Matayo 23
23
Yesu areewula baraangilisi b'ediini
(Mako 12.38-39; Luka 11.43,46; 20.45-46)
1Lwanyuma Yesu waakanikha isi kamatuuli ke babaandu ni isi baleekelwa beewe, nga abaloma ari, 2“Baleekeli be kamakaambila ka Musa ni Bafarisaayo baayila bunyala bwa Musa. 3Ni nashiryo mwaakhila khuwaamba ni khuukhola ibyo byoosi byeesi babaloma inywe khuukhola. Ne mukhakhola nga nibo ni bakhola ta, lwekhuuba nibo sibakhola byeesi baleekela ta. 4Nibo babowa bisutwa bisiro, baabira khu mabeka ke babaandu babaandi, ne nibo babeene nga sibakana ni khukhwinyusa lulwaala lwaabwe lwonyene khuubayeetakho ta.
5 #
Mat 6.1;
Maka 6.8;
Bala 15.38
“Nibo byoosi byeesi bakhola, bakhola bari nio babaandu bababone. Babalaayisa tsisutilo tsaabwe tse bibyaronebwa ni khuuleyesa kamayeeye ke bikwaaro byaabwe khukhwokesa bari barya Wele. 6Bakana naabi biifwo bye angaaki ali kamayiiya, ni bitsoloŋo bye shiriifwa mu ntsu tsye khukhwisaayilamo. 7Bakana naabi khusheesebwa mu butale, ni khuukana naabi babaandu babalaange bari, umuleekeli.
8“Ne inywe bakhabalaangatsaka bari, umuleekeli ta, lwekhuuba inywe muli n'Umukoosi mutweela, ne inywe mweesi muli be buulebe busa. 9Luundi inywe mukhalaanga umuundu yeesi mu shiibala muri, ‘Paapa’ ta, lwekhuuba muli ni Paapa mutweela yenyene uli mwikulu. 10Namwe mukhalaangiwatsaka muri ‘Bakasya’ ta, lwekhuuba muli n'Umukasya mutweela yenyene niye Kristo. 11#Mat 20.26,27; Mako 9.35; 10.43,44; Luka 22.26Uyo ufuura bukhulu mus'iinywe, niye ukane abatsake umwakaanisi weenywe. 12#Luka 14.11; 18.14Lwekhuuba buli muundu yeesi ukane eniinisatsake umweene, alikhisibwa aasi, na buli muundu yeesi ukane eyikhisatsake aasi umweene, aliniinisibwa angaaki.”
Yesu ekiitsa bubeeyi bwaabwe
(Mako 12.40; Luka 11.39-42,44,52; 20.47)
13“Nga she kumutaambo isi inywe baleekeli be kamakaambila ka Musa, ni Bafarisaayo. Inywe babemunyakasa khu ngaaki, inywe mwikalilila babaandu babaakana khukhwinjila mu Buyiinga bwe mwikulu ibulafu nga babona. Inywe mwabeene simwinjila ta, ate mukhingilila ibo babaakhakakho khukhwinjila. 14Nga she kumutaambo inywe baleekeli be kamakaambila ka Musa ni Bafarisaayo, inywe babemunyakasa khu ngaaki. Munuula tsinusu tse banamulekhwa, ni khukhwiyokesana muri muloomba lukali. Nashiryo, mulikhaliwila kumusaango kukufuura burafu.
15“Nga she kumutaambo inywe baleekeli be kamakaambila ka Musa ni Bafarisaayo. Inywe babemunyakasa khu ngaaki. Mukyenda osi khu shiibala ni khukhwibotokhelela tsinyaantsa, lwe khuukana khushuusa umuundu mutweela afukiilise mu diini yeenywe, ne nga wafukiiliile, mumwikyelisa khuuba umwaana we kumulilo kukukhasima ta, kimiluundi kibili khufuurisa nga mwabeene ni muli.
16“Nga she kumutaambo isi inywe baraangilisi babaali baabofu! Inywe muloma muri, ‘Umuundu yeesi n'akane etsubatsakile Lisaayilo Likhulu, mbaawo ilomo ta, ne uyo yeesi ukane etsubatsakile izaabu iye mwisaayilo likhulu, abowebwa ni shishitsubo sheewe.’ 17Inywe baabofu baasilu! Shiina shishifuura; izaabu namwe Lisaayilo Likhulu lilikyelisa izaabu khuuba ikhosefu? 18Naluundi muloma muri, ‘Umuundu yeesi ukane etsubatsake isi shisheeso, shiili lomo ta, ne uyo ukane etsubatsake isi shiwaanwa shishiili khu sheeso, abowebwa ni shishitsubo sheewe.’ 19Inywe basaani baabofu! Shiina shishifuura bukhulu? Shiwaanwa namwe shisheeso shishikyelisa shiwaanwa khuuba shikhosefu? 20Ni nashiryo uyo yeesi ukane etsubatsake isi shisheeso, aba wetsubiile shisheeso sheene, ni nebyo byoosi bibishilikho. 21Ni nooyo ukane etsubatsakile Lisaayilo Likhulu, aba wetsubiile Lisaayilo Likhulu lyeene, ni nooyo ulimenyamo. 22#Isay 66.1; Mat 5.34Ni nooyo ukane etsubatsake isi likulu, aba wetsubiile shitsoloŋo sha Wele ni isi uyo ushikhalakho.
23 #
Lev 27.30
“Nga she kumutaambo isi inywe baleekeli be kamakaambila ka Musa ni Bafarisaayo! Inywe babemunyakasa khu ngaaki! Muwa shisiintsa shitweela she liikhumi khu biindu byeenywe bibiŋaayisa tsinyanyi nga butuungulu, ni bibintsaali, ne mwalekha khwinaanayo isi bibiindu bibifuura bukhulu bye kamakaambila, nga nibyo bwa ŋali, shiisa, bubwiyikinwa ni khufukiilila. Bino muli ni khubikhola, ne se shimanyisa shiri muli ni khutataya bibiindi bibiramile ta. 24Inywe baraangilisi baabofu, mukhakakho naabi khurusamo isame mu biliibwa byeenywe, ne mwamila iŋamya nga akhushimanya ta.
25“Nga she kumutaambo inywe baleekeli be kamakaambila ka Musa ni Bafarisaayo! Inywe babemunyakasa khu ngaaki! Musiinga khu ngaaki khwe shikhopo ni sowaani, ne mukari mwayitsula bulyaanga, ni khukhwiiliisa mwabeene mwenyene! 26Iwe Umufarisaayo umubofu! Nyoowa usiinge mukari mwe shikhopo ni sowaani, nio akile ni khu ngaaki nakhwo khube khumiliwu.
27 #
Bur 23.3
“Nga she kumutaambo inywe baleekeli be kamakaambila ka Musa ni Bafarisaayo! Inywe babemunyakasa khu ngaaki! Inywe muli nga tsiŋani tseesi bawakha luloongo luwaanga, nga tsibonekha bulayi khu ngaaki, ne nga mukari tsetsuule kamakuumba ke baafu, ni bunyaalu bwoosi. 28Ni musaambo niyo ndweela, nanywe mubonekha mu baandu bulayi khu ngaaki, nga bakwalaafu, ne mukari mweenywe mwayitsula bubeeyi, ni bubwoonaki bukali.
Yesu aruumbula bitaambiso bibikheetse muumoni
(Luka 11.47-51)
29“Nga she kumutaambo isi inywe baleekeli be kamakaambila ka Musa ni Bafarisaayo! Inywe babemunyakasa khu ngaaki! Inywe mwombekha tsiŋani tse baŋoosi, naluundi mwawakha mwamiliisa tsiŋani tse bakhosefu. 30Mwamala mwaloma muri, ‘Khuba nga khukhwabawo mu bifukhu bye bakuuka beefwe, khali sikhwetubaasa ni nabo mu khutsukha kamafuki ke baŋoosi ta.’ 31Muryo inywe mwekhaliile khaale kumusaango muri, inywe muli babaana baabo babeera baŋoosi. 32Aso, inywe ni mwiloosele mumalilise kumulimo kweesi bakuuka beenywe barakikha!
33 #
Mat 3.7; 12.34; Luka 3.7 “Inywe tsindemu! Luundi inywe babaana be tsindemu tse buutwa! Muliwona muryeena khuubakhalila kumusaango kwe kumulilo kukukhasima ta? 34Nashiryo ise indibarumanila baŋoosi ni basaani be kamakyesi, ni baleekeli. Batweela khu nibo mulibeera, mubatsaangilile khu misalaba, babaandi khu nibo mubakhupe tsimiimbo nga bali mu ntsu tseenywe tse khukhwisaayilamo, nga mubakubyeenga khukhwaama mu shiriimba shitweela khukhwoola mu shiindi. 35#Rak 4.8; 2 Kim 24.20,21Ni shishamamo nisho shitaambiso she kamafuki ke bakhosefu kakatsutsukha khu shiibala, shishiliikwa khwiinywe, khukhwaama khu mafuki ka Abeli, khukhwoolesa khu mafuki ka Zekariya, umwaana wa Berekiya, isi mwerira akari e Lisaayilo Likhulu ni shisheeso. 36Ilala imbaboolela ndi, shitaambiso isho shoosi shiliitsa khu baandu be kumuboolo kuno.”
Yesu akana naabi Yerusalemu
(Luka 13.34-35)
37“O Yerusalemu, Yerusalemu! Iwe uwiira baŋoosi, naluundi wakhupa kamabaale ibo babarumaniwa is'uli, tsifuunda tseenga tseesi nakanila khubuusanisa babaandu boowo atweela nga ingokho ni buusanisa bubwaana bwayo mu ndaha tsayo, ne iwe walekha khufukiilila ta! 38#Yer 22.5Ne bona intsu yoowo yalekhewele nga likubili busa. 39#Zab 118.26Ari ikhuboolela ndi, khukhwaama shaleelo, s'ukane umbonekho luundi ta, khukhwoolesa ni muliloma muri, ‘Ali ni khabi uyo uwiitsila mu lisiina ly'Omukasya.’ ”
Actualmente seleccionado:
Matayo 23: LPE
Destacar
Copiar
Comparar
Compartir
¿Quieres tener guardados todos tus destacados en todos tus dispositivos? Regístrate o inicia sesión
The Bible in Lumasaaba © Bible Society of Uganda, 2016.