Versículos bíblicos populares de Jenasis 49

Compartir

Yu garra jidan bigbala bos, en ola biginini blanga yu garra jidan bigbala bos biyain langa yu du. En ola najalot pipul garra lukbek langa yu, en dei garra lisin langa yu du.

“Josef, yu garra jidan jis laiga wailwan dongki wansaid langa springwoda. Yu garra jidan jis laiga yangwan brambi langa hil kantri. Ola bedfren blanga yu garra kaman garram bo en erro, en dei garra fait langa yu.

Bat yu garra bidim olabat, dumaji yu garra abum stedibala am blanga det bo en erro. God garra gibit yu pawa blanga bidim ola enami blanga yu. Im na det haibala God weya Jeikob bin bulurrum. En dei gulum im Stakmen, dumaji im det bos hu oldei lukaftumbat Isreil. Im na det God weya yu dedi bin bulurrum. En im na garra album yu. Det haibala God garra oldei gudbinji langa yu, en im garra oldei gibit yu reinwoda blanga det gadin blanga yu en springwoda blanga ola buligi blanga yu. En det gadin blanga yu garra growimap loda daga, en yu garra bridimap loda buligi, en yu garra abum bigmob biginini du. Yu garra faindim olkain ting langa hil kantri en langa ston kantri blanga meigim yu gudbinji. Ol detlot gudbala ting na God garra kipgon gibitbat langa yu, dumaji imbin pikimat yu brom ola braja blanga yu.

“Juda, ola braja blanga yu garra pudum gudwan wed blanga yu, en yu garra bidim ola bedfren blanga yu, en yu garra jidan bos langa yu braja olabat du. Yu jis laiga bigbala laiyan weya oldei go en gajim enijing weya im wandim, en afta im gobek langa im kemp blanga abum spel, en nobodi kaman deya blanga hambag langa im.

“Rubin, yu main eldiswan boi, en yu brabli strongbala. Aibin abum yu wen aibin yangmen. En yu brabli haibala, en yu garram mowa pawa langa ola najalot san blanga main. Yubin jidan jis laiga strongwan fladwoda, dumaji yubin meigim bigwan trabul langa main kemp. Yubin silip garram det najawan waif blanga main, en yubin meigim trabul jis laiga fladwoda.