Isaya 24
24
Cilengano cakubetekwa kwanyika
1Amubone! Jehova ulagwisizya nyika zintu zyoonse zili mumo, ulaisaala, ulaisandamuna akumwaisya bantu bakede mulinjiyo. 2#Ezk 7:12Lino muntu uyooba mbubonya mbuli mupaizi, muzike uyooba mbubonya mbuli simalelo wakwe, mulanda musimbi uyooba mbubonya mbuli namalelo wakwe, sikuula uyooba mbubonya mbuli sikuulisya, sizikoloto uyooba mbubonya mbuli sikumukolotesya, ayooyo uupegwa impindu uyooba mbubonya mbuli sikumupa impindu. 3Kumaninwa nyika ncobeni yamaninwa zintu, kusaalwa ncobeni ilisaalidwe, nkaambo ndendilyo ijwi Jehova ndyaambide. 4Nyika ilalila, ilapusama. Luwa lulanyana, lulapusama. Bantu balisumpula banyika balanyana. 5#Matl 3:17; Lev 18:25; My 35:33Nyika yasofwaazigwa bantu bakede mumo, nkaambo basotoka mulao, basandula-sandula imbeta akujaya cizuminano citeeli. 6#Lev 26:15; Dt 28:15; Dan 9:11; Mal 2:2Nciceeco lutuko ncilwalida nyika, abantu bakede mulinjiyo balijene mulandu. Nciceeco bantu bakede munyika ncibapiidwa, abantu basyaala mba ee. 7Imbote iilwela ilalila, musaansa wapusama, boonse bakondedwe mumoyo balatongela-tongela. 8Kuyobeka kwanyeele kwamana, kuyobayoba kwabaabo basekelela kwaleka, kuyobeka kwakantimbwa kwamana. 9Tabakooyoonywa waini cakwiimba pe. Zikola ziyoolula kulibaabo bazinywa. 10Munzi walupyopyongano lwamwayigwa; maanda oonse alijalidwe, taakwe manjililo. 11Mumigwagwa bantu balalilila waini. Lukonde loonse lwabbililwa izuba. Busekelezi bwanyika bwatolwa mubuzike. 12Mumunzi mwasyaala lusaalo buyo, acalo citendele capwayigwa pwa. 13Nkaambo mbuboobu mbukuyooba mukati kanyika akati kabantu. Kuyooba mbuli kutikinisigwa kwamusamu waolifa, ambuli kuvululwakwamasaansa bantu nibamana kale kutebula. 14Lino abo basyaala bayoolizya majwi aabo akoonzomoka. Bayooyobeka kuzwa kulwizi nkaambo kabulemu bwa-Jehova. 15#Mal 1:11; Is 66:19Nkaambo kako amulemeke Jehova inywe nomukede kujwe, anywebo nomuli kunkomwe yalwizi kumbo amulemeke izina lya-Jehova Leza wa-Israyeli.
16 #
Jer 3:20
Kuzwa kumagolelo aanyika twamvwa nyimbo zyakutembaula mululami, Pele mebo ndati, Maawe! Ndanyanyatila! Ndanyanyatila! Basilweeno beena! Ncobeni basilweeno beena! 17#Jer 48:43,44; Am 5:19Kuyoowa amulindi akakole, zyoonse zilimujisi inywe nomukede ansi. 18#Matl 7:11; Int 18:7Lino kufumbwa uucija ijwi lyakuyoowa uyoowida mumulindi, ayooyo uuzwa mumulindi kayoomujata kakole, nkaambo impulunguzyo zyakujulu zyajaluka, nkabela intalisyo zyanyika zyazungaana. 19#Jer 4:23Nyika yamwayigwa loko! Nyika yapwayigwa pwa! Nyika yasunzuluka kasimpe! 20Nyika iyoopampalika mbuli muntu uukoledwe. Iyoozungaana mbuli cilao, Milandu yayo iyooilemena, nkabela iyoowa, tiikooyoobuka limbi.
21 #
Int 76:12
Lino mubuzuba obo Jehova uyookoma makamu aabantu basumpukide bakujulu, abalo bami banyika bali ansi. 22Nkabela bayooyobololwa mbuli baangidwe mbubayobolwedwe muntolongo. Bayoojayilwa muntolongo, elyo amane mazuba manji, bayooswayigwa. 23#Heb 12:22; Ciy 19:4Lino mwezi uyoopilinganizigwa, alyalo izuba liyoofwa insoni, nkaambo Jehova wamakamu uyooendelezya mucilundu ca-Ziyoni amu-Jerusalemu akumeso aabapati bakwe cabulemu.
Currently Selected:
Isaya 24: Ibbaib63
Highlight
Share
Copy
Want to have your highlights saved across all your devices? Sign up or sign in
The Bible in Tonga (Zambia) © United Bible Societies, 1963.