Intembauzyo 139
139
Kumupati wabasikwiimba.
1 #
Jer 12:3; Ciy 2:23 Intembauzyo ya-Davida
Jehova, ulandilingula, ulindizi.
2 #
2 Bam 19:27; Mt 9:4; Joh 2:24 Ulizi kukala kwangu akubuka kwangu,
Ulibwene miyeeyo yangu noli kule.
3Kweenda kwangu akoona kwangu, zyoonse ulazilingula.
Ulizi inzila zyangu zyoonse.
4 #
Heb 4:13
Nkaambo taakwe ijwi lyalulimi lwangu
Ndotezi loko, O Jehova.
5Musule akunembo koonse ulindisinkilide,
Ulindijisi ajanza lyako.
6Luzibo luli boobo lulandigambya;
Ndupati loko, nsilukonzyi.
7Nje kuli kukusia Muuya wako?
Ncijile kuli kusia busyu bwako?
8 #
Tus 15:11
Na ndatanta kujulu, akwalo nkoli.
Na ndayala bulo bwangu kubusangu, akwalo nkoli,
9Na ndauluka amababa kuya kubuzwezuba,
Nanka kuyookala kumagolelo aalwizi lwakumbo,
10Akwalo ijanza lyako lilandeenzya,
Ijanza lyako lyalulyo liyoondijata.
11Na ndaamba kuti, Mudima undivumbe,
Mumuni undizyungulukide usizigwe,
12Ncobeni mudima awalo tuusisi kulinduwe;
Masiku alabalangala mbuli isikati,
Mudima amumuni ncintu comwe kulinduwe.
13Nkaambo nduwe wakabumba zyamumubili wangu,
Nduwe wakandinunganya mwida lyabama.
14Njookulumba nkaambo kakugambya kwakulengwa kwangu.
Milimo yako ilagambya;
Moyo wangu ulizi loko,
15Mubili wangu teewakasiswa kulinduwe,
Nendakapangwa cakusisa,
Nendakalungilizigwa kunsi anyika.
16Meso aako akandibona nkencili insala lila;
Mubbuku lyako zizo zyangu zyoonse kazilembedwe,
Izyakali kucitwa buzuba bumwi abumwi,
Zyoonse kazitana kuboneka,
17Miyeeyo yako ilayandika kulindime, O Leza!
Mweelwe waya mupati loko!
18Na ndibala, minji kwiinda museye.
Na ndasinsimuka, tucili ayebo.
19 #
Is 11:4
Akaka Leza! Sa tookooyoojaya ba sizibi?
Basibulowa bazwe kulindime,
20 #
Job 21:14,15; Jud 1:15 Bantu bakupapila cabuyo,
Basinkondonyoko basampuula izina lyako.
21Sa nsisulide abo bakusula, O Jehova?
Sa nsisesemwi kulibaabo bakubusizya inkondo?
22Ndibasulide alusulo luyoosya.
Ndabaamba kuti mbasinkondoma.
23 #
Job 31:6
Undilingule, O Leza, uzibe moyo wangu,
Undisunke, uzibe miyeeyo yangu,
24 #
Mt 7:14; Joh 14:6 Bona na muli inzila imbi mulindime;
Undeenzye munzila iitamani.
Currently Selected:
Intembauzyo 139: Ibbaib63
Highlight
Share
Copy
Want to have your highlights saved across all your devices? Sign up or sign in
The Bible in Tonga (Zambia) © United Bible Societies, 1963.