Tourat 2: Hizrot 32
32
Allar birudde Boni Israilor naformani (32:1—34:35)
Shunar murti pujar shaza
1Musa nobi faṛ taki lamia aite deri or dekia, manshe aia Harunor sairobae dola oia ḳoila, “Amrare fot sinaia neoar lagi, afne amrare devta banai deukka. Ḳaron, ze Musae amrare Mishor taki bar ḳori anche, tar kita goṭse amra to zani na.” 2Ikan hunia Harune tarare ḳoila, “Tumra zarzir bou ar fua-fuṛintor ḳano taki shunar goyna kulia amar gese ano.” 3Teu hoḳole tarar ḳanor goyna kulia Harunor gese ania dilo. 4Manshe zeta shuna ania dila, Harune ota nia aguindi golaia, hunaror atiardi eḳ basuror murti banaila. Ogu dekia Boni Israile ḳoila, “Bai oḳol, ou ein-u tumrar devta, zein tumrare Mishor desh taki bar ḳori anchoin.” 5I halot dekia Harune hou basuror samne eḳ boli kana banaia zanai dila, “Samnor ḳail Mabudor name kushi-bashi kora oibo.” 6Teu bador din kub sobre uṭia manshe devtar samne aia mongol boli ar foshu zalaia boli dila. Bade tara ḳaoa-daoa ḳoria hari, hoi-hulla ḳori nas-gan, furti-amud ḳorat lagla.
7Ou Mabude Musare ḳoila, “Tumi faṛor lamat zao. Tumar ou zeta manshore Mishor desh taki bar ḳori ancho, ita to naforman bonigese. 8Ami tarare zela solar hukum dislam, tara ita bad dia nizor lagi eḳ basuror murti banaia, maṭit foṛia ogure fornam ḳorer. Ogur name tara foshu boli der ar ḳor, bai oḳol, ou ein-u tumrar devta, zein tumrare Mishor desh taki bar ḳori anchoin.”
9Mabude Musare ḳoila, “Ami ita manshore sini, ita to gaṛteṛa-ekguia zat. 10Oḳon tumi amare bada dio na, itar ufre amar gusa aguinor laḳan dau dau ḳori zoler, ami itare sarḳar ḳorilimu. Bade ami tumar maz taki eḳ moha zati foyda ḳormu.”
11Teu Musae tan Mabud Allare minot-ḳajji koria ḳoila, “O Mabud, tumi tumar kudroti at dia tumar moha kudroti bole zetare Mishor taki bar ḳori ancho, tarar ufre tumi kene oto gusa oilae? 12Mishori oḳole ḳene ikan matar shuzug faita, faṛia elaḳat ania tarare ḳotom ḳoria, dunia taki tarar nam miṭailibar lagi tumi tarare Mishor taki bar ḳoria ancho? Mabud go, tumar i betaya gusaḳan tumi tamailao. Meherbani kori, tumar bonda oḳlor ufre i gozobḳan anio na. 13Tumar afon gulam Ibrahim, Isʼhak ar Iakubor ḳota iad ḳoro. Tumi nizor name ḳosom ḳaia tarare ḳoislae, tarar oarish oḳolre tumi asmanor terar laḳan baṛaibae, ar tumar oada ḳora ou asta deshor malikana-o tarare dibae, ar tara hor-hameshakur lagi er doḳol faiba.” 14Ikan hunia Mabudor meherbani oilo. Tain tan bonda oḳlor ufre ze gozob ḍalita saisla, ita bad dilaila.
15Erbade Musae Allar deoa duioḳan shahadot fattor loia lamat aila. I fattoror ulṭa-baṭiol duio galat leḳa asil. 16I duio fattor oilo Alla Pakor nizor ator ḳam, ar i fattoror ufre kudia leḳa ḳano tan nizor ator leḳa. 17Musar ḳadim Iusae manshor ita hoi-hulla hunia Musare ḳoila, “Sab, amrar kempor maze zuddor aoaz huna zar.” 18Musae ḳoila, “Ita to kunu zuddor ara-zitar aoaz nae. Ami zeta huniar, ita to ganor aoazor laḳan lager.”
19Bade Musae kempor ḳasat aia manshor nasa-nasi ar basuror murti deḳla. Dekia-u tain gusae aguin oia, ator fattor duioḳan iṭa mari falai dila. Teu fattor duioḳan faṛor tole foṛia surmar oigelo. 20Ar Musae tarar banail basuror murti nia agunit falaia zalailila. Bade ogure fishia guṛa banaia fanit mishaia, Boni Israil oḳolre ḳaoai dila.
21Tain Harunre ḳoila, “Ita manshe tumare kita ḳorsil, tumi kene tararedi shiriki kam ḳorailae?” 22Harune zuaf dila, “Malik, afne gusa ḳoroin na zanu, afne to zanoin-u, ita manush ḳali karaf ḳamor ashik. 23Tara aia amare ḳoila, amrare fot sinaia loia zaoar lagi devta banai deukka, ḳaron ze Musae amrare Mishor taki bar ḳori anchoin, en kita oise, amra to zaniar na. 24Ikan hunia ami tarare ḳoilam, tumrar gese zeta shuna-dana ase, ota kulia amar gese ano. Tara ania amar ato dila, ar ami oḳnain iṭa mari agunit falailam, teu ou basur ogu bar oia ailo.”
25Musae deḳla, i manush guin beforua oigesoin. Tain buzla, Harune tarare beforua oar shuzug disoin. Erlagi dushmon oḳole ashibar shuzug faisoin. 26Ou Musae kempor geiṭor gese ubaia ḳoila, “Tumra zoto zon Mabudor fokke aso, hoḳol amar ḳasat ao.” Teu Lebi ḳandanor hoḳol manush tan gese ailo. 27Aia harle Musae tarare ḳoila, “Mabud, zein Boni Israilor Alla, tain nize hukum ḳorsoin, tumra hoḳole zarzir ḳomro toluar bando, ar kempor bitre zare samne fao zane maro. Asta kempor bitre bai-bondu, ari-fori zare fao maro.” 28Teu Lebi ḳandanor manshe Musar hukum mafik kam ḳorla. Hi din onuman tin azar manush mara gela. 29Bade Musae ḳoila, “Tumra aiz Mabudor name zarzir fua ar bai-biradoror ufre at tulte ḳoredi geso na, Mabudor ḳamor lagi tumra alada oiso, erlagi Mabude tumrare rohomot disoin.”
30Bador din Musae manshore ḳoila, “Tumra to bezuita guna ḳorso. Te ami oḳon hirbar Tur faṛo Mabudor dorbaro zairam, farle tumrar guna mafir koforar kunu fot bar ḳormu.” 31Musae Mabudor dorbaro gia aroz ḳorla, “O Mabud, i manush guinte bezuita guna ḳorilise. Tara nizor lagi shunar murti banaise. 32Te tumi meherbani koria tarar gunare oḳon maf ḳori dilao, ar zudi maf na ḳoro, taile tumar leḳa ḳata taki amar namḳano ḳaṭilao.” 33Mabude zuaf dila, “Huno, amar birudde zera guna ḳorse, ami kali tarar namre-u amar ḳata taki fusilimu. 34Te tumi oḳon zaogi, ar ami ze deshor ḳota ḳoisi, tumi tarare loia hou desho roana dilao. Amar firistae tumrare fot deḳaia niba. Bade zebla shaza deoar shomoy aibo, ou shomoy ami tarar gunar shaza dimu.”
35Harunor ate banail hou basuror murtir lagi manshe zeta ḳorsila, otar lagi Mabude tarar ufre gozob nazil ḳorla.
Actualmente seleccionado:
Tourat 2: Hizrot 32: sylL
Destacar
Copiar
Comparar
Compartir
¿Quieres tener guardados todos tus destacados en todos tus dispositivos? Regístrate o inicia sesión
© Ahle Kitab Society. All rights reserved.