Tourat 3: Lebian 15
15
Shorilor datu zaoar nafakir befare
1Mabude Musa ar Harunre ḳoila, 2“Tumra Boni Israilre zanao, kunu beṭa manshor feshabor rastae zudi hamesha datu bar oy, te tar shoril nafak. 3Tar shoril taki datu baronit roile ba shorilo aṭki roile-o he nafak. 4Ola nafak halote he ze bisnat hutibo, ba ze zagat boibo, hou bisna ar hou zaga-o nafak oizibo. 5Ou datu zaora nafak beṭar bisna ze zone soibo, he nizor ḳafoṛ-sufoṛ doia dia fanidi naibo, ta-o hainja forzonto he nafak halote roibo. 6Olaḳan hou beṭar boar zagat ze zon boibo, he-o tar ḳafoṛ-sufoṛ doia dia fanidi naibo, ta-o hainja forzonto he nafak halote roibo. 7Ar i datu zaora beṭare ze zone soibo he-o tar ḳafoṛ-sufoṛ doia dia fanidi naibo, ta-o hainja forzonto he nafak halote roibo. 8Hou datu zaora beṭae zudi kunu fak-saf manshor gotro sef falae, te ou zone-o tar ḳafoṛ-sufoṛ doia dia fanidi naibo, ta-o hainja forzonto he nafak halote roibo. 9Ou datu zaora beṭae kunu zagat zaibar ḳalo gaṛi-guṛa kunutar siṭo boia gele, i siṭ nafak oizibo. 10Ou siṭ kunu manshe soile he hainja forzonto nafak halote roibo. Ou siṭ ze zone tulbo, he tar ḳafoṛ-sufoṛ doia dia fanidi naibo, ta-o hainja forzonto he nafak halote roibo. 11Ou datu zaora beṭae fanidi at na doia zudi kunu manshore soilae, te zare soibo, he tar ḳafoṛ-sufoṛ doia dia fanidi naibo, ta-o hainja forzonto he nafak halote roibo. 12Ar datu zaora beṭae zudi kunu maṭir bashon soilae, te ita bangilite oibo, ar laḳṛidi banail kunu zinish soile, ita fanidi doite oibo.
13“Hou datu zaora bemari beṭar bemar zedin ḳomizibo, ou din taki gonia shat dinor din he tar ḳafoṛ-sufoṛ doia dia futor fanit naia hari fak-saf oibo. 14Bade aṭ dinor din he duiṭa ḍufi faki ba dugu faro loia Mabudor samne Milon-tambur duaror gese azir oia, imam sabor ato dite oibo. 15Imame hou duiṭar egure dia gunar koforar kurbani, ar dusraṭa dia zalail kurbani adae ḳorba. Datu zaora beṭar nafaki horanir niote, imam sabe Mabudor samne ou nomunae tar kofora adae ḳorba.
16“Kunu beṭa manshor zoubonor fani bar oigele he tar asta shorilre fanidi doite oibo, ar hainja forzonto he nafak halote roibo. 17Ou zoubonor fani kunu ḳafoṛ ba samṛar zinisho lagigele, ita fanidi doite oibo, ar hainja forzonto ita nafak halote roibo. 18Kunu beṭae tar bour loge mila-mishar ḳalo zoubonor fani bar oile, tara duiozone fanidi naite oibo, duiozon hainja forzonto nafak halote roibo.
19“Kunu beṭir mashik bemaror lou zaoar shomoy tai shat din nafak halote roibo. Ou shomoy i beṭire ze zone soibo, he hainja forzonto nafak halote roibo. 20Ou beṭiara bemaror shomoy tai zetar ufre boibo ba hutibo, ita hoḳolta nafak oizibo. 21Tair bisna ze zone soibo, he-o tar ḳafoṛ-sufoṛ doia dia fanidi naibo, ta-o hainja forzonto he nafak halote roibo. 22Ou bemari beṭi zetar ufre boise, ita zudi keu soilae, te he-o tar ḳafoṛ-sufoṛ doia dia fanidi naibo, ta-o hainja forzonto he nafak halote roibo. 23Tair bisna ba searo ḳeu soile, ba itar ufre toa kunta soile-o, he hainja forzonto nafak halote roibo. 24Beṭiara bemari beṭir loge kunu beṭa manush zudi hute, ar tair mashikor lou tar shorilo lage, te ou beṭa-o shat din nafak halote roibo. Ou shat dinor maze he ze bisnat hutibo, ita-o nafak oizibo.
25“Kunu beṭi manshor zudi bout din dori lou zaoat roy, mashik bemaror shat din faronir bade-o zudi lou zaoat roy, te zotodin forzonto ila lou zaibo, otodin tai nafak roibo. 26Beṭiara mashik bemaror laḳan ou lou zaibar shomoy tai zetat hutibo ba boibo, ita nafak oizibo. 27I bisna ba sear ze zone soibo, he-o nafak oizibo. He tar ḳafoṛ-sufoṛ doia dia fanidi naibo, ta-o hainja forzonto he nafak halote roibo. 28Ou beṭir lou zaoa bond oar bade-o, tai gonia aro shat din bar saite oibo, erbade tai fak-saf oibo. 29Ar aṭ dinor din tai duiṭa ḍufi faki ba faro loia Milon-tambur duaror gese imam sabor daro zaibo. 30Imame hou duio fakir mazor egudi gunar koforar kurbani, ar dusraṭa dia zalail kurbani adae ḳorba. Ou nomunae imame tair lou zaibar nafaki horanir kofora Mabudor samne adae ḳorba.
31“O Musa ar Harun, ou nomunae tumra Boni Israil shomazre hoḳol nomunar nafaki taki basaio, arnae tarar maze roa amar fobitro boshot ḳanare zudi tara nafak banain, te ou nafakir dae to tarar moron oibo.”
32-33Te beṭaintor datu zaoa bemar, zoubonor fani baroni, beṭintor mashik bemar, beṭa ba beṭintor zekunu laḳan datu zaoa, nafak bour loge mila-misha ḳora, ita zekunu zonor lagi ou niom zari oilo.
Actualmente seleccionado:
Tourat 3: Lebian 15: sylL
Destacar
Copiar
Comparar
Compartir
¿Quieres tener guardados todos tus destacados en todos tus dispositivos? Regístrate o inicia sesión
© Ahle Kitab Society. All rights reserved.