lâu ngì-têu chṳ́-sûn ke fun-ngiak. Liá chhiu-he Song-chú pûn ngài ke min-lin. 14Ngì-têu lâu ngì-têu ke chṳ́-ńg cho-tet sṳ̍t hien-pûn Song-chú ke thi̍t-phe̍t lî-vu̍t, chhiu-he só yèu ke hiûng-phù-ngiuk lâu só hien ke heu-thúi. Ngì-têu oi chhai lî-ngì song chhiang-li ke thi-fông sṳ̍t liá-chúng ngiuk. Liá he tui Yî-set-lie̍t-ngìn só-hien ke phìn-ôn-chi fûn chhut-lòi pûn ngì-têu lâu ngì-têu chṳ́-sûn ke. 15Só hien ke heu-thúi lâu só yèu ke hiûng-phù-ngiuk, kì-têu oi lâu fó-chi ke yù khiung-ha tai-lòi, yèu kí-ha hien-pûn Song-chú cho yèu-chi. Cheu Song-chú ke min-lin, liá phu-fun oi yún-yén kûi ngì-têu lâu ngì-têu ke chṳ́-sûn.”

16Mô-sî chhà-mun ke-chak su̍k-chhui-chi ke sân-yòng-kú, fat-hien kì yí-kîn pûn-ngìn sêu-thet. Kì chhiu hiong Â-lùn chhûn ke lai-é Yî-li-â-sat lâu Yî-thâ-mâ fat-khién, chit-phi kì-têu: 17“Ngì-têu cho-má-ke mò chhai sṳn ke só-chhai sṳ̍t su̍k-chhui-chi nè? Liá-chi he chṳ-sṳn ke. Song-chú chiông kì su-pûn ngì-têu, oi ngì-têu tâm-tông#10:17 “tâm-tông” ya-he yi̍t-cho “chhù-thet”. chhiòn-thí ngìn-mìn ke chhui-ngiak, chhai Song-chú mien-chhièn vi kì-têu su̍k-chhui. 18Ki-yèn liá sên-ngì ke hiet mò tai-ngi̍p sṳn-só tî-poi, ngì-têu chhiu yin-kôi cheu Ngài ke min-lin chhai sṳn-só tî-poi sṳ̍t liá chi-ngiuk.”

19Â-lùn en Mô-sî kóng: “Kîm-pû-ngit ngìn-mìn hien kì-têu ke su̍k-chhui-chi lâu sêu-fa-chi pûn Song-chú, chúng-he ngài tù-tó liá-chúng châi-nan. Chhiu-son ngài kîm-pû-ngit sṳ̍t-thet su̍k-chhui-chi ke chi-vu̍t, liá voi sṳ́ Song-chú chiap-na̍p mò?” 20Mô-sî thâng-liáu liá-fa, ngin-vì kì kóng ke yû-lî.

Actualmente seleccionado:

Li-vi Ki 10: THV12Rdb

Destacar

Copiar