Versículos bíblicos populares de ရှင်လုကာ 3

Compartir

ထောထဲမရော့ခံမှာ ယောဟန်ဟ လူများဂီးဝို ရေနှစ်မြင်ဂလာပြုပေးခဲ့ပီး ကိုယ်တော်ယေရှုဝိုလဲ ရေနှစ်မြင်ဂလာပေးလေရယ်။ ကိုယ်တော်ယေရှု ရေနှစ်မြင်ဂလာ ခံယူပီး ဆုတောနေဝိုခီမှာ ကောကံဟ ဟမ်းလမ်းပွမ့်ရားပီး ဉာဏ်လင်းတော်ဟ ချိုးငှက်သွမ်န ကိုယ်တော်ယေရှုပေါ်ဝို ဆင်းသက်လာလေရယ်။ အဲနော့ ဘုရားရှင်ဟ “သင်ဟ ငါ့ရှစ်ရဝို ငါ့သားတော်ဖြစ်ရယ်။ ငါဟ သင့်ဝို ရားဒိုင်းနှစ်သက်အားရတော်မူရယ်” ဆိုပီး ကောကံဟနေ မိတော်မူခဲ့လေရယ်။

အဲဂျော့ ယောဟန်ဟ သူ့နို့ဝို “ငါဟ လူထုပရိသတ်ဝို ရေနရေနှစ်မြင်ဂလာ ပေးဇာလောမှန်ရယ်၊ အယ်ဘေမဲ့ ငါ့ထက် ပိုပီးကီးမြတ်ဝို သူတစ်ယော့လာပါလိမယ်၊ ငါဟ သူ့ရဲ့ခေနပ်ကြိုးဝို ဖလုပေးဝို့ကိုမှ ထိုက်တန်ရ။ သူဟ နန်းနို့ဝို ဉာဏ်လင်းတော်နရော၊ မီးနရော နှစ်ခြင်းမြင်ဂလာ ပြုပေးလိမယ်။

အဲဂျော့ နန်းနို့ရဲ့ ပြစ်ဒုဇရိုက်ဒွေဝို ကောကောနော်ဒရပီး ဘုရားရှင်ဆီဝို ပလန်လှည့်လာရယ်ဆိုဇာဝို သက်သေပြဝိုနည်းန သက်ရှင်နေထိုင်သင့်ပါရယ်။ ‘နို့ဟ အာဗြဟံရဲ့မျိုးဇစ်ဒွေဖြစ်ရိဂျော့ နို့ဝို ဘုရားရှင်ဟ ပြစ်ပေးမှာမုဝ’ ဆိုပီး ကိုယ့်ကိုယ်ကိုယ် ပြောနေဂေ့န။ ဟဲဖြစ်ရိနူးဆိုဇာဝို နန်းနို့ဝို ငါပြောမယ်။ ဘုရားရှင်ဟ နန်းနို့နေရာမှာ စားထိုးဝို့ အယ်မိုကလော့ခဲဒွေဝို အာဗြဟံရဲ့မျိုးဇစ်ဒွေဖြစ်န ဖန်ဇင်းလိုက်နိုင်ရယ်။

ဘုရားရှင်ဟ သစ်ပမ်ရဲ့မလစ်နားမှာ ကပ်ပဝို ကိုင်ရားဝို လူနတူရယ်။ နန်းနို့ဟ သစ်ပမ်ဒွေမျိုးဘဲ့ဖြစ်ရယ်။ အဲ့ဂျော့ သီးသီးဘဲဝိုပမ်ဒွေဝို ခုလှဲပီး မီးထဲဝို ပစ်ခလလိမယ်။” ဆိုပီး ပြောလေရယ်။

ပရောဖက် ဟေရှာယရဲ့ကျမ်းမှာ ယောဟန်ကြောဝို ရေးသားရားဝိုဇာဟ “တောကန္တာရထဲမှာ ဇုံတယော့ဟ အော်ပြောနေဇာဟ အရှင် ကြွလာဝို့လမ်းဝို ပြင်ဆင်ဂေ့လော့။ သူ့လမ်းဝို ဖြော့တန်းဇေဂေ့လော့။ တော်ဂျား ဂျိုင့်ဝှမ်းဒိုင်းဝို မလေဖို့ပီး တော်ဂူးတော်တန်းဒိုင်းဝို ညီညာအော် မလေညှိဂေ့ပါ။ ကော့နေဝိုလမ်းဒွေဝို ဖြော့စေပီး ကြမ်းတမ်းဝိုလမ်းဒွေဝို ချောမွေ့ပလေပြစ်အော် လုပ်ဂေ့ပါ။ အဲနော့ လူဒွေဂူလုံး ဘုရားရှင်စေလွှတ်တော်မူဝို ကယ်တံရှင်ဝို ဗြင်တွီ့ဂေ့ရလိမယ်” ဆိုပီး ဖြစ်ရယ်။