ꠁꠘ꠆ꠎꠤꠟ ১: ꠝꠕꠤ 18
18
ꠃꠝ꠆ꠝꠔꠞ ꠟꠣꠉꠤ ꠢꠎꠞꠔ ꠁꠍꠣꠞ ꠎꠞꠥꠞꠤ ꠔꠣꠟꠤꠝ (১৮:১-৩৫)
ꠛꠦꠢꠦꠡ꠆ꠔꠤ ꠛꠣꠖꠡꠣꠁꠔ ꠛꠠ ꠇꠦ?
1ꠅꠃ ꠡꠝꠄ ꠍꠣꠢꠣꠛꠤ ꠅꠇꠟꠦ ꠢꠎꠞꠔ ꠁꠍꠣꠞ ꠇꠣꠘ꠆ꠖꠣꠔ ꠀꠁꠀ ꠎꠤꠇꠣꠁꠟꠣ, “ꠢꠥꠎꠥꠞ, ꠛꠦꠢꠦꠡ꠆ꠔꠤ ꠛꠣꠖꠡꠣꠁꠞ ꠝꠣꠎꠦ ꠢꠇ꠆ꠇꠟ ꠕꠣꠇꠤ ꠛꠠ ꠇꠦ?”
2ꠔꠦꠃ ꠁꠍꠣꠄ ꠄꠇ ꠢꠥꠞꠥꠔ꠆ꠔꠣꠞꠦ ꠒꠣꠇꠤꠀ ꠀꠘꠤꠀ ꠔꠣꠞꠣꠞ ꠝꠣꠎꠦ ꠃꠛꠣ ꠇꠞꠣꠁ ꠇꠁꠟꠣ, 3“ꠀꠝꠤ ꠔꠥꠝꠞꠣꠞꠦ ꠢꠣꠍꠣꠃ ꠇꠁꠞꠣꠝ, ꠔꠥꠝꠞꠣ ꠎꠥꠖꠤ ꠝꠘ ꠚꠤꠞꠣꠁꠀ ꠅꠃ ꠢꠥꠞꠥꠔ꠆ꠔꠣꠞ ꠟꠣꠈꠣꠘ ꠘꠣ ꠅꠅ, ꠔꠦ ꠇꠥꠘꠥꠝꠘ꠆ꠔꠦꠃ ꠛꠦꠢꠦꠡ꠆ꠔꠤ ꠛꠣꠖꠡꠣꠁꠔ ꠢꠣꠝꠣꠁꠔꠣꠄ ꠙꠣꠞꠔꠣꠄ ꠘꠣꠄ। 4ꠎꠦ ꠎꠘꠦ ꠘꠤꠎꠞꠦ ꠅꠃ ꠢꠥꠞꠥꠔ꠆ꠔꠣꠞ ꠟꠣꠈꠣꠘ ꠢꠥꠞꠥ ꠝꠘꠅ ꠇꠞꠦ, ꠛꠦꠢꠦꠡ꠆ꠔꠤ ꠛꠣꠖꠡꠣꠁꠔ ꠢꠦ-ꠃ ꠢꠇꠟ ꠕꠣꠇꠤ ꠖꠣꠝꠤ। 5ꠀꠞ ꠎꠦ ꠎꠘꠦ ꠀꠝꠣꠞ ꠟꠣꠉꠤ ꠅꠃ ꠢꠥꠞꠥꠔ꠆ꠔꠣꠞ ꠟꠣꠈꠣꠘ ꠇꠥꠘꠥ ꠍꠣꠛꠣꠟꠞꠦ ꠇꠛꠥꠟ ꠇꠞꠦ, ꠢꠦ ꠀꠝꠣꠞꠦꠃ ꠇꠛꠥꠟ ꠇꠞꠦ।
ꠉꠥꠘꠣꠞ ꠇꠣꠝ ꠕꠣꠇꠤ ꠢꠥꠡꠤꠀꠞ ꠞꠅꠀ
6“ꠢꠥꠘꠅ, ꠀꠝꠣꠞ ꠔꠞꠤꠇꠣꠞ ꠅꠃ ꠢꠥꠞꠥ-ꠝꠥꠞꠥ ꠄꠇꠎꠘꠞꠦ ꠎꠦꠉꠤꠄ ꠉꠥꠘꠣꠞ ꠙꠕꠦ ꠐꠣꠘꠤꠀ ꠘꠦꠄ, ꠅꠉꠥꠞ ꠟꠣꠉꠤ ꠀꠞꠅ ꠜꠣꠟꠣ ꠅꠁꠟ ꠅꠘꠦ, ꠅꠉꠥꠞ ꠉꠟꠣꠔ ꠙꠣꠔ꠆ꠔꠞ ꠛꠣꠘ꠆ꠖꠤꠀ ꠖꠞꠤꠀꠔ ꠚꠣꠟꠣꠁ ꠖꠦꠅꠀ। 7ꠢꠣꠄꠞꠦ ꠖꠥꠘꠤꠀ, ꠉꠥꠘꠣꠞ ꠙꠕꠦ ꠘꠦꠅꠀꠞ ꠟꠣꠉꠤ ꠔꠥꠝꠣꠞ ꠝꠣꠎꠦ ꠇꠔ ꠃꠍꠇꠣꠘꠤ ꠀꠍꠦ! ꠃꠍꠇꠣꠘꠤ ꠔ ꠀꠁꠛꠃ ꠀꠁꠛ। ꠅꠁꠟꠦ ꠟꠣꠘ꠆ꠘꠔ ꠢꠃ ꠎꠘꠞ ꠃꠙꠞꠦ, ꠎꠦꠉꠤꠄ ꠉꠥꠘꠣ ꠇꠞꠣꠘꠤꠞ ꠟꠣꠉꠤ ꠃꠍꠇꠣꠘꠤ ꠖꠦꠄ। 8ꠔꠥꠝꠣꠞ ꠀꠔ ꠛꠣ ꠙꠣꠅ ꠎꠥꠖꠤ ꠔꠥꠝꠣꠞꠦ ꠉꠥꠘꠣꠞ ꠙꠕꠦ ꠐꠣꠘꠦ, ꠔꠦ ꠁ ꠀꠔ-ꠙꠣꠅ ꠇꠣꠐꠤꠀ ꠚꠣꠟꠣꠁ ꠖꠦꠅ। ꠖꠥꠁꠅ ꠀꠔ-ꠙꠣꠅ ꠟꠁꠀ ꠖꠥꠎꠈꠅ ꠎꠟꠣ ꠕꠣꠇꠤ, ꠀꠔꠥꠞ ꠅꠁꠀꠅ ꠛꠦꠢꠦꠡ꠆ꠔꠅ ꠎꠣꠅꠀ ꠔꠥꠝꠣꠞ ꠟꠣꠉꠤ ꠜꠣꠟꠣ। 9ꠔꠥꠝꠣꠞ ꠌꠃꠈꠦ ꠎꠥꠖꠤ ꠔꠥꠝꠣꠞꠦ ꠉꠥꠘꠣꠞ ꠙꠕꠦ ꠐꠣꠘꠦ, ꠔꠦ ꠁ ꠌꠃꠈ ꠔꠥꠟꠤꠀ ꠚꠣꠟꠣꠁ ꠖꠦꠅ। ꠖꠥꠁꠅ ꠌꠃꠈ ꠟꠁꠀ ꠖꠥꠎꠈꠅ ꠎꠟꠣ ꠕꠣꠇꠤ, ꠇꠣꠘꠣ ꠅꠁꠀꠅ ꠀꠈꠦꠞ ꠙꠣꠅꠀ ꠔꠥꠝꠣꠞ ꠟꠣꠉꠤ ꠜꠣꠟꠣ।
10“ꠢꠥꠘꠅ, ꠀꠝꠤ ꠇꠁꠞꠣꠝ, ꠔꠥꠝꠞꠣ ꠅꠃ ꠢꠥꠞꠥꠔ꠆ꠔꠣꠞ ꠟꠣꠈꠣꠘ ꠇꠥꠘꠥ ꠍꠣꠛꠣꠟꠞꠦꠅ ꠄꠟꠣꠝꠤ ꠇꠞꠤꠅ ꠘꠣ। ꠔꠣꠞꠣꠞ ꠚꠤꠞꠤꠡ꠆ꠔꠣ ꠅꠇꠟꠦ ꠛꠦꠢꠦꠡ꠆ꠔꠞ ꠝꠣꠎꠦ ꠢꠞ-ꠢꠣꠝꠦꠡꠣ ꠀꠝꠣꠞ ꠛꠦꠢꠦꠡ꠆ꠔꠤ ꠛꠣꠚ ꠀꠟ꠆ꠟꠣ ꠙꠣꠇꠞ ꠝꠥꠈ ꠖꠦꠈꠞꠣ। 11ꠎꠣꠘ ꠘꠤ, ꠎꠦꠞꠣ ꠛꠦ-ꠙꠕꠦ ꠉꠦꠍꠦꠉꠤ, ꠄꠞꠣꠞꠦ ꠛꠣꠌꠣꠘꠤꠞ ꠟꠣꠉꠤꠃ ꠀꠝꠤ ꠛꠤꠘ-ꠀꠖꠝ ꠁ ꠖꠥꠘꠤꠀꠔ ꠀꠁꠍꠤ।
12“ꠝꠘꠅ ꠇꠞꠅ, ꠇꠥꠘꠥ ꠝꠣꠘꠡꠞ ꠄꠇ-ꠡꠉꠥ ꠝꠦꠠꠣ ꠀꠍꠦ, ꠄꠞ ꠝꠣꠎꠞ ꠄꠉꠥ ꠝꠦꠠꠣ ꠀꠞꠣꠁ ꠉꠦꠟꠦ ꠢꠦ ꠛꠣꠇꠤ ꠘꠤꠞꠣꠘ꠆ꠘꠛ꠆ꠛꠁꠐꠣ ꠛꠘ꠆ꠖꠅ ꠕꠁꠀ, ꠢꠃ ꠀꠞꠣꠁꠟ ꠅꠉꠥ ꠔꠥꠇꠣꠘꠤꠔ ꠎꠣꠄ ꠘꠣ ꠘꠤ? 13ꠀꠝꠤ ꠔꠥꠝꠞꠣꠞꠦ ꠢꠣꠍꠣꠃ ꠇꠁꠞꠣꠝ, ꠢꠦ ꠎꠥꠖꠤ ꠁꠇꠐꠣ ꠔꠥꠇꠣꠁꠀ ꠙꠣꠄ, ꠔꠦ ꠎꠦ ꠘꠤꠞꠣꠘ꠆ꠘꠛ꠆ꠛꠁꠉꠥ ꠀꠞꠍꠤꠟ ꠘꠣ, ꠅꠉꠥꠁꠘ ꠕꠁꠀ ꠎꠦꠉꠥ ꠀꠞꠤ ꠉꠦꠍꠤꠟ, ꠅꠉꠥꠞ ꠟꠣꠉꠤꠃ ꠢꠦ ꠈꠥꠛ ꠈꠥꠡꠤ-ꠛꠣꠡꠤ ꠇꠞꠦ। 14ꠑꠤꠇ ꠅꠃ ꠟꠣꠈꠣꠘ, ꠔꠥꠝꠞꠣꠞ ꠛꠦꠢꠦꠡ꠆ꠔꠤ ꠛꠣꠚ ꠀꠟ꠆ꠟꠣꠄꠅ ꠌꠣꠁꠘ ꠘꠣ, ꠅꠃ ꠢꠥꠞꠥꠔ꠆ꠔꠣꠁꠘ꠆ꠔꠞ ꠝꠣꠎꠞ ꠄꠉꠥ ꠢꠥꠞꠥꠔ꠆ꠔꠣꠅ ꠛꠤꠘꠣꠡ ꠅꠃꠇ।
ꠅꠙꠞꠣꠗꠤꠞꠦ ꠛꠥꠎꠣꠅ
15“ꠔꠥꠝꠣꠞ ꠇꠥꠘꠥ ꠜꠣꠁꠄ ꠎꠥꠖꠤ ꠔꠥꠝꠣꠞ ꠉꠦꠍꠦ ꠖꠥꠡ ꠇꠞꠤꠟꠣꠄ, ꠔꠦ ꠢꠦ ꠎꠦꠛꠟꠣ ꠘꠤꠞꠣꠟꠣꠄ ꠕꠣꠇꠦ, ꠅꠃ ꠡꠝꠄ ꠔꠥꠝꠤ ꠄꠇꠟꠣ ꠉꠤꠀ ꠔꠣꠞꠦ ꠛꠥꠎꠣꠁꠅ। ꠔꠥꠝꠣꠞ ꠛꠥꠎ ꠎꠥꠖꠤ ꠝꠣꠘꠤꠟꠣꠄ, ꠔꠦ ꠅꠃ ꠜꠣꠁꠞ ꠟꠉꠦ ꠔꠥꠝꠣꠞ ꠜꠣꠁꠀꠟꠤ ꠛꠣꠌꠣꠁꠟꠤꠟꠣꠄ। 16ꠅꠁꠟꠦ ꠢꠦ ꠎꠥꠖꠤ ꠔꠥꠝꠣꠞ ꠛꠥꠎ ꠘꠣ ꠝꠣꠘꠦ, ꠔꠦ ꠀꠞꠅ ꠖꠥꠁ-ꠄꠇꠎꠘ ꠝꠣꠎꠞ ꠝꠣꠘꠥꠡ ꠟꠁꠀ ꠎꠣꠁꠅ। ꠉꠤꠀ ꠔꠣꠞꠣꠞ ꠍꠣꠝꠘꠦ ꠔꠣꠞꠦ ꠛꠥꠎꠣꠁꠅ। ꠔꠦꠃ ꠝꠥꠍꠣꠞ ꠡꠞꠤꠅꠔꠞ ꠅꠃ ꠢꠥꠇꠥꠝ ꠙꠥꠞꠣ ꠅꠁꠛ, ‘ꠖꠥꠁ-ꠔꠤꠘꠎꠘ ꠡꠣꠇ꠆ꠇꠤꠞ ꠇꠕꠣꠄ ꠎꠦꠇꠥꠘꠥ ꠛꠦꠙꠣꠞ ꠙꠞꠝꠣꠘ ꠅꠄ।’ 17ꠄꠞꠣꠞ ꠛꠥꠎꠅ ꠎꠥꠖꠤ ꠢꠦ ꠘꠣ ꠝꠣꠘꠦ, ꠔꠦ ꠔꠣꠞ ꠛꠦꠙꠣꠞꠦ ꠎꠝꠣꠔꠅ ꠘꠣꠟꠤꠡ ꠖꠦꠅ। ꠎꠝꠣꠔꠞ ꠇꠕꠣ ꠎꠥꠖꠤ ꠝꠣꠘꠤꠟꠣꠄ ꠔꠦ ꠜꠣꠟꠣ, ꠀꠞ ꠘꠣ ꠝꠣꠘꠟꠦ ꠔꠣꠞꠦ ꠛꠤꠗꠞ꠆ꠝꠤ ꠛꠣ ꠊꠥꠡꠈꠥꠞ ꠔꠡꠤꠟꠖꠣꠞ ꠝꠘꠅ ꠇꠞꠤꠀ, ꠔꠣꠞꠦ ꠔꠣꠞ ꠙꠕꠦ ꠍꠣꠠꠤ ꠖꠦꠅ। 18ꠔꠦ ꠀꠝꠤ ꠔꠥꠝꠞꠣꠞꠦ ꠢꠣꠍꠣ ꠇꠕꠣ ꠇꠁꠞꠣꠝ, ꠅꠃ ꠖꠥꠘꠤꠀꠁꠔ ꠔꠥꠝꠞꠣ ꠎꠦꠔꠣꠞꠦ ꠘꠣꠎꠣꠁꠎ ꠇꠁꠛꠣꠄ, ꠁꠔꠣ ꠀꠟ꠆ꠟꠣꠞ ꠖꠞꠛꠣꠞꠅ ꠘꠣꠎꠣꠁꠎ ꠅꠁꠎꠤꠛ, ꠀꠞ ꠔꠥꠝꠞꠣ ꠎꠦꠔꠣꠞꠦ ꠎꠣꠁꠎ ꠇꠁꠛꠣꠄ, ꠀꠟ꠆ꠟꠣꠞ ꠖꠞꠛꠣꠞꠅ-ꠅ ꠁꠔꠣ ꠎꠣꠁꠎ ꠅꠁꠛ।
19“ꠢꠥꠘꠅ, ꠀꠝꠤ ꠔꠥꠝꠞꠣꠞꠦ ꠀꠞꠅ ꠇꠁꠞꠣꠝ, ꠔꠥꠝꠞꠣꠞ ꠝꠣꠎꠞ ꠖꠥꠁꠎꠘ ꠎꠥꠖꠤ ꠄꠇꠝꠔ ꠅꠁꠀ ꠇꠥꠘꠥ ꠛꠦꠙꠣꠞꠦ ꠖꠥꠀ ꠇꠞꠦ, ꠔꠦ ꠀꠝꠣꠞ ꠛꠦꠢꠦꠡ꠆ꠔꠤ ꠛꠣꠚ ꠀꠟ꠆ꠟꠣꠄ ꠅꠃ ꠖꠥꠀ ꠇꠛꠥꠟ ꠇꠞꠛꠣ। 20ꠀꠝꠣꠞ ꠘꠣꠝꠦ ꠎꠦ ꠎꠣꠉꠣꠔ ꠖꠥꠁ ꠛꠣ ꠔꠤꠘ ꠎꠘ ꠎꠝꠣ ꠅꠄ, ꠢꠃ ꠎꠣꠉꠣꠔ ꠀꠝꠤꠅ ꠀꠎꠤꠞ ꠕꠣꠇꠤ।”
ꠝꠣꠚ ꠇꠞꠣꠞ ꠛꠦꠙꠣꠞꠦ ꠔꠣꠟꠤꠝ
21ꠅꠃ ꠡꠝꠄ ꠙꠤꠔꠞꠦ ꠀꠁꠀ ꠁꠍꠣꠞꠦ ꠇꠁꠟꠣ, “ꠢꠥꠎꠥꠞ, ꠀꠝꠣꠞ ꠜꠣꠁꠄ ꠎꠥꠖꠤ ꠀꠝꠣꠞ ꠉꠦꠍꠦ ꠛꠣꠞ ꠛꠣꠞ ꠖꠥꠡ ꠇꠞꠦ, ꠔꠦ ꠀꠝꠤ ꠇꠔꠛꠣꠞ ꠔꠣꠞꠦ ꠝꠣꠚ ꠇꠞꠔꠣꠝ? ꠡꠣꠔ ꠛꠣꠞ ꠘꠤ?” 22ꠁꠍꠣꠄ ꠇꠁꠟꠣ, “ꠈꠣꠟꠤ ꠡꠣꠔ ꠛꠣꠞ ꠘꠣꠄ, ꠀꠝꠤ ꠇꠁꠞꠣꠝ, ꠔꠣꠞꠦ ꠡꠔ꠆ꠔꠁꠞ ꠉꠥꠘ ꠡꠣꠔ ꠛꠣꠞ ꠝꠣꠚ ꠇꠞꠤꠅ।
23“ꠢꠥꠘꠅ, ꠛꠦꠢꠦꠡ꠆ꠔꠤ ꠛꠣꠖꠡꠣꠁ ꠅꠟꠣ ꠄꠇ ꠛꠣꠖꠡꠣꠞ ꠟꠣꠈꠣꠘ, ꠎꠦꠁꠘ ꠔꠣꠘ ꠃꠎꠤꠞ-ꠘꠣꠎꠤꠞꠞ ꠉꠦꠍꠦ ꠢꠤꠡꠣꠛ-ꠘꠤꠇꠣꠡ ꠌꠣꠁꠟꠣ। 24ꠛꠣꠖꠡꠣꠄ ꠢꠤꠡꠣꠛ ꠟꠅꠀꠔ ꠛꠁꠟꠦ ꠄꠞꠣꠞ ꠝꠣꠎꠞ ꠅꠟꠣ ꠄꠇ ꠎꠘꠞꠦ ꠔꠣꠘ ꠍꠣꠝꠘꠦ ꠀꠘꠣ ꠅꠁꠟ, ꠛꠣꠖꠡꠣꠄ ꠄꠞ ꠉꠦꠍꠦ ꠟꠣꠈ ꠟꠣꠈ ꠐꠦꠇꠣ ꠙꠣꠅꠘꠣ ꠀꠍꠟꠣ। 25ꠅꠃ ꠙꠣꠅꠘꠣ ꠚꠤꠞꠔ ꠖꠤꠛꠣꠞ ꠈꠦꠝꠔꠣ ꠄꠞ ꠘꠣꠁ। ꠄꠞꠖꠣꠄ ꠛꠣꠖꠡꠣꠄ ꠢꠥꠇꠥꠝ ꠖꠤꠟꠣ, ꠢꠦ ꠡꠥꠖ꠆ꠖꠣ ꠔꠣꠞ ꠛꠃ, ꠙꠥꠀ-ꠙꠥꠠꠤꠘ ꠉꠥꠟꠣꠝ ꠢꠤꠡꠣꠛꠦ ꠛꠤꠇꠤ ꠈꠣꠁꠀ, ꠢꠇꠟ ꠡꠄ-ꠡꠝ꠆ꠙꠔ꠆ꠔꠤ ꠛꠦꠌꠤꠀ ꠔꠣꠘ ꠙꠣꠅꠘꠣ ꠀꠖꠣꠄ ꠇꠞꠣꠞ ꠟꠣꠉꠤ। 26ꠅꠃ ꠢꠥꠇꠥꠝ ꠢꠥꠘꠤꠀ ꠢꠦ ꠛꠣꠖꠡꠣꠞ ꠙꠣꠅꠔ ꠗꠞꠤꠀ ꠇꠣꠘ꠆ꠖꠤꠀ ꠇꠁꠟ, ‘ꠢꠥꠎꠥꠞ, ꠀꠝꠣꠞꠦ ꠕꠥꠠꠣ ꠡꠥꠎꠥꠉ ꠖꠦꠃꠇ꠆ꠇꠣ, ꠀꠝꠤ ꠀꠙꠘꠣꠞ ꠢꠇꠟ ꠙꠣꠅꠘꠣ ꠖꠤꠟꠣꠁꠝꠥ।’ 27ꠅꠃ ꠔꠣꠁꠘ ꠖꠄꠀ ꠇꠞꠤꠀ ꠔꠣꠞꠦ ꠍꠣꠠꠤ ꠖꠤꠟꠣ, ꠀꠞ ꠢꠇꠟ ꠖꠦꠘꠣ ꠝꠣꠚ ꠇꠞꠤ ꠖꠤꠟꠣꠁꠟꠣ।
28“ꠛꠣꠖꠦ ꠢꠦ ꠛꠣꠞꠦ ꠉꠤꠀ ꠔꠣꠞ ꠟꠉꠞ ꠀꠞꠇ ꠌꠣꠇꠞꠤꠀꠘꠞꠦ ꠙꠣꠁꠟ। ꠅꠃ ꠎꠘꠞ ꠉꠦꠍꠦ ꠢꠦ ꠄꠇ-ꠡ ꠐꠦꠇꠣ ꠙꠣꠅꠘꠣ ꠀꠍꠤꠟ। ꠙꠣꠁꠀ ꠔꠣꠞꠦ ꠉꠟꠣꠔ ꠐꠤꠙꠣ ꠝꠣꠞꠤ ꠗꠞꠤꠀ ꠇꠁꠟ, ‘ꠅꠂ, ꠔꠥꠁ ꠀꠝꠣꠞ ꠙꠣꠅꠘꠣ ꠐꠦꠇꠣ ꠖꠦ।’ 29ꠢꠃ ꠎꠘꠦ ꠔꠣꠞ ꠙꠣꠅ-ꠅ ꠙꠠꠤ ꠝꠤꠘꠔ ꠇꠞꠤ ꠇꠁꠟ, ‘ꠀꠝꠣꠞꠦ ꠕꠥꠠꠣ ꠡꠥꠎꠥꠉ ꠖꠦꠅ, ꠀꠝꠤ ꠔꠥꠝꠣꠞ ꠢꠇꠟ ꠙꠣꠅꠘꠣ ꠖꠤꠟꠣꠁꠝꠥ।’ 30ꠅꠁꠟꠦ ꠢꠦ ꠄꠞ ꠇꠕꠣ ꠝꠣꠘꠟ ꠘꠣ। ꠔꠣꠞ ꠐꠦꠇꠣ ꠘꠣ ꠖꠦꠅꠀ ꠙꠞ꠆ꠎꠘ꠆ꠔ ꠔꠣꠞꠦ ꠎꠦꠟꠅ ꠢꠣꠞꠣꠁ ꠕꠁꠟ।
31“ꠁꠔꠣ ꠖꠦꠈꠤꠀ ꠔꠣꠞ ꠟꠉꠞ ꠃꠎꠤꠞ-ꠘꠣꠎꠤꠞ ꠅꠇꠟ ꠈꠥꠛ ꠛꠦꠎꠣꠞ ꠅꠁꠟꠣ। ꠔꠣꠞꠣ ꠉꠤꠀ ꠁꠔꠣ ꠛꠣꠖꠡꠣꠞꠦ ꠎꠣꠘꠣꠁꠟꠣ। 32ꠛꠣꠖꠡꠣꠄ ꠢꠃ ꠌꠣꠇꠞꠤꠀꠘꠞꠦ ꠀꠘꠣꠁꠀ ꠇꠁꠟꠣ, ‘ꠢꠣꠄꠞꠦ ꠘꠣꠚꠞꠝꠣꠘ, ꠔꠥꠝꠤ ꠀꠝꠣꠞꠦ ꠝꠤꠘꠔ ꠇꠞꠣꠄ ꠀꠝꠤ ꠔꠥꠝꠣꠞ ꠢꠇꠟ ꠖꠦꠘꠣ ꠝꠣꠚ ꠇꠞꠤ ꠖꠤꠟꠣꠁꠍꠟꠣꠝ। 33ꠔꠦ ꠀꠝꠤ ꠎꠦꠟꠣ ꠔꠥꠝꠣꠞꠦ ꠖꠄꠀ ꠇꠞꠍꠟꠣꠝ, ꠔꠥꠝꠤꠅ ꠅꠃꠟꠣ ꠔꠥꠝꠣꠞ ꠟꠉꠞ ꠌꠣꠇꠞꠤꠀꠘꠞꠦ ꠖꠄꠀ ꠇꠞꠣ ꠃꠌꠤꠔ ꠀꠍꠤꠟ ꠘꠣ ꠘꠤ?’ 34ꠛꠣꠖꠦ ꠛꠣꠖꠡꠣꠄ ꠉꠥꠍꠣ ꠇꠞꠤꠀ ꠔꠣꠞꠦ ꠎꠦꠟꠅ ꠢꠣꠞꠣꠁꠟꠣ, ꠔꠣꠘ ꠙꠣꠅꠘꠣ ꠀꠖꠣꠄ ꠅꠀꠞ ꠀꠉ ꠙꠞ꠆ꠎꠘ꠆ꠔ ꠎꠦꠟꠞ ꠎꠟ꠆ꠟꠣꠖ ꠍꠤꠙꠣꠁꠄ ꠔꠣꠞꠦ ꠇꠠꠣꠇꠠꠤ ꠡꠣꠎꠣ ꠖꠤꠟꠣ।
35“ꠑꠤꠇ ꠅꠃ ꠟꠣꠈꠣꠘ, ꠔꠥꠝꠞꠣꠅ ꠎꠥꠖꠤ ꠔꠥꠝꠞꠣꠞ ꠜꠣꠁꠞꠦ ꠖꠤꠟ ꠕꠣꠇꠤ ꠝꠣꠚ ꠇꠞꠤ ꠘꠣ ꠖꠦꠅ, ꠔꠦ ꠀꠝꠣꠞ ꠛꠦꠢꠦꠡ꠆ꠔꠤ ꠛꠣꠚ ꠀꠟ꠆ꠟꠣꠄꠅ ꠔꠥꠝꠞꠣꠞꠦ ꠅꠃꠟꠣ ꠡꠣꠎꠣ ꠖꠤꠛꠣ।”
Actualmente seleccionado:
ꠁꠘ꠆ꠎꠤꠟ ১: ꠝꠕꠤ 18: sylN
Destacar
Compartir
Comparar
Copiar
¿Quieres tener guardados todos tus destacados en todos tus dispositivos? Regístrate o inicia sesión
© Ahle Kitab Society. All rights reserved.