MALIAKI 1
1
1Gitio noyo tanou ru Tuhan ri Maliaki koson posoboyon ra ulun ru Israil.
Togom ru Tuhan ra Israil
2 Indagu Tuhan ra ulun Nano, “Magail Aku motogom ramuyun.”
Kaa' taam ilo, “Ati kulaan Tuhan motogom ramon?”
Taam Tuhan, “I Isau am i Jakub magaka'; motogom Aku ri Jakub am niayuk papag nano, 3kaa' masisang Aku ri Isau am niayuk papag nano. Pinuso Ku noyo intok makabulur longgom ri Isau am nompoloso ra tana' nano ayanin ru bibiag masigo.”
4Amon ru papag ri Isau, iono ulun ru Idom mindagu, “Bandar maino pinuso noyo kaa' baalon mai sagulio',” am Tuhan Ondo' Maayo Kaga' Kuasa' pana tumaam, “Polosoon ilo mambaal raginio saguli', kaa' lunsayon Ku poyo. Ulun manabit risilo ‘Pagun malaat’ am ‘Bansa' ondo' sinangitan ru Tuhan ra sabubuoi no.’ ”
5Bansa' ru Israil makakito galama' ra kasaukan raginio, am mindagu, “Totopot Tuhan makakuasa'; kuasa' Nano saboi giu' ra liwar ru pagun Israil!”
Siminangit Tuhan ra imam-imam
6Mindagu Tuhan Ondo' Maayo Kaga' Kuasa' ra imam-imam, “Sangulun anak mangurumat ra ama' nano am sangulun ulipon mangurumat ra tuan nano. Aku ama' min, kaa' kua kalo mangurumat kau Raki'? Aku tuan min, kaa' kua kalo malaa' kau Raki'? Magasab kau Raki', kaa' mangkuot kau, ‘Atan koson akai nagasab Rirun?’ 7Ralan koson ragitio; Nampataak kau ra akanon ondo' kalo maaya' pataakon giu' ra rasawat ru altar Kuno. Kopongo raginio nangkuot kau, ‘Atan koson akai kalo mangurumat Rirun?’ Mambala' Aku toojo: Nagasab kau ra altar Kuno. 8 Paat ra akau mampataak ra bibiag ondo' bolou, ondo' marualan, kapoam ondo' kimpo' koson ra taak ra tayar Kuno, kalo kia baal raginio makasala? Kinami' pataako' bibiag koson raginio ra gabenor! Maansayan io kia ramuyun, am pamakuan ramuyun moonsoi kia?”
9Raino, akau imam-imam, kinami' makitaak maa' raginio makaasi' i Aki Kapuuno' ritakau. Kalo mangiou Io ra pakiasian min, am baal raginio kasalaan min galama'. 10Mindagu Tuhan Ondo' Maayo Kaga' Kuasa', “Moonsoi poyo sangulun intor ramuyun paangabin kulobon ru Baloi Kuno, sabap ra kolondo' onong min mampaang ra apui giu' ra rasawat ru altar Kuno. Kalo maansayan Aku ramuyun am marara' mangapu ra taak min. 11Urumaton Aku ru bansa'-bansa' ra titikop ru tana' ti. Solobon nilo kaminyan giu' ra ngaangai' intok koson mangurumat Raki', am mampataak ilo ra taak simbalui ondo' maaya' pataakon. Ilo ngaangai' mangurumat Raki'! 12Kaa' akau nagasab Raki' sabap ra minindagu ra altar Kuno kolondo' onong, am nampataak kau ra akanon ondo' kararain min giu' ra rasawat ru altar no. 13Kamin, ‘Nasuraan akai no ra ngaangai' ti’, am nagasab kau Raki'. Nagibit kau ra bibiag ondo' tinakou, ondo' kimpo', kapoam ondo' marualan koson pataakon raki'. Indoson min kia apuon Ku taak raginio? 14Kaulas noyo ulun mamparuung ondo' nampataak ra bibiag ondo' kolondo' onong Raki', kaa' mokoondo' io ra bibiag ondo' moonsoi ra ngaangai' ru bibiag tinambiag nano ondo' binantu' nano Raki'; Aku noyo Raja' ondo' maayo, Tuhan Ondo' Maayo Kaga' Kuasa', am ngaangai' bansa' mangurumat Raki'.”
Currently Selected:
MALIAKI 1: TMT
Highlight
Share
Copy
Want to have your highlights saved across all your devices? Sign up or sign in
Hakcipta © Bible Society of Malaysia, 2013.