JUANIS 11
11
Pinatayan ri Lajarus
1-2 Mokoondo' sangulun ungkuyon makainggalan ri Lajarus ondo' marualan. Io ti intor ra pamagunan Bitania am pagaka' io ri Maria am i Marta. I Maria ti noyo ondo' nampabuur ra umau maamis owou ra kalayam ru Tuhan, am piiri' no ra abuk nali. 3Magaka' ra ruandu' ti nampasaboi ra bilin ri Jisus ra; “Tuhan, rangan ra tagamin Muno marualan.”
4Pakaining i Jisus ra bilin i, indagu Io, “Maruol ragitio kalo mangkinibit ra kapatayan; kaa' masauk baal ragitio maa' raginio katulayan ri Aki Kapuuno' am Anak Nano pakitonon.”
5Motogom toojo i Jisus ri Marta, i Maria am i Lajarus. 6Kabalu' pana nokorongog Io ra i Lajarus marualan, siminingon Io soroi ra giu' i buoi karuaan poyo. 7Indagu boo i Jisus ra maamaya' Nano, “Saguli' takau ra Judia.”
8Taam maamaya' Nano, “Mangingila', kalo poyo nabuoi ra bobolon kou raan ra batu ru ulun ru Jaudi am raino rumuli' kou po kia ra giu' i?”
9Indagu i Jisus, “Orou ti matawang mopor am ruo nganjam. Amon ru sasangulun no mugar ra matawang, kalo makasaru io, sabap ra makito no ralan. 10Kaa' amon ru sasangulun no mugar ra molondom, makasaru io, sabap ra kolondo' sinda riso.” 11Kon raginio noyo ragu ri Jisus, am indagu poyo, “I Lajarus rangan takano nombolong, am ongoyon Ku io karato'.”
12Ginio ra indagu maamaya' Nano, “Mangingila', amon ru nombolong i Lajarus, mapali' io ra maagu no.”
13Kaa' ondo' kon ri Jisus ni am minatoi noyo i Lajarus. Kaa' indos nilo, kon Nani, nombolong ayuk toojo i Lajarus. 14Ginio ra pambala' toojo i Jisus risilo, “Minatoi noyo i Lajarus. 15Kaa' naringkuanang Aku niayuk ra kalo nokosoroi ra giu' i, maa' raginio mangintopot kau. Raino ongoi takau ra intok ri Lajarus no.”
16Ginio ra i Tomas, ondo' niayuk sabiton Magapir, minindagu io ra maamaya' ra bokon no, “Ibok, marurumar takau matoi!”
I Jisus noyo kaayagan saguli'
17Pakasaboi i Jisus ra giu' i, ilai' No naapatan noyo i Lajarus linobong. 18Pamagunan Bitania ti olo'-olo' talu kilomito galur intor ra Jirusalim. 19Masuang ulun ru Jaudi minongoi panimayo ri Maria am i Marta sabap ra pinatayan ru pagaka' nilai, i Lajarus.
20Pakaining ayuk i Marta ra nakaratong noyo i Jisus, ongoyo' no umaa', kaa' i Maria soroi ayuk ra baloi. 21Indagu i Marta, “Tuhan, amon ru nokosoroi kou ra giti, maaru' ungkuyon mai kalo matoi. 22Kaa' makapandai aku ra raino ti pana iowon ri Aki Kapuuno' atan ayuk kitaakon Muno Riso.”
23Taam i Jisus, “Pagaka' muno bayagon saguli'.”
24Kon ri Marta, “Iou, makapandai aku i Lajarus bayagon saguli' paat ra ulun namagatoi paluaton ra Orou Pupus.”
25Indagu i Jisus, “Aku noyo mampakaayag ra ulun minatoi am manaak ra kaayagan. Osoi ayuk mangintopot Raki', kabalu' pana matoi ulun no, maayag Io saguli'. 26Ulun ondo' maayag am mangintopot Raki', kalo mantilayun io matoi. Mangintopot kou kia ragitio?”
27Kon ri Marta, “Iou Tuhan, mangintopot aku ra Okou noyo Anak ri Aki Kapuuno', Mamamayag ondo' inaru' noyo matong ra tana' ti.”
Nantangi' i Jisus
28Karagu ri Marta gini, ongoyo' no sinoko' piawo' pongkotob nano i Maria. Kon ri Marta riso, “Sumuku' noyo Mangingila' am mompoongoi Io rirun.” 29Kaining ayuk ri Maria, ingkakat io am pagindibok ongoi uma' ri Jisus. (30Paat ragili kalo poyo nakasuku' Io ra pamagunan no. Lakat Io ayuk poyo soroi ra intok inumaan ri Marta Riso.) 31Ulun-ulun ru Jaudi ondo' namparangan ri Maria ra baloi i, nakakito riso nagindibok miningkakat am ingkual, sunu' ilo boo riso. Indos nilai mongoi io pantangi' ra kalabangan ri Lajarus.
32Pakasuku' io ra intok ri Jisus am kakito no, igulatur io ra saang Nali am indagu, “Tuhan, amon ru nokosoroi Kou ragiti, maaru' ungkuyon mai kalo matoi.”
33Paat ri Jisus nakakito riso nantangi', am niayuk ulun-ulun ru Jaudi ondo' nababaya' riso i nantatangi', mangiluk toojo guang Nali am makaasi' Io. 34Pangkuot Io boo risilo, “Ati kia nampalabangan min riso?”
Taam ilo, “Ibok, ongoyo' takau ilai', Tuhan.”
35Pantangi' boo i Jisus. 36Indagu ulun-ulun ru Jaudi, “Ilai', mumpara' boo togom Nano ri Lajarus!”
37Kaa' kon ru bokon i, “Mamabas Io ra mato ru ulun bolou, kaa' kua pai' No kaalap ra inga' pinatayan ri Lajarus i?”
I Lajarus binayag saguli'
38Mulu' poyo ngiluk ru guang ri Jisus, am ongoi Io boo ra kalabangan. Lobong i rondo' luang batu ondo' inangaban ra batu maayo. 39Indagu i Jisus, “Insiro' min batu no.”
Kaa' i Marta, pagaka' ru minatoi i, timinaam, “Tuhan, maaru' mootong noyo baangkai no, naapatan noyo io linobong.”
40Indagu i Jisus, “Sala' ka kia nambala' Aku no rirun; amon ru mangintopot kou, makakito kou ra kuasa' ri Aki Kapuuno'?” 41Insiro' nilo boo batu i. Pantingaa' boo i Jisus ra limbowon am indagu, “Ama', paringkuanangan Ku Rirun, sabap ra rinongog Mu noyo pakiasian Kuno. 42Nakapandai Aku ra masalok Kou mangkirongog ra pakiasian Kuno. Kaa' rinagu Ku kon raginio, koson giatilo ondo' soroi ragiti mangintopot ra Okou noyo nanusub Raki'.” 43Pakaindagu raginii, golok boo i Jisus ra mosongou, “Lajarus, ingkual!” 44Ingkual boo ulun minatoi i. Kalindu' am kalayam nali lakat ayuk poyo nakulumput ra konoon mapulak am bulos nali pana nakulumput ra konoon. Kon ri Jisus ra ulun-ulun ra giu' no, “Iruo' min konoon no am polosoo' io luminjau.”
Nampapakatan mamatoi ri Jisus
(Mat. 26:1-5; Mrk. 14:1-2; Luk. 22:1-2)
45Masuang ulun ru Jaudi ondo' minatong ra intok ri Maria am nakakito ra nasauk ni, nangintopot ri Jisus. 46Kaa' kukula' ngaulun intor risilo i siminaguli' am pambala' ra ulun ru Parisi ra binaal ri Jisus i. 47Ginio ra ulun ru Parisi am tingganai imam Jaudi miting ra Majlis Ugama. Konilo, “Atan nua' baalon takau? Ilai', masuang kaimuagan binaal ru ulun ti! 48Amon ru polosoon takau ayuk Io, ngaangai' ru ulun mangintopot Riso. Pupus no, tingganai ru pagun Roma mongoi pampalunsai ra Baloi Tuhan takau am mamuso ra ngaangai' bansa' takau.”
49Kaa' sangulun intor risilo i, makainggalan ri Kayapas, io no Tingganai Maayo Imam Jaudi paat ra bilor ragili, minindagu, “Akau ti kolondo' katandaan! 50Kalo kia matutunan min ra moonsoi poyo sangulun suali ayuk matoi intor ra ngaangai' ru bansa' mapuso?” 51Sotopot no rinagu nati kalo sumugut ra pangkaraan nali galama', kaa' koson sangulun Tingganai Maayo Imam Jaudi bilor ragili, nambala' io ra i Jisus ti potoyon koson ra kaatangan ra ulun ru Jaudi. 52Sala' ka kaatangan ra ulun ru Jaudi ayuk, kaa' koson manimung ra ngaangai' anak ri Aki Kapuuno' ondo' nantutuliar.
53Intor orou ragili niayuk tingganai ru ulun ru Jaudi nampapakat mamatoi ri Jisus. 54Ginio ri Jisus kalo boo minintalang ra ulun masuang ra Judia, kaa' minongoi Io ra pekan Ipraim, maar ra tana' kaagisan, am ayan Io am maamaya' Nano ra giu' i.
55Paat ragili Pangiantakan ra Paska mamaar noyo, am masuang ulun intor ra moonong pamagunan minongoi ra Jirusalim. Maya' ilo ra kaulayan pambaguan ra kalo poyo masaboi pangiantakan no. 56Naguyum ilo ri Jisus, am paat ra ilo timinimung giu' ra Baloi Tuhan i, nangkukuot ilo ra rondo' am bokon, “Atan guang muno? Matong Io nua' ra pangiantakan ti?” 57Sabap ra mokoondo' noyo susuban intor ra tingganai imam am ulun-ulun ru Parisi, ra osoi ayuk makapandai ra ati i Jisus, musiti' mambala' maa' raginio marakop nilo Io.
Currently Selected:
JUANIS 11: TMT
Highlight
Share
Copy
Want to have your highlights saved across all your devices? Sign up or sign in
Hakcipta © Bible Society of Malaysia, 2013.