सपन्याह 1
1
1 #
२ राजा 22:1—23:30; २ इतिहास 34:1—35:27 यहूदाको राजा आमोनका छोरा योशियाहको समयमा परमप्रभुले सपन्याहलाई दिनुभएको सन्देश यो हो। (सपन्याह हिजकिया राजाका जनाति, अमर्याहका पनाति, गदल्याहका नाति र कूशीका छोरा थिए।)
परमप्रभुको न्यायको दिन
2परमप्रभुले भन्नुभयो, “पृथ्वीमा भएका सबै थोक म नाश पार्नेछु। 3मानिसहरू, पशुहरू, चरा-चुरुङ्गीहरू र माछाहरू सबै म नाश गर्नेछु। म दुष्टलाई ध्वंस पार्नेछु। मानिस जातिलाई ध्वंस पार्नेछु। कोही बाँच्नेछैन। म परमप्रभुले बोलेको छु।
4“यरूशलेम र सारा यहूदा देशका मानिसहरूलाई म दण्ड दिनेछु। त्यहाँ बाल देवताको पूजा गर्ने विधि रतिभर म बाँकी राख्नेछैनँ र त्यसको मूर्तिको पूजा गर्ने कुनै पूजाहारीको यादसम्म कसैलाई रहनेछैन। 5छानामाथि चढेर घाम, जून र ताराहरू पुज्ने हरेकलाई म नाश गर्नेछु। मलाई पुज्ने र मप्रति भक्तिको शपथसम्म खाइटोपल्ने, तर त्यसपछि चाहिँ मोलेख देवताको नाममा साक्षी राखेर शपथ खानेहरू सबैलाई म नष्ट गर्नेछु। 6मकहाँ फर्केर पनि मलाई नपछ्याउने, मतिर नआउने वा मेरो अगुवाइ नलिनेहरूलाई म नाश गर्नेछु।”
7परमप्रभुको दिन नजिकै आएको छ। यसकारण सार्वभौम परमप्रभुको सामुन्ने चुप लाग। परमप्रभुले एउटा बलिदान तयार गर्नुभएको छ र निम्त्याइएकाहरूलाई चोख्याउनुभएको छ। 8परमप्रभु भन्नुहुन्छ, “त्यस बलिदानको दिन म सबै भारदारहरू, राजकुमारहरू र विदेशी रीतिथिति मान्ने सबैलाई दण्ड दिनेछु। 9देवी-देवता मान्नेहरूले झैँ पूजा गर्ने र आफ्ना मालिकहरूको घर लुटेका धनले भर्नलाई चोरी र हत्या गर्ने सबै मानिसहरूलाई म दण्ड दिनेछु।”
10परमप्रभु भन्नुहुन्छ, “त्यस दिन यरूशलेमको माछा ढोकामा रुवावासी चलेको सुन्नेछौ। सहरको नयाँ टोलमा विलाप गरेको सुनिन्छ र डाँडा-डाँडामा भयानक आवाज सुनिनेछ। 11बजारमा बस्नेहरूचाहिँ विलाप गर्दै रोओ किनभने व्यापारीहरू सबै मरिसकेका हुनेछन्।
12“त्यस बेला हातमा बत्ती लिएर म यरूशलेममा खोजी गर्नेछु। आफैंमा सन्तोष गरी ढुक्क भई बस्ने र मनमा ‘परमप्रभुले असल या खराब केही गर्नुहुन्न’ भन्ने मानिसहरूलाई म दण्ड दिनेछु। 13तिनीहरूका धन-सम्पत्ति लुटिनेछन् र घरहरू भत्काइनेछन्। आफूले बनाएका घरहरूमा तिनीहरूले कहिल्यै बास गर्न पाउनेछैनन्। आफूले लगाएका दाखबारीबाट तिनीहरूले कहिल्यै दाखमद्य पिउन पाउनेछैनन्।”
14परमप्रभुको महान् दिन नजिकै छ, त्यो खुबै नजिक छ र चाँडो-चाँडो आइरहेछ। त्यो दिन अत्यन्तै तिक्त हुनेछ, महावीरपुरुषहरू पनि त्यस दिन जोडसित कराउनेछन्! 15त्यो क्रोधको दिन, दु:ख र सङ्कष्टको दिन, बरबादी र विनाशको दिन, कालो र बादल छाएको दिन हुनेछ। 16त्यो दिनमा तुरहीहरू बज्नेछन्, सुरक्षित सहरहरू र अग्ला किल्लाहरूमाथि आक्रमण गर्ने सेनाले आफ्नो सोर उचाल्नेछ।
17परमप्रभु भन्नुहुन्छ, “म मानिसहरूबीच यस्ता विपत्ति ल्याउनेछु कि तिनीहरूले अन्धाझैँ छाम-छाम छुम-छुम गरी हिँड्नेछन्। तिनीहरूले मेरो विरुद्धमा पाप गरेका छन्। अब तिनीहरूको रगत पानीझैँ खन्याइनेछ र लाशहरू सडेर जमिनमा परिरहनेछन्।”
18परमप्रभुको क्रोध प्रकट भएको दिन तिनीहरूका जम्मै सुन र चाँदीले पनि तिनीहरूलाई बचाउनेछैन। उहाँको क्रोधको आगोले सारा पृथ्वीलाई भस्म पार्नेछ। पृथ्वीका बासिन्दाहरू सबैको उहाँले अचानक अन्त गराउनुहुनेछ।
Actualmente seleccionado:
सपन्याह 1: सरल नेपाली
Destacar
Compartir
Copiar
¿Quieres tener guardados todos tus destacados en todos tus dispositivos? Regístrate o inicia sesión
Simple Nepali Holy Bible © Nepal Bible Society, 2008.