JUANIS 6
6
Nampaakan i Jisus ra limo ngaribu ngaulun
(Mat. 14:13-21; Mrk. 6:30-44; Luk. 9:10-17)
1Kopongo ragili, siminandaup i Jisus ra Tasik Galilia, ondo' inggalanin poyo ra tasik Tibirias. 2Masuang ulun saguguluyur minaya' Riso, sabap ra nakakito ilo ra kaimuagan binaal Nano paat ra Io namabas ra ulun marualan. 3Pagaloi boo i Jisus am maamaya' Nano ra bulur am panturung Io ra giu' i. 4Paat ragili maar noyo Pangiantakan ra Paska. 5Pampulolou i Jisus am pakakito ra ulun saguguluyur matong Riso. Ginio ra pangkuot Io ri Pilipus, “Ati nua' pambalian takau ra akanon koson mapaakan ra ngaangai' ulun ti?” (6Minindagu i Jisus koson raginio sabap ra masaga' Io mangkinam ri Pilipus; kaa' Io galama' nakapandai ra atan ondo' saukon No ra maagu no.)
7Taam i Pilipus, “Ruti' ra mokologo ruo ngaatus ruit pirok pana kalo makaukop ra kinasuang ru ulun no, kabalu' pana sanganu ayuk maalap ru moonong ulun.”
8Indagu poyo sangulun maamaya' Nano ra bokon, i Andrias, pinongkotob ri Simon Pitrus, kono, 9“Giti mokoondo' sangulun lalaing ungkuyon ondo' makaruti' barli limo ngampila' am makapapait ruo ngaunor. Kaa' atan onong ru ginio ra susuang ru ulun ti?”
10Indagu i Jisus ra maamaya' Nano, “Susubo' ilo manturung.” Masakot intok ra giu' i, am pantuturung boo ulun masuang am suang ru ungkuyon limo ngaribu ngaulun. 11Alapo' ri Jisus ruti' i, am paringkuanang Io ri Aki Kapuuno' am tatayaro' No ra ulun masuang ondo' nantuturung i. Papait i pana binaal No koson raginii, am ngaangai' ulun i nangakan saboi nangaasug ilo. 12Kaasug ilo ngaangai' raiti, indagu i Jisus ra maamaya' Nano, “Luluro' min ngaangai' suwo no am kalo boo malubat.” 13Ginio ra luluro' boo ru maamaya' Nano, am mokoondo' mopor am ruo ngambakul suang ru suwo nalulur nilai intor ra limo ngampila' ruti' barli ondo' inakan ru ulun masuang no.
14Kakito ayuk ru ulun masuang no kaimuagan sinauk ri Jisus i, konilo, “Totopot Io ti noyo nabi ondo' matong ra tana' ti!” 15Kaa' natutunan noyo ri Jisus ra jajalin nilo Io masauk ra raja', ginio ra inggalur Io risilo am ongoi misasangulun ra kabuluran.
Minugar i Jisus ra rasawat ru timug
(Mat. 14:22-33; Mrk. 6:45-52)
16Paat ra palunggai', tuun maamaya' ri Jisus saguli' ra Tasik Galilia. 17Sakoi ilo ra parau am sindaup ilo ra tasik i mongoi ra pekan Kapirnaum. Kabalu' pana molondom noyo, kaa' lakat ayuk poyo kalio i Jisus minatong risilo. 18Napaat ragili mapuor bagiu' am kinulun pana lumapos. 19Nangkabil maamaya' Nano olo'-olo' limo kilomito noyo galur am kakito nilo i Jisus mugar ra rasawat ru timug. Mininggaar Io ra parau i am nangalaa' ilo kaga'. 20Kaa' indagu i Jisus risilo, “Pai' kau kalaa', Aku noyo gitio!” 21Ginio ra masaga' ilo mampasakoi Riso ra parau i am paat ragili niayuk nakasaboi parau i ra intok sukuan nilai.
Ulun masuang maguyum ri Jisus
22Paat ra suabon, ulun masuang ondo' nombolong ra sandaup ru tasik i, nakatutun ra rondo' ayuk parau ra giu' i. Nakapandai ilo ra minugar maamaya' ri Jisus no siminakoi ra parau i, kaa' kalo minaya' i Jisus risilo. 23Mokoondo' kukula' parau ra bokon intor ra pekan Tibirias minatong am raral mamaar ra intok ru Tuhan minindagu ra paringkuanangan ra ruti' ondo' inakan ru ulun masuang i. 24Kaa' paat ra ulun masuang no nakakito ra kalio i Jisus kapoam maamaya' Nano ra giu' i, sakoi ilo ra parau-parau no am ongoi ra pekan Kapirnaum maguyum ri Jisus.
I Jisus noyo ruti' ondo' mampakaayag
25Katuum ru ulun masuang no i Jisus giu' ra sandaup i, pangkuot ilo Riso, “Mangingila', sanggilan Kou pakasuku' ragiti?”
26Taam i Jisus, “Balain takamin toojo: Maguyum kau Raki', sabap ra pai' ru nakarati' kau ra kaimuagan binaal Kuni, kaa' nakaakan kau noyo ra ruti' i saboi naasug. 27Pai' kano paguyum ra akanon ondo' mataki' malaat. Kaa' paguyum kano ra akanon ondo' tumaan, ioginio mangani' ra kaayagan motopot am mantilayun. Anak ru Ulun noyo mangani' ramuyun ra akanon ragitio, sabap ra i Aki Kapuuno' noyo galama' nangiou Riso.”
28Pangkuot ilo Riso, “Atan maaru' baalon mai koson sumugut toojo ra kasagaan ri Aki Kapuuno'?”
29Indagu i Jisus, “Gitio noyo baalon min koson sumugut ra kasagaan ri Aki Kapuuno'; pangintopot kano Riso ondo' sinusub ri Aki Kapuuno'.”
30Ginio ra pangkuot ilo Riso, “Atan kaimuagan baalon Muno, maa' raginio makapangintopot akai Rirun? Ati kia rondo' baalon Muno? 31 Kinamatuaan maili nangakan ra manna giu' ra intok masiluk. Koson tinulisan ra Buuk Kitab, ‘Nangani' Io risilo ra ruti' intor ra suruga'.’ ”
32Indagu i Jisus risilo, “Balain takamin toojo: Sala' ka i Musa ondo' nangani' ramuyun ra ruti' intor ra suruga'; kaa' i Ama' Kuno ondo' mangani' ramuyun ra ruti' motopot intor ra suruga'. 33Sabap ra ruti' ondo' taakin ri Aki Kapuuno' sotopot no Io ondo' timinuun intor ra suruga' am manaak ra kaayagan motopot ra ulun ru tana' ti.”
34Ginio ra indagu ilo, “Tuan, kasalok no pangani' ramon ra ruti' raginio.”
35Indagu poyo i Jisus risilo, “Aku noyo ruti' ondo' mampakaayag. Osoi ayuk matong Raki', kalo boo maitilan, am osoi ayuk mangintopot Raki', kalo boo paason. 36Nambala' Aku noyo ramuyun, ra nakakito kano Raki', kaa' kalo niayuk mangintopot kau Raki'. 37Moonong ulun ondo' taakin ri Ama' Raki', makaratong Raki'. Kalo inggalarin Ku osoi ayuk pana ondo' matong Raki'. 38Sabap ra Aku ti timinuun intor ra suruga' sala' ka mambaal ra kasagaan Kuno galama', kaa' mambaal ra kasagaan ru Io ondo' nanusub Raki'. 39Gitio noyo kasagaan ru Io ondo' nanusub Raki': kalo matatakan Aku ra sangulun pana intor risilo ngai' ondo' pinataak Raki', kaa' mampakaayag Aku risilo paat ra Orou Pupus. 40Sabap ra gitio noyo kasagaan ri Ama': moonong ulun ondo' makaulig ra Anak Nano am mangintopot Riso, mokoowot ra kaayagan motopot am mantilayun am mampakaayag Aku risilo paat ra Orou Pupus.”
41Ginio ra pasabutok ayuk boo ulun ru Jaudi ri Jisus sabap ra minindagu Io ra, “Aku noyo ruti' ondo' timinuun intor ra suruga'.” 42Indagu ilo, “Io ti i Jisus, anak ri Jusup. Mauligan mai ama' am ina' Nano. Ati kulaan Io makaindagu ra timinuun Io intor ra suruga'?”
43Taam i Jisus risilo, “Pai' kau pambubutok! 44Kolondo' sangulun pana makaratong Raki', amon ru kalo kimaitin io ri Ama' ondo' nanusub Raki' i; am ulun no bayagon Ku paat ra Orou Pupus no. 45 Tinulisan noyo ra Kitab ru Nabi-Nabi, ‘Ngaangai' ulun ilaan ri Aki Kapuuno'.’ Moonong ulun ondo' mangkirongog ri Ama' am migigila' intor Riso matong Raki'. 46Ginio sala' ka aration ra mokoondo' noyo ulun nakakito ri Ama'. Io ondo' intor ri Aki Kapuuno' ayuk nakakito ri Ama'. 47Balain takamin toojo: Osoi ayuk mangintopot, mokoowot io ra kaayagan motopot am mantilayun. 48Aku noyo ruti' ondo' mampakaayag. 49Kinamatuaan mini minatoi niayuk, kabalu' pana nangakan ilo ra manna giu' ra tana' kaagisan. 50Kaa' ruti' ondo' timinuun intor ra suruga' sala' ka koson raginio, osoi ayuk mangakan ra ruti' ti kalo matoi. 51Aku noyo ruti' mampakaayag ondo' timinuun intor ra suruga'. Osoi ayuk mangakan ra ruti' ragitio, maayag io ra mantilayun. Ruti' ra pataakin Kuno, io no inan Kutu, maa' raginio ulun ru tana' ti mokoowot ra kaayagan.”
52Intor ra ragu Nani, mansasangor boo ulun-ulun ru Jaudi ra rondo' am bokon, konilo, “Ati kulaan ulun ti mampaakan ritakau ra inan Nano?”
53Indagu i Jisus risilo, “Balain takamin toojo: Amon ru kalo mangakan kau ra inan ru Anak ru Ulun am manginum ra raraa' Nano, kalo totopot maayag kau. 54Osoi ayuk mangakan ra inan Kutu am manginum ra raraa' Kutu, mokoowot io ra kaayagan motopot am mantilayun am bayagon Ku io paat ra Orou Pupus. 55Sabap ra inan Kutu noyo akanon ra motopot, am raraa' Kutu pana inumon ra motopot. 56Osoi ayuk mangakan ra inan Kutu am manginum ra raraa' Kutu, sumoroi io Raki' am Aku pana sumoroi riso. 57I Ama' ondo' maayag nanusub Raki', am makakaayagan Aku intor Riso. Koson niayuk ra osoi ayuk mangakan ra inan Kutu, makakaayagan io intor Raki'. 58Gitio noyo ruti' ondo' timinuun intor ra suruga'; Io ti sala' ka koson ra ruti' ondo' inakan ru kinamatuaan mini, ondo' minatoi niayuk. Kaa' ulun ondo' mangakan ra ruti' ti maayag ra mantilayun.”
59Ngaangai' ti rinagu ri Jisus ra Io nangila' giu' ra baloi sambayangan giu' ra Kapirnaum.
Ragu ondo' mangani' ra kaayagan motopot am mantilayun
60Korongog nilo ragu ri Jisus ni, masuang intor ra maamaya' Nano minindagu, “Mapagon toojo pangilaan ti. Osoi tumaan mangkirongog raginio?”
61Kapandayi' ri Jisus ra pasabutok maamaya' Nano ra nangilaan Nali, pangkuot Io risilo, “Mampakalawo kia ra guang min nangilaan Kuni? 62Ati poyo kulaan ru makakito kau ra Anak ru Ulun rumuli' ra intor Nali? 63Ambiluo ri Aki Kapuuno' noyo mangani' ra ulun ra kaayagan, kuasa' ru ulun kalo makapambaal raginio. Ragu Kutu intor ra Ambiluo ri Aki Kapuuno' ondo' mampakaayag ramuyun. 64Kaa' mokoondo' niayuk kukula' ngaulun intor ramuyun ondo' kalo mangintopot.” (Natutunan noyo ri Jisus intor ra talimpuun i, osoi kalo mangintopot Riso am osoi mampataak Riso ra pantula' Nano.) 65Indagu Io poyo, “Ginio sabap ra nambala' Aku ramuyun ra kolondo' sangulun pana makaratong Raki' amon ru kalo iowon ru Ama' Kuno.”
66Intor raginii, masuang maamaya' Nano timinuliar am kalo boo maya' ilo Riso. 67Ginio ra pangkuot i Jisus ra mopor am ruo ngaulun maamaya' Nano, “Akau pana, masaga' kau kia mangiruan Raki'?”
68 Taam i Simon Pitrus Riso, “Tuhan, osoi poyo angayan mai? Ragu Muno mangani' ra kaayagan motopot am mantilayun. 69Raino mangintopot akai toojo ra Okou no Matulai ondo' sinusub ri Aki Kapuuno'.”
70Indagu boo i Jisus risilo, “Kabalu' pana Aku noyo nampili' ramuyun mopor am ruo ngaulun ringai', kaa' sangulun intor ramuyun no riwato.” 71I Judas kon Nati, anak ri Simon Iskariot. Sabap ra kabalu' pana io sangulun intor ra mopor am ruo ngaulun maamaya' ri Jisus, kaa' mampataak io ri Jisus ra pantula' Nano ra tauli no.
Currently Selected:
JUANIS 6: TMT
Highlight
Share
Copy
Want to have your highlights saved across all your devices? Sign up or sign in
Hakcipta © Bible Society of Malaysia, 2013.