Esita 1
1
Ipobwe lyamwami Ahasuera
1 #
Es 8:9; Dan 6:1 Lino kwakacitika mumazuba aa-Ahasuera oyo wakalela kuzwa ku-India kusikila ku-Etiopiya, zisi zili mwaanda amakumi obile azisanu muzibili, 2#2 Sam 7:1; Dan 4:4; Neh 1:1; Dan 8:2kuti ciindi eco mwami Ahasuera kakede acuuno cabwami bwakwe cakali mu-Susa munzi wamwami, 3#Matl 40:20; Es 2:18; Dan 5:1; Mk 6:21mumwaka watatu wabulelo bwakwe, wakabacitila pobwe beendelezi abakamboni bakwe; alimwi basimutwe bankondo zya-Persia a-Media, abaleli abapati bazisi bakaliko. 4Wakabayubunwida lubono lwabwami bwakwe lukankamanisya azyakusama zya bwami zigambya, mazuba manji, mazuba aali mwaanda amakumi aali musanu mwaatatu, 5Akamana mazuba aya mwami wakabacitila pobwe boonse bakali mu-Susa munzi wamwami, bapati abaniini, mazuba aali musanu mwaabili, mulukwakwa lwaŋanda yamwami; 6#Es 7:8; Am 2:8akali masani aanzikidwe aatuba aasiyasiya aangidwe amakole aazisani zituba azisalala kutusale twansiliva akumisemo yabbwe bbotu; zikalilo zyangolida azyansiliva zyakalikede acibuye camabwe aasalala, aatuba, aasiya. 7Bakabanywisya muzinywido zyangolida (kazyaandeene) alimwi akaambo kabwaabi bwamwami waini wakaba ceyo; 8pele, amulao, taakwe wakasungilizigwa kuti anywe, nkaambo mwami wakalaambide kubazike boonse baŋanda yakwe kuti acite mbuli mbwayanda mweenzu woonse. 9Awalo Vasiti namalelo wakabacitila pobwe bakaintu baŋanda yamwami Ahasuera.
Kutaswiilila akusampuka kwa-Vasiti
10Lino kubuzuba bwamusanu mwaabili moyo wamwami kaukondwa akaambo kawaini, wakalailila Mehumani, Bizita, Habona, Bigita, Abagata, Zeta a-Kaaka basiŋanda bali musanu mubabili bakalindilila mwami Ahasuera, 11#Tus 16:9kuti balete Vasiti namalelo kumbele lyakwe kasamide munsini wabwami kuti bantu abasimutwe babone kweebeka kwakwe. Nkaambo wakali kweebeka kukulanga. 12Pele Vasiti wakakaka kuboola basiŋanda nebakaleta ijwi lyamwami. Lino mwami wakakalala kapati, wakapya lunyemo, 13#Jer 10:7; Dan 2:12; 1 Mak 12:32; Is 7:14; Dan 9:24; Mal 3:1; Mt 16:3elyo wakabuzya kubasongo bakezi zilengwa (nkaambo kukosola koonse kwamwami kwakali koombololwa abasimulao abasilubeta). 14#Ezr 7:14Bali afwaafwi anguwe bakali Kaasena, Seta, Adamata, Taasisi, Meresi, Maasena, a-Memukani beendelezi musanu ababili ba-Persia a-Media, bakazumininwa kuti banjile kumwami akukala munsi lyacuuno cabwami. 15Wakabuzya akaambo ka-Vasiti namalelo kuti ncinzi ncaakeelede kucitilwa akaambo kakutaswiilila kwakwe ijwi lyamwami kulibasiŋanda bakwe. 16Memukani wakavuwa kunembo lyamwami abeendelezi wati, Vasiti takwabisizya mwami alike pele beendelezi boonse abantu bamuzisi zyamwami Ahasuera. 17Nkaambo eci ncacita namalelo ciyakumvwigwa abakaintu boonse, elyo bayakunyansya baalumi babona kuti kwaambwa kuti mwami Ahasuera wakalailila Vasiti namalelo kuti aletwe kumbele lyakwe pele wakaka. 18Buzuba buno, bakaintu babeendelezi ba-Persia a-Media bamvwa amilimo yanamalelo, balaamba cakunyansya atubuko kulibasimutwe boonse bamwami. 19Kuti kazumina mwami, kacituminwa maleya cilaililo cakwe, alimwi kacilembwa mumilao yaba-Persia aba-Media, citakasandulwi, kuti Vasiti atakabooli limbi kunembo lyamwami Ahasuera; mwami kapa cilao cakwe cabwami kuluumbi uumwiinda kubota. 20#Ef 5:22,23; Kol 3:18; 1 Pet 3:1Elyo, mulao wamwami kuti kawiimikidwe akutuminwa maleya mubwami bwakwe boonse (nkaambo mbupati), boonse bakaintu bayoolemeka baalumi babo, bapati abaniini.
21Twaambo otu twabotezya mwami abeendelezi, elyo mwami waka cita mbuli mbwakaamba Memukani; 22#Es 8:9; Ef 5:22-24wakatuma maŋwalo kuzisi zyakwe zyoonse, kucisi cimwi acimwi mbuli kulemba kwaco akumukowa woonse mululimi lwawo, kalailila kuti mwaalumi woonse alele muŋanda yakwe akupa milazyo mbuli mbwayanda.
Currently Selected:
Esita 1: Ibbaib63
Highlight
Share
Copy
Want to have your highlights saved across all your devices? Sign up or sign in
The Bible in Tonga (Zambia) © United Bible Societies, 1963.