2 JUANIS 1
1
1Okou ina' ondo' pinili' ri Aki Kapuuno' am niayuk akau anak-anak nano. Aku magagalung ra pasimpungan ulun Kristian ondo' topot-topot motogom ramuyun. Sala' ka aku ayuk sangulun kaa' ngaangai' ulun ondo' makaulig ra katapatan motogom ramuyun. 2Katapatan minayan ralalom ru guang takau am tumilayun io sumimpung ritakau ra sabuoi-buoi no.
3Gama' ru Ama' takau, i Aki Kapuuno', am Anak Nano i Jisus Kristus manaak ritakau ra barakat, asi' am pabansayan: Gama' ru ngaangai' ragitio maapu takau ra guang motopot am motogom.
Katapatan am togom
4Ina', naansukan aku kaga' naala' ra mokoondo' intor ra anak-anak muno ondo' kaayagan nilo maya' ra ralan motopot, koson ra nanusuban ri Aki Kapuuno' ritakau. 5 Ginio ra Ina', kimaitin tokou maa' boo raginio motogom takau ra rondo' am bokon. Ondo' tulisin kutu rirun sala' ka susuban nakabagu; susuban ragitio pinataak ritakau intor poyo ra talimpuun i. 6Motogom arati' no maayag sumugut ra susuban ri Aki Kapuuno'. Am susuban ondo' norongog min intor ra talimpuun i, ioginio, musiti' kau masalok motogom ra rondo' am bokon.
7Masuang noyo mamparuung ra ulun ra tikop-tikop ru tana' ti. Ilo ti ulun ondo' kalo mangintopot ra i Jisus Kristus minatong ra tana' ti siminauk ra ulun. Ulun raginio mamparuung am tumula' ri Jisus Kristus. 8Ginio ra ilalai' min! Maa' raginio kalo matatakan kau ra atan ondo' kinandoi maili ramuyun, kaa' makaalap kau ra atan ondo' taakin ri Aki Kapuuno' ramuyun.
9Osoi ondo' kalo gumagaya' ra pangilaan ri Jisus Kristus am tumalansiang ra nangilaan Nano, ulun raginio kalo nakaulig ri Aki Kapuuno' am i Aki Kapuuno' sala' ka io tatangan. Osoi ondo' lumayun ayuk ra nangilaan ri Jisus Kristus, arati' no, i Aki Kapuuno' am niayuk i Jisus Kristus io tatangan. 10Amon ru mokoondo' sasangulun matong ramuyun am kalo mambala' ra pangilaan ri Jisus Kristus, pai' min apuo' ulun no ralalom ru baloi min, am pai' min io tabio'. 11Osoi ondo' mangapu am tumabi' ra ulun ra raitii' ni, arati' no, maya' io ra ulun raginio mambaal ra kalaatan.
Ragu pupus
12Masuang poyo musiti' pabalaan kuno ramuyun. Kaa' guang ku moonsoi sala' ka tulisin ra surat. Malansan mokoongoi aku galama' tuum am makimansunur ramuyun, maa' boo raginio guang takau topot-topot maansukan.
13Posoboyon ku ramuyun kaansayan intor ra anak-anak ru pabukat ruandu' min ondo' niayuk pinili' ri Aki Kapuuno'.
Currently Selected:
2 JUANIS 1: TMT
Highlight
Share
Copy
Want to have your highlights saved across all your devices? Sign up or sign in
Hakcipta © Bible Society of Malaysia, 2013.