ESTER 1
1
Minanggal Andu' raja' Wasti ra susuban ru Raja' Agaswiros
1-2 Giu' ra Susan, pusor bandar ru Pirsia, Raja' Agaswiros namarinta ra 127 wilayah, intor ra India polos ra Itiopia.
3Paat ra bilor katalu ru pamarintaan nano, nambaal Raja' Agaswiros ra bunsag maayo koson ra ngaangai' ru tingganai am pagawai nano. Panglima-panglima ru Pirsia am Midia, am niayuk gabenor-gabenor am pagawai mangaatang intor ra wilayah-wilayah minaya' saang ra bunsag no. 4Buoi onom ngansila' raja' no nampatalang ra kalangkayaan ru istana nano, am kinoonsoi am kinaayo ru pamarintaan nano.
5Kopongo raginio nambaal raja' ra bunsag ra tayar ru ngaangai' mamagun ru pusor bandar, ondo' langkaya' am poyo ondo' musikin. Bunsag no binaal giu' ra taman ru istana raja', am saminggu' buoi no. 6Liliut ru istana binungaan ra tabir intor ra konoon linon makabatik motomou am mapulak, ondo' binangkos ra ribin linon matanggilung ondo' malumis, am pinasangut ra golong-golong pirok ondo' pinatakin ra lugu'-lugu' marmar. Sofa-sofa intor ra mas am pirok giu' ra liliut ru istana, pinabanta' giu' ra rasawat ru sulig ondo' inanian ra marmar mapulak, hablur malia', am kulapa' ru mutiara ondo' manguliat, am batu pirus motomou. 7Inula' ru raja' masuang kaga' wain ondo' pinasulung ralalom ru sangkir-sangkir mas nansalinut batik. 8Wain ondo' ininum ru tambului-tambului kalo inuar. Nangani' raja' ra susuban ra kambo-kambo ru istana maa' raginio magayam ra moonong tambului sumugut ra kasagaan ru sigagama'.
9Liliwa' raginio, giu' ra ralalom ru istana Andu' raja' Wasti niayuk nambaal ra bunsag ra bala ruandu'.
10Paat ra orou katulu' ru bunsag no, nanginum raja' saboi naansukan kaga'. Raja' pana nampiau boo ra tulu' ngaulun ungkuyon sida-sida ondo' nasauk ra kambo nano galama': I Miguman, Bijta, Arbona, Bigta, Abagta, Jitar am i Karkas. 11Nanusub raja' risilo nagibit ra Andu' raja' Wasti riso am nangkaraun ra pamarintaan. Andu' raja' no mantalur kaga' am makaguang raja' mampakito ra kinantalur nano ra tingganai-tingganai am tambului-tambului nano. 12Kaa' paat ra sida-sida no nampasaboi ra susuban ru raja', Andu' raja' Wasti marara' matong. Binaal nano nangkinibit ra raja' siminangit kaga'.
13Mokoondo' raja' ra kaindalaman koson makitaak ra ginuang ru ulun mangapintar intor ra pangkuatan ru undang-undang am kaulayan. Ginio ra piniau ru raja' ulun-ulun maminson riso koson mangkuot ra atan ondo' musiti' baalon ralalom ru baal koson raginio. 14Ulun-ulun maminson ra raja' ondo' masalok piawon iono i Karsina, Sitar, Admata, Tarsis, Miris, Marsina am i Mimukan. Ilo pagawai ru Pirsia am Midia ondo' masawat kaga' kandoi ralalom ru pamarintaan raginio. 15Kon ru raja' ra tulu' ngaulun maminson no, “Sinusub ku noyo kambo mongoi ra Andu' raja' Wasti nabaya' ra susuban maa' raginio matong io raki', kaa' marara' io. Sumugut ra undang-undang, atan kia musiti' takau baalon riso?”
16Kon ri Mimukan ra raja' am tingganai-tingganai, “Andu' raja' Wasti sala' ka ayuk nagasab noyo rirun, kaa' niayuk ra pagawai-pagawai muno, am poyo ngaangai' ungkuyon ra ralalom ru pamarintaan! 17Sabap ra mokorongog ayuk bala ru ruandu' ra binaal ru Andu' raja' no, moonong ruandu' ra ralalom ru pamarintaan kalo mangurumat ra ralaki nano. Mindagu ilo, ‘Raja' Agaswiros nanusub maa' raginio Andu' raja' Wasti muma', kaa' marara' io matong.’ 18Paat ra andu'-andu' ru pagawai ru raja' Pirsia am Midia nokorongog intor ra paliso ru andu' raja' no, maaru' ilo pana mataki' mambala' ra baal raginio ra ralaki nilo. Kinibit ru ginio, andu' manggal ra susuban ru ralaki am ralaki sumangit ra andu'. 19Ginio ra amon ru mangiou kou raja', ingkualo' rondo' susuban ra Andu' raja' Wasti kalo boo iowon muma' ra raja'. Susuban raginio musiti' saukon ra undang-undang ru Pirsia am Midia maa' raginio kalo lair boo masulang. Mopongo raginio, pataako' intok ru Andu' raja' Wasti ra ruandu' bokon ondo' moonsoi poyo. 20Paat ra makatanou susuban muno giu' ra titikop ru pamarintaan ondo' malangka' ti, am moonong ruandu' mangurumat boo ra ralaki nano, ondo' io langkaya' am poyo musikin.”
21Raja' am pagawai-pagawai nano nangiou ra inatang ri Mimukan no, am raja' pana mataki' nambaal raginio. 22Nangator raja' ra surat susuban ra ngaangai' wilayah giu' ra ralalom ru pamarintaan nano, ralalom ru moonong ragu am tulisan giu' ra wilayah raginio. Susuban no mindagu ra ralalom ru moonong sambaloi, ralaki noyo ondo' musiti' masauk ra tingganai, am ondo' iowon mangani' ra pamatasan.
Currently Selected:
ESTER 1: TMT
Highlight
Share
Copy
Want to have your highlights saved across all your devices? Sign up or sign in
Hakcipta © Bible Society of Malaysia, 2013.