Tourat 3: Lebian 10
10
Nadab ar Abihur naformanir shaza
1Bade ola oilo, imam Harunor fua Nadab ar Abihue tarar zarzir agor-kushboy danit aguin zalaila, ar ou agunir ufre agor-kushboy dila. Tara Mabudor hukumor ulṭa gia dusra aguin dia Mabudor name agor-kushboy zalaila. 2Otar lagi Mabudor ges taki aguin lamia aia tarare zalaililo, tara Mabudor samne morigela. 3Teu Musae Harunre ḳoila, “Mabude to age-u zanai disla,
Amar samne zera azir oy,
tara amare fak-fobitro ḳoia manbo,
hoḳol manshor samne
amar gourob-mohima zair ḳorbo.”
Ikan hunia Harun sufsaf roila.
4Bade Musae Harunor sasa Ujjolor fuain Mishayel ar Elzafonre ḳobor dia anaila, anaia ḳoila, “Tumra Herem Shorifor samon taki tumrar duio batizar lashre bar ḳoria kempor bare neo.” 5Tan hukum faia tara gia Nadab ar Abihur lashre imamoti fainjabir ḳafoṛo dori ṭania kempor bare nila.
6Bade imam Harun ar tan fuain Ali-Azor ar Isamarre Musae ḳoila, “Tarar moutor duke tumra nizor sulre aula-zaula ḳorio na, ar finnor ḳafoṛ-sufoṛ faṛio na. Ita ḳorle tumra-o morbae, ar asta shomazor ufre Mabudor gozobi gusa lambo. Oile Mabude zerare aguindi zalai marsoin, tarar duke tumrar kuṭum-ḳesh mani bad-baki Boni Israile mattom-ahazari korta farba. 7Tumrar gotro to Mabudor namor ḳelafoti shomzibar fobitro tel deoa oise, erlagi tumra Milon-tambur duaror bare zaio na, gele-u morbae.” Tara-o Musar ḳota manla.
8Erbade Mabude imam Harunre ḳoila, 9“Tumi ar tumar fuainte anguror shorbot ba shorab ḳaia Milon-tambur bitre hamaio na, hamaile-u morbae. I hukum oarishor for oarish dori hor-hamesha manio. 10Kunṭa haram ar kunṭa halal, kunṭa fak ar kunṭa nafak, ita buzia-hunia solio. 11Ar ami Mabude Musar marfote Boni Israilre zoto hukum-ahkam disi, tarare ita hikao.”
12Bade Harun ar tan baki duio fua Ali-Azor ar Isamarre Musae ḳoila, “Mabudor name agunit deoa kurbanir logor dan-gomor sodgar ze ongsho baki roise, ota dia ḳamir saṛa ruṭi banaia kurbani kanar ḳandat nia tumra ḳaio. Ita to ḳas fobitro zinish. 13Tumra fobitro Kaba goror shimanar bitre ota ḳaio. Mabudor name agunit deoa kurbanir ou ongsho to tumar ar tumar fuaintor faona. Mabude amare ola hukum disoin. 14Oile Mabudor name dulona kurbanir sina ar ranor gust tumra ar tumrar fua-fuṛinte-o ḳaitae farbae. Zekunu fak-saf zagat boia tumra ita ḳaio. Boni Israilor hoḳol salamoti kurbanir gustor ou ongsho tumrare ar tumrar fua-fuṛintore deoa oise. 15Ou kurbanir foshur sorbi zebla ana oibo, ou shomoy dulona kurbanir lagi sina ar ranor gust-o ana lagbo. Mabudor hukum mafik ou ran ar sinar gust tumi ar tumar fua-fuṛintor siroḳalin faona.”
16Bade Musae kub kiali oia tallashi koria zanla, ze sagol dia gunar koforar kurbani adae ḳora oisil, ogur hoḳol gust tara zalailise. Erlagi Musae Harunor baki duio fua Ali-Azor ar Isamaror ufre gusa ḳoria ḳoila, 17“Gunar koforar kurbanir gust tumra Kaba goror shimanat ḳailae na ḳene? Ita to ḳas fobitro zinish. Mabudor samne Boni Israilor gunar kofora adae ḳoria, tarar dush-ḳosuri mafir lagi ita to tumrare deoa oisil. 18Kurbanir sagolor lou zebla Herem Shorifor bitre neoa oise na, te amar hukum mafik itar gust to tumra Kaba goror shimanar bitre ḳaoa zorur asil.”
19Harune zuaf dila, “Aiz Mabudor samne tarar gunar koforar kurbani ar zalail kurbani adae ḳorar bade amar ufredi otota goṭilo. Te aizkur dino ami ou kurbanir gust ḳaile Mabud kunu kushi oiba ni?” 20I zuaf hunia Musa nobi kushi oila.
Actualmente seleccionado:
Tourat 3: Lebian 10: sylL
Destacar
Copiar
Comparar
Compartir
¿Quieres tener guardados todos tus destacados en todos tus dispositivos? Regístrate o inicia sesión
© Ahle Kitab Society. All rights reserved.