KAINGKUALAN 1
1
Inimbolo' ulun ru Israil giu' ra Misir
1 I Jakub ondo' niayuk ininggalanan ri Israil, minongoi ra Misir nababaya' ra anak-anak nano am sasambaloi ru sigagama'. Anak ri Jakub iono 2i Rubin, Simion, Liwi, Jiuda, 3Isakar, Jibulon, Binjamin, 4Dan, Naptali, Gad am i Asyir. 5Ngaangai' suang ru papag ri Jakub tulu' ngoopor ngaulun. I Jusup anak ri Jakub nokosoroi noyo giu' ra Misir. 6Buoi kabuoi i Jusup am pinongkotob nano minatoi, am koson niayuk ra ngaangai' ulun ondo' santuu' riso. 7 Kaa' papag nilo iono ulun ru Israil, makaanak ra masuang. Siminuang ilo kaga' am suang nilo giminaai toojo ra mataki' saboi pagun ru Misir natikop nilo.
8 Kopongo raginio sangulun raja' nakabagu ondo' kalo makaulig ri Jusup timinalimpuun mamarinta ra pagun ru Misir. 9Indagu raja' no ra mamagun nano, “Makalalaa' ulun ru Israil ritakau, sabap ra masuang kaga' ilo am maikang poyo intor ritakau. 10 Amon ru makamasauk pangayawan, maaru' lair magamung ilo ra pantula'-pantula' koson manggal ritakau am magiru' manatang ra pagun ti. Musiti' takau maguyum ra ralan koson suang nilono kalo boo rumuang.” 11Ginio ra pangalap ulun ru Misir ra kukula' ngaulun tingganai ru ulipon koson mangimbolo' ra ulun ru Israil ra kandoi maagat. Jajalin ulun ru Israil mambaal ra bandar Pitom am Ramsis ondo' saukon ra pusor pambulian ra kuliamos tayar ru raja' ru Misir. 12Kaa' gumaai ingkotog ru ulun ru Misir mangimbolo' ra ulun ru Israil, gumaai poyo suang ru ulun ru Israil am nokopolos ngai' ra titikop ru pagun no, saboi mangalaa' ulun ru Misir risilo. 13Mangimbolo' ulun ru Misir ra ulun ru Israil ra malaat, 14am nangkinibit ra kaayagan nilo naimbolo'. Kalo makaasi', jinajalan ulun ru Israil mangandoi ra maagat giu' ra projek-projek panambalayan am giu' ra umo-umo.
15Panusub boo raja' ru Misir ri Sipra am i Pua, mampaanak ondo' mangindangan ra ruandu' Ibrani maganak. 16Kon ru raja' ru Misir, “Paat ra akau mangindangan ra ruandu' Ibrani maganak, karaa' gitio: Amon ru lalagang ungkuyon, potoyon min io. Amon ru lalagang ruandu', polosoon min io maayag.” 17Kaa' ulun-ulun mampaanak no malaa' ri Aki Kapuuno'. Marara' ilo mambaal ra susuban ru raja', am pinoloso nilo lalagang ungkuyon maayag. 18Piawo' boo ru raja' no ulun mampaanak no am pangkuot, “Kua baalo' min gitio? Kua polosoo' min lalagang ungkuyon maayag?”
19Taam ilo, “Ruandu' ru Ibrani kalo mogondo' ra ruandu' ru Misir; ruandu' ru Ibrani maluoi maganak. Kalo poyo makaratong mampaanak, naanak noyo lalagang.” 20-21Nambarakat i Aki Kapuuno' ra ulun-ulun mampaanak no am nanaak risilo ra papag, sabap ra malaa' ilo ri Aki Kapuuno'. Ulun ru Israil pana riminuang poyo am maikang. 22 Indagu boo raja' ru Misir ra moonong mamagun, “Moonong anak ungkuyon ru ulun ru Ibrani ondo' kakaanak no musiti' patirin ra Sungoi Nil, kaa' ngaangai' anak ruandu' polosoon maayag.”
Currently Selected:
KAINGKUALAN 1: TMT
Highlight
Share
Copy
Want to have your highlights saved across all your devices? Sign up or sign in
Hakcipta © Bible Society of Malaysia, 2013.