Versículos bíblicos populares de EPESUS 4

Compartir

Kabalikanni, wuah naun maeh atei nelang uweng ahi lelo isa anri sa lain, nelang ipangampun sameh kala Alatalla pada ngampun naun itetei Kristus.

Wuah naun saratang randah atei, maeh lagu-lampah, nelang sabar. Tantarang sinta naun mitah ipangarawah isa anri sa lain.

Amun naun bapaner, ada makai kawan lengan sa murun. Pakai kawan lengan sa mambangun nelang ngami pangarawahen ma ulun lain. Kawan lengan kala yiru sagar nginsing pikaeh ma kawan ulun sa nyanrengeini.

Samawai kawan hanang atei, ngatei anri sangit. Ada lagi wawerei ikakehet lengan nelang nangkurun ngawawarah. Ada lagi naan kaingkam muar atawa kaingkam lain masam yiru.

Amun naun sangit, ada maladar kasangiten yiru ngulah sabab naun badosa. Ada sangit hapus erang anrau, nampan Iblis puang kaiyuh kasampatan.

Daya yiru umpe murunsia uhang anri piduduk pamelum uhang sa rahat natanrusak daya kawan kabahirienni sa ngampi tawang. Wuah atei anri pikiran naun uras nasamau katuluhni. Wuah naun welum yalah murunsia wau sa naulah manyu wangun Alatalla; hanyeyiru anri pidasaran sa mawitu bujur nelang barasis.

Kakali tuu-tuu nampan welum anri damai nampan pibayaan sa naulah daya Roh Alatalla tatap tapalihara.

Hanye sa “ngami kawan pangamian ma murunsia”; mehe naangkatni jari rasul, sa lain jari nabi; sa lain lagi jari pambarita Kabar Maeh yiru, nelang sa lain kamulek naangkatni jari kawan guru anri pamalihara ungkup. Yiti naulahni nampan ulun wat Alatalla katuluhni penu napania nampan tau malayanni Tuhan nelang mambangun tenga Kristus. Anri kala yiru takam katuluh jari isa gana kaparisayaan sa sameh nelang kataruen sa sameh neu Anak Alatalla. Nelang takam jari kawan ulun sa dewasa sa magin lawah magin batambah paruna kala Kristus.

Balalu takam puang jari kawan iya lagi sa guyang-gampah nelang tainsing maaru-maati daya kareh wahai masam pangajaran teka kawan ulun sa puang maeh atei. Here nyantawang ulun makai tipu daya here. Puang budas! Kabalikanni takam harus ngalalea kawan hal sa bujur anri atei sa penu sinta, hampe hawuang katuluh hal takam magin lawah magin paruna kala Kristus, sa jari kapala takam.