If you would like a copy of this version please contact info@davaraudiobibles.org

Dogri Bible, CC-BY-SA-4.0, Beyond Translation. (Text)
Dogri Audio Bible, CC-BY-SA-4.0, Davar Partners International, Beyond Translation, 2026. (Audio)

Dogri Bible

This work is licensed under Creative Commons Attribution-ShareAlike 4.0 License.

यीशु एस गल उपर पी उंदे कन्ने कानीयें च आखना लगया, “सोर्ग दा राज ओस राजे आला लेखा ऐ, जेस ने अपने पुत्तर दा विहा कराया। ते ओनें अपने नौकरें गी पेजया, के विहा दी धाम आसतै सदे दे लोकें गी धाम गी सदन; पर ओ नेई औना चांदे हे। पी ओसने ओर नौकरें गी ए आखीयै पेजया, के सदे दे लोकें गी आखो; दिखो, आऊँ धाम दी रुट्टी गी त्यार करी चुके दा ऐं, मेरे देरण ते पले दे पोरु मारी दित्ते गेदे न, ते सब केश त्यार ऐ; विहा दी धाम च आओ। पर ओ एस गल गी अल्का समझीयै अपने-अपने गी चली गै; कोई अपने खेतर गी, कोई अपने वपार गी। बाकी लोग जेड़े बची गेदे हे ओदे नौकरें गी पकड़ीयै उंदी बेईजती कित्ती ते उनेंगी मारी उड़या। ओस बेलै राजा गी गुस्सा आया, ते ओसने अपनी सैना पेजीयै उनै कत्तल करने आलें गी नाश कित्ता, ते उंदे शैर गी फुकी दित्ता। ओस बेलै ओसने अपने नौकरें गी आखया, विहा दे धाम दी रुट्टी तां त्यार ऐ लेकन सदे दे लोग काबल नेई निकले। एस आसतै चरस्तैं च जाओ ते जिन्नें लोग तुसेंगी मिलघंन, सबनीं गी विहा दे धाम च बलाईयै लेई आओ। खीरी च उनै नौकरें सिड्कें उपर जाईयै के बुरे ते के पले, जिन्नें बी मिले, सबनी गी किट्ठा कित्ता; ते विहा दा कर परौनें कन्ने परोई गीया।
“जेसलै राजा परौनें गी दिखने आसतै पणडार दे अंदर आया, तां ओसने उत्थें एक मनुक्ख गी दिखया, जेस ने विहा आले सेई कपड़े नेई ला दे हे। ओसने उसी पूछ्या, ए मित्तर; तुं विहा आले सेई कपड़े लाए दे बगैर इत्थैं कि आई या? ते ओ मानु चोप्प ओई गीया। ओस बेलै राजे नै नौकरें गी आखया, एस दे अथ्थ पैर बनियै इसी बार न्हेरा च सुट्टी दियो, उत्थें रोना ते दंद केलढ़नां ओग। किके बलाए दे तां मते न पर चुने दे थुड़े न।”

ओस बेलै फरीसियें जाईयै अप्पुं बिचें वचार कित्ता के उसी केस चाली गल्लें च फसाचै। खीरी च उनै अपने चेलें गी हेरोदियें कन्ने ओदे कोल ए आखने गी पेजया, “ए गुरु, असेंगी पता ऐ के तुं सच्चा ऐ, ते परमेसर दा रस्ता सच्चाई कन्ने सखाना ऐं, ते कुसे दी परवाह नेई करदा, किके तुं मनुक्ख दा मुंह दिखियै गल्लां नेई करदा। एसकरी असेंगी दस्स तुं के सोचना ऐं? कैसर गी चुंगी देना मनासव ऐ यां नेई।” यीशु ने उंदी बराई समझीयै आखया, “ए कपटीयों, मिगी कि परखा करदे ओ? चुंगी देने आला सिक्का मिगी दस्सो।” ओस बेलै ओ ओदे कोल एक दीनार लेई आए। ओसने उनेंगी पूछ्या, “ए शक्ल जेड़ी एदे उपर ऐ ते ए नां केस दा ऐ?” उनै उसी आखया, “कैसर दा।” ओस बेलै ओसने उंदे कन्ने आखया, “जेड़ा कैसर दा ऐ, ओ कैसर गी; ते जेड़ा परमेसर दा ऐ, ओ परमेसर गी दियो।” ऐ सुनीयै उनै रांनगी कित्ती, ते उसी छुड़ीयै चली गै।

उसै देन सदूकी जेड़े आखदे न के मरें दें लोकें जिंदा ओना गै नेईयैं, ओ ओदे कोल आए ते उसी पूछ्या, “ए गुरु मूसा ने गलाया हा के जे कोई बगैर औलाद दे मरी जा, तां ओसदा प्रा ओदी करेआली कन्ने विहा करियै अपने प्रा आसतै बच्चे पैदा करै। अच्छा ऊन साड़े इत्त्थैं सत प्रा हे। पैला प्रा विहा करियै मरी गीया, ते औलाद नेई ओनें दे कारन अपनी करेआली गी अपने प्रा आसतै शुड़ी गीया। इसै चाली दुए ते त्रिये बी इयै कित्ता, ते सत्तें प्राऊ तकर इयै नियां ओंदा रिया। सबनी मरनें कोलां बाद ओ जनांनी बी मरी गेई। खीरी च दवारै जिंदे ओनें उपर ओ उनै सत्तें प्राऊ बिचा केड़े प्रा दी करेआली बनग? किके ओ सबनी दी करेआली बनी चुकी दी ही।” यीशु ने उनेंगी जबाब दित्ता, “तोस पवित्र शास्त्र ते परमेसर दी शक्ति गी नेई जांनदे; एस कारन पोल च पेदे ओ। किके दवारा जिंदा ओनें उपर विहा-शादी नेई ओनी ते पर ओ सोर्ग बेच परमेसर दे दूतें आला लेखा ओगन। लेकन मरे दे जिंदे ओनें दे बारै च के तुसैं ए वचन नेई पढ़या जेड़ा परमेसर थुआड़े कन्ने आखया हां; आऊँ अब्राहम दा परमेसर, ते इसहाक दा परमेसर, ते याकूब दा परमेसर ऐं? ओ मरें दा नेई, लेकन जिंदे दा परमेसर ऐ।” ए गल्ल सुनीयै लोक ओदी शिखया थमां रांन ओई गै।

जेसलै फरीसियें सुनया के यीशु ने सदूकियें दे मुंह गी बंद करी दित्ता, तां ओ बी किट्ठे ओए। उंदे बिचा एक ने जेड़ा कनून दा उस्ताद हा उसी उसी परखने आसतै यीशु गी पूछ्या, “ए गुरु, कनून बेच केडा उक्म बड़ा ऐ?” ओसने उसी आखया, “तुं परमेसर अपने प्रभु कन्ने अपने सारे मन ते अपने सारे प्राण ते अपनी सारी अक्ल दे कन्ने प्यार रख। बड़ा ते पैला उक्म तां इयै गै। ते ओदे आला लेखा ए दुवा बी ऐ के तुं अपने गुआंडी कन्ने अपने आला लेखा प्यार रख। इयै गै दाऊँ उक्म सारे कनून ते पविखवक्तें दी बुनयाद ऐ।”

जेसलै फरीसी किट्ठे हे, तां यीशु ने उनेंगी पूछ्या, “मसीह दे बारै च तोस के समझदे ओ? ओ कोदी औलाद ऐ? उनै ओस कन्ने आखया, दाऊद दी। ओसने उनै गी पूछ्या तां पी दाऊद आत्मा च ओईयै उसी प्रभु कि आखदा ऐ? प्रभु ने, मेरे प्रभु कन्ने आखया, मेरे सज्जे पासे बौ, जेलै तकर के आऊँ तेरे बैरीयें गी तेरे पैरें दे तलें दी चौकी नेई बनाई दें। पला, जेलै दाऊद उसी प्रभु आखदा ऐ, तां पी ओ ओदा पुत्तर कियां बनयां?” एस गल दे जबाब बेच कोई बी एक गल्ल नेई बोली सकया। पर ओस देन थमां बाद कुसे गी बी पी उसी पूछने दी इम्त नेई ओई।

Escucha a मत्ती 22