Ba-Roma 6
6
Muntu uukamantene a-Kristo uleelede kufwidwa zibi
1 #
Rom 3:5-8
Lino twaambe buti? Sa tucikonzya kukala muzibi kuti luzyalo lukainde kuvula? 2#1 Pet 4:1Ne! swebo tufwidide zibi tukonzya buti kucikala mulinzizyo? 3#Gal 3:27Sa tamuzi kuti toonse nitwakabapatizigwa muli-Jesu Kristo twakabapatizigwa mulufu lwakwe. 4#Kol 2:12; 1 Pet 3:21Aboobo twakazikwa awe mukubapatizigwa kwamulufu, kuti mbuli Kristo mbwaakabusigwa kuzwa kubafu kubulemu bwabawisi, mbubonya obo aswebo tukeende mubuumi bupya, 5#Flp 3:10,11Nkaambo kuti twaba bagumene awe mucikozyano calufu lwakwe, elyo tuzooba awe mububuke bwakwe abwalo. 6#Gal 5:24Nkaambo tulizi kuti muntu wesu mukulukulu wakabambulwa awe aciingano, kuti mubili wazibi ukalobesegwe, tutacibi mubuzike bwazibi, 7#1 Pet 4:1ikuti mufu waangunwidwa mulandu wazibi. 8Pele kuti twakafwa antoomwe a-Kristo, elyo tulasyoma kuti kupona akwalo tulapona awe, 9nkaambo tulizi kuti Kristo mbuli mbwabukide kuzwa kubafu tacifwi limbi pe. Lufu talucili abwami bwanguwe pe, 10#Heb 9:26-28; Gal 2:19; 1 Pet 3:18Nkaambo kufwa wakafwida zibi, ncalumwi luzutu, pele kupona ulaponena Leza. 11#2 Kor 5:15; 1 Pet 2:24Mbubonya obo anywebo amuliyeeye mbuli bafwididwe zibi, pele baumi kuli-Leza muli-Kristo Jesu Mwami wesu. 12#Matl 4:7Nkaambo kaako mutazuminini zibi kuti zibe abwami mumibili yanu yanyama bwakumucitya kuti muzuminine zisusi zyayo. 13#Rom 12:1; Ef 2:5; 5:14Alimwi mutaabili zibi zizo zyanu mbuli zicityo zyakutalulama, pele amulyaabile Leza mbuli bapononona bazwa kubafu, azizo zyanu amuzyaabile Leza mbuli zicityo zyabululami. 14#1 Joh 3:6Nkaambo zibi tazikooba abwami bwandinywe, ikuti tamuli kumi ku-Mulao, muli kumi kuluzyalo.
Banakristo tabacili bazike bazibi, mbazike ba-Kristo
15 #
Rom 5:17,21 Lino nkutyeni? Sa tucite zibi, nkaambo kakuti tatuli kunsi ku-Mulao anukuti tuli kunsi kuluzyalo? Ne! 16#Joh 8:34; 2 Pet 2:19Sa tamuzi kuti umwi aumwi ngumulyaabila kukuswiilila, muli bazike bayooyo ngumuswiilila, nikuba zibi zileta lufu, nikuba luswiililo luleta bululami. 17Pele Leza alumbwe kuti mwakali bazike bazibi pele mwaswiilila camyoyo olo lwiiyo ndumwaabilwa, 18#Joh 8:32nkabela lino mulilubulwidwe kuzibi, mwaba bazike babululami. 19(Ndaamba cabuntu nkaambo kabulelu bwanyama bwanu), Lino mbuli mbumwakaabila busofwi akasampusampu zizo zyanu mbuli bazike bakasampusampu, mbubonya obo sunu amwaabile bululami zizo zyanu, mbuli bazike babusalazi. 20Nkaambo nimwakali bazike bazibi mwakalubuka kubululami. 21#Ezk 16:61,63; Rom 8:6,13Lino kuciindi eco ncilumbonzi ncimwakajisi muzintu ezyo nzimuusila bweeme ciindi casunu? Nkaambo mamanino aazintu ezyo ndufu. 22#1 Pet 1:9Pele sunu mbumulubukide kuzibi akuba bazike ba-Leza, mulijisi cilumbo canu cabusalazi, nkabela mamanino aaco mbuumi butamani. 23#Rom 5:12Nkaambo cakuvola cazibi ndufu, pele caabilo ca-Leza mbuumi butamani bwamuli-Kristo Jesu Mwami wesu.
Currently Selected:
Ba-Roma 6: Ibbaib63
Highlight
Share
Copy
Want to have your highlights saved across all your devices? Sign up or sign in
The Bible in Tonga (Zambia) © United Bible Societies, 1963.