Versículos bíblicos populares de Matthew 21

နန်းနို့ ဟဲရာဝိုမဆို ယုံကြည်မှုရှေ့ရှေ့န ဆုတောမယ်ဆိုဝါ အဲမိုဇာဝို ရရှေ့ပေလိမယ်။" ဆိုပီး မိတော်မူလေရယ်။

ကိုယ်တော်ဟ သူ့နို့ဝို "နန်းနို့ဟ ယုံကြည်ခြင်းရှေ့ပီး သံသယကင်းမဲ့ရယ်ဆိုဝါ ငါဟ အယ်မိုသဖန်းပမ်ဝို ပြုမျိုး နန်းနို့လဲ လုပ်ဆော်နိုင်ဝို့ပြင် အယ်မိုတော်ဂိုမှ "ရွေ့ရားပြီး ပမ်လယ်ထဲဝို ကလလော့" ဆိုပီး ပြောနဂိုမှ အဲမိုတိုင်းဘဲ့ ဖြစ်လိမယ်။

ကိုယ်တော်ရဲ့ရှေ့ဟနေသွားဝို လူထုပရိသတ်ဒွေန နော့ဟနေလိုက်ဝိုလူထုပရိသတ်ဒွေဟ "ဒါဝိဒ်ရဲ့သားတော်ဝို ချီးမွမ်းတော်မူပေရယ်၊ ဘုရားရှင်ရဲ့နာမတော်အားန ကြွလာတော်မူဝို ကိုယ်တော်ဟ မြင်ဂလာရှေ့ပေရယ်၊ ဘုရားရှင်ရဲ့ဂုဏ်ကျေးဇူးတော်ဒွေဝို ချီးမွမ်းပါရယ်။" ဆိုပီး ကြွေးကြော်ဂေ့လေရယ်။

ကိုယ်တော်ဟ အဲမိုလူဒွေဝို "ငါ့ရဲ့ဗိမာန်တော်ဝို ဝတ်ပြုဆုတောသူဒွေရဲ့ အီတော်ဆိုပီးခေါ်ဂေ့ဘေမဲ့ နန်းနို့ဟ အယ်မိုနေရာဝို ခိုးဒမလဒွေရဲ့ ပုန်းခိုရာနေရာဖြစ် ပြုလုပ်နေပေရယ်" ဆိုပီး မိတော်မူရယ်။

"ဂျေရုဆလင်ဗြို့မှာ ရှေ့ဝိုလူဒွေဝိုပြောလော့၊ "နန်းနို့ရဲ့ဘုရင်ဟ နန်းနို့ဆီကြွလာဇာဝိုကေ့လော့၊ သူဟ ကိုယ့်ကိုကိုယ်နှိခလသူဖြစ်ပြီး မြည်းငယ်ဝိုစီးပီး ကြွရော့လာချေပြီ" ဆိုဝို ဂါးဟ ပလဲ့ဇုံခဲ့လေပြီ" ဆိုပီး မိတော်မူရယ်။

အဲနော့ ကိုယ်တော်ယေရှုဟလည်း "တိုက်ဆော့ဝိုသူဒွေဟ ရေးပါရဆိုပီးထံဝို ပစ်ပယ်ရားဝိုကလော့ဟ ရေးပါဆုံးထော်ချော့ကလော့ဖြစ်လာရယ်။ အဲမို အံ့ဖွယ်မှုဒွေဝို ဘုရားရှင်ဟဖန်ဆင်းတော်မူရယ်" ဆိုဝို ကျမ်းစာဝို နန်းနို့ ဖတ်ဖူးဂေ့ရလော။

အဲဂျော့ နန်းနို့ဝို ငါပြောရမယ်ဆိုဝါ နန်းနို့ဆီဟ ဘုရားရှင်ရဲ့သာသနာတော်ဝို သီးယူပီး ကောမွန်ဝိုသီးပွမ့်ဒွေ ပြုလုပ်နိုင်ဝိုသူဆီဝို အပ်နှင်းတော်မူလိမယ်။