Tourat 3: Lebian 8
8
Hozrot Harun (a:) ar tan fuaintor ḳelafoti
1Bade Mabude Musare ḳoila, 2“Tumi Harun ar tar fuaintore loia amar gese azir o. Er loge tarar imamotir lebas, ḳelafoti shomzibar tel, gunar koforar kurbanir bisal, dugu meṛar faṭa ar ḳamir saṛa ruṭir ṭukri-o anio. 3Ar tumi tamam Boni Israilre Milon-tambur duaror ḳandat dola ḳoro.”
4Teu Mabudor hukum mafik Musa nobie hoḳolta ḳorla, hoḳol Boni Israil Milon-tambur duaror ḳandat dola oila. 5Ou shomoy Musae erare ḳoila, “Mabude hukum disoin ita ḳorar lagi.” 6Oḳan ḳoia tain imam Harun ar tan fuaintore samne ania fani dia naoaila. 7Bade tain Harunre imamoti lebasor fainjabi findaia hari komror bondoni bandia dila. Tain alḳella ar efron findaia feṭor ufror noksha ḳora ḳafoṛre fitadi bandi dila. 8Bade bukur ufror toli findaia er bitre fobitro Urim ar Tummim haraila. 9Erbade Harunor matat faugṛi findaia hou fobitro taz, mani shunar fatḳan faugṛir samnabae lagaila. Musae i hoḳolta ḳorla Mabudor hukum mafik.
10Bade tain Milon-tambu ar er bitoror hoḳol mal-samanare ḳelafotir tel dia fobitro ḳorla. 11Ou tel taki tuṛa tel nia tain kurbani kanar ufre shatbar siṭaila. Kurbani kana ar er logor hoḳol mal-samana, hanḍi-bashon, ar uzur fanir gamla ar er tolor soki-kaṭre, tel dia fak-fobitro ḳorla. 12Aro tuṛa tel nia imam Harunor matar maze ḍalia tanre fak-fobitro bonar lagi kelafoti dila. 13Ar Harunor fuaintore samne ania tarar gotro fainjabi findaila, ḳomror bondoni bandia hari matar toki findaila. Ita hoḳolta ḳorla tain Mabudor hukum mafik.
14Erbade tain gunar koforar kurbanir bisal anla, anle Harun ar tan fuainte bisalor ḳolla atai dila. 15Teu Musae ou bisalre zobo ḳoria ogur kisu lou nia, kurbani kanare fak-saf ḳorar kiale oḳanor hing oḳlor maze ator anguildi lou maḳaila. Baki lou tain kurbani kanar tole ḍali dila. Ou nomunae tain gunar koforar kurbanir lou dia kurbani kanare fak-saf ḳorla. 16Bade tain bisalor feṭor bitoror hoḳol sorbi, ḳoiljar logor maṭia, sorbi shomet duio kiḍni nia kurbani kanar ufre zalailila. 17Oile bisalor ḳal, gust, gufor nia tain kempor bare zalaila. Musae ita hoḳolta ḳorla Mabudor hukum mafik.
18Bade tain zalail kurbanir meṛar faṭare anla. Anle Harun ar tan fuainte ogur ḳolla atai dila. 19Ar Musae ou meṛare zobo ḳoria kurbani kanar sairo galat lou siṭai dila. 20Tain meṛare ṭukraia ogur ḳolla, gustor ṭukra ar sorbire zalaila. 21Ar ou meṛar feṭor bitoror hoḳolta, tar sairo ṭeng fani dia doia hari, asta meṛare zalail kurbani hishabe kurbani kanar ufre zalailila. Ita to Mabudor name agunit deoa zalail kurbani, itar dumar gerane tain kushi oin. Musae ita hoḳolta ḳorla Mabudor hukum mafik.
22Bade tain imamoti kamo boailor niote, dusra meṛare ania harle Harun ar tan fuainte meṛar ḳolla atai dila. 23Musae ou meṛare zobo ḳoria, ogur tuṛa lou nia Harunor ḍain ḳanor lotit, ḍain ator ar ḍain faor buṛi angulit lagaila. 24Ar Harunor fuaintore-o samne ania, tarar ḍain ḳanor lotit, ar ḍain at, ḍain faor buṛi angulit tuṛa lou lagai dila. Aro tuṛa lou nia kurbani kanar sairo galat siṭai dila. 25Tain meṛar sorbi, sorbi ala lenguṛ, ḳoiljar logor maṭia, sorbi shomet duio kiḍni, ar ḍainor ran nila. 26Ar Mabudor samne toa ḳamir saṛa ruṭir ṭukri taki ekḳan ruṭi, ar teldi baza ekḳan fiṭa, ar tel maḳail ekḳan ruṭi nia hou sorbi ar ranor ufre toila. 27Toia ita hoḳolta Harun ar tan fuaintor ato dia dulona kurbani hishabe Mabudor samne dulaila. 28Bade tain ita tarar at taki nia hari kurbani kanar foshur ufre toia zalailila. Ita to ḳelafoti shomzibar kurbani, Mabudor name agunit deoa kurbani, itar dumar gerane tain kushi oin. 29Bade tain nizor faona ongsho, mani kelafoti shomzibar kurbanir meṛar sina nia dulona kurbani hishabe Mabudor samne dulaila. Tain ita hoḳolta ḳorla Mabudor hukum mafik.
30Bade Musae ḳelafoti shomzibar tuṛa fobitro tel nila, ar kurbani kana taki tuṛa lou ania Harun ar tan fuaintor ufre ar tarar lebasor ufre siṭai dila. Ou nomunae Harun ar tan fuaintore, ar tarar lebasre-o fak-fobitro ḳora oilo.
31Bade Musae Harun ar en fuaintore ḳoila, “Tumra Milon-tambur duaror samne ou gust rando, randia hono boia ḳelafoti shomzibar ṭukrir ruṭi dia ota ḳao. Amare to age ou ḳota zanail oise, ita ḳali tumi ar tumar fuainte ḳaibae. 32Ḳanir bade zeta gust ar ruṭi baki roibo, itare aguindi zalailio. 33Tumrare ḳelafoti shomzibar ou mahfil shat din dori solbo. I shat din tumra Milon-tambur duaror ḳanda taki horio na. 34Aiz zeta ḳorlam, ita to tumrar gunar kofora hishabe Mabudor hukum mafik korlam. 35Te tumra zane basia roar lagi aiz taki shat din forzonto ou Milon-tambur duaror ḳandat roio. Din-rait ono roia Mabudor hukum mafik kam ḳorio. Tumra ola ḳorar lagi to ami hukum faisi.”
36Musa nobir mazdi Mabude zotota ḳorar hukum disla, Harun ar tan fuainte ita hoḳolta ḳorla.
Actualmente seleccionado:
Tourat 3: Lebian 8: sylL
Destacar
Copiar
Comparar
Compartir
¿Quieres tener guardados todos tus destacados en todos tus dispositivos? Regístrate o inicia sesión
© Ahle Kitab Society. All rights reserved.