Chhut Âi-khi̍p Ki 7

1Song-chú tui Mô-sî kóng: “Ngài oi sṳ́ ngì chhai koet-vòng mien-chhièn chhiong Song-ti khiung-yong, ngiâ-kô Â-lùn oi thoi ngì kóng-fa, chhiong cho ngì ke siên-tî. 2Ngì oi chiông Ngài min-lin ngì kóng ke fa chhiòn-phu lâu Â-lùn kóng, ham ngiâ-kô hiong koet-vòng kóng, oi kì piong Yî-set-lie̍t-ngìn lì-khôi liá-ke koet-kâ. 3Chúng-he Ngài oi sṳ́ koet-vòng sîm-ngang, mò-lun Ngài tui Âi-khi̍p hàng kí-tô sṳ̀n-chiak khì-sṳ, 4kì hàn-he m̀-thâng ngì-têu ke fa. Chui-heu Ngài oi ngiàm-ngiàm chit-fa̍t Âi-khi̍p; Ngài oi thu Ngài ke kiûn-chhui Yî-set-lie̍t ke chṳ́-mìn lì-khôi liá thi-fông. 5Ngài tui Âi-khi̍p chhut-sú, thu Yî-set-lie̍t-ngìn lì-khôi kì-têu koet-kâ ke sṳ̀, kì-têu chhiu voi tî Ngài he Song-chú.” 6Mô-sî lâu Â-lùn chhiu vàn-chhiòn cheu Song-chú só min-lin ke hi-cho. 7Kì-têu lâu koet-vòng kâu-sa̍p ke sṳ̀, Mô-sî yí-kîn pat-sṳ̍p se, Â-lùn pat-sṳ̍p sâm-se.

Â-lùn ke Koái-kun-é

8Song-chú tui Mô-sî lâu Â-lùn kóng: 9“Na-he koet-vòng oi ngì-têu hàng yit-chak sṳ̀n-chiak lòi chṳn-mìn ngì-têu ke sṳ̂n-fun, ngì oi fûn-fu Â-lùn chiông kì ke koái-kun-é fit chhai koet-vòng mien-chhièn, ke-kî koái-kun-é voi pien-cho sà.” 10Mô-sî lâu Â-lùn hi-kien koet-vòng, kì-têu cheu Song-chú ke min-lin hi-cho: Â-lùn chiông koái-kun-é fit chhai koet-vòng lâu kôn-yèn mien-chhièn, ke-kî koái-kun-é chhiu pien-cho sà. 11Koet-vòng ngiàm-sṳ̀ seu-si̍p Âi-khi̍p ke sên-siong-kâ lâu hàng sià-su̍t ke; kì-têu ya pien fap-su̍t lòi-cho khiung-yong ke sṳ. 12Kì-têu tak-sà chiông sú-chûng ke koái-kun-é fit chhai thi-song, ya chhiòn-phu pien-cho sà; chúng-he Â-lùn ke koái-kun-é thûn-thet kì-têu ke koái-kun-é. 13Cheu Song-chú só-kóng ke, koet-vòng ke sîm hàn-he án ngang; kì m̀-thâng Mô-sî lâu Â-lùn ke fa.

Âi-khi̍p Su Châi-nan

(1) Hiet-châi

14Song-chú tui Mô-sî kóng: “Âi-khi̍p-vòng sîm-ngang, kì m̀ piong Ngài ke chṳ́-mìn chéu. 15Thiên-kông chêu-sṳ̀n, kì hi Nì-lò-hò ke sṳ̀, ngì hi-kien kì. Chiông ngì ke-kî pien-ko sà ke koái-kun-é tai-hi, chhai hò-pa sùn tén kì. 16Ngì oi tui kì kóng: ‘Song-chú — Hî-pak-lòi-ngìn ke Song-ti phai ngài lòi, oi ngì piong Kì ke chṳ́-mìn chéu, pûn kì-têu chhai khóng-yâ kin-pai Kì, chúng-he ngì yit-chhṳ̍t m̀-hén thâng. 17Song-chú án-ngiòng kóng, liá-ha ngì voi tui Kì só-hàng ke lòi tî Kì chhiu-he Song-chú. Ngì khon, ngài oi yung liá-kî koái-kun-é tá hò-pa súi, súi voi pien-cho hiet, 18ǹg-è chhiòn-phu voi sí chhiang-chhiang, hò-pa súi voi chhu-thet, Âi-khi̍p-ngìn voi m̀-kám lîm liá-súi.’ ”

19Song-chú tui Mô-sî kóng: “Ngì oi lâu Â-lùn kóng, ham kì sú khià kì ke koái-kun-é, chhûn-sú hiong Âi-khi̍p só-yû ke hò-pa, yun-hò, fù lâu pî-thòng. Súi chhiòn-phu voi pien-cho hiet, chhiòn-koet mân-thi he hiet, lièn súi thúng, sa̍k-kông tî-poi ya chhiòn-phu he hiet.”

20Só-yî, Mô-sî lâu Â-lùn cheu Song-chú ke fûn-fu hi-cho. Chhai koet-vòng lâu kì ke kôn-yèn mien-chhièn, Â-lùn khià-hí koái-kun-é tá hò-pa súi, hò-súi chhiòn-phu pien-cho hiet. 21Hò-pa tú ke ǹg-è sí-thet, hò-pa súi ya chhu-thet, Âi-khi̍p-ngìn mò fap-thu sṳ̍t liá-ke súi. Âi-khi̍p tak thi-fông ke súi chhiòn-phu pien-cho hiet. 22Chúng-he Âi-khi̍p hàng sià-su̍t ke ya hàng fap-su̍t, khiung-yong sṳ́ súi pien-cho hiet. Cheu Song-chú só-kóng ke, koet-vòng ke sîm pí yî-chhièn hàn-kha ngang, m̀-hén thâng Mô-sî lâu Â-lùn ke fa. 23M̀ tân-chhiang án-ngiòng, koet-vòng chón-hi vòng-kiûng, mò chiông liá-sṳ piong chhai sîm-tú. 24Só-yû ke Âi-khi̍p-ngìn chhiòn-phu mò-fap sṳ̍t hò-pa ke súi, kô-put-chiông chhai hò-pa sùn yet-chiáng sṳ̍t thi-hâ súi.

25Song-chú tá hò-pa súi heu, liá châi-nan lièn-siu̍k chhit-ngit.

Actualmente seleccionado:

Chhut Âi-khi̍p Ki 7: THV12Rdb

Destacar

Copiar

¿Quieres tener guardados todos tus destacados en todos tus dispositivos? Regístrate o inicia sesión

Aprende más sobre HAK-NGÎ SṲN-KÎN – Hien-thoi Thòi-vân Hak-ngî Yi̍t-pún – Sîn-Khiu Yok Chhiòn Sû (Lò-mâ-sṳ pán)