Chhut Âi-khi̍p Ki 12

Phàn-ko-chiet

1Song-chú chhai Âi-khi̍p tui Mô-sî lâu Â-lùn kóng: 2“Liá-ke ngie̍t oi-cho châng-ngie̍t, he ngì-têu yit-ngièn ke thi-yit chak ngie̍t. 3Ngì-têu oi tui Yî-set-lie̍t chhiòn-phu ngìn-mìn kóng: Chhai pún-ngie̍t chhû-sṳ̍p, tak-kâ ke kâ-chóng yit-thin oi vi kì chhiòn-kâ tho̍k yit-chak se-yòng. 4Na-he vuk-hâ ngìn-séu, sṳ̍t m̀-thet kûi-chak yòng, kì chhiu oi lâu kak-piak ke lìn-sa khiung-ha sṳ̍t yit-chak, cheu ngìn-su lâu kok-ngìn ke sṳ̍t-liong lòi pûn. 5Ngì-têu yung mièn-yòng ya-he yung sân-yòng chhiòn-phu cho-tet, chúng-he yit-thin oi yung mò khiet-tiám ke, yit-se thai ke yòng-kú. 6To pún-ngie̍t sṳ̍p-si ngit lìm-am-é, Yî-set-lie̍t chhiòn-phu ke ngìn-mìn oi-chhṳ̀ kì-têu tho̍k chhut-lòi ke yòng-kú. 7Tak-kâ ngìn oi nâ têu hiet kò chhai mùn-khiông lâu mùn-mì táng, yu-oi chhai ke-kiên vuk-tú sṳ̍t yòng-ngiuk. 8Ke am-pû kì-têu yit-thin oi sṳ̍t phoi ke yòng-ngiuk, fú-chhoi lâu vù-kau-piáng. 9Yòng-ngiuk cho-m̀-tet sâng-sṳ̍t, ya cho-m̀-tet sṳ̍t súi-chú ke, yit-thin oi lièn thèu, lièn kiok lâu puk-nui, kûi-chak yòng yung phoi ke. 10Cho-m̀-tet liù-to chêu-sṳ̀n; sṳ̍t-chhûn ke oi chhai thiên-kông chhièn sêu-thet. 11Ngì-têu sṳ̍t ke sṳ̀, oi kiak-kiak sṳ̍t; oi kiê-hèn yêu-tai, oi chok-hài, nâ-tén koái-kun-é. Liá he Song-chú ke Phàn-ko-chiet.

12“Ke am-pû, Ngài oi hàng-theu Âi-khi̍p, chhṳ̀-sí só-yû thèu-thôi kiung ke, put-kón he ngìn ya-he thèu-sâng, chhiòn-phu oi chhṳ̀-sí. Ngài oi chit-fa̍t só-yû Âi-khi̍p ke sṳ̀n-mìn. Ngài he Song-chú. 13Mùn-khiông táng ke hiet he ngì-têu vuk-è ke ki-ho. Tông Ngài khon-tó liá-hiet, Ngài oi phàn-ko ngì-têu ke vuk-hâ. Ngài chit-fa̍t Âi-khi̍p-ngìn ke sṳ̀, châi-nan yit-thin m̀-voi sông-hoi ngì-têu. 14Tak-ngièn ngì-têu oi ki-ngiam liá-ngit, ya yin-kôi khin-chuk Song-chú liá-ke chiet, cho ngì-têu sṳ-sṳ thoi-thoi yún-yén ke li-kûi.”

Chhù-kau-chiet

15Song-chú kóng: “Chhai liá chhit-ngit nui, ngì-têu oi sṳ̍t vù-kau-piáng, cho-m̀-tet sṳ̍t yû-kau ke piáng. Ngì-têu oi chhai thi-yit ngit chhù-thet vuk-hâ só-yû ke kau; chhai ke chhit-ngit nui na yû-ngìn sṳ̍t yû-kau ke piáng, yit-thin oi chiông kì tui Yî-set-lie̍t Ngài chṳ́-mìn chûng chhù-miàng. 16Thi-yit ngit lâu thi-chhit ngit, ngì-têu oi chhi-si̍p kin-pai. Liá lióng-ngit, chhù-liáu chún-phi thai-kâ oi sṳ̍t ke yî-ngoi, má-ke se ya cho-m̀-tet cho. 17Ngì-têu oi sú liá Chhù-kau-chiet, yîn-vi chhai liá-ngit, Ngài thu ngì-têu ke chung kiûn-chhui lì-khôi Âi-khi̍p. Tak-ngièn, ngì-têu yit-thin oi khin-chuk liá-ngit, khin-chuk liá chiet-khì, cho ngì-têu sṳ-sṳ thoi-thoi yún-yén ke li-kûi. 18Tui châng-ngie̍t sṳ̍p-si am-pû to ngi-sṳ̍p yit am-pû, ngì-têu oi sṳ̍t vù-kau-piáng. 19Chhai liá chhit-ngit chûng, ngì-têu vuk-hâ cho-m̀-tet yû-kau; na-he yû-ngìn sṳ̍t yû-kau ke sṳ̍t-vu̍t, mò-lun pún-koet chhut-se ya-he lòi cho lî-hak ke, chhiòn-phu oi tui Yî-set-lie̍t Ngài chṳ́-mìn chûng chhù-thet. 20Yû-kau ke sṳ̍t-vu̍t, ngì-têu chhiòn-phu cho-m̀-tet sṳ̍t; mò-lun ngì-têu he̍t chhai nai-vi, tû oi sṳ̍t vù-kau-piáng.”

Thi-yit ke Phàn-ko-chiet

21Mô-sî seu-si̍p só-yû Yî-set-lie̍t-ngìn ke chóng-ló, lâu kì-têu kóng: “Ngì-têu tak-kâ oi tho̍k yit-chak yòng-kú, chiông liá Phàn-ko-chiet ke yòng-kú chhṳ̀-thet. 22Oi nâ yit-kha̍k ngiù-chhit-chhó, vun phùn-tú ke hiet, kò chhai mùn-khiông lâu mùn-mì táng. Yit-chhṳ̍t to thi-ngi chêu-sṳ̀n, mò-lun má-ngìn chhiòn-phu cho-m̀-tet chhut-mùn. 23Tông Song-chú hàng-theu Âi-khi̍p, chhṳ̀ Âi-khi̍p-ngìn ke sṳ̀, khon-tó mùn-khiông lâu mùn-mì táng ke hiet, chhiu phàn-ko hi, m̀ pûn chṳp-hàng fí-me̍t ke thiên-sṳ́ ngi̍p ngì-têu ke vuk-hâ chhṳ̀ ngì-têu. 24Ngì-têu lâu ngì-têu ke chṳ́-sûn yit-thin oi yún-yén chûn-sú liá-têu li-kûi. 25Tông ngì-têu chin-ngi̍p Song-chú só yin-hí su pûn ngì-têu ke thi, ngì-têu oi chûn-sú liá chiet-khì ke lî-ngì. 26Ngì-têu ke se-ngìn-è mun ngì-têu kóng: ‘Liá-ke lî-ngì yû má-ke yi-ngi?’ 27ngì-têu chhiu en kóng: ‘Liá he hien-pûn Song-chú Phàn-ko-chiet ke chi-vu̍t, yîn-vi Kì chhai Âi-khi̍p phàn-ko Yî-set-lie̍t-ngìn ke vuk-hâ. Kì chhṳ̀-thet Âi-khi̍p-ngìn, chṳ́n-kiu ngài-têu tak-kâ ke sin-miang.’ ” Yî-set-lie̍t-ngìn chhiu khúi hâ-lòi kin-pai Song-chú. 28Kì-têu chhut-hi, cheu Song-chú fûn-fu Mô-sî lâu Â-lùn ke hi-cho.

Chhṳ̀-sí Thèu-thôi

29To pan-ya, Song-chú chhṳ̀-thet só-yû Âi-khi̍p-ngìn ke chóng-chṳ́, song-tui koet-vòng ke chóng-chṳ́ — chhiu-he chiông-lòi oi sṳ̀n-chiap vòng-vi ke vòng-chṳ́, hâ-to kâm-ngiu̍k tú fam-ngìn ke chóng-chṳ́; lièn só-yû thèu-sâng ke thèu-thôi ya chhiòn-phu chhṳ̀-thet. 30Ke am-pû Âi-khi̍p-vòng, kì só-yû ke kôn-yèn, lâu chhiòn-koet ngìn-mìn lûng-chúng hong hí-lòi. Chhai Âi-khi̍p chṳ́-yû thâng-tó pî-sông thai-kieu ke sâng, yîn-vi kâ-kâ fu-fu yû sí-ngìn. 31Ke am-pû, Âi-khi̍p-vòng chhiu seu-kien Mô-sî lâu Â-lùn, tui kì-têu kóng: “Kiak-kiak chéu! Ngì-têu lâu Yî-set-lie̍t-ngìn kón-kín lì-khôi ngài ke ngìn-mìn; cheu ngì-têu só yêu-khiù ke hi kin-pai Song-chú. 32Cheu ngì-têu só-kóng ke, tai-tén ngì-têu ke ngiù-yòng kón-kín lì-khôi; ya oi vi ngài chuk-fuk.”

33Âi-khi̍p-ngìn chhûi Yî-set-lie̍t-ngìn kón-kín lì-khôi kì-têu ke koet-kâ; kì-têu kóng: “Ngì-têu hàn m̀-chéu, ngài-têu voi sí chhiang-chhiang lé!” 34Só-yî Yî-set-lie̍t-ngìn chhiu chiông vù-kau ke mien-thòn piong chhai phùn-tú, yung sâm-fu pâu hí-lòi, pà chhai kiên-thèu táng. 35Kì-têu ya cheu Mô-sî só fûn-fu ke, hiong Âi-khi̍p-ngìn thó kîm-hi, ngiùn-hi lâu sâm-fu. 36Song-chú sṳ́ Âi-khi̍p-ngìn chûn-kin Kì ke chṳ́-mìn; kì-têu oi má-ke, Âi-khi̍p-ngìn chhiu pûn kì-têu má-ke. Án-ngiòng, Yî-set-lie̍t-ngìn tai-chéu Âi-khi̍p-ngìn ke chhòi-vu̍t.

Yî-set-lie̍t-ngìn Chhut Âi-khi̍p

37Yî-set-lie̍t-ngìn tui Làn-sai yit-chhṳ̍t hàng-to Sû-kot. Fu-ńg lâu se-ngìn-è mò-son, tân-chhiang nàm-ngìn chhiu-yû liuk-sṳ̍p van-ngìn. 38Chhin-tô ngoi-chhu̍k ngìn pin ngiù-yòng chhin thai-khiùn ya lâu kì-têu khiung-ha hàng. 39Kì-têu yung Âi-khi̍p tai chhut-lòi ke vù-kau mien-thòn phoi-piáng, yîn-vi kì-têu pûn-ngìn chhûi-pet oi kiak-kiak lì-khôi Âi-khi̍p, mò sṳ̀-kiên chún-phi sṳ̍t-vu̍t.

40Yî-set-lie̍t-ngìn he̍t chhai Âi-khi̍p yit-khiung si-pak sâm-sṳ̍p ngièn. 41Mân si-pak sâm-sṳ̍p ngièn, tú-tú hó ke-ngit, Song-chú ke kiûn-chhui chhiu chhiòn-phu lì-khôi Âi-khi̍p. 42Liá am-pû, Song-chú chhîn-chhṳ pó-sú kì-têu, thu kì-têu chhut Âi-khi̍p; só-yî Yî-set-lie̍t-ngìn chhai liá am-pû chhiu oi sú-ya, chiông kì fung-hien pûn Song-chú, liá he kì-têu sṳ-sṳ thoi-thoi yin-kôi chûn-sú ke.

Phàn-ko-chiet ke Li-kûi

43Song-chú tui Mô-sî lâu Â-lùn kóng: “Phàn-ko-chiet ke li-kûi he án-ngiòng: Ngoi-chhu̍k ngìn cho-m̀-tet sṳ̍t Phàn-ko-chiet ke se-yòng; 44chúng-he ngì-têu mâi-lòi ke nù-phu̍k, su kot-lî yî-heu chhiu cho-tet sṳ̍t. 45Chhiam-sṳ̀ he̍t chhai ngì-têu vuk-hâ ke ngìn-hak lâu chhiáng-lòi ke kûng-ngìn cho-m̀-tet sṳ̍t. 46Sṳ̍t ke sṳ̀ oi chhiòn-kâ khiung-ha chhai vuk-tú sṳ̍t, cho-m̀-tet tai-chhut vuk-ngoi; se-yòng ke kut-thèu lièn yit-kî ya cho-m̀-tet áu-thôn. 47Yî-set-lie̍t ngìn-mìn chhiòn-phu oi khin-chuk liá-chak chiet-khì, 48chúng-he mò su-ko kot-lî ke ngìn cho-m̀-tet sṳ̍t liá se-yòng. Na-he yû chhiam-he̍t chhai ngì-têu tông-chûng ke lî-hak, oi sú Phàn-ko-chiet lòi chûn-kin Song-chú, ngì-têu yit-thin oi-siên vi kì chhiòn-kâ ke nàm-ngìn hàng kot-lî. Án-ngiòng, kì-têu chhiu-chhiong pún-thi kiung ke Yî-set-lie̍t-ngìn, cho-tet sṳ̍t Phàn-ko-chiet ke se-yòng. 49Só-yû pún-thi kiung ke Yî-set-lie̍t-ngìn lâu chhiam-he̍t chhai ngì-têu tông-chûng ke lî-hak chhiòn-phu oi chûn-sú liá li-kûi.” 50Só-yû ke Yî-set-lie̍t-ngìn chhiu cheu Song-chú fûn-fu Mô-sî lâu Â-lùn ke hi-cho. 51Song-chú chhiu chhai ke-ngit thu Yî-set-lie̍t-ngìn ke kiûn-chhui yit-chhui yit-chhui chhut Âi-khi̍p.

Actualmente seleccionado:

Chhut Âi-khi̍p Ki 12: THV12Rdb

Destacar

Copiar

¿Quieres tener guardados todos tus destacados en todos tus dispositivos? Regístrate o inicia sesión

Aprende más sobre HAK-NGÎ SṲN-KÎN – Hien-thoi Thòi-vân Hak-ngî Yi̍t-pún – Sîn-Khiu Yok Chhiòn Sû (Lò-mâ-sṳ pán)

Chhut Âi-khi̍p Ki 12

Versículos bíblicos populares de
Chhut Âi-khi̍p Ki 12

Biblia:

Hakkafa (Roman script)

Versión: HAK-NGÎ SṲN-KÎN – Hien-thoi Thòi-vân Hak-ngî Yi̍t-pún – Sîn-Khiu Yok Chhiòn Sû (Lò-mâ-sṳ pán) - THV12Rdb